Leveraged ETF 討論區 (4)

Leveraged ETF介紹
前言
受到全倉TQQQ巴打啟發，今年4月開始留意Leveraged ETF (槓桿ETF)依樣嘢。5月中開咗開咗post講leveraged ETF。
當時TQQQ股價仲係99.15，開第二個post嗰陣係141.79，開第三個post嗰陣係150，而家已經去到170。

由年初至今經歷多次回調，TQQQ, UPRO仍然頻頻破頂、越戰越勇。
同一時間ARKK浮浮沉沉、GME距離高位仲有一大段距離，一眾中概股長跌長有。

依個post會解釋乜嘢係leveraged ETF，同埋TQQQ點解咁勁。想寫嘅嘢非常多，我會分幾日嚟寫，大家可以用「追故模式」嚟睇。置頂會有目錄方便大家搵有興趣嘅topic嚟睇。

之前嘅post：
Leveraged ETF 討論區
https://lih.kg/2518419
Leveraged ETF 討論區 (2)
https://lih.kg/2714659
Leveraged ETF 討論區 (3)
https://lih.kg/2751539

全倉TQQQ巴打嘅文章，我就係受到依篇文啟發：
【數學+歷史分析】 Leveraged ETF 可否長揸？
https://lih.kg/2409324

［勸世］最近龍市多咗人講TQQQ，我想同大家講千祈唔好愈買愈大
https://lih.kg/2760022

乜嘢係Leveraged ETF?
Leveraged ETF (槓桿ETF)係一種高風險嘅投資產品，有機會輸哂大部份本金。
就算係最出名嘅TQQQ，如果喺最高位入市之後遇到科網股爆破可以輸99%，即係輸9成之後先入場都可以再輸9成。遇到金融海嘯可以輸95%，即係1萬蚊本金得返不到6百蚊。（註：TQQQ喺2010年先推出，以上計算係根據模擬結果）
單單係2020年Covid-19一役，TQQQ已經試過跌72.8%。
雖然長揸好多年係有機會升返（都有機會升唔返），不過用輸得起嘅錢去買就好。如果買得太多，有回調嗰陣會容易受唔住壓力。喺大型股災嗰陣好容易輸哂本金。

戴完頭盔入返正題。Leveraged ETF係用複雜嘅衍生工具去放大某種指數或者某種資產(benchmark)嘅每日回報。
例如TQQQ每日嘅回報大約等於Nasdaq 100指數嘅3倍。Nasdaq 100指數升1%，TQQQ就大約升3%；Nasdaq 100指數跌2%，TQQQ就大約跌6%，升幅跌幅都同樣會被放大3倍。

留名

Leveraged ETF有咩種類？
睇一隻Leveraged ETF，首先要睇佢追蹤邊樣嘢，以及佢嘅倍數係幾多倍。
有啲Leveraged ETF追蹤大盤指數，亦都有啲追蹤個別行業。

追蹤Nasdaq 100指數：QLD (2倍) TQQQ (3倍) PSQ (負1倍) QID (負2倍) SQQQ (負3倍)
追蹤S&P 500指數：SSO (2倍) UPRO SPXL (3倍) SPDN (負1倍) SDS (負2倍) SPXU (負3倍)
追蹤恒生指數：7200 (2倍) 7500 (負2倍)
追蹤ICE半導體指數：SOXL (3倍) SOXS (負3倍)
追蹤羅素1000金融服務業指數：FAS (3倍) FAZ (負3倍)
追蹤20年以上美國國債：UBT (2倍), TMF (3倍) TBF (負1倍) TBT (負2倍) TMV, TTT (負3倍)
追蹤羅素2000指數：UWM (2倍) TNA (3倍) RWM (負1倍) TWM (負2倍) TZA (負3倍)
追蹤VIX期貨：UVXY (1.5倍), SVXY (0.5倍)

大家想發挖更多可以喺google search "List of Leveraged ETFs"。
我嘅心得係「少人玩嘅嘢多數係伏」，即係每日成交量比較細、資產規模細嘅嘢，背後總會有啲原因。太偏門嘅嘢最好唔好玩。
TQQQ嘅資產規模大約130億美元，每日成交額幾十億美元，Leveraged ETF之首當之無愧。

上面你會見到Leveraged ETF多數都係2倍或者3倍。
倍數越高風險就會越高，即係3倍會比2倍更高風險。上面提過大型股災嗰陣可以輸9成以上係指3倍ETF。2倍嘅風險細啲，不過喺最高位入市QLD (納指100 2倍)嘅話，遇到科網股爆破都可以輸94%、遇到金融海嘯可以輸超過8成。喺2020年Covid-19一役，QLD都試過由最高位跌55%。雖然都跌得多，不過比3倍ETF已經算好好多。

