【小確幸愛情/微甜】殘酷暗戀物語

第四部曲唔會有喇
至於新故事就隨緣喇，寫完可能要啲時間抽離一下先。
如果可以嘅話，我都想用返呢個世界觀繼續寫其他故事。

期待中 。

希望唔會令你失望

期待

感謝鐵拳巴一直支持
仲有咁多位追緊故嘅巴打絲打
出埋聽日嗰集
正式進入結局篇

13(c). 我們都不是無辜的（下集）

或者，旅行嘅意義並唔係在於參觀咗幾多個名勝，試過幾多道異國佳餚，抑或認識咗幾多新面孔，有時候一趟旅程，簡單到可以只係同自己內心嘅一場坦誠對話，重新確認自己所渴望嘅究竟係咩嘢，當然，冇人可以保證一定會搵到答案。

義遊團只係為期兩個禮拜，我哋主要喺倫敦外郊嘅公園幫手做啲生態保育嘅工作，而呢段時間我同自己講，應該要暫時盡量放低喺香港嘅一切思緒，全情投入咗喺自己嘅義工崗位上面先，同埋享受每晚返到義工營裡面之後，同其他人一齊煮嘢食、傾吓偈、仲會有人玩音樂，其實都幾寫意。

我嘗試去認識唔同背景嘅朋友，佢哋每當有空餘時間就會叫埋我去市區參觀倫敦嘅名勝古跡，有啲男仔又會提議去佢哋鐘意嘅球隊主場朝聖，就算我從未都聽過嗰啲球隊名都好，每次我都會跟埋佢哋一齊去，就當係一次特別嘅體驗。

原來一班人柴娃娃咁周圍玩係幾開心嘅，但係呢種嘅開心感覺上亦都只係停留於過眼雲煙嘅程度，只係好似唔知喺邊度亦都曾經感受過呢種嘅快樂。

我記得當晚離家出走之前，我同佢傾電話嗰陣，仲假扮想早啲瞓覺收咗佢線，其實我只係要趕去機場，直至隔咗大半日我去到倫敦落機之後，電話多咗百幾條未讀訊息，我先知道原來第二日佢見我遲遲冇覆電話，擔心我會唔會又遇到嗰啲唔開心嘅事，佢摷勻晒屋企附近咁多個地方去搵我，都完全唔知道我去咗邊，直至我覆返佢我去咗英國。然後，我再將佢個對話框轉做靜音模式。

喺呢兩個禮拜，佢一直關心我、安慰我，仍然嘗試用唔同方法去引我覆佢，從來冇停止過，但我最多都只係影吓周圍嘅風景俾佢知道我喺邊就算。老實講去到呢刻，理應我一早已經滿足晒我嘅報復心，奈何我得到嘅只有內疚感，本來我應該喺義遊團結束之後就返香港，但係反而我選擇延長多兩個星期去荷蘭同法國，因為我已經唔敢返去面對現實。

倫敦坐夜船去荷蘭只需要一晚時間，喺呢趟船入面，有個亞洲面貌嘅女仔同我共睡一個船艙，佢起初以為我都係日本人，跟住我同佢講其實我喺香港嚟。佢問係咩原因驅使我一個女仔獨遊歐洲，佢以為我係嗰種好勇敢要闖蕩世界嘅女仔，我話我啱啱相反，其實我好懦弱，我係逃避緊一啲嘢先至嚟到呢個地方，然後我同佢傾吓傾吓就慢慢進入咗朦朧狀態。

船到岸時佢輕輕叫醒咗我，佢喺我仲係意識迷糊嘅時候同我講，其實逃避並唔可恥，有時候退後一步都係一種方法去重新確認自己最珍惜嘅係咩嘢。就係咁，我同佢就係碼頭分道揚鑣，去到荷蘭沉澱咗幾日，我先開始認真思考個女仔同我講嘅呢番說話。

嚟到旅程嘅第三個禮拜，我終於鼓起勇氣去重新睇返呢段日子佢send俾我嘅短訊，甚至我碌到最前由一開頭開始睇起。原來最初係我搵佢先嘅，我將中文科默書個範圍send俾佢，我記得事後佢仲同我講返，佢將成篇《出師表》背晒，我笑佢傻瓜，明明只係需要背頭兩段。

