個個話有心理準備坐十碌，入面係點，想唔想知？你問我答(2)

Lm

想問下有無聽過d犯有特別故事先被判？
例如唔同一般古惑仔為錢入黎？

多謝你。
會呀，夢中仲坐緊監，
到依家我出冊13年，
我仲會發呢啲夢。
夢見判刑前一晚，
夢見斬人嗰一下，
成個人瞓瞓下喺張床彈起，
成頭成身都係汗，枕頭都濕曬，
好得人驚。

有啲錯其實就算我坐左監都彌補不了，
內疚自責會跟我一世。

犯罪手法層出不窮，
每一個入冊既故事都好曲折離奇既，
但歸根究底，
都係為錢。
唔為錢去坐監既人都有，
為愛情既有，
俾條仔呃佢認罪咁囉，
我無見到條女，
但佢條仔同我一齊拋，
係我兄弟黎既
古惑仔心中咪一個字，蠢囉
而政治犯為理想，為社會去坐監，
都係一個字，痴，
三個字就痴撚線。
古惑仔只會為錢坐監，
而且可以明碼實價添

想問下如果個探訪名單無寫個個人個名既話，佢係咪點都探唔到對方，例如想探一個曾經認識既人，不過咁啱探訪名單無名，有無方法比佢知

上個po唔係話政治犯會受人尊重多d架咩，好擔心班義士入到去被人玩死、班女手足比人玩到不似人型

探訪名單無你名，
懲教唔會俾你見佢。
但如果知佢終身/還押號碼，
可以寫信叫佢加名，
如果都唔知就只可以叫可以探佢既人代傳。


如果上述途徑都不可行，
只好放大絕了，
在囚人士絕大部份有聽收音機，
每個星期日傍晚由葉韻怡主持既萬千寵愛就更加係必聽，
自己無聽都好，同期數或同倉一定有人聽，
試試寫封信上去尋人，
或者會有奇蹟
當然呢個只係無辦法之中既辦法，
而且細節我唔清楚，
要你自己去諗，
例如：如何令葉韻怡讀你封信，
讀出左，又點樣令你個朋友知道信中主角係佢，
點樣令到就算佢無聽，都會有人傳俾佢聽等，
相信我，呢個節目對香港囚犯影響力巨大

係，
係會尊重多一啲，
裡面對讀書多既人會尊重啲，
對唔為錢而坐監既人會覺得痴撚線，
但同時亦會比較尊重，
真係可以唔駛咁擔心，
除非有利益，無利益古惑仔係連交都唔會隨便打

風化犯係咪都會講大話 扮自己係衰其他野入黎？

柳記狗會幫佢牌仔（監獄身分證，每人有一個跟身，上註閣下尊姓大名，出冊日期，定罪罪名，刑期，住倉，期數）打其他案件，例如搶劫。
但一般都會放喺特別期數，唔會放出去同大棚接觸。
因為入面個個精過鬼，唔係衰嗰樣你要吹水係極難，個個都犯罪專家，一chok就乜都穿煲，穿煲就大鑊了，我祠堂目睹過一次，姦劫鳳姐，佢淨係講打劫，無講強姦，仲報稱和字頭背景，和字頭亦正式收左人，結果穿煲後，和字頭為向大同社（裡面黑社會分五大勢力，而大同社就代表五大勢力聯合統稱）眾人交待，帶頭襲擊該風化犯人，最終條友係俾人插盲一隻眼，跟住由和字頭籌旗俾煙搵個越南仔認頭，完結事件。

係咪有代客探監

其實只係有啲無人探訪既人，
無人探訪即係無物資。
而另外有人希望可以入多啲物資，
於是自己私下deal，
用佢戶口入物資，
俾返少少報酬咁樣。
算係各取所需，
代客探監就應該無。
三唔識七，探訪有咩意思？

有無見過有人犯罪入獄之後極度後悔，例如誤殺左好親既人之類，謝謝你！

無。
後悔點解唔小心啲，
手腳點解唔乾淨啲，
檢討下次點樣做好啲，
好留破綻俾差佬既比較多

誤殺親友，例如產後憂鬱症阿媽錯手殺兒，
老漢憂病妻無人照顧，先殺老伴再自殺，死唔去，
結果都唔駛坐。

唔知天琦係裡面係點

出黎之後仲有無同任何犯人有contact，知道佢地對呢兩個幾月事件既睇法嗎？

呢兩個月好多人為社會自發走出黎，古惑仔應該覺得好難想像？

有外國籍可以去入境處申請declare國籍更變 否則香港政府會老屈你有中國籍(雙重國籍)喎

呢度係講有中國籍嘅人無得揀定係就算declare咗退咗中國籍都無得揀？

上個post有人問黑手會笑白手既問題，
關於呢個問題，
白手同黑手係會分開囚禁既，唔會一齊，
所以放心，白手唔會俾黑手蝦既。
你聽講嗰個情況應該係喺荔枝角收押所時，
嗰度係唔會分黑白手，會依據案件分類，
攞戒毒所報告既會集中一齊，
高地院既會集中一齊，
普通地區裁判法院既一齊，
呢個時候就係唯一可能黑手會笑白手既地方，
但放心，其實真正出黎行既都知道，
黑手係柒既代表，唔柒點會俾人拉？
早坐監唔係一件值得驕傲既事，
如果真係有人咁做，
就恭喜佢，恭喜佢咁早坐監，
恭喜佢坐咁多監，
恭喜佢坐多啲監啦

以我所見，
無成功案例。
但無成功案例，可能係因為無人試，
可能因為刑期短既，唔會搞，亦搞唔切，
刑期長亦未必有錢搞，
柳記係永遠唔會順順攤攤咁答應你要求既，
但只要你有刑期，又有錢駛，又鐘意搞事既，
好多都會成功。
葉繼歡係一個例子，葉繼歡食嗰份餐係一定係即炒新鮮上碟俾佢，絕對唔會好似普通犯咁食啲黃曬既菜既。
因為佢有錢，又有刑期，預計都無命出冊，所以搵律師搞好多野，令自己好捱啲。
赤柱廚房期入面有個特別餐部，就係專做呢啲大哥餐，同其他醫療需求既特別餐既。
而老老豆豆，想坐監食好啲，曬呢啲律師費不如用錢買煙，然後用煙買野食會方便而且慳好多。
坐監有煙就有野食，
根本唔需要搞咁多野

有，同一啲大家都退出江湖做正行既朋友有聯絡。
有人支持有人反對，
反對既堅持一定有人收錢做野，
然後其他人就係蠢，受人煽動。
支持既比較少，呢個係事實，
始終低學歷，吸收資訊渠道比較窄，
但佢地都係已經改邪歸正既人，
絕對唔係出黎打人既賤人，
我可以肯定。
希望大家對更生人士都多一點包容，
試試俾條路佢行，
好多人只要有路可行有希望就唔會再挺而走險了，
好似我，當日無俾機會我嗰個人，
可能我無計可施之下又會重操故業，
希望大家如果有機會，
都可以做同樣既野。

我無渠道攞到資訊。
但上個post有巴打話有親友同天琦同期數，
話天琦好好，無人蝦佢，
你可以放心。

識畫h漫係入面會唔會發達

Respect

發達就不至於，
但肯定有好多朋友，
裡面有朋友比較重要