[偽鐵膠佛誕出遊] 長氣多圖 白銀袖湊進擊九州之旅

果然係地獄行軍

06:40 宮崎早晨


又咁早就醒左，返工返學都無咁勤力
有樣野唔記得講，就係尋晚其實有落去洗衫 (唔重要)


刷牙洗面換個衫執野就落樓下食早餐喇
都係果句，可有可無既早餐係東橫INN既特色之一


食完早餐就攦手check out埋喇
無記錯既話有位巴打既老豆講過
上左年紀既人對東橫INN有種信仰
呢兩日完全明白感受到
尤其當你開始對大城市厭倦了
要去小城市搵地方訓既時候
儘使山窮水盡
東橫INN會係你值得信賴既一個家


徙步10秒鐘就去食多個早餐，麥當勞
食下連登仔吹奏既McGriddles
個口感係幾唔錯
不過食完之後成個人口好乾好燥
有小小唔舒服，都唔係第一次係咁
最大問題應該係杯咖啡
睇來我同老麥相性真係唔好

食完跟住？當然又係趕車啦

又live咗

真，又可以儲下先睇

呢間551次次都勁多人係度排

07:30 追求昇龍之道

本身真係想留係宮崎玩多一日半日
以我瘋狂既行動力去埋鵜戸神宮、飫肥城根本唔成問題

可惜計劃總係跟唔上變化
出發前幾日心血來潮手痕睇下仲有無SL人吉車飛
最後又真係有喎，全國JR PASS個網上預約真係有用
咁無理由唔搭架，依家唔搭以後都唔會有得搭架喇
宮崎剩返既地方唯有有緣再會啦

所以10點半左右就要去到熊本
依家已經7點半

宮崎咁遠，講下宮崎去博多既主要手段先
最痴線：特急日輪喜凱亞 (Nichinin Seagaia)，巴士以外唯一最直接方法 (笑)
不過一日得一班，而且號稱日本最長特急，全程差唔多6個鐘。
本格鐵膠重口味之選 (如果坐一定坐DX Green)
最直接：宮崎有內陸機去福岡，航程只需45-55分鐘。宮崎空港十分方便，有JR直達，一日10往復以上。但機票都唔平，尤其想即日搭就好貴。商務 / JAL Explorer Pass / 早買早享受之選
最經濟：高速巴士「鳳凰號」，要4個幾鐘，除左平好處就係直到天神
窮L / 揸SunQ Pass之選
最暴力：搭特急霧島返鹿兒島中央轉新幹線，視乎timing最快可以3個半鐘搞掂，不過蝕里程亦都蝕錢蝕時間，運賃過萬。揸JR PASS之選


所以我手上有全國PASS
本身就應該要搭到07:14開出既特急返鹿兒島
但係已經成7點半，仲施施然食早餐，即係miss左呢班車

其實係故意既，主要有兩個原因：
1. 真係想訓多陣
2. 唔係咁鍾意走回頭路
(如果唔係miss左志布志班船，呢個會係原本方法)

依家先走去搭巴士去熊本一定趕唔到SL人吉
但好彩，其實仲有一招地元之選！

07:45 第壱式・疾風迅雷


有見宮崎交通如此不便
故此JR九州與宮交、產交三社聯營
提供了一種另類路線方便宮崎住民出城
呢個就係「B&S Miyazaki」，前往熊本縣既新八代駅
接駁九州新幹線前往熊本至新大阪，陸上最強組合！

如果你睇app，加埋都要成萬YEN先去到博多
不過JR當然有套票，基本上唔會有人散買
我係巴士站買飛都俾人叫返去JR綠色窗口買
但講明淨係搭巴士，所以佢先做我生意



勁耐無搭過高速巴士了
JR PASS當然唔包高速巴士，呢程豪左正價4350円

呢班巴士係JR營運，播着同新幹線一模一樣既廣播，超有誠意
(當然字眼有小小唔同)

今日も、JR九州バスをご利用くださいまして、ありがとうございます。このバスは、B&Sみやさき、新八代駅ゆきです。このより、宮交シティ、都城北、小林ｲﾝﾀｰﾁｪﾝｼﾞ、人吉ｲﾝﾀｰﾁｪﾝｼﾞ，終点、新八代駅へと運行してまいります。


