https://hk.lifestyle.appledaily.com/lifestyle/columnist/%E5%B7%A6%E4%B8%81%E5%B1%B1/daily/article/20200213/20861196/
閉門作賽馬迷罵官 - 左丁山
![](https://static.appledaily.hk/images/apple-photos/apple_sub/20200213/large/1581492159_bf2e.jpg)
二月八日沙田馬場賽馬場面(作者提供圖片)
呢個星期好勞氣,與廣大馬迷一同失落,因為唔可以入場跑馬,焗住要在屋企用馬會投注App,同樣係投注啫,有乜唔同?咪就係氣氛囉,入場可以在沙圈睇清楚馬匹動態,雙邊投注則可以有大電視睇到馬匹行圈,下注把握係多啲嘅。惡佬明上個星期六被迫在家落注,先至發覺電話戶口唔夠錢,而所有投注站閂晒門,點搞好?如熱窩上螞蟻,想講粗口鬧馬會堅離地之際,由佢教曉賭馬嘅乖仔唔知在邊處搵到資料,話7-11繳費靈可以轉錢入戶口,於是惡佬明衝落街入錢落投注戶口,跟住就收到大批老友來電話:「喂,入唔到錢喎,有冇辦法?」可見不少馬迷(包括左丁山)都唔知有呢個方法。
惡佬明兩仔爺今季馬運亨通,經常贏錢,惡佬明公子更加刨馬有道,常中冷門,令左丁山冇法子唔服,前星期越洋轉播南非賽馬,佢兩仔爺居然中咗一條派彩兩萬嘅三重彩。問星期六在屋企落注又如何呢?佢係堅持「沙圈睇馬」一族,要睇勻每隻馬行圈神態先至肯下注,但在家看有線18台,馬匹行圈畫面細,睇唔清楚,轉去睇無線J2(82台),畫面夠大,不過唔知點解,串流不順,畫面窒吓窒吓,睇唔清楚,惡佬明卒之輸到唞大氣,打電話嚟:「喂,你有冇辦法向馬會反映,咁樣賽馬好唔掂呀?」
反映乜鬼吖,你估馬會唔知咩,內地傳言話雙黃連(成藥,與黃連不同)可防武漢肺炎,雙黃連賣到斷市,香港馬會對閉門賽馬就真係啞仔吃黃連,有苦自己知。上星期六賽馬,左丁山在場內有朋友馬出賽,於沙圈聽到消息,馬會應政府「要求」,閉門賽馬進一步收緊,短期內連遴選會員都不能進場,只得出賽馬匹馬主及配偶入場,有啲朋友知道後,面都黑晒,一位鄉親索性勞氣到話現時香港由「狗官治港」!又關政府事?大家都明白,閉門作賽對賽馬事業好不利:(一)無氣氛,(二)人少易造假,(三)投注額下滑,上星期六投注額已比前一個周末少10%以上,(四)最弊係鼓勵外圍馬復甦,本來經馬會大力宣傳後,外圍馬已縮窄活動空間,但依家冇電話投注,冇投注站,冇入場,如此環境對外圍莊家非常有利,仲唔乘機死灰復燃咩。或曰,武肺當前索性連賽馬都收檔啦,咁又違反鄧小平遺願「馬照跑」噃,2003年沙士死人甚多,香港都冇停止賽馬,冇閉門賽馬,點解董伯伯得,而林鄭就如此無能?林鄭政府其實係對馬會施壓,馬會揸頸就命,唯有盡量壓縮入場人數,極度不願意叫停賽事。普羅馬迷,尤其是低下基層,多是老馬迷、公眾席擁躉,投注站常客,現在呢班人最憎林鄭令佢地賭馬不便,在街頭街尾放聲大罵林鄭防疫無方,連累賽馬!
左丁山
電郵 :mcwriter@appledaily.com