「極限旅遊、運動與攝影」 我站在歐洲白朗峰與馬特洪峰上。

大家好，又係我喪標巴打 今次借左朋友個acc 開post。自從我上次係尼泊爾地震雪崩死唔去之後，我好好彩用記攝身分入左一間專門訓練雪巴嚮導既登山學校學習各種登山知識。關於登山學校入面既故事，大家可以係我個page到睇，有興趣既可以follow支持下 ，我會不定期更新分享世界各地自己做既專題紀實報導同登山資訊，之前我都寫過格陵蘭現代獵人故事。如果有咩唔明，大家都可以問我登山、高山症或者gear上既問題，我識既會盡量答。帶返頭盔先，以下所講既都係自己經驗或者其他教練教我所綜合出黎既野，如果有其他高手發現有錯，歡迎指正，希望大家可以交流下。真係想攀山既，就搵專業人士教，唔好睇完個post就狗衝去爬

FB: https://www.facebook.com/ericshorizons/

IG: https://www.instagram.com/eric_songbill/


以下既相係自己用5d mark3及24-70 2.8拍的，雖然機身同鏡頭對於一位登山者黎講重得過份，但經歷過真實既雪崩測試都絲毫無損，最重要係電量穩定，我自己唔係一個鐘意連撳快門既人，一日可能只影30－50張，甚至唔影都有可能，一切隨心。係負10至負30度環境下，一個電池夠我用兩三日。


一切正常，呢個就係我用dslr唔用無反既原因。



左下角條村落就係我上登山課既地方，海拔3400m


開學之前，我地要搵喇嘛進行一個叫puja既儀式向山神敬拜，祈求一切順利平安。


學校只會係一月開課，因為一月份珠峰地區氣溫會降至－20度以下，咁樣先可以冰封瀑布，而且一月天氣太凍，根本就冇人會去當地健行，有好多雪巴人都受唔住嚴寒，而飛往加德滿都避寒，所以雪巴人係呢個時份會變得好清閒。

完成呢個basic course之後，(其實真係好basic，對我來講advance course既冰上救援課程比較有用)。我就同幾位有trekking經驗既朋友去左法國攀登西歐最高既Mont Blanc「白朗峰」4810m，然後自己去左瑞士攀Matterhorn 4478m「馬特洪峰」， 但在我開始寫遊記前， 好想花d時間同大家9 up下「登山」或者「攀登」Mountaineering 。可能大家會覺得我以下所寫的很長didn’t read，但最近實在太多行山遠足意外，我怕d人睇完之後，又有樣學樣，試想像一下香港行山都死咁多人 ，攀大山真係死100條命都唔夠，仲會連累身邊既partner或嚮導，到出事既時候真係後悔都太遲啦。


南針峰上事前既訓練。


從Mont Blanc下撤時睇到既風景。


Mont Blanc登頂入口

我係尼泊爾返學既時候，其實有好多雪巴嚮導同我訴苦，話好多商業登山客好多野唔識就話要爬大山爬珠峰。當去到山上既時候就好似個bb仔要人照顧，要人幫著安全帶著冰爪，呢樣都唔緊要，每個人都有第一次。但d客人最唔應該犯既低級錯誤，例如唔見左手套、冇gear check，要個嚮導借野比佢，攪到個嚮導生凍瘡切手指或者有雪盲等等。呢d唔應該犯既低級錯誤，經常係山上發生，而且全都要嚮導去承受，攪到山上既意外不斷出現。


一位好出名既雪巴嚮導係fb投訢d客

隨便攀山真係分分鐘害死自己，害死人都似。登山需要高度專注，而且唔可以犯任何錯誤既極限運動。希望大家有興趣玩既，真係好好了解一下係咩黎先 。當你真係了解左既時候，其實好多意外都可以避免發生，亦都唔會連累到人。

好啦，首先講解下Hiking、Trekking 同Mountaineering ，可能你會覺得全部都一樣，上得山就係叫登山，但係去到外國其實會分得好清楚，講錯會比人笑做乜9。係唔知點解得香港係會全部撈埋一齊，可能香港冇Trekking同Mountaineering 呢兩個項目掛。