係宮交City上埋客後
要走喇宮崎，有緣再會！
宮崎真係一個好地方，靜中帶旺
最緊要係宮崎D女好正


首先會經過都城北


小林IC，之後就會係えびのJCT
從E10宮崎道轉入E3九州道了


大約個半鐘進入熊本縣
人吉IC，依家人吉最出名當然就係SL人吉


巴士入到八代範圍可以見到球磨川
九州第二長既一級河川
其中八代至人吉一段，有條JR肥薩線沿住
但係因為令和2年7月豪雨被害，造成河水氾濫
令到八代至吉松長達87km既區間不通至今
並面臨廢線既命運
加埋武廢之禍，對熊本南部觀光造成嚴重打擊


路線至此與前往博多既「鳳凰號」大致相同
但會係八代IC出口離開

「まもなく、新八代駅前です。
九州新幹線はお乗り換えです。」



10:15 到達新八代！


另一架行走本路線既巴士
甚至設計成個新幹線咁款

10:27 第弐式・昇龍裂破


八代市，人口約12萬，熊本縣第二大城市
最出名係演歌歌手八代亜紀，真係呢到出身
2020年多左個觀光景點
係八代港起左個熊本熊主題公園，應該都值得一去

站前巴士站有幾個香港人係度等車唔知等乜


唔知咩來，太抽象了


進入熊本縣範圍就周街都係熊本熊
因為熊本熊係縣級吉祥物
熊本熊既由來要由2011年九州新幹線開業講起
熊本縣認為自己既知名度唔高
而且熊本係中間既站，好驚被邊緣化
所以就在新幹線開業前一年創造左呢隻吉祥物
至少從結果論來講，熊本熊既設計充滿商業考慮




跟住就接10:27 Sakura上去熊本喇
時間當然係夾好晒，轉車有足夠時間去洗手間


新幹線好快！11分鐘就到左距離八代39km既熊本喇！
雖然鹿兒島本線都唔差35分鐘左右


來到呢度做咩應該唔需要再多講掛


在來線月台已經堆滿準備影SL人吉既龍友喇

10:46 迷失長洲


10:46 坐上了鹿兒島本線前往大牟田．銀水
等等，說好的SL人吉呢？


唔記得講
SL人吉停車站為熊本、玉名、大牟田、久留米、鳥栖
我劃到既指定席劵淨係得玉名 - 大牟田一個區間咁多
因為我真係無聊到逐個區間check下有無
結果呢個就係我唯一執到雞既

咁因為SL人吉係10:58先開始，佢又行得慢
我先搭呢班車就可以係下個站截獲佢


middle of nowhere 大野下有兩位龍友準備影相


唔記得係玉名落車搭過左龍……去緊長洲
再搭落去已經係大牟田，即係張SL人吉又溶左


結果就係長洲緊急下車！
長洲呢個地方，如果有plan過長崎縣既雲仙、島原既話
可能會知，長洲港可以搭船去島原，只需45分鐘就能到達多比良港
另有島原港 - 熊本港路線
大大縮短長崎與熊本之間既距離


唔少地方會作個名堂俾自己
不過咩鬼金魚與鯉魚之鄉丫
我話不如真係同香港個長洲搞合作
引入下平安包等等長洲名物係度賣
搞下展，或者直頭砌返個長洲出來
保證能夠大大提升呢到既觀光價值

樓主賣左自己去長洲
到底最後命運如何呢……？

待續

LM

笑4，啲topic寫得好正

https://www.jrkyushu.co.jp/tabi/bs/
呢個B&S みやざき真係幾方便
bookmark 佢先

又miss

依家JR Pass愈來愈貴
全九都加唔少
加上九州縣民其實係唔會用正價搭車既
識得玩一定比開pass慳到更多

LM

11:49 叫我玉名大帝・SL人吉


賣左自己係長洲
咪拿拿臨返對面月台



無驚無險返到玉名，又跑返去對面月台
架SL人吉已經到左，好彩仲未開出
唔遲唔早，時間岩岩好



俾D蒸氣噴到添
係名符其實既蒸汽火車
呢個係我第二次坐SL，對上一次係東武既大樹


開車了
有似乎是當地住民歡送，好有熱情


一開始當然就係拿記念乘車證啦 (中間果張)
老婆上年就搭左SL人吉 (熊本方向)
話個印同記念乘車證係呢個方向先至有架
感覺自己賺左咁
不過我一諗已經知，「即係另一個方向有第二個印囉」





