聖經嘅翻譯問題茲事體大，有學者提出，根據希伯來文「YHWH」，「雅威」會比華人慣用譯名「耶和華」更貼切原本讀音。環球聖經公會早前舉行「全球起動 為神譯名」活動，邀請信徒喺「主／上主」、「耶和華」和「雅威（或雅巍）」揀出神嘅中譯。結果顯示，有54%參加者認為，應該用返原本譯名「耶和華」。
本地基督徒網媒《低聲道》就報道咗今次嘅投票。其他選擇有「主／上主」（20%）同「雅威（或雅巍）」（15%），其他建議則佔11%。有關投票有超過1000人參與，主要來自香港（34%）、美國（32%）和加拿大（11%）。
根據公會提供嘅參考資料，現代學者大多認為「耶和華」不是神名字嘅真正讀音，而學術界約定俗成稱神為「雅威」。但缺點係信徒對「雅威」比較陌生，而且廣東話個音都唔係嗰件事。
至於譯做「主」，好處就係無須提個讀音，但喺專稱神嘅一啲經文就呈現唔到個寫法，而且喺新約會好易撈亂神同耶穌。「耶和華」呢個詞雖然唔被現代學者廣泛認同為真正讀音，但都有好處，就係可以反映到同耶穌嘅聯繫。
#廣東話譯名 #廣東話聖經 #耶和華 #雅威 #耶穌 #粵語聖經 #普通話聖經 #環球聖經公會 #低聲道 #港語學
SOURCE: https://gongjyuhok.hk/articles/12225
