哈囉,我叫阿輝阿,但我唔識講外星話。
亦可能因為呢樣野,我同唔到綁架我班人溝通。
.
「先生,你試下冷靜啲咁組織返好件事先,唔係我地好難理解你講乜野架。」坐係我面前嘅係一個警察。
「喂大佬阿,我比人綁架阿!你叫我點撚樣冷靜阿?」對唔住,我真鳩係冷靜唔到,因為我相信我嘅理智已經比人撕咗票。
「你唔冷靜,我地乜都問唔到,我地唔會幫到你。」
.
就咁嘅,我呢成世仔都未好彩過架喇,但我相信一樣野,叫做好人有好報,惡人就一定有惡報。雖然我運氣差,但我相信,只要我肯努力,將來一定可以改變自己,成為一個成功人士。
至於咩叫成功,我相信都不外乎係乜野有車有樓有女朋友。最重要,係可以受到人尊重。而我相信,從日常嘅小事出發,亦係最容易受到人尊重嘅。少則幫人搬下野,大則 .. 我冇咁偉大,我最偉大都淨係係試過讓座比人。
幫人,係常理,係人之常情。我相信我幫人嘅時候,都係一直幫緊自己。但假如有一日,你發覺你幫人嘅時候係會害到你自己。唔係講緊會消費你時間,消費你金錢咁簡單。
而係講緊你幫人,係會消費你條命。