[遊記] hea遊東京

想問JR買去河口湖車飛
係咪同職員講想由新宿站出發去河口湖站就得？

唔買廣域pass？
4千幾單程喎
來回8千幾
廣域好似1萬yen鬆少少
3日喎

同用pass換指定席一樣做法
只不過要俾錢咁解
不過咁樣買飛法既話我寧願用廣域pass
都係差二千円

明白，期待你的河口湖一日遊

蟹黎講 北海道嗰啲真係冇得彈
呢隻毛蟹啲膏和味到

喺cafe hea左一個鐘左右
我地就行返出去丸之內口
影下夜晚既東京車站

日頭嘅時候我覺得棟建築一字排開好有氣勢
夜晚有燈打落去既時候就添加咗一份神秘感
不過無論係朝早定夜晚黎睇
佢都係好靚好引人注目

話咁快就過左接近4個鐘
點解去旅行d時間過得咁快

今次返黎先知背面仲有倒數殘奧



影完就搭jr返上野食晚餐

搭到中途諗緊咩站落車既時候
突然醒覺我地一路都搭多左個站
根本就冇需要搭到上野駅
之前兩日白白俾多左錢同行左好多冤枉路

由御徒町駅行一兩分鐘就到今晚食飯既地方
早兩日行過間野已經想試架啦
不過嗰陣已經賣哂
所以今日就專登早少少過黎
好好彩呢個鐘數仲未洗排隊
不過入面都已經坐爆哂

眼見好多人都會叫多碗飯
不過我地就唔算肚餓
只係一人叫左一碗麵

鴨湯拉麵

湯底係醬油底
飲落感覺好清爽得黎但又有好香既鴨味
不過麵條偏幼，掛湯能力一般
如果d麵可以掛多少少湯會更好
塊叉燒(?)其實係鴨肉黎
食落好淋好嫩好滑
d旬又冇渣

鴨湯沾麵

麵條好粗，掛湯能力好好
而個沾汁勁鮮甜勁濃鴨味
濃到好似塞左好多隻鴨落個口到
食完加湯之後就似返拉麵湯底陣味
清清地好好飲
但食完飽到上心口
細食既人都係叫拉麵食算啦


個拉麵其實好好食
不過以鴨黎講
都係香港既燒鴨最好食

食完出返黎見到鋪頭外面大排長龍
起碼排咗二三十個人
如果遲左黎就可能冇得食lu~


らーめん 鴨to葱
東京都台東区上野6-4-15
https://s.tabelog.com/tokyo/A1311/A131101/13210392/

想試個沾麵

上野好多鐵路站
JR：上野，御徒町
地鐵： 上野，上野御徒町，上野廣小路
仲有京成上野站

㨂啱站出慳返唔少時間同腳骨力

御徒町唔算大站,唔算多車停

有機會一定要試下
真係好好食

咁我黎黎去去都係搭山手線啫
由酒店行去御徒町近好多

食完野去左隔離間uniqlo行街
可惜冇咩斬獲
最後只係買左條頸巾同一件衫

買完嘢就返酒店做一件好重要既事
就係洗衫喇
喺呢間酒店洗衫既好處係
你可以用房入面部平板電腦
check住洗衣機有冇人用/你d衫洗完未
唔使喺部洗衣機隔離呆等

洗衣房入面除左洗衣機
仲擺左兩部汽水機
一部製冰機、微波爐同埋一個磅




等緊d衫既時候
唯有宵夜打發時間啦
不過今日真係食得好飽
所以淨係買咗一個布甸(?)做甜品

面層係牛奶蛋糕
中間有層cream
底層係牛奶mix吉士布丁
我覺得味道有d單調
食黎食去都係奶同奶
同系列黎講呢個雖然漏d但好食d(舊年食既)


