般奴費南迪斯上年1月加盟曼聯之後,立即成為靈魂人物,據悉會方上月已計劃同呢位26歲葡萄牙國腳續約5年,加佢一倍人工至20萬周薪。不過,英國《太陽報》指般費有所猶豫,因為想等埋中場拍檔保羅普巴續約後,確定球隊有爭霸決心,佢先至會同紅魔鬼續約。
保羅普巴將於明年6月約滿,但去留仍然成疑,有傳呢位法國國腳要求50萬鎊周薪,令紅魔鬼管理層卻步。如果雙方今夏未能達成協議,曼聯可能會出售普巴,以免佢明年自由身離隊,而人財兩失。
般奴費南迪斯希望了解球隊有冇爭霸野心,包括會唔會留住保羅普巴,甚至會唔會收購查頓辛祖、艾寧夏蘭特等球星,提升爭標實力,先至決定是否續約。
般奴費南迪斯最擔心曼聯一旦出售普巴,球隊失去爭標本錢,屆時就算自己續約留隊,都會踢到冇癮。唔知曼聯會唔會睇在般費份上,同普巴續約呢?
普巴stay,般奴stay