之後到我哋困喺儲物室嘅第二日，原本晏晝我哋要出席排球隊加操訓練，但係佢見我成程都冇出現過，佢唔剩止係咁打電話搵我，而且佢仲send咗好多短訊俾我，擔心我係咪唔舒服定係有其他原因，從字裡行間都可以感受到佢當時嗰種嘅關心，絕對唔止係寒暄問候。

校際排球決賽當日朝早，佢話好想我會去睇佢比賽，我突然醒起，嗰日比賽贏咗之後，喺慶祝同合照嗰陣佢不停咁四圍張望，其實應該就係想望我有冇嚟到現場，結果我最終都係令佢失望。

起初我去到英國嘅時候，佢好緊張咁問我點解粒聲唔出走咗去，但係我發現，每次我send相俾佢，佢都幾乎係秒覆返我，而且唔係純粹話「好靚喎」、「呢度邊度嚟㗎」呢啲求其敷衍嘅說話，而係佢每次都會好認真咁叫我唔好掛住影相啊，要小心啲有冇陌生人喺後面跟住我啊，又提我今日呢邊可能會落雨記得帶遮啊諸如此類。

就算我同佢之間相隔咗八個鐘頭嘅時差，就算我張相係咩時候send俾佢，就算呢邊係日頭佢夜晚，我夜晚佢凌晨，佢都依然照樣花時間同心機去覆返我，而偏偏我就喺度逃避緊佢。

當我發現咗呢點之後，原本嬲佢嘅感覺早已經蕩然無存，我開始積極主動去影多啲相俾佢睇，以前可能一日最多只係一張起兩張止，到而家我會盡量去發掘旅程之中得意嘅嘢，甚至只係我生活上細微細著嘅事，都會影底send俾佢分享。只係由唔知幾時開始，我發現佢好似冇再認真咁逐張逐張覆我，有時候會夾埋幾張一齊覆，有時仲會隔咗半日先覆返我…

呢日已經喺旅程嘅第四個禮拜，我喺巴黎市中心街頭散步，就算佢對我冷淡咗都好，我依然繼續努力咁搵可以引起佢興趣嘅嘢影俾佢。忽然間我注意到前面條橋，欄杆掛滿咗成千上萬個七彩繽紛嘅鎖頭，我認得呢條就係巴黎情人橋，世界各地嘅情侶都會慕名而來將愛情鎖掛喺情人橋上，寓意至死不渝嘅愛。

我諗返起去荷蘭嗰趟船個女仔同我講過嗰番說話，於是乎我喺背囊到拎咗本袖珍畫簿出嚟，行到去情人橋中央搵咗個位置坐喺地板上面，望住一對又一對嘅情侶將佢哋嘅承諾緊扣嘅同時，我亦都將自己心裡面覺得最珍貴嘅事物，用鉛筆慢慢一劃一劃咁描繪出嚟。

經過咗四個星期，我諗呢趟旅行嘅意義，已經寄存咗喺呢本袖珍畫簿裡面，我將佢由背囊裡面抽返出嚟，放喺我個斜揹手提包入面，然後掛喺膊頭，帶住佢起程返番去我原本嘅地方。
​​​​​​

《殘酷暗戀物語最終部曲》即將進入結局篇

女主角成長咗好多

唔係鐵拳巴咁講，我都冇發現到，原來不經不覺間佢都開始大個女，已經唔再係中學生

佢由一開始淨係識逃避，到而家識面對已經好勁

又諗起方皓玟首歌，
假使世界原來不像你預期～

幾好睇 一日追到live, 覺得幾有趣嘅位係 第一部全書面語, 第二部就旁白書面語對話口語, 第三部就全口語, 同埋錯字唔算多,唔會令人睇到好辛苦, 亦冇用'既'代替'嘅', '係'代替'喺', 睇得幾舒服。而且3個故串連得唔錯，後面嘅內容有解釋返前面啲伏線。
支持新作者，加油寫埋個結局佢留言係想話畀你知有人睇緊同欣賞你寫嘅文字。