至於倍數係負嗰啲叫Inverse ETF (反向ETF)，係用嚟做淡嗰陣用嘅。美股氣勢如烈，就算睇淡都唔好做淡，不過下面都會學術討論吓。

雖然我講到Leveraged ETF好恐怖，喺股災嘅時候隨時可以輸哂所有本金咁。但係喺好景嘅時候，佢都可以升得好勁。
由今年年頭開盤到而家，Nasdaq 100同S&P 500指數都係升咗18.4%左右，但係三倍槓桿TQQQ已經升咗54.1%，UPRO已經升咗62.3%。至於兩倍槓桿嘅QLD同SSO都分別升咗36.5%同39.7%。

過去10年，Nasdaq 100指數升咗6.8倍左右，TQQQ升咗差唔多100倍。S&P 500指數升咗2.8倍左右，UPRO升咗差唔多32倍。
如果1985年10月1日嗰陣開始用1萬蚊揸TQQQ ，即使中間經歷過87股災、科網股爆破、金融海嘯，嚟到今日你都會有1400萬。(當年未有TQQQ，以上純粹係模擬結果)

Leveraged ETF嘅複息效應
睇到依度你應該想問：「TQQQ嘅回報點解唔係Nasdaq 100指數嘅三倍左右？點解Nasdaq 100指數升6.8倍，TQQQ唔係升20.4倍而係100倍？」
依度開始會有啲數學，大家可以慢慢細味。如果真係睇唔明，skip咗都無所謂。

因為leveraged ETF係放大追蹤嗰樣嘢嘅「每日回報」，而唔係「每月回報」或者「每年回報」。持有多過一日嘅話，TQQQ嘅回報唔等於Nasdaq 100指數一段時間回報嘅3倍係好正常。
記住：
喺連續上升嘅日子，TQQQ嘅升幅係會多過指數嘅升幅乘3。
喺連續下跌嘅日子，TQQQ嘅跌幅係會少過指數嘅跌幅乘3。

舉個例子：
假設指數本身係100點，同時用本金$100買3倍ETF。
當指數連續十日升3%：
指數 = 100*(1+3%)^10 = 134.39 (+34.39%)
3倍ETF = 100*(1+9%)^10 = 236.74 (+136.74%)
指數升咗34%左右，就咁三倍應該係升34*3=102%左右，但事實上3倍ETF升咗136%左右。

背後原因係compounding effect(複息效應)，簡單嚟講即係「錢滾錢」。一開始舊錢越大，連續滾落去就會越嚟越多錢。
第一日將回報放大咗3倍之後，舊錢就會大咗，用更多嘅錢滾落去筆錢就會越嚟越大。因此喺好景嘅時候，指數連續上升可以帶嚟驚人嘅回報。

當指數連續十日跌3%：
指數：100*(1-3%)^10 = 73.74 (-26.26%)
3倍ETF：100*(1-9%)^10 = 38.94 (-61.06%)
指數跌咗26%左右，3倍ETF「只係」跌咗61%左右，而唔係跌78% (26*3)。

強帖留名

Volatility decay
「凡事有優點都會有缺點，要享受優點就一定要承受缺點。」依個道理係全倉TQQQ巴打教我嘅。
要享受上面提到嘅compounding effect，同時就需要承受接下來提到嘅volatility decay (波動耗損)。

股市唔會只有連續上升或者連續下跌，而係不斷升升跌跌。
喺「先升後跌」或者「先跌後升」嘅日子，就會出現volatility decay
Volatility decay嘅意思係當指數跌完之後升返去原位，Leveraged ETF個價仍然會比原來低。

如果你上網睇其他文章，大部分都會話俾你聽volatility decay好嚴重，股市長期橫盤就會輸錢，所以leveraged ETF唔適合長揸。
等我舉兩個例子講吓volatility decay有幾恐怖，你喺網上搵到嘅例子大概都會係咁。雖然依度比較多數學，但係依樣嘢非常重要，希望大家耐心睇。

例子1：指數某一日大跌20%之後，第二日升返25%。
指數：100*(1-20%)*(1+25%) = 100 (無升無跌)
2倍ETF：100*(1-40%)*(1+50%) = 90 (-10%)
3倍ETF：100*(1-60%)*(1+75%) = 70 (-30%)