魷魚條

男朋友最鍾意既零食
因為佢鹹鹹香香之餘仲好好嚼
呢包野係喺東京地下街一間鋪頭買返黎
食落完全冇腥味

食送酒小食又點可以冇啤酒呢

呢罐啤酒好濃小麥味
不過應該唔係個個都鍾意飲

DAY 4完

成個星期都忙到嘔
weekend終於有時間打遊記






DAY 5

為左慶祝(?)男朋友終於脫離朝七晚二既生活
我地前晚臨時決定今日要黎個近郊一日遊
本身諗緊去江之島定河口湖
結果天氣預告話嗰日富士五湖一帶會出太陽

於是我地決定搏一搏
希望一睹富士山既真面目之餘
順便滿足埋男朋友想睇雪既願望

只不過前一晚佢為左清埋d手尾
又做野做到凌晨兩三點
而我又為左見證呢一刻而唔願瞓
去到朝早真係有少少唔想起身


平時睇親有關河口湖既遊記
不論搭巴士定JR都係由新宿出發
只不過由上野去新宿閒閒地都要半個鐘
變相要好早出門口
唔甘心早起身既我千搵萬搵
終於俾我搵到一個舒服少少既路線
就係由東京駅出發既高速巴士
車費同新宿出發既一樣
都係單程2000円
而車程雖然比起新宿出發既多15分鐘
但係可以瞓多半個鐘先出門口(呢個先係重點)



一上車食返個飯糰先
呢個係芝士醬油飯糰

見佢新出又咁邪惡就買黎試下
可能當時好眼訓冇心情試真佢
又或者要叮熱先好食
當刻食落覺得有d普通
無論芝士定醬油既味道都唔出


雖然天氣預告話會有陽光
但上車既時候仲落緊毛毛雨

入到郊區更加係仿如置身仙境

所以都打定輸數今日既行程會收皮


臨落車前十幾分鐘
仲係半夢半醒既時候
男朋友突然叫我望去窗出面
一望之後
嘩！不得了啦！
d雲散緊啊！！！
而且地下仲有雪啊！
係男朋友第一次見到既雪啊


望多兩望
富士山仲伸個頭出黎同我地say hi
到底我係咪發緊夢



據聞好刺激既富士急過山車
希望仲玩到既時候可以玩一次



落車之後坐低食埋上車前買既便當先


兩樣都好食既
美中不足係個飯中間唔夠熱
應該係加熱既時候整得唔好

哇個三文治睇落好正

三文治個餡係豬扒？

睇黎幾好天下~

我都想去多次河口湖 未玩佢個樂園
去住湖南莊上屋頂睇煙花 畢生難忘

係呀豬扒黎
兩邊都搽左層醬
食落唔會乾柴柴

點解唔羽田走?

我都想去多次河口湖 未玩佢個樂園
去住湖南莊上屋頂睇煙花 畢生難忘

我都想再去多次，想影下相
煙花有冇圖睇下

一黎唔想搭red eye/晨早機
二黎嗰期羽田走貴到仆街
成田來回連稅都要二千中

去程3個幾鐘都幾快... 但出市區好耐....
除非好似你咁去成田行山...

其實我唔明點解回程就算羽田走都要5粒鐘...

其實都係睇下去邊既啫
羽田出新宿嗰邊係幾快
但由成田搭出上野搭skyliner都係45分鐘
我覺得可以接受呀

去程同回程時間差咁遠係因為風向
去程順風，回程逆風
所以回程所需既時間會長好多，尤其冬天

食完見時間差唔多就出發
呢個時候d雲已經散得七七八八

識揀當然係揀靠富士山既一邊黎坐
方便隨時隊部相機去窗邊影相
但睇返d相先發覺自己淨係掛住望
成程車都冇乜影過相

係自帶仙氣既富士山

靚到成車人都不停影相



十幾分鐘就到下吉田駅


只不過點解會喺到見到月亮頭



踏切與民居


仲有小橋流水


望見咁既景象
令我諗起舊年去過既岡山
一樣都係人少少，行得好舒服


由車站行幾分鐘就到神社入口

沿途都有哂指示牌話你知點去
即使事前冇做功課都唔會盪失路


上左幾十級樓梯就到神社
隔離有個位俾人影下富士山
其實呢個位置望過去已經好靚
只係好撚多人咁解




景色呢d野我相信係越高越壯觀
於是我地就繼續行幾百級上去
但係條樓梯因為落完雪而好濕
加埋我平時少運動
呢幾百級對我黎講係幾吃力
去到咁上下都冇再影相


連埋上神社嗰段樓梯
前前後後行左接近半個鐘先行得完


臨上到頂有條小路
見到有人影相
我地又湊熱鬧影埋一份
估唔到景色都幾開揚




我地仲喺到學人chok住影相

但張相好睇唔好食
每行一步都驚自己會仆街
尤其係落返黎嗰下
如果冇人扶住既話我諗已經冼低左