我選擇用三種文體嘅其中原因，係三個主角性格同自身經歷不一，用以區分。

另外因為「係」同「喺」，「既」同「嘅」本身讀音都有明顯分別，所以就算日常使用我都盡量分返開。

寫文過程都學咗唔少以前老師唔會教嘅口語用字，係值得嘅。

最後多謝絲打支持，每次見到有新留言，仲開心過有新寫作靈感（畢竟我仲係年資尚淺）

今晚開始連載結局篇

Lm

Thanks thanks

14(a.) 愛比死更冷（上集）

｛愛比死更冷—周國賢｝


喺巴黎機場臨回程之前，我厚住面皮咁將個航班時間send俾佢，再用錄音短訊同佢講：「我返嚟喇。」，呢次係事隔一個月以嚟，我第一次同返佢講嘢。

而直至電話訊號中斷，我都冇收到佢嘅回覆，我都好明白，佢絕對有理由嬲我。

返到香港之後，我有幻想過佢只係專登扮唔睬我，然後突然出現喺機場，舉住牌仔咁迎接我返嚟，製造一個驚喜俾我。但隨住我從禁區走到接機大堂，冷清清嘅場面令我一切嘅想像落空。

我喺接機大堂隨便搵咗個位置坐低，裙袋裡面嘅電話突然傳來震動，我滿心歡喜咁期待係咪佢搵我，抑或係原來佢匿埋喺遠處偷偷地望住我？

不過，期望都只係換來另一次嘅失望，佢話有啲急事嚟唔切機場，如果我行李太重嘅話，佢叫我可以搵曾皓賢過嚟幫忙拎住先，佢搞掂好件事會喺屋企附近地鐵站接我。

其實我啲行李，都只係得一個旅行背囊再加個斜揹手提包，雖然係重，但至少我都已經帶住佢哋去咗三個國家。我唔知道佢刻意叫我搵曾皓賢去幫係有咩用意，但既然佢咁樣講到，我都會跟佢意思照做。

同時我又喺度諗，就算佢有幾嬲我冇同佢講就消失咗成個月，仲要喺呢段時間對佢愛理不理，陣間只要一見到佢，我就即刻衝埋去攬住佢、嗲吓佢，要先令到佢心軟，再慢慢搵機會同佢道歉。

與此同時，由機場返去屋企嘅嗰程地鐵入面，曾皓賢嘅神態比起我去旅行之前更加曖昧，我同佢分享我喺歐洲所見所聞嘅時候，我感覺上佢望住我，仲多過專心響度聽我講嘢。

終於返到屋企嗰地鐵站，離開車廂之後，我刻意同曾皓賢保持住前後腳嘅距離，無幾耐就見到郭家朗喺前面挨住條柱㩒緊手機。

冇見一排，佢都仲係咁鐘意擺甫士。

我直接將曾皓賢拋離身後，朝住郭家朗個方向衝埋去，成個身撲入佢懷抱之內，呢個時候佢隻手已經搭住咗我條腰，而且仲含情脈脈咁望住我。

當我仲以為身體接觸真係有用之際，原來一切都只係我嘅妄想。我哋離開地鐵站之後，佢一直都冇講過半句說話，冇過問我去旅行嘅任何事。

直到返到我屋企之後，已經係傍晚時份，佢話有啲說話想同我講，講完就會走。

我知道一定唔可以俾佢咁快就走，我話難得屋企今晚冇人，夾硬將佢拉入客廳，要佢試埋我嘅廚藝先准走，因為我想好好咁為我嘅任性向佢道歉，我想同佢講我以後都唔會咁自私，不顧一切咁走咗去。

喺廚房擾攘咗一輪之後，我將兩碟精心泡製嘅忌廉蘑菇意粉擺喺餐枱上面，係我哋兩個最鐘意食嘅味道。當我擺放緊餐具嘅同時，亦都思考緊應該點樣同佢道歉好，但結果俾佢搶先咗。

「其實，我冇嬲你粒聲唔出就去咗歐洲，我知道你一定有某啲原因，先會決定咁樣做。」

我默默咁坐喺佢隔離，耷低頭，凝視住眼前兩碟意粉所散發出嚟嘅蒸氣。

我唔知道佢係咪只係扮唔嬲我，但當我偷偷望咗佢一眼，見到佢真誠嘅眼神，愧疚感一下子注滿我內心，我好想同佢坦白自首點解我會突然間離開。

「見到你返嚟，我好開心，起碼我仲可以喺最後呢幾日見多你一面。」我聽到呢度個心一沉，但已經冇時間俾我思考，因為跟住佢終於揭曉，嗰個埋藏咗喺佢心底好耐嘅秘密。

原來，佢真係要移民，本來其實仲有一個月時間，但係因為臨時改早咗，所以呢三日已經係佢留喺香港最後嘅時光，暑假過後佢就開始喺英國讀書。

自從當日我喺佢屋企見到啲紙皮箱，我就嬲佢一直隱瞞住，唔肯同我講佢要離開我。

我以為自己一早有晒心理準備，但當親耳聽到嘅時候，我個心依然好似俾把刀捅咗入去咁。

「我冇辦法可以同你一齊繼續讀書，達成唔到你嘅心願。」

而佢竟然一直記住我當晚飲醉酒講嘅幼稚說話...