指數無升無跌，但係2倍ETF同3倍ETF分別跌咗10%同30% ，依個就係volatility decay。

例子2：指數一日升5%、一日跌5%，不斷重覆200日
指數：100*[(1-5%)*(1+5%)]^100 = 77.86 (-22.14%)
2倍ETF：100*[(1-10%)*(1+10%)]^100 = 36.60 (-63.40%)
3倍ETF：100*[(1-15%)*(1+15%)]^100 = 10.27 (-89.73%)

指數跌咗22%左右，但係2倍ETF同3倍ETF分別跌咗大約63%和90%。跌得仲多過指數嘅2倍同3倍。

不過以上兩個例子純粹虛構。理性嘅讀者應該問吓依種情況喺現實之中出現嘅機會有幾高、出現過幾多次。
以Nasdaq 100指數嚟講，1985年10月1日至今總共9071個交易日入面，單日下跌超過10%只有4日，跌最多嗰次係單日跌15.08%。(1987-10-19：-15.08% 2020-03-16：-12.19% 1987-10-26：-11.69% 2008-09-29：-10.52%)，而單日下跌超過5%只有64日。
以S&P 500指數嚟講，1923年至今單日下跌超過10%只有4日，跌最多嗰次係單日跌20.47%。(1987-10-19：-20.47% 1929-10-28：-12.34% 2020-03-16：-11.98% 1929-10-29：-10.16%)

因此單日大跌20%、一日升5%一日跌5%持續一整年嘅情況係幾乎不可能發生。
以2021年初至今，平均嚟講Nasdaq 100指數每日嘅波幅只係0.86%。

就算一日升0.86%一日跌0.86%持續一整年，TQQQ嘅decay都係大約6.44%，並不算嚴重。
指數：100*[(1-0.86%)*(1+0.86%)]^100 = 99.26 (-0.74%)
3倍ETF：100*[(1-3*0.86%)*(1+3*0.86%)]^100 = 93.56 (-6.44%)

Leveraged ETF唔可以長揸依個觀點，似乎經不起實證考驗。

參考資料：
List of largest daily changes in the S&P 500 Index
https://en.wikipedia.org/wiki/List_of_largest_daily_changes_in_the_S%26P_500_Index

單日大跌34% TQQQ會點？
經常會有人問如果Nasdaq 100指數單日大跌34%，TQQQ將跌幅乘3倍之後會點？

正如上面所講，依種情況係幾乎不可能發生。就算第三次世界大戰爆發都唔會一日內跌咁多。
而且美股有熔斷機制，如果S&P 500跌幅達到20%就會即刻休市。
萬一真係爆發比第三次世界大戰更嚴重嘅危機，到時你都應該唔得閒睇住個市。
如果你真係想知答案，咁你當會輸哂啲錢啦。就算唔係輸錢，都係幾乎輸哂啦。

不過依個世界唔係淨係得TQQQ同UPRO嘅，仲有好多唔同嘅Leveraged ETF。
我嘗試搵啲單日跌得最多嘅Leveraged ETF，雖然仲未搵到啲一日跌100%嘅，不過都搵到一堆執咗笠嘅。
跌得最慘係QILU，3倍原油ETF，喺負油價嗰期試過單日大跌70.11%。

XIV曾經喺2018年輸到執笠，SVXY都試過輸到要deleverage，即係由1倍槓桿跌到得返0.5倍，升返家鄉遙遙無期。
詳情可以睇返依篇新聞報導：
https://www.ft.com/content/288fb178-1bf5-11e8-956a-43db76e69936
喺2020年3-4月都有一堆leveraged ETF/ETN執笠：
https://www.etf.com/sections/features-and-news/leveraged-etf-closures-piling
個人建議係唔好玩冷門嘅ETF，太冷門嘅嘢一般都唔會係優質嘅投資機會。

Lm

tqqq 10年財自

留名繼續學野

用危險嘅方法玩安全嘅嘢
既然你指數化投資咁勁，點解大多數人唔會咁做呢？
點解唔見啲大學生、姨媽姑姐投資麥當勞、可口可樂依啲公司？

巴菲特都相當推崇投資指數，佢多次建議其他人買跟蹤指數嘅指數基金(e.g. VOO)，認為只要長揸50年就會變得富有。
Amazon創辦人Jeff Bezos曾經問過巴菲特：「既然你嘅方法咁簡單，點解其他人唔學你呢？」
巴菲特回答「Because no one wants to get rich slowly （因為無人想慢慢發達）」
其實好多散戶都知道指數基金勁，但係佢地唔想等到老咗先發達。
所以散戶寧願買啲無人識嘅細公司（俗稱妖股），好多人對依啲妖股一無所知，但仍然成副身家擺落去，博佢短時間內升幾倍，偏偏唔肯買世界上最優質嘅公司，然後一年慢慢賺5%。
「買妖股回報高但勝算低，買優質公司回報低但勝算高」就係一般散戶面對嘅難題。