Hiking 解作行山遠足，通常都係一日來回既路程，而且d路鋪得好靚，難度最低，只要你乖乖地行大路，通常都唔會有咩事發生（你自己Hi Hi跣腳另計）。香港既行山徑，例如大東山，龍脊都係hiking。


之前係冰島行既火山，雖然係火山，但係有好靚既行山徑，幾個鐘就行完。



Trekking我會解作健行或者徒步，其實係複雜d既hiking，路程通常都係2日起甚至幾個月既都有，d路會複雜好多，冇咁好行，而且大部分都位於高海拔位置，適合體能好少少既人。例如尼泊爾既ABC、EBC路線、雲南既雨崩、重行人生之前行既PCT，外國專門玩呢類項目既人叫Trekker ，而唔係Mountaineer.


之前4月行過既尼泊爾EBC路線，




尼泊爾既Everest Base Camp同昆布冰川

前往ebc最後一條村

LM
巴打影既相好靚

Mountaineering攀登，係3者入面地型最複雜，危險性最大，包括左冰雪岩既攀登活動，而且體力雖求極大，需要落裝備去攀登。玩得登山就需要100％既認真同專注，唔容許登山者有任何傻的嗎行為。山上既死法可以有好多種，只要你一個少少既失誤，打錯一個結，就可以令你全team人受傷甚至死亡。


用Alpine方式冬攀6189m的Island Peak


登完頂就下撤走佬。


過冰隙必用既梯，其實唔係好難。只要你當普通梯咁行就得。


做一個真正既登山家Mountaineer其實有好多野需要去學，係外國 d人唔會隨隨便便叫自己做Mountaineer，佢地要學識攀岩、攀冰、繩索技巧、地理雪地知識、安全理論等等。我地到法國瑞士呢d登山地方，人地真係會好認真同你交流，爬咩線，幾多個pitch。如果同人傾計比人知道你咩都唔識而又叫自己做Mountaineer真係會比人覺得你傻的嗎9， 我係登山學校讀書個陣就係花左好多心機同時間去考呢5個試先可以畢業，但其實我畢左業後返香港冇玩一排，已經有好多野唔記得，要補課。


如果有睇tvb既天與地，可能會認得呢位雪巴醫生Dr. Nima，佢負責係學校入面教急救同高山症既部分。


學生實習


來自Alaska既Denali 嚮導教繩索技巧

每一座山峰都會有唔同既特性，登山者其實要依照山既特性同路線去做準備，例如夏季既Matterhorn基本上有3／4既路程都係岩線，1／4接近頂既係冰雪，咁專業既登山者就會知到要執d咩裝備同做咩訓練去攻頂。


Matterhorn hornli route路線。


攀登Matterhorn既情況，既然岩線多既就帶多幾隻cams，反而1支ice screw已經夠用。

大山呢，通常我自己會分兩種，一種係trekking peak，另一種既係technical peak，而Mountaineering大致上我會分為2種， Expedition style「遠征或者叫喜馬拉亞式」、 同Alpine Style或者叫Alpinism「阿爾卑斯式」.


其中一座我好想爬既technical peak, Ama Dablam 6812m,呢座山仲難過一d 8000m既山。

Trekking Peak可以話係唔洗任何攀登技術就可以去登山，因為路線較為平坦，唔洗點攀，登山者有時可能唔需要用冰鑽去整保護點anchor，就咁行上去就得，有時攀之前可能需要學少少裝備上既應用，就算要學既技巧、都係用3－4個鐘頭內學既簡單升降技術。因為有d trekking peak特別係尼泊爾既商業登山隊為左賺錢，令登山門檻降低，雪巴人或者嚮導會係山季開始前，將條static rope 預先架設係山頂上。我地會叫做fixed rope，比d唔識攀既人用一個叫上升器Jumar既裝置chok上去就可以登頂，由於上升器只識上唔識落，扣左係條繩到，就算你吊係半空，你都可以隨時放手休息唔會跌死，非常方便。不過呢個做法係會被視為cheating 作弊。因為根本唔係用自己技術去攀，冇左攀山原有既意義同樂趣。