如果，當日唔係我突然間咁走咗去，原本我哋仲有多一個月時間相處，而家我哋只係得返幾日嘅時間，我仲可以點樣補償返俾佢？

我捉住佢隻手，想哄埋去攬住佢。

但佢鬆開咗我隻手...

我只可以強忍住淚水，望住佢嘅臉龐側影。

「身為一個排球隊隊長，照顧隊員嘅職責，嚟到呢度，終於完結喇。」佢展露出一副寬懷嘅笑容，繼續說道：「不過見到你開始識得笑，開始識到新朋友，其實我都冇其他嘢可以再為你做，係咪先？」

佢抬起頭，望住掛喺牆上面嘅時鐘，我視線都不自覺咁跟住佢望上去，然後佢繼續說道。

「頭先喺地鐵站，我故意攬住你，去觀察你best friend嗰表情，跟住我就知道佢鐘意你，人哋可能就係等緊一個同你表白嘅機會。」

「而家我將個機會交俾佢。」

我心裡一酸，連忙捉住佢手解釋：「唔係吖，我同佢只係好朋友嘅關係，唔係你諗嘅咁㗎...」

今次佢冇再捹開我隻手，佢企起身，伸手摸我個頭續道。

「傻瓜，有邊對情侶一出世就喺埋一齊㗎？好朋友都可以培養感情變成情侶㗎啫。」雖然俾佢摸住頭我心裡面有股甜意泛起，但同時都有種酸溜溜嘅感覺交集住。

佢話，當日喺排球隊儲物室門邊，見到我捧住個排球講心事嗰陣，佢曾經對上天許下諾言，只要我能夠幸福快樂，就算要佢犧牲一半壽命換取，佢會毫不猶豫。

或者係因為呢個諾言，當我由黑暗之中嘅最深處，逐步逐步咁爬返上嚟之後，呢個代價亦都同時間慢慢浮現，就係從此，我會喺佢生命中消失得無影無蹤，亦等於將佢生命切割一半。

後來佢諗通，同我分開並唔係佢最大嘅傷痛，佢最怕嘅係，當佢離開咗之後，我會重新跌返入深淵裡面，所以唯有見到另一個男仔可以取替到佢嘅位置，佢先能夠放心，等我喺佢生命中慢慢咁消失。

我忍唔住問返佢：「你將我讓俾另一個男仔照顧，你捨得咩？」

佢以最溫柔嘅聲線對住我講：「你可以搵到一個好好照顧你嘅人，就係我最大嘅心願。」

呢晚，佢並無留低食埋晚飯先走，我竟然一直冇察覺到，原來由始至終佢都係為咗我著想，而內心就獨自承受住咁大嘅痛楚。

喺佢臨離開之前，佢攞起我部手機將兩碟意粉影底再直接send俾曾皓賢，然後帶點調皮，笑咪咪咁將部電話交返俾我。

「嗱，幫你開咗個頭㗎喇，我走喇，以後你要自己加油知唔知？」
​​​​​​​

朗哥
點解可以咁型

係唔係要配合首歌一齊聽?
我要深夜時間一邊食甜品，一邊睇。
等完晒再講感想。

郭嘉遺計（打漏咗個朗字）

我自己有將咁多集嘅歌整合咗個playlist嚟聽，
So far好少邊聽邊睇，或者邊聽邊寫，
但有幾首我會覺得適合睇完篇文之後當片尾曲咁聽。
例如係在空中的這一秒同天空塌下前，
呢兩首我都有刻意放埋youtube link喺篇文度。

不過我覺得歌就好似調味料咁，
可以跟建議食法，
亦都可以按自己喜好隨意添加。

期待你嘅感想

周興哲 你不屬於我

呢排成日聽

呢首歌好有feel