但講開新機,而家嘅電話真係愈出愈大部,愈出愈多功能,雖然畫面同科技都得到提升,但係電話嘅重量都愈來愈重,就算唔係大機都有一定嘅重量,對於長期拎住嘅用家黎講,對尾指嘅負擔真係好大
,長時間拎住個電話手指尾會好痛,輕則可能有小小瘀同酸痛,而有啲嚴重嘅甚至會起枕(繭)同埋手指尾有小小變形。
所以坊間就發明咗電話扣呢樣嘢去減輕呢個問題,只要個扣掛喺手指度,就可以唔需要用尾指托住個底,同埋會冇咁易跌電話,呢個真係一個好方便嘅發明。
不過呢個發明有一個缺點,就係用咗電話扣就冇得用無線差電,因為佢擋住咗個充電位。不過今時今日手提電話都不知不覺已經進入咗無線充電既時代喇,好多電話都配有無線充電嘅功能,無線充電的確係一樣好方便嘅功能,一直垢病嘅充電速度慢亦都進步緊,相信無線差電絕對係將來嘅趨勢。
為咗自己嘅尾指著想,所以我就設計咗一款電話扣係可以保護自己珍貴嘅手指尾之餘又唔影響無線充電功能,而家就等我同大家介紹下啦!
我只需要將佢安裝喺電話背面嘅底部,有用開case嘅照貼喺背面都得,佢有一個機關可以將一塊軟墊墊喺尾指同電話之間,等隻可憐嘅尾指唔駛再俾個硬掘掘嘅電話un住
,就算長時間拎住部電話手指尾都唔會好痛,唔用嘅時候仲可以收埋佢,唔會影響平時用USB線充電,而且佢安裝喺電話底部,阻唔到無線充電嘅位置,平時可以揭開當電話扣咁用,當要無線差電嘅時候就收納好佢就得喇
而且佢好薄,展開咗只有3.5mm,絕對唔會令到部電話好厚重,兼且仲可以當托架咁用,佢其中一個特點係可以直擺而唔係好似其他普通嘅電話扣一樣只能夠橫擺,打直擺就用嚟放喺枱面玩facetime真係一流。
打橫擺都得
唔知各位全能嘅連登仔可唔可以俾啲意見我改進佢,或者會唔會諗到一啲我忽略咗嘅缺點,甚至乎有冇巴打想做白老鼠,幫我試用下呢樣嘢然後俾啲用家意見??
一如既往咁多謝大家睇到呢度,今次有D多字,唔好意思
同埋想改好小小先成為產品
而家想整到一件令自己同大家都滿意嘅產品最重要
