[偽鐵膠佛誕出遊] 長氣多圖 白銀袖湊進擊九州之旅

間章 ー 九 州 大 都 會
(Day 3 後半)

16:00 九州大都會

瘋狂獨遊部分暫告一段落
今次來福岡機場唔係要搭飛機
而係順便接埋frd
(其實本身無呢個打算，不過因為SL人吉改左行程先有空檔)

福岡空港國際線規模其實唔係咁大
幾乎都係亞洲航點，而且至少一半係去泡菜國
因為福岡距離首爾既距離仲短過東京好多
釜山更唔洗講，對果度既人來講落九州等同過大海

朋友搭因航過來，拿埋行李都係半個鐘內就出到來
咁事不宜遲就去check in喇

福岡空港出市區首選當然係搭的士
距離市中心咁近



結果都等左兩三個字先上到車


中途路過博多一双分店


兩三個字就來到今日既目的地喇！
呢個價錢連一程Skyliner都搭唔到！

日本的士可以碌卡同埋各式各樣既app
香港既的士真係好古板

16:30 九州大都會


今晚既住宿就係連登仔最鍾意既Dormy Inn~~
天然温泉袖湊の湯 Dormy Inn PREMIUM 博多運河城前

「袖湊」呢個名幾乎不可考，福岡市既wiki有略略講過
南宋時期，平清盛係博多建立左日本第一個人工港口「袖の湊」
對促進博多對外既交流有好大貢獻
但依家google「袖湊」，結果幾乎都係Dormy Inn
成為左將呢個名字傳承下來既最大功臣

每間有溫泉既Dormy Inn都會改個靚名
唔知大家覺得邊個最優美或者最霸氣呢


今晚既房間兩個幾月之前book，每人7688円




食個Welcome dessert先


開電視睇下，都播緊大谷翔平既精華集錄


星期日5pm既指定動作
當然呢套野已經完結左，機械既野我識條爛鐵，我依家唯一感想係：

Live到，不過訓覺先

17:30 九州大都會


睇完水星的魔女後就慢慢行返去JR博多站
基本上就係一條直路，人來人往，唔會行錯路


我好似都係第一次係呢個方向見到博多站
成個叫做JR博多City，九州最大型購物之城




但我淨係聽到個唔知乜鬼Vtuber係度唱歌


就係呢位係博多City無處不在既官方Vtuber羽形モモ
目前有1930個subscribe


frd會使用北部九州地區周遊劵5日
所以來呢到既目的就係換PASS
點解官方要強調北部九州而唔就咁叫北九州
係因為唔想同小倉所在既北九州市混淆
如果就咁講北九州PASS可能會被誤會成九州最北部既PASS
不過中文使用者幾乎無呢個意識


博多作為九州既玄關口
絕大部分開九州PASS既遊客都係博多搞
所以換PASS建議晏D先換啦，會相對無咁多人

聽到有個香港大媽同人大大聲講經
講到好有經驗，搭過好多觀光列車
不過就話上次搭SL人吉果日太大雨取消左好遺憾
有人問佢劃唔劃呢班9:17分開出既車，佢都話祝你好運


趁frd仲排緊JR PASS我都去排下隊
不過當然係博多站超人氣店 il FORNO del MIGNON
賣牛角包賣到打晒蛇餅果間，只要你去博多站一定會見到
目前老母地方同太鼓城都有分店

值唔值得排見仁見智啦
其實咁多人排其中一個原因就係等車
個包又幾好食，又平，上路前搵野填下肚既最佳選擇
不過始終都係平民野，硬係有人覺得唔值
滿足唔到大魚大肉先開心既人

(但唔知點解，依家東京大阪都有分店，但就唔特別多人排
依乎都係……文化差異？)

不過我買完包個frd都未完
入返去俾住D包佢食下先，雖然好快就食dinner
結果都成大半個鐘先完成

我福岡第一晚 都係住呢間

19:15 九州大都會

博多係美食天堂，一街都係牛腸鍋同埋水煮雞
好似香港周街都雞煲咁

不過唔知點解心血來潮走去食燒肉
但係之前無搵定，所以頭先frd排PASS果陣搵左兩搵
都係睇邊間就腳D同埋高分D


結果都係搵左間運河城附近既
係華盛頓酒店樓下
等左前面一組港女x4之後就到我地


泡菜幾好食


因為無預約所以無得喊course
主要就叫左個特選部位盛合

反正仲有宵夜，食夠過下癮就走了

やきにくのバクロ 博多店 (3.58)
https://tabelog.com/fukuoka/A4001/A400101/40045144/

20:30 九州大都會


燒完肉就係運河附近鳩行下
穿過中洲果堆大搖大擺既無料案內所之後
就見到中洲屋台
不過唔係好食得落野住所以skip啦

好多人排拉麵，亦都係嗚人去一樂食拉麵同cfu吹水果種feel
呢種夜市氣氛係東京大阪唔會有






夜晚既運河城，不過其中一棟已經拆左
咁岩果到播音樂，原來係嘖水表演
但行到去就完左，聽到既係成班講廣東話既人散場


跟住已經返到Dormy Inn
其實係有個地鐵站係正門口
睇落好新，因為真係新
呢個站叫「櫛田神社前」，2023年3月27日開業
打破了七隈線18年來係天神南止步，無法直達博多既限制