點樣解決依個問題呢？我諗到嘅答案就係「用危險嘅方法玩安全嘅嘢」。

用現金買指數，屬於「用安全嘅方法玩安全嘅嘢」。
用現金買妖股，屬於「用安全嘅方法玩危險嘅嘢」。
用槓桿買指數，屬於「用危險嘅方法玩安全嘅嘢」。

一般最安全嘅指數基金係指QQQ, VOO依種。巴菲特建議嘅係長揸VOO 50年。依種基金比較安全，唔係依個post一直講嘅槓桿ETF。
但係我依種平民心急唔想get rich slowly，就需要用槓桿嚟買啲跟蹤指數嘅嘢，放大回報。

槓桿嘅方法有好多，例如孖展、leveraged ETF、期權、期貨。之後會詳細討論。
我衡量過之後覺得2-3倍槓桿嘅話leveraged ETF係最合適，即係跟蹤Nasdaq 100指數就QLD (2倍) TQQQ (3倍)，跟蹤S&P 500指數就SSO (2倍) UPRO (3倍)。
孖展有斬倉嘅風險、期權期貨知識要求較高，操作上亦無leveraged ETF咁簡單。
如果再高啲槓桿就可以揀孖展期權期貨，不過槓桿水平越高，勝算都會越低。指數雖然勁，但係槓桿得太盡都會令你由贏變輸。

3倍槓桿已經足以令一般打工仔十幾廿年內get rich。如果你想一兩年內get rich？咁六合彩可能會更加合適。

玩Leveraged ETF好過炒個股
其他人辛辛苦苦讀財報、做研究去搵十倍股。
又要睇基本面、又要睇貨源歸邊、又要估莊家心理。

但其實簡簡單單TQQQ、UPRO已經係十倍股，唔洗尋尋覓覓。最好嘅嘢就係大家都一定識嘅大公司。只係我地用較進取嘅方法去買佢地。而且指數長升長有，你可以任何時候入場唔需要驚錯失機會。

細股好多時都係靠好消息爆上，錯過咗未必有下一次。但係指數可以長升長有，受惠於美國整體經濟發展。

繼續留名

TQQQ咁好？我all in啦！
TQQQ好又唔代表要all in 凡事太盡，緣份勢必早盡
首先指數雖然長線嘅講會係升，但係短線都可以插得好勁，亦都有機會橫行一年以上。而且leveraged ETF係用一種危險嘅方法嚟玩指數。做危險嘅嘢就更加要小心謹慎。

舉個例子：大家平時出街會唔會一路行一路睇手機？會唔會紅燈嗰陣過馬路？我其中一個人生座右銘就係：「睇手機就唔好亂過馬路，亂過馬路就唔好睇手機」。
你要做危險嘅嘢，就應該謹慎啲。你唔想咁謹慎，就唔好做危險嘅嘢。人無事先做到世界冠軍。TQQQ咁勁，就算你唔all in，你最終都會發達。唔需要咁心急一嚟就all in去盡。就算TQQQ最後真係升100倍，你捱唔住中間嘅過程都係無用。跟住落嚟就會講吓資產配置。

建議大家可以睇返全倉TQQQ巴打嘅勸世文：
［勸世］最近龍市多咗人講TQQQ，我想同大家講千祈唔好愈買愈大
https://lih.kg/2760022

TQQQ你快d落返黎先，咁高好危險嫁，萬事有商量，我唔想冇左你！

⋯⋯

G持

點樣做資產配置？
無標準答案嘅，連登巴打們都分幾種講法。
我唯有整理吓唔同人嘅睇法，大家自己判斷。

1. 全倉TQQQ
正如上面所講，做危險嘅嘢應該謹慎啲，考慮清楚自己承受能力。連登有巴打全倉TQQQ，但係佢無叫你跟佢一樣咁做。

如果出現特大股災、長期熊市嘅話，TQQQ可以跌9成以上。但如果依啲災難唔出現，all in TQQQ回報會係最高。
人性就係會恐懼，所以先要揸其他非槓桿股票ETF、債券ETF嚟防範。如果最後無驚無險，買其他嘢會令你跑輸全倉TQQQ。但如果不幸出現災難，到時你就跑贏全倉TQQQ。

