【#廣福RB有感】 假如搭巴士唔使再兜廣福邨先...
相信好多大埔人搭市區巴士返大埔,每次臨到廣福邨之前都會自動瞓醒啦,事實上大埔出市區嘅巴士線,好多都有個共通點,就係將廣福邨作為係大埔嘅最後一站。
呢點你知、我知、連Green Objects都知道,所以每逢星期六日都會係廣福邨設置路障,非常擾民。
相對於鄰近大埔嘅北區,佢地嘅巴士線係區內走線就非常多元化
,我地都唔舉例大家可以自行查下。如果連大埔區嘅對外巴士線都可以做到走線多元化,唔使話一定經廣福邨先,又有啲咩例子呢?
其實咁多條由市區返入大埔嘅巴士站之中,只係得一條 74E 線係做到不經廣福,行完吐露港之後直接行完善路,然後直達大埔中心第五期,可惜嘅係 74E 只係得星期一至五開出一班車返大埔,可以話係「近乎無」。
我地睇一睇大埔嘅地圖,其實從吐露港公路入大埔,除咗廣福邨同完善路嘅出入口之外,仲有一條連接達運道去運頭塘邨,同埋一條連接大埔太和路去太和嘅出入口。而其實呢兩個出口掉返轉分別都係有巴士線利用呢條路離開大埔,佢地就係 273C, 273P 同埋快將開辦嘅 907B,當然呢對路線都仲係只限晨早繁忙時間,其他全日時間都仲需要倚靠廣福邨呢個大埔之門~~
又如果巴士公司可以考慮一下善用其他出入口進入大埔,或者唔一定要再經廣福邨,又或者可以修改一下繞經廣福邨嘅次序,令到對外巴士線唔使再過度倚靠廣福邨,又係咪真係好一啲呢?當然試唔試都好,似乎都好難過到大埔區議會主席兼廣福邨區議員黃X嬌嘅虎口架啦~~
#今次懶得打英文 #大埔 #大埔交通 #TiTP #廣福係世界中心 #凡是不經廣福的我們就要反對 #黃BigGuilt不倒大埔不會好 #利伸筆者住係廣福邨