初選第一日投票嘅竟然係中老年居多,眼見好多後生仔仲停留係投定唔投o既討論,不堪入目
呢個POST話你知初選真面目,不服來辯
照舊,重要野行先:
初選投票就係本土派致勝關鍵,唔想本土派再次成為CONDOM就一定要投
先講下話唔應該參加初選/初選唔應該投嘅論點,逐個話你地知有咩問題,畀你地好好諗清楚。
之後再講初選點解會係致勝關鍵。
(1) 「成個初選都係泛民搞出黎,用下腦都知唔會俾你贏到啦」
呢個論點可以有深淺,淺嘅就係最簡單:敵人搞嘅就唔應該參加
漏洞一樣好簡單,所有正式選舉、甚至有朝一日香港真係有普選嘅話,個選舉都係由正苦搞
如果你係支持一律都唔應該參加都尚算一致,但係好明顯見到大部分持呢個論點嘅人都唔係咁諗,即係私怨行先
深入D會講到:泛民搞出黎,成個選舉都係favour泛民,投票嘅都係泛粉居多嫁啦,根本唔會有一個公平環境俾本土派有機會贏
第一,泛民搞出黎係推導唔出個選舉就會係favour泛民,就算係民建聯搞,只要有心,佢地都可以搞到一個公平嘅選舉出黎。成場選舉公唔公平,唔係睇邊個搞,而係睇場選舉嘅細節同規則
唔知你地有冇留意,泛民或者都係同一個思路,認為去得初選都應該係泛粉,靠鐵票贏撚硬,所以係成場初選嘅選舉過程,泛民係極少選舉工程,街站都唔多個。相反,本土派素人嘅選舉工程可以話係仆心仆命,日日擺街站,經營FB、Twitter等社交媒體,由初選開始至今都係咁。
亦正因如此,所以出現左第二點:
呢場初選係歡迎任何選民去投票,即係話無論你係泛粉定本土,你都可以參與其中。參考下區議會,同樣係敵人搞嘅選舉,結果大家有目共睹。如果本土派真係當今主流,傾巢而出係冇咩可能少票過泛粉鐵票,可以係一場「不公」嘅選舉勝出,就更加代表本土派已經係作弊都搞唔掂嘅真主流。但係相反黎講,如果本土派係今次初選嘅得票連泛粉鐵票都不如,咁本土派都不過如此
(2)「 未到選舉就伸個龜頭出黎俾人打,搏DQ送頭?」
本土派正式參選時極大機會被DQ相信係大家共識,有班人認為本土派而家走黎參加初選就係俾人引蛇出洞,正苦跟住個參選結果DQ你就搞掂。
冇錯,如果本土派係初選勝出,正苦跟個結果DQ就可以係選戰中抹煞大量本土派。但係亦唔好忘記本土派係初選中勝出嘅意義,佢地能夠勝出,就即係本土派係有一定民意基礎,足以撼動泛民甚至親共派,所以先需要DQ佢地。若然佢地落敗,本土派係呢一刻都不足為懼
可能有人會話:「我信本土派先係主流,到時先參選都會贏到,洗乜而家走出黎俾人點相」
第一,即使本土派係主流,無可否認選戰某程度上係同資源同名氣掛勾,如果到時先參選嘅係天K,我都相信佢會贏到,但係本土陣營有幾多個天K,大家心裡有數。如果初選過後先開始選舉工程,我唔相信趕得切令你穩守一席。如果你有留意開初選動向,唔難睇到有好幾個本土素人係初選過程中令好多人眼前一亮,即使未必下定決心投佢一票,至少都已經令本土派係唔少人心中留下好印象。初選,已經係選舉工程嘅一部分
第二,若然你係認為而家出黎就會俾人點相DQ,遲D出黎就會冇事入閘,我好肯定咁講你實在太天真,心態上仲停留係一年前嘅僥倖心態,用返天K做例子,雖然我相信如果天K成功入閘就會贏,但係我都相信就算佢係兩個月後先宣佈參選一樣係會被DQ。既然還掂都被DQ,何不把握時間開始自己嘅選舉工程?所以抱住呢種僥倖心態黎看待初選以至正式選舉,恐怕你一整年黎都冇進步過,或者你根本不願面對今日嘅政局
(3) 「初選咪姐係小圈子選舉,冇認受性可言」
其實同樣係僥倖心態,想為本土派輸左搵後路。一句冇認受性,本土派輸左咪唔認數囉。
係,其實大家都係咁玩,如果本土派贏左,親共勢力就會走出黎話係小圈子選舉冇認受性,但泛民就會進退兩難,唔可以否定自己搞出黎嘅初選,如果否定左可能連泛粉都留唔住。
如果泛民贏左,恐怕就唔係咁講,你可以設想泛民同親共派都會一齊將初選捧上神枱,至少唔會有好大阻力去話主流民意唔係泛民到。我地要做嘅唔係搵定後路輸左嘅話點樣唔認數,而係唔可以俾本土派有機會輸,一輸就後患無窮,你都唔想香港繼續俾泛民unun腳扮工玩死
(4)「成班傻仔俾曬資料人地,中共最開心」
先唔講你嘅個人資料共產黨一早有曬,除非你一路都係隱居係唔知邊到冇交過任何資料俾正苦
如果只係驚自己因為參加初選暴露自己立場而被點相:
第一,如果人夠多,我唔知佢成百萬人相有咩用啦,可能過幾年一次過拉入集中營掛。
第二,如果係驚到咁,你仲可以做乜?出過去遊行用天眼搵返你只係時間問題,勇武更加唔洗講,做鍵戰都隨時起到你底,連投個票都要驚俾人點相,可能你係咩大人物先會驚啦,如果唔係嘅話你就只係呢個階段已經驚到縮埋一舊等死嘅人。縮係屋企做港豬就一定唔驚俾人點相,不過中共幾時連港豬都清洗埋就自己諗啦
---
至於點解呢個係致勝關鍵,或者點解話本土派可能再次成為Condom,其實都唔難理解
無論你視初選係一個泛民設嘅局,定係乜撚野團結民主陣營嘅玩意,都唔能夠否認,本土派輸左就會進退兩難
首先係參加左初選嘅本土派
如果佢地係初選中落敗,基於初選承諾,佢地理應唔可以再參選正式選舉,當然佢地可以違背承諾,但係無論如何,佢地都會付出沉重嘅代價
如果佢地輸左之後真係退出選戰,每輸一個,本土派就打少一個,同時係初選中投佢地嘅票,可能就會去左泛民手上,即係正式選舉時要派出一個新嘅本土派擊敗泛民嘅難度又會提高
如果佢地輸左之後違背承諾,繼續參選,佢地基本上就係抱住必輸嘅覺悟去選,仲要順手俾大量政敵攻擊佢違背承諾破壞佢嘅聲譽。點解會係必輸嘅覺悟?因為佢連理應只有自己友嘅投票都贏唔到,你叫佢地憑咩去相信本土派真係主流,憑咩去相信係有埋對家嘅選舉之中反而會贏?
到佢地真係輸左,佢地係名利雙失,冇人會再記得佢地,即係正式成為Condom
至於冇參加初選嘅本土派
如果參加左果班輸左,你地都唔會好過,無論係泛民定係親共派,都會不停拎住個初選結果黎講,將本土派打成小眾。到時你再去參選,「以大局為重」嘅香港人會唔會俾你地贏,自己諗下
總結就係,
如果你自命為本土派,你冇理由初選唔去投票,你真係唔鐘意初選呢個制度都好,你都唔可以放過任何一個幫本土派造勢嘅機會
認同請分享,同意請推POST,不服來辯