有d嚮導自己會盡量唔用條fixed rope去攀山，因為條繩會一直放到登山季節完左先會拎返落黎，有個嚮導曾經同我講，試諗下條繩放係山到4－5個月，不斷被初哥用蠻力拉扯，仲要受盡風吹雨打，條繩已經起哂線，咁你仲會唔會信條繩？（雖然條繩係好難先會斷）

如果大家真係想體驗下登山既感覺，其實外國有幾座山難度唔高，屬於入門級適合啱啱開始玩既「新手」。咁當然你都要有返一定既「體能」啦，同最好有少少攀岩底啦，咁樣會減少你係山出錯既機會，有基本知識係對自己同對嚮導既安全負責。尼泊爾既Island Peak島峰, Mera Peak同Lobuche East呢幾座都係過6000m但係其實比較容易攀既山，唔洗任何個人技術，拎上升器chok上去就得。如果鐘意噱頭野既，可以去爬俄羅斯既Mt.Elbrus 或者非洲既Kilimanjaro 呢兩座都唔太難，trekking peak黎，又係唔需要攀冰同攀岩呢d特別既技巧，而且叫歐洲同非洲最高可以大下唔識爬山既人。想平既可以去雲南既哈巴雪山或者四姑娘2峰等等，坡度細，海拔唔太高都係trekking peak黎。


去緊Island Peak base camp


Island Peak日出

Expedition style通常都會用係6500m以上既雪山，攀呢d超級大山，需時1－2個月，因為需要長時間去適應高海拔既氧氣，所以登山隊伍會設立唔同既大本營同埋請好多後勤同補給去慢慢推進上頂。呢個就係點解爬珠峰要幾十萬既原因，以家Expedition style既主流就係請好多雪巴人去幫助登山隊伍鋪路搭橋，同做porter搬野，但係呢種玩法會導致另一個問題出現…….就係多左好多唔專業既商業登山客，比得起錢就有得玩，我聽過有d人連8字環都唔識用就攀8000m山，呢d人令到山上出現意外既機會大大增加，而且對雪巴人黎講唔公平，登頂既榮譽冇左雪巴人份。其實冇左雪巴人既幫忙，佢地根本冇可能登到頂。

真正既Expedition style應該要登山隊伍每個人都有唔同既崗位去做唔同既事，而唔係全都靠哂雪巴人去做。


黑色個座，世界最高既珠峰就係expedition既好例子

最後就係Alpinism，世界主流推祟既登山技術，難度最高，亦都係「孤高之人」入面森文太郎用既登山技術。呢種技術源自於18世紀歐洲既阿爾卑斯山脈，係登山界入面最原始古老既技術，冇Alpinism就唔會出現任何滑雪、攀岩、攀冰、甚至係行山等等既活動。Alpinism係最符合運動精神既一種攀登方式，同喜馬拉亞山式完全唔同。好講求獨立自主同公平原則，全程都唔會有人幫你拎袋，冇人會拖你上去，所有裝備都要自己拎。對Alpinist黎講如何去嘗試到達頂峰，比佢地實際上有冇登頂更重要。

引用返呢篇大陸人解釋Alpinism既文章，其實佢寫得幾好。
http://sports.sohu.com/20040809/n221442540.shtml

「在國內只有少數人知道這種登山形式，在同一時期，大部分國人還是只對海拔高度有興趣而已，很多人只對數字挑戰，但並不了解登山後面的意義，6000米爬完就想拼7000米，7000米硬上去後，就算有隊員傷亡，還要進軍8000米，不管一座山脈只是用走的上去，不管是實際上協作架好繩子之後，你推上升器一路上呼吸瓶裝氧氣到登頂，只要你達到8000米的夢幻高度，沒有人會質疑，山頂到底是在什麼代價之下上去的。」


孤高之人第一期可以睇得出架仔真係好愛mammut


Alpinism絕對強調依靠自己個人既能力、技術同經驗去克服各種困難既地形，我地要識攀岩攀冰，中途唔借助其他人既補給，盡可能採用最少既裝備同物資去快速攻頂同下撤，而且越少隊友越好，通常繩隊只會連住1至2名能力相近既隊友，去到某d情況下為求行動迅速，我地會視乎隊員能力，路線難度同風險去拆繩。甚至會出現solo獨攀情況。Mont Blanc既Bionnassay route就係獨攀既一個好例子，所以攀山有時並唔係一定要有同伴，要睇情況，好多世界級既登山家都係solo。
https://www.youtube.com/watch?v=hN3Jp6jhD5c
Mont Blanc Bionnassay route solo

