辣椒(已殘)
2017-08-02 02:06:43
「張...三峰,你,多謝。」除左一句多謝,我連應該講咩都唔知道。
我早兩日明明向佢發左一次咁大嘅脾氣,但係結果佢竟然冇怪我,係我有難嘅時間黎左救我,短短一個鐘三個字佢就黎到呢到,證明左佢一聽到我個錄音,就馬不停蹄咁趕過黎,果然係好兄弟...
「唔洗講咁多野,面前呢班人我每一個都唔係第一次見,一班走狗。」佢大為有殺氣咁同我講,然後又另轉面大喝「我兄弟,今日我照硬,邊個敢越過呢條雙白線,我唔保證我會做啲乜。」
佢係我印象中一直沉著、冷靜,從來唔會好似依家咁大喝大叫,有控制唔到自己嘅跡象。
「算啦,啊峰,你走啦,我唔應該拖你落水。」
「收聲,我唔可以再見到咁樣嘅事係我面前發生。」
或者係我已經明白左佢想表達嘅係乜,或者係我最後一條救命稻草,我冇再開聲。
「張三峰,我比面你,可以唔傷害個男嘅,但個女嘅,我地一定要帶走!」
「我張三峰有三不做,一,不傷婦孺,二,不助紂為虐,三,唔會放過傷害我身邊人嘅人,你,你,你同你,你地全部人都犯晒我三條戒律,我唔會退縮。」
「講得好,我地兩兄弟今日有今生無來世,如果真係要收皮嘅,我地黃泉路上再聚頭啦,哈哈哈。」
「屌,敬酒唔飲係都要飲罰酒,機關國組聽命,女嘅活捉,盡量唔可以傷到佢,男嘅,殺無赦。」
呢一日呢一幕係我記憶中永遠咁刻印左落腦海入面,我,背上嘅懿婷,白衣勝雪嘅張三峰,三個人四隻手,對住幾百個有背景有組織有勢力嘅黑衣人,黑之中嘅白,永遠都係最令人著眼。
雖然自呢一日之後我所受嘅磨難會更多,但我唔後悔,因為呢一場戰役,我搵到我最愛嘅女人,我最好嘅兄弟,仲有咩係唔心足?
面前嘅黑衫撚樣二十人為一個陣型,張三峰面對十個,我面對十個,我同佢背對背,懿婷就夾係中間。
我同佢,每人都要打十個。
我同佢,每人都要打十波。
一浪接一浪嘅攻勢,我同佢都帶傷在身,開始有些許招架唔住。
佢一身白衣都慢慢染紅。
「呀飛,睇實啦,我依家就打出太極內功入面比較上乘嘅四兩撥千斤,呢一招同乾坤大挪移有異曲同工之妙,借力打力,但借一力用十力,平時我唔會對你使出黎,但你依家就睇實啦!」
我雙眼望過去,就直接望到張三峰嘅運氣節奏,佢全身經脈好似盡現我眼前咁,呢種...唔係陳四海嘅能力咩?
佢左手畫圓,右手畫方,右邊吸力,左手推拳,對面打出黎嘅真氣,經過左右運動,真係可以以十倍之力打返出黎,一時之間一堆人牆倒下,形成左一條通道。
我地三個人一直向果個方向跑,直到,聽到一個電話鈴聲。
「喂,陳生?...係..係....係,明白....收到...知道。」