「教授你知唔知架?」湘南又再問陳全。
「做咩個個都問我知唔知啫?唔知呀!」陳全突然好大聲咁講。「帽又我戴,仔又我教埋,仲要係咁問我知唔知.......我真係應該搵機會鏈死李子坤!」
「嘻嘻......哈哈哈哈!」我睇得出陳全係講笑。都過左咁多年,如果佢真係對我既離開懷恨在心一早就去左報仇啦!不過同湘南相處左咁耐,應該想報都報唔到。多得佢搞一搞笑,我地先可以係離別同相認既悲傷氣氛入面解放返出來,笑住咁完結呢件事。
湘南今晚應該有好多野諗,我突然既夜訪令到佢人生發生好大既變化。佢突然間有一個富可敵唔知幾多個國既老豆,但同時發現自己老母係雞,仲要同自己一直鍾意既女人就係自己老母個樣。我同陳全離開左佢間客房,等佢同我自己都可以有更多空間思考未來應該點做,尤其係喺而家咁危險既情況之下。
深夜既時候,我同秀晶一齊訓,因為大家都要訓係無線充電床上面,就無謂分開兩個地方。明軒幢大樓求其開兩層來訓已經多房到隨便都得。
「曉夢.....你可唔可以攬住我?」秀晶講。
「點解既?」我捉住秀晶隻手問。
「因為.....我除左呢個機械身體既感覺之外,都仍然感覺到自己真身既感覺。啲水......好凍,而且全身都好痛.....」我唔知可替代因子既液體如果溫度升高既話會唔會有不良既影響,但佢全身果種被電擊既感覺係來自身體利用電流來取代營養去維持運作。如果佢要保持清醒,就永遠會有呢種感覺。
「秀晶你要堅持住.....」我攬住佢,之前都冇發覺佢全身都係咁凍。
「堅持住之後呢?」
「你好快會習慣。」無論係用咩形式,將人既生命放入機械人入面仍然係冇好多缺點。希望陳全,子坤同明軒呢啲有錢或者有能力既人會係自己死之前諗好點改善啦!如果唔係我地就只可以「習慣」。
「曉夢,秀晶,快啲起身!」我啱啱先攬住秀晶,就聽到蒂亞把聲,摸黑咁行入來。
「又做咩呀!」我起身想摸燈掣。
「殊!」我直接比佢掩住把口推返落床。我都唔知點解佢睇到我係邊,咁黑機械人都睇唔到佢係邊啦!
「你留心聽下?」蒂亞輕力關埋房門之後,自己都縮埋來我地身邊。
係腳步聲.....而且人數好多。呢幾層既大樓係明軒特登開比我地訓幾日,好彩定唔好彩我地都係訓呢幾日。所有人都應該訓哂....邊到來咁多腳步聲?
「陳日正既人來左!」蒂亞好緊張咁講。
「點解佢會知我地係度架?」係蒂亞?係希爾德?到底係邊個?
「陳日正個人唔聰明啫,但佢手下啲人唔係全部冇腦架嘛!陳全同湘南兩個人都跟唔到咩!」蒂亞講。
「咁而家點?」佢講得啱。陳日正唔係聰明但都唔會坐以待斃,只要一搵到機會佢一定會搵辦法收捨我地。
「佢地仲係樓下掃緊上來,呢幢樓既保安應該冇哂架喇。頭先明軒收到警報既時候已經停哂成幢樓既電,希望冇燈冇電梯佢地上來會慢啲,但都拖唔到好耐。你快啲去佢個槍庫到攞槍先啦!」蒂亞拉起我就行。
「樓下?咁陳全同湘南咪......成幢樓冇哂保安?邊有可能呀?」明軒唔係做軍事企業,雖然有持槍守衞但人數唔多,但都唔會咁快輸哂下話......
「佢地夜襲好有可能用左睡眠毒氣,所以先至無聲無息咁搞掂哂咁多人。」佢拍一拍我膊頭。「所以要靠你喇!呢度得返你可以反擊架咋!」
「咁秀晶呢?」秀晶淨係識捉住我地。佢只係一個啱啱醒返,應該得十歲既細路呀....
