八十年前，一場完全改變世界嘅戰爭喺歐洲爆發，三年之後，呢場戰爭波及到遠東一個英國殖民地、我哋嘅屋企-香港，喺知道香港係冇可能守住嘅情況下，英軍仍然盡最後一口氣去保護呢一片土地，當中一批加拿大援軍更加係啱啱入伍、未受充足訓練、而且水土不服嘅年青人，呢批軍人，好多到今日都返唔到屋企，長瞓咗喺呢一片佢哋毫不認識嘅土地上面。
香港重光以後，每年八月最後一個禮拜一（重光紀念日）同十一月第二個禮拜日（和平紀念日）都有儀式紀念為咗守護香港而逝去的人，以示對佢哋嘅尊重同紀念，九六年之後，呢兩個活動，重有好多好多香港嘅嘢被中共港共不斷矮化，意圖抹走我哋嘅歷史同身份，一個民族一個國家一個文化，最緊要就係歷史，所謂「底氣」就係咁樣嚟，並唔係發言人講兩句就會有嘅。
今年六月，香港人瞓醒咗，唔經唔覺已經就嚟五個月，今年同七十七年前一樣，有人為咗我哋嘅香港，失去咗佢哋嘅性命，憤怒過，傷心過，發泄過，淚流過，呢場運動，我哋創造緊香港嘅未來，但係唔好唔記得我哋香港係足足有一百七十八年歷史，但係而家成個社會俾人嘅感覺係香港所有嘢係由九七年七月一號開始，其實咁樣共產黨已經成功咗大半，要滅你嘅族，先要滅你嘅根，
十月開始大家都好似開始有啲迷惘，嚟到十一月，細佬我就有個諗法，想大家喺呢個十一月戴番個poppy喺左邊心口，開始重拾我哋嘅歷史，重拾我哋嘅「底氣」，重拾我哋嘅根，重拾我哋香港Nulli Secundus in Oriente（東方不敗）嘅氣勢！
November is the month to remember
十一月，記住守護香港嘅人
英魂不朽，浩氣長存
光復香港，時代革命