其實Alpinism 可以話係一種對新手危險，但同時又對高手安全既登山方法。因為冇fixed rope既關係，攀登者一定要對自己既技術同體能充滿信心，如果你一失手fall就要靠隊友既力量同重量去支撐承托你，但如果solo fall就gg係咁先，所以點解我話登山一定要100％專注唔可以出錯。不過Alpinism亦都因為講求行動迅速，所以減低左你係雪崩同落石區域暴露既風險。大部分山難意外，都係因為行得太慢同太多人停留左係雪崩區域先會出事，所以登山係要越少人攻頂先會越安全。

咁森文太郎獨攀k2既情況有冇可能係現實發生呢？Alpinism可唔可以用黎爬8000m級既大山呢？ 答案係可以，但係做到呢個創舉既人係無乜幾個。最出名既就係登山之神 Reinhold Messner，佢係第一個完成14座8000m既人，以前d人會認為根本冇可能用呢種方法攀高海拔既喜馬拉亞山，但係因為佢既創舉，世人再次關注Alpinism呢種攀登技術。 所以Alpinism可以話係一種追求同突破人類極限既表現。


如果你覺得森文太朗好勁可以獨攀K2,咁你就要認識下Ueli Steck 佢13年solo Annapurna, 南壁 28小時登頂，Annapurna死亡率仲高過K2。仲有11年既Shishapangma south face solo,10:30hrs 都好L痴線。

好撚癲
留名

好多專業既登山者都會有一個Mountaineering CV去紀錄自己登過既山，我地會詳細寫低自己識既技能，攀石攀冰達到咩grading，之前登過既山、路線、難度同完成時間都會寫係cv到。另外Trekking係唔會計落去，所以就算你行過珠峰大本營都唔可寫落去，就等於你返工做炒散都唔會寫落cv到。有d山其實係要交cv或者通過測試嚮導先會帶你爬，Matterhorn係其中一座，其實有好多外國人都好想爬Matterhorn，但由於佢地好多都係新手冇咩經驗，所以呢座山成日出意外。至今Matterhorn已經死左超過500人以上，所以如果你冇cv或者過唔到個測試， 嚮導會評你為唔適合攀，唔帶你去。

登山係一個好講求體能同心理質素既運動，我d雪巴教練同 Alpine嚮導都同我講過話真正既高山只適合強者，體能唔夠就應該要落山唔好夾硬黎，要對大自然同自己既身體誠實，好好認清自己既能力，否則只係死路一條。登山同其他運動唔同， 登左頂，路線仲係未完成，你一定要活著完整落山先叫做真正完成。

最後，我並唔係鼓吹大家登山一定要玩Alpinism，因為呢種方式只適合訓練有素既人，而且門檻高。係大家登山之前，問問自己點解要去。呢樣野好重要，每個人追求既野都唔同，有d人攀山為左型，有d人為左挑戰自己，有d人鐘意個感覺。如果只係為左型同登頂既，我建議用fixed rope推下上升器就算，無謂辛苦自己。無論你用咩方式去選擇登山，有一樣野一定要絕對遵守。「山永遠都係到，走進山野享受攀登既過程、尊重愛護大自然而活著返黎先係登山既成功之道。登頂其實只係額外收穫黎，冇野重要得過自己條命，上唔到頂既就下次再黎。」

Mont Blanc

長篇大論9up完，遊記開始！

歐洲的阿爾卑斯登山風格完全跟尼泊爾的喜馬拉亞山相反，他們的要求比尼泊爾的高和嚴謹得多，地勢方面也比尼泊爾的trekking peak更危險更難攀。雖然阿爾卑斯山海拔低，最高的山峰只有4810m，但雪崩、冰崩，落石頻繁而且發生位置空曠。雪崩冰崩要來的時候，根本就避無可避，還有我最討厭的冰隙殺人陷阱都令到攀登難度大大提高。

