大家好,好耐冇見(其實都無人識我
)。小弟平復左心情幾個月,總算夠膽再入呢個post。
話說我剛剛9月底考強制,但結果衰左
。一路以來練習,唔敢話好完美,但起碼夠合格。而且考試果朝再練習時手車非常暢順,自己都好有信心,tg group 啲師兄師姐話掂硬啦,學牌準備
。
到我考試時,心情係緊張,但都同自己講當練習就得,幾分鐘好快就過。第一個test 開停車 easy job 無難度
,深呼吸一下就開始左轉。當轉完圈預備停入格仔時,突然feel 到部車想傾右,我立即盡力救車,成個身挨左,堂軚好似想俾我拉斷。但部車繼續傾右,愈來愈右,最後「嘭」一聲 - 跌車。
我無跟住部車跌,但成個人呆左企係度,耳仔好勁耳鳴,個腦諗緊係咪發緊夢?考官嗌咪嗌左兩三次 同學有無受傷?我先知原來唔係發夢。我好似平時跌車咁抬起部車,慢慢推去出口。其他師兄識趣讓開,我停好部車企埋一邊等其他人考完。
我一路等一路問自己咩事?我每次練習失敗只係撞雪糕筒,死火等等,一次都未試過咁樣衰法,但偏偏考試時就衰到咁。果輪考試好似次得兩個人衰,果刻覺得自己好瘀正垃圾。
考完試到返到屋企我都唔敢睇訊息,唔敢話俾人知衰左。直到夜晚都係眼光光,唔敢相信係事實。第二日見佢地講其他話題我先敢入去睇,但仍然唔敢出聲,驚俾人問考成點。
下個月第二次考強制,最近練左兩次都正常發揮。但經過今次打擊我已經唔夠膽講掂硬,只係諗點再做好啲。而家每次練習前,我都重温一次當時心情 諗返自己點樣失敗,唔憤氣,諗諗下差啲叫出黎。同自己講唔想再經歷一次就要做好啲,強制都咁,路試咪食得屎?
廢話講完,只係想祝其他巴絲打強制/路試都順利
,失敗嘅滋味睇我段野就夠,唔駛自己去試
。