「秀晶你留係呢度匿埋唔好出來就得。」蒂亞將佢好似BB 咁氹返上床,就好似仲係頭先乜事都冇咁訓低,然後用被冚過佢全身。「秀晶你記住無論邊個過來都唔好開門,知唔知呀?」
蒂亞同我出左房之後即刻鎖左房門,希望冇人搵到秀晶。
「我地先去明軒間安全房攞武器!」蒂亞帶我向樓上跑。
「快!陳全同湘南係樓下,我要去搵返佢地。」我同蒂亞向住明軒既安全房直奔。
安全房就係明軒個邪教教堂果層,好標準咁收埋係個教主位下面,果種中二病既感覺真係呢.....不過後生仔做就叫中二病,老人做可能又變復古呢,邊個知。
「曉夢你要唔要著呢件野?」兩個一肥一瘦既黑衣人係安全房到等緊我地。肥果個當然係明軒,瘦果個應該係梅森係度守住佢老細。緊身既黑衫係戰術裝甲,佢地兩個仲要戴埋頭盔添。
「你件野會唔會爆開架!唔好夾硬來喎!」明軒件緊身衫包到佢好似吹到極限既氣球咁。唔好話刀傷槍戰,我覺得我用手指篤一篤佢件衫都會爆。
「唔好講咁多啦!著左先啦!」蒂亞自己開始除衫....係除哂!然後行左入去一個用玻璃圍起既箱到。過左一陣就著住果件緊身衫出來。
「我唔洗啦下話,我本身都防彈」我搖搖頭講。
「但係你層皮如果再穿窿,你仲邊到整得切?我地要離開呢度架喇!」蒂亞講。
「離開?我地唔係出去殺哂陳日正啲人咩?」
「仲唔走?呢度黃左喇!陳日正咁多錢佢可以請哂成個H 市既人來捉你,你點殺呀?同埋佢地係來捉你,你仲留係度搞鳩明軒幢樓?救埋你果兩個人拿拿聲走啦!」我第一次聽到蒂亞講粗口。
「得啦得啦!我著喇好冇?」我除乾淨身上既衫然後行入果部機入面,一團噴霧係我身上交織出細密既纖維,最後硬化變左一件最適合我身型既黑色衫。
我一出來蒂亞就比左我頭盔我。「唔可以比佢地知仲有一個秀妍係呢度。」
「敵人知道自己係要來捉或者殺一個走失左既戰鬥機械人,所以一定會帶穿甲彈同電磁脈衝手榴彈。穿甲彈你用呢件裝甲都頂到一陣既,但如果中左電磁脈衝既話你會有一段時間郁唔到,所以要同正常人一樣,離開啲手榴彈。」梅森係明軒既私人僱傭兵頭目,臨走既時候比少少建議我同埋帶我睇一次幢樓既藍圖。
「你點解唔同我一齊去?」我問。
「我都出埋去咁呢兩個冇開過槍既人點算?」佢又講得有啲道理。
「明軒,如果一陣整爛你啲野既話,對唔住喇。」我拎左兩把襯手既槍同掛左一堆子彈係身,踏出安全房。
「果啲有限錢來啫,快啲去啦!」佢地將安全房既門係我背後鎖上。
腳步聲越來越近,佢地一定已經捉左陳全同湘南,我要搵辦法救返佢地。呢個邪教教堂最大既缺點就入係有個好大既落地玻璃窗,就算斷哂電,H 市既光害都會照到呢度燈火通明咁。
一,二......十,只係一個小隊十個人應該唔會有咁大動靜。係搵到我之前佢地應該只係每層分散少少人手來仔細咁搜索。
裝甲既頭盔本身有夜視功能,當然敵人都有。佢地散開隊型慢慢咁搵我可以藏身既地方,但搵到既只係一個又一個因為斷電而熄機既被困少女。
「喂。」我搵到一個落單既士兵,係佢背後叫左一聲,趁佢轉身既時候一把利刀插入佢既眼窩,穿過防毒面具直達腦髓。佢係叫出聲之前已經斷左氣。
佢因為停留左係明軒其中一個收藏係水箱入面既截肢少女前面而落單。估唔到明軒呢個變態既嗜好竟然會有咁既作用。
我仔細翻弄呢個死左既標本,睇下佢地帶既係咩裝備。心口同背脊有標準既防彈鋼板,但入面冇戰術裝甲,可能真係來得太多人所以唔會每個都有著。厚重既頭盔如果唔係直接命中既話可能打唔穿,即係我要盡量射塊面或者頸先可以一槍致命。而如果我條頸係弱點既話,話唔定我用刀繼續背刺先係最安靜最安全既方法。
我將佢部對講機既頻道同我頭盔入面既對講機配對埋一齊,佢地已經搵到陳全同湘南。好彩大樓既電梯冇開,佢地要人手捉果兩個人落樓。但再落多二十層就會到明軒既私人直升機坪,到時佢地就會捉佢地上直昇機,我一直要快。
我將佢部對講機既耳機掹走,令佢變成揚聲模式。一句接住一句Clear 同埋繼續搜索既指令開始係幽暗既大廳中迴響。敵人一邊慢慢搜索聲音既來源,一間房接住一間房,一具又一具沉睡既少女肉體令佢地忍唔住停低望多一眼。
搵人要緊,我唔得閒同佢地玩。佢地離開門口去搵對講機既時候我已經慢慢咁行到去樓梯口。始終都係兩個人留係門口附近睇水。
「我係呢度呀!」我用對講機細細聲咁講。全層....應該話全幢樓既士兵對於突然有其他人講野都停左一停。尤其係我呢層既小隊長更加除左自己既耳機仔細咁去搵聲音既來源......
「有隊友死左,我重複,有隊友死左!分成兩人一組,即刻開始搜索,唔好再比人偷襲!」小隊長一聲令下,門口果兩個人終於肯郁。我越過佢地向樓梯井進發。
「二十層,希望我唔會數錯啦。」我向住迴旋型既樓梯中間,蹤身一躍。
新既身體保持左原有既輕巧但係強度比之前更加高,原本既戰鬥機體設計係由運輸機上面直接掉落戰場既中間做突擊。我呢個弱化版係五公里高度以內直接跌落地都唔會有任何損壞。
「發現目標!佢.......跳左落樓梯井......」雖然只係一個黑影咁係眼前掠過,但係每層都有士兵既情況之下總會有人見到。
「五....四.....三....二....一!」如果我冇數錯既話呢層就係停機坪。我伸手捉住樓梯既欄杆整停自己,但始終都係跌多左一層。
「曉夢!探測器見到佢地佔領左停機坪之後又降落左兩部直昇機既士兵落來。果層太多人喇!你唔會救到佢地架!如果你仲未比人發現就搵個地方匿埋啦!我地突擊果陣仲可以救佢地,但如果你比人捉到咁就玩完架喇!」蒂亞用我身體入面既電話聯絡我。
「講笑咩!你有兩個人質係人地手你仲憑咩去突擊人呀?」我係腦入面答。「而且,都比人發現左啦!」
作者的話:請左假先來打風,好彩唔係八號,但我今日都冇得出街