[img]https://c1.staticflickr.com/3/2827/32760495714_66e279e21b.jpg[img]
有時大風雪過後，新雪會遮蓋了冰隙，型成一個完美的殺人陷阱。看似平平冇奇的雪地，只要踏上陷阱，便會跌入萬丈深淵。

分析一座山難不難爬可以由幾種因素決定，在阿爾卑斯山脈裡，法國人有自己一套的評分系統名為International French Adjectival System (IFAS)

F：容易。
PD：略難。
AD：頗難。冰雪坡度在45-65度之間，攀岩難度達到UIAA III級。
D：困難。冰雪坡度在50-70度之間。
TD：非常難。冰雪坡度在65-80度之間。
ED1/2/3/4：極難。
ABO ：我會叫ABO做難以生存 。

先從地勢開始看，坡度有多高？是不是在雪崩冰隙區域？base camp有多遠，有沒有補給？海拔有多高？8000m的雪山不一定難過4000m的雪山，以歐洲不足4000m的Eiger北壁為例，技術上已經難過一些8000m級別的雪山，聽聞從沒有香港人成功攀上歐洲3險峰北壁。（歐洲3險峰分別是Eiger, Matterhorn, Grandes Jorasses，當中Eiger更是充滿傳奇故事。) 日牌Mont-bell就是因為Eiger北壁而創辦。

究極高質post留名

有時大風雪過後，新雪會遮蓋了冰隙，型成一個完美的殺人陷阱。看似平平冇奇的雪地，只要踏上陷阱，便會跌入萬丈深淵。

LM
巴打影既相好靚

多謝絲打

位於法國的白朗峰Mont Blanc標高海拔4810m，因山頂終年被白雪覆蓋 ，而被稱為「白色少女」或是「白色山峰」，一般人攀白朗峰會從幾條線路入手。

第一，風險較低亦是最簡單的Gouter Route, PD Grade，由於是最簡單的路線，所以最多人爬，但從一開始到山屋位置也有點險要，需要通過名為Death gully的棧道，棧道落石頻繁，經常發生爆頭意外，而且山屋長期full house，要預早訂才有床位。

Death Gulley其實好恐怖，有人試過係到爆頭死左。
[url]https://www.youtube.com/watch?v=NW1vFQTDE0c
[/url]
第二，中級難度的Three Monts route，仍然是PD/PD+ Grade路線較長，需要蹤走3座山峰，坡度較高而且危險，因為經常發生冇預兆的大型冰崩，而且體力需求大所以較少人選擇，但這條路線亦是IFMGA Guide其中一條考試路線。

第三，高難度，比較險峻，需要在Bionassay arête 上蹤走的 Bionnassay route, AD級路線，體力、應變同攀爬技術需求大。
[url]https://www.youtube.com/watch?v=hN3Jp6jhD5c
[/url]

Mont Blanc Three Monts route 初段早上。

高質post 留名 好想去

D相靚到痴線

睇到一半 留名以示支持

世界級 留名

多謝咁多位巴絲打 ，今日去左攀岩好攰，聽日再寫。

睇完孤高之人覺得登山係男人既浪漫

巴打
可唔可以完左依到 分享下點樣開始同有咩特別野分享下

睇完孤高之人覺得登山係男人既浪漫

巴打
可唔可以完左依到 分享下點樣開始同有咩特別野分享下

我自己係玩Trekking先，跟住機緣巧合下入左尼泊爾登山學校攀冰。不過正式玩呢樣野既可以話係爬完歐洲d山之後，返香港再學同補課。去到歐洲真係大開眼界，覺得自己好渺小 。

如果你真係想學既，問下自己想玩到咩程度先。我自己target係alpine 8000大山同歐洲3大北壁。希望自己可以同歐洲d痴線佬抗衡下 ，拉近個距離。

我都唔知可以分享d咩，gear？？我自己拎去base camp個袋都25－30kg。

好佩服巴打
山神一定會看顧你

孤高之人fans

好佩服巴打
山神一定會看顧你

孤高之人fans

多謝巴打先
孤高之人係幾好睇既，但有時都吹大左

超高質post