22:00 九州大都會

呢到既大浴湯好正
真係溫泉水，浸完成個人精神返晒
最正係浸完有雪條食


最後仲食埋夜鳴拉麵
夜媽媽有人淥麵俾你食就唔好太多要求喇
係滿足既


今日整體無咩實際觀光行程真係唔好意思
起身之後就去坐由布院之森，進擊大分縣！

間章 九 州 大 都 會
完

Day 4 - 07:00


又晨早流流就醒鬼左
咁落樓下食早餐先


早餐當然唔少得地方名物
有得食牛腸鍋，不過食落好肥好漏
但唔見有水煮華味鳥，可能係隔日先有


早餐算好豐富，當然唔少得明太子
夾左好多蘿蔔，要攝取多D野菜
塞爆左個肚，差D食唔晒

Day 4 - 08:30


一晚Dormy Inn就叉爆電
食完早餐就執齊行裝出發喇
唔好漏野！唔返來架喇！

即將展開壯大既第四章
♨️ 挑戰非自駕極限！進擊久大本線溫泉之旅 ♨️

簡介：
總共係三日兩夜既行程，所以會分為上中下三部曲
重量級內容，敬請密切期待

check out後就行返去博多站
唔通搭地鐵咩，你行到去地鐵月台我已經係JR月台
frd有個gip，所以首先搵左個locker鎖左佢
隔兩日返來拿返

略略分享下呢個行程係點樣誕生：

行程三日兩夜唔多唔少都同locker有關
車站既locker通常都可以擺三日兩夜
拿返出來果陣就睇下過左幾多晚就補返錢
不過超過兩晚就會鎖上，要搵職員搞同埋俾附加費，會好麻煩

呢段時間只要有個小背包揹住兩日衫就ok
溫泉旅館無得洗衫，亦都唔適宜拖gip走來走去
plan郊區行程以呢個楔式會好適合休閒旅遊

九州成個台灣咁大唔係細，好多地方可以去
好多人難免會心大心細
不過係無得貪心，地理交通係必須要考慮既因素
今次難得同frd玩，當然會考慮熱門既地方先

而我都未踏足過大分縣，號稱日本第一既溫泉賒
再加上frd好鍾意進擊的巨人，會去埋作者個鄉下
所以好快就拍板以大家最鍾意既由布院之森為主題
係久大本線範圍挑選左兩晚溫泉
一晚就大家好熟悉既由布院
另一晚就會係相對隱世好多，會有截然不同既體驗

呢三日完左之後，我就會返歸先
frd就繼續係九州獨遊
(其實佢本身就打算獨遊，完全唔洗擔心)

第四章 ♨️ 挑戰非自駕極限！進擊久大本線溫泉之旅 ♨️
上篇 進擊由布院之森

概要：如題

09:17 由布院之森


準傭好後就出發了
博多站雖然係九州最大車站
但結構簡單，基本上唔會迷失


各位遊客已經各就各備準備好
迎接大家最鍾意既由布院之森～



到了到了，由布院之森Ⅰ世



愈來愈少見既舊式燈牌

車廂就相對普通，但開揚既設計好方便大家欣賞周圍既風景
全部都係普通車指定席，除左車頭外咩位都無分別
呢程意外地唔點聽到廣東話
主要都係台仔同泡仔，泰仔都有





物販要開車後一段時間先開始
但已經排滿晒乘客


最重要都係記念乘車證，係物販區附近自取
老婆有張Ⅲ世，加埋已經幾乎儲齊晒九州觀光列車既證

Dormy Inn早餐好豐富既關係就無食便當
叫左由布院Milch Krapfen同埋日田天領水綠茶



由布院之森首先會行鹿兒島本線
經過鳥栖後，就去到久留米轉入久大本線
向大分縣進發

久大本線沿途風景優美，有山又有水
但同時佢周圍既河川同埋盆地特性
令其成為九州數一數二多災多難既路線
今年7月豪雨又沖爛左，三個禮拜先整返好 (算快手)
但最誇張都係2017年果次
搞到由布院之森要改行小倉、大分轉返入由布院
全程4個半鐘，果期真係好攞命

篇章標題好中二
想問換JR pass排咗幾耐？

btw樓主又改名

sor自膠睇漏你最後果句

之後會正常返小小

正當高達8成既乘客都係去由布院落車
我地比較另類，係久大本線第一個停車站
日田就落左車



至於由布院之森值唔值得搭呢？
呢個相信係唔少人想知道既
但容我留返去埋由布院之後先一次過解答呢個問題啦


btw唔知點解會係久大本線見到佐世保既Seaside Liner
呢到邊鬼到Seaside 明明係Riverside

10:25 日田天領之地


一出個站門口，就會有D日田天領水噴下噴下招呼你
好涼爽好舒服～

日田已經係大分縣了
人口6萬人，唔算大城市啦
基本上站前，係無人既

大分縣最出名係別府溫泉，但其實成個縣都有好多溫泉鄉
日田亦都唔例外，但規模細好多
人氣當然唔及別府同埋由布院高




可是近年因為一個漫畫作品
令日田呢個小城市出現了地鳴式既改變

待績

當地市民點搭平車?

酒店業務西鐵INN一樣痴線，北海道到沖繩，甚至韓國台灣泰國都有爪牙

西鐵INN岩岩係台北開左新酒店

幾好睇, 樓豬講解都幾詳細

除左D TOPIC名太令人尷尬外

多數都係早特同埋回數劵啦