早晨
我睇左啦。天要下雨,娘要嫁人,有d嘢真係你攔都攔唔住。你對佢既愛意,佢收到曬架啦
戴頭盔先,如果我係你,我就會唔理佢,唔搵佢
咁樣做係違反人類天性,因為人係feel到會失去一樣野既時候,就會拼命想捉住個樣嘢
但係你搵佢,就好似我上面回覆樓主咁。佢本身已經淡,唔想見到你,但係你係咁逼到佢,佢就會開始嫌你煩,得不償失
咁你可能會問「我唔搵佢,佢咪會離開我!」
其實唔搵佢,會有兩個可能性:
1. 佢真係走撚左。雖然無人想要呢個結果,但係咁大個人都係要學識接受,無人會陪你行一世:你父母,你兄弟姐妹,你朋友。每個人都係黎陪你行一陣。況且樂觀d諗,佢諗過都係唔鍾意你,所以先會離開你。咁你咪ok fine繼續走自己既路,搵一個愛你既人囉
2. 佢表明有意願繼續一齊,皆大歡喜。有時d人係犯賤,你係佢面前就唔會珍惜;當你冷淡,佢可能反而會諗下「咦,佢做咩突然唔理我/發生咩事」,佢先會開始諗失去你會點。我覺得啦,一個人對你好個陣,你就對佢好;佢對你冷淡既時候,你要比佢十倍冷淡。邊個怕邊個?大家都係人,都係有阿媽生,唔洗咁卑微
講起卑微,你覺得自己要求可能太多,導致佢覺得「做極都係滿足唔曬你d要求」。我唔知詳情,但係你可以問下你d朋友,d要求算唔算過分。如果唔過分既,我覺得你唔好為左挽留條仔,而自貶身價,屈就自己。拍拖就係了解大家同磨合,睇下過唔過到人世。唔通為左佢,你以後就咩要求都唔提出咩?都唔make sense啦,你咁樣會開心咩?你問下自己你係咪想咁。打得有d長氣,唔好意思