因為上個Post太凌亂太多私片，所以係到續Post以正視聽：
好，終於都做完野可以合拼回應，睇哂上面既回應，睇得出大部份都係出自公務員，見到可以係返工時間咁得閒作出咁既質素既回應，我更加肯定我個Stand Point：
而家香港政府財政太過健康，太多盈餘，鼓厲左政府去維持過於冗腫並且效率低下既公務員團隊，而正正因為呢個團隊"唔炒得"、"唔壓得"、"唔改得"所在，政府需要持續地保證佢既穩定財政收入。
香港政府既財政結構係非常單一，稅基係非常之窄：
2015-2016年度財政收入：
http://www.legco.gov.hk/research-publications/chinese/1415fs03-major-sources-of-government-revenue-20150907-c.pdf
土地相關收入：1417億
非土地經營收入：3209億
其它非經營收入：150億
整體收入：4776億
就咁照數字睇，土地相關收入 (賣地，印花稅，差响) 都佔左政府30%，但假若我地再拆解當中土地相關既利得稅同埋土地相關從業員既薪俸稅，更有機會達到40%。一個政府，4成既收入都係靠土地，咁既樣生態圈底下，高地價係絕對在所難免，整個政府已經比土地"騎劫"。
曾經有人提出過消費稅，擴闊稅基，去減輕對土地財政既依賴，但對於打工既或者做生意既，係樓價高企，租金高企既大前題下，再要被額外收稅，大家既生活壓力同經營壓力將會變得百上加斤。最基本既衝擊係，全球政府都倡議減稅既大前題下，你加稅，係立刻趕走外資，呢個影響係立桿見影。
咁既然唔加得稅，我地又有乜方法可以擺脫土地財政依賴？各公務員如果可以提出另外可行既惜施同方法，我即刻收嗲。
福利開支，教育開支，醫療開支呢D民生大頭，絕對唔減得。
工程開支，未來既可以減，但弊在上果兩屆政府已經開左太大Project，無一個暫停到，果度未來需付賬項達至幾千億，係差唔多等於而家財政存備一半有多。就算你而家強行Stop哂大部份Project又得佢爛尾，亦會面對極大量既官司、申訴、索償。
減已開左頭既工程開支，係唔可行。
減未開頭既工程開支，果D係遠水，甚至係超遠水，救唔到眼前既近火。
人事開支，係唯一可以動到刀既地方。
香港需要行小政府，一個太大既政府，只會不斷咁鼓厲施政者去無所不用其極去維持一切現有既財政收入，大政府就好似無臉男咁：
小政府，施政者先會有足夠彈性，足夠緩衝，去推行大擔既政策，放棄危害香港經濟既政府收入。
關於點樣減到樓價，我前文已經講過，全世界要壓制樓價既方法得一個，就係：
房產稅 + 租務管理
呢個係不二法寶，對持貨者增加持貨成本，而並非交易成本，再對租客作出適當既保障。就算政府都知道，現時再多既辣招只係針對"交易成本"，佢買左，唔交易，你係吹佢唔漲，而投機者更會睇穿政府無左土地收入唔得，對政府博奕，不斷炒高個價，正正係而家既狀況。
政府再推再多既辣招，再多既土地，再多既綠置居，都係做戲，打不著痛點。
辣招 > 只增加交易成本，不增加持貨成本
土地 > 你增加得公營房屋土地，就要增加私營房屋土地，近期賣地成積大家睇到，越賣只會越貴，更貴
綠置居 > 單位杯水車薪，而且按規劃至落成既時間，要十年後先可以推出市場，大家仲有幾多個十年？
我就一直唔明，明明而家市場上有4成既住房，都係比投機客持有，香港唔係無屋，而係房屋集中係大地主手上，點解我地既取態係等十年後大家起多D屋黎賣，而不是想方法另到現在投機客手上持有既單位流轉翻市場上？
或者再咁講，就算十年後起多左一倍樓，按現時政策方法繼續落去，你估你買樓會快過勁過班大地主咩？大家睇睇啟德一號就知乜事，大地主D樓係一層一層咁買。
點解香港政府唔推：
房產稅 + 租務管理
係因為我地既政府架構過於龐大，而家已經入左一個惡性遁環：
我地只要放棄大政府思維，減輕政府財政支出，就可以另到施政者有動力去放棄土地財政，又不需新增稅項，呢個係我既立論！
現時政府每年放係人事支出達1035億，養左16萬人，而中層及高層既人工更高到不可理喻，跟市場嚴重脫節，香港需要既，唔係好似[0-1-1]呢一類型既小打小鬧式既Cost Cut，而係大刀闊斧式既Cost Cut，可以做到Cut 4~5成人事支出，而不影響效率。
呢到各巴打又會問：
問：比你Cut 4~5成又點？
4~5成相等於400億~500億，佔1471億土地收入將近3份1。再簡單D講，我地呢邊Cut到4~5成，果邊賣地可以賣平3份1，而又不對政府構成財政壓力，鼓厲施政者去實行"房產稅 + 租務管理"
問：有乜可能Cut到4~5成？而家已經好唔夠人用。
真係唔得？
而家公務員架構最大問題，係好難炒人。就算公務員犯一D常人都認為非常嚴重不能接受既錯誤，都唔炒得，最多唔升職唔跳Point，但大家要記住一點，就算唔跳Point都唔代表公務員無人工加，因為公務員人工係每年跟隨通漲調整，即係佢點都有人工加，加多加少而已。