車內場面相當混亂
有位無人坐，因為都去晒排物販
SL好焗好熱
辛苦晒係度開工招呼成班大帝既姐姐們





好可惜因為列車老化同埋技術難以持續等既問題
JR九州已經宣佈左SL人吉會係2024年退役
自此日本將會再少一個SL觀光列車了

留個名先
個遊記幾好睇

12:25 第参式・神龍剌青


12:22 到大牟田
夏日熱辣辣坐SL有D辛苦
所以坐得一個站都唔係壞事

anyway搭到SL人吉
今日總算是mission complete了


大牟田，意味住已經來到福岡縣喇！
唔好以為佢個名好鄉下就真係好鄉下，人口都過10萬架
唔知點解站牌個九州特色ICON係條神龍，但幾QQ

一見到福岡就諗起拉麵了，我好肚餓喇！
要食麵喇！


落車3分鐘之後紫電一閃已經係另一架車上面
九州最強私鐵立即出發！
搭西鐵・直奔天神！



時間關係
唯有係西鐵上面歡近SL人吉啦，拜拜！


雖然叫做特急，但唔同公司既terminology都唔一樣
而呢個西鐵特急係唔駛加特急錢既

係呀又狠狠地把JR PASS完全無視了

西鐵係日本16間大手私鐵之中唯一係神戶以西的
最為遊客熟識既原因就係可以去到太宰府同埋柳川啦


不過西鐵既範圍唔算大，4條線加埋得72個站
天神大牟田線 大牟田至西鐵福岡已經係成個西鐵最長區間

佢既巴士同埋酒店業務龐大多了
更加係日本巴士大王，擁有2800架巴士，博多一街都係西鐵巴士
酒店業務西鐵INN一樣痴線，北海道到沖繩，甚至韓國台灣泰國都有爪牙



齊頭60分鐘到達西鐵福岡 (天神)！
宮崎博多縱貫完成！Hello 九州大都會！


架車都幾靚



肚餓喇！
要食麵喇！要食麵喇！

14:00 元氣一族 百名店爆發！！


係星期日既天神鳩左一陣後，覺得好無聊
就行去食lunch喇，食麵要緊

上個遊記橫掃西日本就落左博多食博多一双

為全九州僅僅兩間拉麵百名店之一
今次當然要去埋另一間




距離唔算好遠所以行路算，唔想搭地鐵
穿過博多最重要既那珂川就去到吳服町
周圍都無咩人，比起星期日既開源道仲要靜


用左大約5分鐘確認呢到究竟係咪就係目的地
因為招牌都無個，但點睇除左呢到都無咩其他可能


都來到了，鼓起元氣入店
我又包場做左唯一食客
店員俾左張英文menu我睇



都係睇慣呢D，其實就算唔識日文都唔緊要
睇多兩睇自然認得
無小食、無野飲，真係純粹食麵既地方


附上拉麵正確打開方式示意圖


拉麵到了，賣相係0分
竟然係忌廉湯底，好有家庭小店既味道
完全唔係我認知中既博多拉麵


跟住就加佢個重點咖哩汁


完成圖！(間舖好強調要將全部咖哩倒晒落去先叫做完成)
但食落又真係幾特別，幾獨特
係肯定唔會係第二度食到既味道
仲可以加唐辛子上去，好正，但唔算辣

個人覺得唔係D咩必食既野
但絕對唔會令你後悔，因為呢種味道真係呢到先有
不過博多又真係太多好食既拉麵了
如果唔係真係想食既話又唔需要特登來既

15:05 第肆式・龍尾烈腳


食完麵就落去搭地鐵


好似多左個站


好快就來到福岡空港
堪稱全日本距離市中心最接近既機場
呢一點幾乎同清邁一樣



但係國際線要轉連絡巴士
要搭三個字，唔係耐既不過好笨柒

下半部即將展開，將會是截然不同的九州之旅。

断章 SUPER 神龍裂破！九州大縱断
完！

d topic 好尷

今晚暫停