其實藍絲好純真，要佢地支持可能比想像中易

娘娘的法則 · 2019-08-10T06:44:16+08:00

先利申：我係一名長者中心社工，面對大量藍絲長者，好感受到運動嘅民意走向。而每日傾反送中被藍絲長者圍屌，我覺得自己成個趙子龍七進七出救阿斗咁，練就左一身同藍絲做社區教育嘅經驗。不論勇武定和理非，一場社會運動民意支持好重要，有人民支持你就係劉備義軍，冇人民支持就係黃巾逆賊。而不能不面對嘅係，往往淺黃淺藍係民意走向中係關鍵因素。因此，就算運動得唔到依部份人支持，都至少要做到佢地體諒。首先，我絕對唔會叫大家為左民意而唔好乜乜77，而其實好多藍絲真係好鬼"單純”，通常佢地有以下特性： -立場出於感性而非理性 -冇能力理解社會問題背後根因 -傾向相信權威/好似有道理嘅說話 -分辨好壞取決於嗰個人嘅態度，而非客觀事實所以，只要掌握到佢地嘅思考模式，大家願意一齊去做，影響淺藍立場比想像中簡單。 1. 唔好再叫示威者做年青人，要講專業人士由今日起，唔好再用“年青人”黎形容示威者。藍絲好盲目相信權威，年青人對佢地係負面label。醫生講一句，好過屋企人講成粒鐘。所以，我地所有論述都要強調今次運動係唔同專業人士都參與係入面。要佢地覺得：連啲平時個人咁好嘅社工都會罷工，梗係有原因啦！連啲醫生都覺得政府唔啱，咁應該有原因啦！ 2. 保持禮貌！保持禮貌！保持禮貌！長輩真係好單純！有禮貌嘅就係大好青年，林鄭只要唔講粗口就有一堆人覺得佢好人黎。所以，由其宜家示威遍地開花，一定要對啲街坊有禮貌！講真，好多街坊影相唔係鬼，佢地係真係唔知，禮貌提醒佢地係明白的。總之，示威中見到啲長輩就係咪都提醒叫佢地小心啲安全，講下唔好意思阻到你，表現出“文明好青年”嘅一面。啲狗愈激動，我地愈有禮貌，佢地就會識得分誰好誰壞。 3. 遊說時引經據典，多用生活經驗例子唔駛同佢地講咁多，你解釋極佢地都唔會明逃犯條例修訂有咩問題，咩叫違法達義，點解要雙普選。反而引一句古人說話佢地就會恍然大悟。舉例：講到警方濫權/選擇性執法，你只要講句“天子犯法，與庶民同罪”，佢就會答你“咁又係嘅” 當佢地話林鄭都冇錯，係啲人搞事，你講句“民為貴，君為輕”，佢就會覺得林鄭應該要聽民意。總之總之總之，長輩唔會在乎背後整個社會結構問題，只要覺得邊個係好人邊個係權威，就會支持邊一面。無錯，係好反智，但亦都係現實。戰友們，共勉之。