首先，喺你被定罪/無擔保開始，
犯人欄後面就係一間細房，
細房入面有條黑暗樓梯，
喺呢度開始，就係失去自由既開始。
落到法庭樓下臭格，
一般都會有幾個大籠，
分開男女犯，老鬼細路，
同案又會分開，
（但一次過40幾個同案我未見過）
喺嗰度，大家等車返去收押所，
老鬼男去荔枝角收押
細路男去壁屋（當日未滿21歲的全部都細路監房）
女既去大欖女懲教所
好似老少都係大欖。
親友當日聽完審，
最快都要第二日先可以去探訪，
唔好諗住朝早10點判刑，
咁下午去收押所探望，
唔得既。
然後，下面係老鬼男去荔枝角收押所既流程，
女既未去過，細路年代太久遠，
記憶模糊就唔講喇
懲教車輛載住一班同囚，
駛入荔枝角收押所，
等緊你既係一隊監獄保安，
仔細同你全身踢竇，
會叫你自己脫光光，
逗起袋底，踎底起身，
電筒照射鼻孔口腔，
會係你試過最徹底既搜身，
人人都一樣，唔好話黃之鋒長毛村長，
新技安龍頭向華炎入去都係咁踢竇。
然後入去指模房。
入到指模房，一排排長椅全部坐滿人，
汗臭味腳臭味，有時直頭帶屎味，
特別夏天，因為通櫃踢竇都喺嗰度，
仲有好多道友，總之臭到仆街啦。
喺指模房，佢會俾一個編號你，
未定罪既就還押編號
已定罪就俾一個跟你再世既終身number 你，
據老屎忽話，啲number 越靚，
咩8888，9999之類靚number 重用機會特別大，
咁我就唔知係唔係了
不過的確，我number 幾靚既，都真係用左好多次
喺指模房佢會俾張紙你填探訪名單，
好似係10名額，但可以隨時落監頭簿申請刪減或增加就得，不限次數。
你無入名既人，係探唔到你既，
然後，當晚所有人都要去醫院留醫一晚，
醫院非常污糟，小強會喺天花周圍走，
而你身上當時只有懲教處派既物品，
拖鞋，上衣，褲，內褲係未必有既，
膠梳，牙刷，牙膏，手巾，一片肥皂，
同你案件有關文件等，
就係直至到有人喺出面買左物資，
黎探你，再翌日，你先會有新物質補充了。
所以，如果你上庭前，已經有被收押既打算，
你最好喺上庭前通知屋企人，
唔駛等通知唔駛等電話，
總之，上庭被還押第二日，
一早九點左右好去荔枝角收押所附近啲士多仔，
買物資去入俾你（物資豐儉由人，全套可能要過千蚊，但平平地都可以淨係買煙，洗頭水肥皂等，但我覺得，出面慳少少，俾裡面嗰個就會好捱好多）
咁你可能入去既第二日下午或第三日上午收到物資，
視乎探你入野既人早去探你
定晏去探你而定。
第二日如果無特別無身體不適，
同埋無毒癮，就會將啲人，依據黑白手、案件類型，案件嚴重性等，編去唔同既day窿（day窿等於期數，即係你逗留喺荔枝角收押所既時候，每日朝早出倉就會去逗留既地方，例如編左你去TR1，咁每日朝早出倉就會去TR1，食飯喺度，大小便都係呢度。
每日除打波沖涼都喺嗰度了。
初初入去頭幾日可能成日叫你去醫院驗尿，
放心無咩特別野，
佢係搵緊吸毒者，不吸毒人士隨便驗係問題，
就算係吸毒者，都係無問題既。
香港法律只管藏毒同販毒，
驗到你吸過毒，唯一同最麻煩既野，
就係你要繼續留喺醫院呢個地獄環境，
周圍圍繞你既係班道友典緊癮，
又臭又污糟，佢哋典癮辛苦又會依依哦哦，
除非喺你身上搜到毒品，否則單驗到吸過毒，
唔會有任何後果。
但吸毒害人影響一生，千祈唔好吸毒。
