我見到湯臣仔果種熱情,我都忍唔住運氣。
「黎啦湯臣仔,你依家就比啲掙扎我睇下。」我嘴角泛起一陣笑意,微微上揚。
「飛哥哥,你看著喔!!」隨住佢童真稚嫩嘅聲線響起,成個空間都暗淡起黎,唯有佢手上果一絲明亮。
幽藍色火苗風中飄搖,除除落係佢手上,然後光火大盛,方圓三十米剎那間都閃現出一朵朵火花。
我體內真氣都一樣慢慢湧出,係我身體附近形成一個渾圓嘅氣場,將所有接近嘅火雲都消空。
而有啲高速被湯臣所控向我襲來嘅冥火乘以速度,就唔係我嘅氣場可以擋得住,我開起天眼,周身空間嘅速度都慢起上黎,我幾個扭身避開左幾朵冥火,然後再瞬速接近湯臣,運起第一式,向湯臣左邊嘅空氣轟埋去,一股莫大嘅穿透力係佢身邊劃過,揚起左大風。
「飛哥哥,你好強喔!」佢笑嘻嘻眼中放光咁望住我。
我摸一摸佢個頭,「傻仔黎嘅,等我出黎再認真同你好好玩啦好無?」
「嗯!」佢甜甜一笑,唔講真係以為佢係小妹妹。
我轉個頭就慢慢步入呢個釀酒窟最深處嘅一個寂靜空間,慢慢盤腿而坐,雷利大叔講過呢到一定唔會有人騷擾,然後我就慢慢沉入左閉關之中嘅冥想。
各種拳式係我腦海中一一劃過,我係一個靈氣匯聚之地練功,除左令我對招式上嘅把握、功力上有進步之外,更加可以貫徹心神,比我用更平靜貼近自然嘅心去感受所有事物。
每一刻我都係到研究到底『天眼』呢種能力係點樣而黎,佢嘅出現令到我好困惑,到底呢一本《七傷拳》係乜野東東?
一直沉醉於練功三日後,我終於明白左呢一種能力嘅來源係啲咩。
「原來只要我,清楚明白對方嘅能力,並對應七情中有強烈反應嘅時候,就會自動拓印人地嘅能力,可惜,呢種咁雞肋嘅能力,得之無用棄之可惜,拓印過就無法再解除,咁就比陳四海個垃圾食左我一個位!屌!」望住雙拳緊握嘅自己,不禁倒抽左一口氣。
跟住落黎四日,我又陷入左深度嘅思考同埋練習當中,突然心有餘悸,由功法嘅深思中醒左。
都練左功唔知幾多日,係時候行出去睇下大家點樣,我要比湯臣仔睇下我依家有咩唔同!要大大力打雷利塊臉!笑我呀拿!
左手推開酒窟嘅門,右手拎住電筒仔,原來已經夜深啦,時間我都唔清楚。
萬籟俱寂之下,唔通個個都訓左?一絲燈光都無,得些許嘅風聲,土地都睇唔清楚添。
腳下一滑,我立即穩左個馬步在先,有少少唔對路?
啲風咁乾燥,點解泥土仲會比較濕,我一觀天象亦唔似落過雨啵。
一開電筒照一照,泥地呈暗紅色,少少濕潤,好怪異。
空氣中一陣陣嘅味道都一樣極怪異,腥味好重。
唯有地上零散地遺留下一絲絲燒唔完嘅幽藍色火苗。