2. TQQQ : VOO : Cash
依個係我自己心目中理想嘅做法。
首先決定一個TQQQ : VOO : Cash嘅比例，例如TQQQ : VOO : Cash = 3 : 5 : 2。(自己配置係更進取)
比例可以自己再調節，窮嘅時候可以進取啲，加大啲TQQQ嘅比例。有錢之後就可以漸漸加大VOO嘅比例，以防股災嗰陣失去大部分財富，但係Cash嘅比例可以唔洗專登增加。然後每季rebalance去保持返依一個比例。

而依個做法可以有幾種變化嘅。唔想揸TQQQ可以轉UPRO。
VOO可以換QQQ，如果已經財自咗嘅話可以換SPY再加protective put或者買SPD (之後會再講)。
雖然股災嗰陣TQQQ同VOO都會一齊跌，但係我相信VOO / QQQ一定升得返。
留一定比例cash係因為始終有可能出現大型長期股災，又或者現實生活出現需要用錢嘅突發情況。
Cash嗰度可以換Cash equivalents，即係短期國債，例如SHV (1年以內美國國債)或者SHY (1至3年美國國債)。想再進取啲可以考慮其他短期債ETF，例如NEAR, MINT。不過新手唔好搞咁多嘢啦。。。

3. TQQQ / UPRO : TMF
話說外國有個blogger叫hedgefundie，佢採用40% UPRO 60% TMF嘅策略（後來改做55% UPRO 45% TMF），然後定期rebalance。依度有唔少巴打都係支持者。依個策略都有唔同變化，UPRO可以換做TQQQ，亦都有人話TMF可以換做TLT或者EDV。
好處就係一開始可以保留購買力喺債券，等股市下跌嗰陣低價入場。(我可能講得唔好，大家可以聽吓其他人點講)
關於TMF可以睇吓FX戰士巴打嘅講法：
https://lih.kg/vbjHtoX
https://lih.kg/bdofjnV
https://lih.kg/uGqRJRX

槓桿工具總結
槓桿嘅工具有好多，有leveraged ETF、孖展、leap call、期貨。
簡單比較幾種加槓桿嘅方法：

Leveraged ETF：
槓桿倍數：3倍或以下
斬倉風險：無
優點：咁多種工具入面唯一有compounding effect，長升嘅時候表現喺咁多種槓桿工具入面最好。(以相約嘅槓桿水平嚟講)，仲可以配合期權玩cash-secured put、covered call。
缺點：Volatility decay，武肺大跌完升返之後無咗26%。金融海嘯可以2X ETF都可以跌接近9成。
綜合評價：流動性高操作簡單，3倍或以下槓桿嘅極佳選擇 ，但我唔會全倉leveraged ETF

孖展：
槓桿倍數：2-10倍
斬倉風險：有，通常新聞、電影啲人輸到跳樓都係因為孖展
優點：新手都容易理解，成本唔算太高
缺點：利息成本，建議搵利息較低的券商。而且券商喺波動時可以任意提高保證金要求，容易令人大失預算。
綜合評價：珍惜生命，唔好跳樓，但如果係輕微嘅孖展(1.2倍或以下)我覺得係OK嘅

Leap call：
槓桿倍數：1倍以上
斬倉風險：無
優點：低槓桿DITM leap call可以取代正股，高槓桿可以唔洗擔心斬倉，遇到武肺大跌都捱得過
缺點：高槓桿時Time decay嚴重，橫行一段時間可以跌幾成。流動性低bid-ask spread闊，適用嘅股票有限，而且需要定期rollover，操作複雜
綜合評價：用喺SPY, QQQ係幾正，或者用喺確定性強嘅大股都唔錯
有興趣可以睇另一個post：
https://lihkg.com/thread/2640434/

期貨：
槓桿倍數：1倍以上
斬倉風險：有，跳樓嘅原因如果唔係孖展，很可能就係期貨
優點：無time decay無利息成本，幾乎零成本獲取高槓桿。交易時間極長，幾乎幾時都有得炒，而且流動性高
缺點：玩期貨嘅人好容易對槓桿水平無自覺，去得太盡有咩股災就容易俾人斬倉
綜合評價：幾乎零成本獲取高槓桿，喺俾人斬倉之前係幾爽。

咁槓桿水平幾多先好？
之前有人做過研究，大約2-3倍係最理想嘅。


Leveraged ETF已經係好進取嘅投資工具，如果TQQQ/UPRO keep到過去10年升勢，都已經夠你財自架啦。如果唔夠嘅話就返工賺多啲本金。
真係信心好強，想再賭大啲先考慮其他工具。

貼住咁多先，得閒再繼續貼。

可以lm了

其實孖展1x etf (voo/qqq)係咪都會做到類似leveraged etf咁既votality decay？