返到屋企,仍然只係得返我一個人對住四面牆。
既來之,則安之。倒返轉嚟諗,可能原本我就可能一早已經死咗,呢幾百日係因為你好人而送比你架呢。個天比多咁多日我,我好應該要珍惜佢先啱呢。
但點解班警察想打比我會打唔通?
但點解會出現咗個我完全冇印象嘅同學?
但點解我明明比人打暈咗但閉路電視影出嚟嘅野完全唔同晒?
雖然我好想安份守己咁過日子,但唔同嘅問題繼續一個一個咁煩住我,定我冇辦法安靜落嚟。
我打開電話,進入通訊錄裡面,檢查下自己嘅電話號碼。果然,我嘅號碼同未出事之前嘅號碼係唔同咗。
我再拎出當年中學畢業時全級一齊影嘅班相出嚟,搵下當年嘅同學。
志偉同嘉怡都係到 ... 同時,有一個同 Kate 都好相似嘅人都出現咗係相片入面。相入面仲多咗幾個我完全冇印象嘅人係裡面。
屌,點解啲劇情咁老套。
根據我嘅推算,由我醒返嘅一刻開始,我已經唔係屬於我原本嘅世界。
即係話,佢地將我寄咗去一個半行時空。
曾經有一個咁嘅理論:所謂嘅改變歷史,並唔係真係去改變原本嘅歷史,而係去分裂多一個平行時空去發展已改變嘅歷史。
而即係,係原來時空嘅我已經死咗,係呢到生存緊嘅我,只不過係去咗另一個時空苟且偷生。
而因為歷史被改變,所以都有來至其他原來時空嘅歷史都被改變?冇理由!明明佢只係改變咗我死亡呢個歷史。
咁呢個 Kate,到底係咩人?
而我嘅號碼,又點解會被改變?
呢個時候,電話一震,又係志偉。
「來至 志偉 的 Whatsapp 文字信息:大撚鑊!急要你幫拖!」