【科幻故唔係科幻幻故/幻幻故】《今次一定救到你》(1)

飛揚

1001 回覆

10 Like 0 Dislike

41樓大王 2025-05-20 18:53:01

飛揚 2025-05-20 19:00:22

上回講到蔡家嘉搵時世傑～話約佢星期六出街喎～
單獨嗰隻吖～
仲想時世當日剪返個Undercut～因為有嘢想同佢講～要難忙嘅～
咁時世咪去剪囉～
搵到間小店～咁啱俾人裝修喎！
原來係冇交保護費！
時世想走先走先㗎～不過見髮型師阿Kit咁慘，就幫幫佢啦～
又真係剪得好好睇喎～希望仲有下次啦～
著到靚靚仔仔去買黃玫瑰～
女店員話十一支啱㗎喇～仲祝佢成功添～
其實時世都唔知成功啲乜～不過應該好快就知道～
點知喺見到家嘉之時…有道強光照到去佢身上…時世就醒咗喇！
原來係發夢…
起先睇睇手機，床頭個鏡又慢咗～
安哥仔、威姐同魚魚都約好一齊去～但今年時世想自己一個喎～
咁時世就去剪返個髮先～
阿Kit而家好好生意喇～不過都有留定位俾時世～佢咁多年都係呢個時候嚟修修個髮嘅～
阿Kit都係咁吹得～
「好彩有你咋！做我第一個客！仲要唔怕班黑社會！繼續搵我！每隔兩三個月就搵我幫你修修！唔係我都捱唔到今日啦！」
『嗯......』
「所以你係我大恩人嚟㗎！再生父母嚟㗎！」
『哈～誇張咗喇～』
即係有種講法話啲髮型師唔係靠把剪搵食，係靠把口搵食，時世信㗎！
你睇阿Kit～幾咁吹得～
不過冇所謂啦～佢咁吹時世咪咁聽囉～
都係嗰句啦～人情世故嘅嘢，出嚟社會磨得多點都識啲～
「不過講返吖...」阿Kit諗諗，「原來班黑社會係響流朵...」
『係？』響流朵？
「係吖...」阿Kit繼續幫時世鑊，「我一直都冇俾保護費佢哋～諗住都唔知佢哋會搞乜花臣出嚟㗎喇...要有定心理準備...點知有一排好耐都冇嚟搞喎...咁我好奇就問吓隔籬啲舖啦～佢哋話原來班人係響流朵！衰咗唔敢再出嚟搞事，就冇再嚟收保護費喇～」
『哦～～～』其實時世就真係唔知呢件事...亦都冇話好大興趣知...
始終嗰一年...發生咗好多事...
好多更令時世在意...一直刻喺佢內心深處嘅事...
不過阿Kit咁講時世就咁聽啦。
跟住既劇情發展又會係點呢？

準備出文

飛揚 2025-05-20 19:01:06

[Day 01－平凡時光] PART 02

坐定定咁望住塊鏡...

「呢幾年...日子真係難捱呢...」

聽住阿Kit講...

「呢幾年...總算捱得過...」

其實我都好明白...

「但係唔知...仲要捱幾耐呢...」

或者明白嘅唔止得我同阿Kit...

頭髮跟住時間一齊落下...

一束又一束...一秒又一秒...

喺鏡中望住個髮型開始成形...已經成形...

飛揚 2025-05-20 19:02:13

剪好個頭，阿Kit幫我Set好埋，就拎住塊鏡幫我照照後面：「O唔OK？」

『OK晒～』同之前一樣，都係咁好睇～

雖然話都剪咗咁多年...都係同一個髮型...

好滿意咁俾埋錢...

「多謝晒～」阿Kit雙手接過我手上啲錢，鞠個躬，「下次見喇～」

『下次見～』我向阿Kit點點頭，揮揮手...

“叮叮噹”行出Barber。

其實話阿Kit靠把口搵食...實在太失禮...太唔尊重...

阿Kit一直都係咁專業呢～

所以點解經過咁多風浪都可以屹立不倒！

飛揚 2025-05-20 19:03:31

我繼續喺街上行，行到去...花店...

「歡迎光...」老闆娘一見到我，就帶住親切嘅笑容點點頭，「嚟咗喇？」

『嗯！係吖～』我就行過去...一堆黃玫瑰面前！

「啲黃玫瑰新返㗎～」老闆娘都行到嚟我面前，「好新鮮～我幫你㨂？」

『哦哦唔使唔使～』我帶住微笑擰擰頭，『我自己揀得喇～』

「都咁多年喇...」老闆娘帶住疑惑嘅微笑，「都仲係唔信我啲花？」

『唔係唔係～』我都帶住微笑擰擰頭，望住一朵朵黃玫瑰，『只係我比較鍾意親力親為～』

「哈哈～」老闆娘帶住古惑嘅微笑，「你女朋友真係幸福呢～」

『哈...』我好認真咁喺一堆黃玫瑰之中...揀返十一支...

每年都係一樣...都係十一支...

十一支嘅花語...又係代表咩呢...

飛揚 2025-05-20 19:04:32

好用心咁揀返十一支最靚嘅黃玫瑰，老闆娘都幫我包返靚束花～

「多謝晒～」老闆娘帶住溫柔嘅微笑向我揮揮手，「下年再見喇～」

『嗯～下年再見～』下年...一年...又一年...

好小心咁護住束黃玫瑰，喺街上行，行去等巴士。

點解唔坐黨鐵？唔Call Uber？

或者係因為...我窮囉～

或者係因為...我對黨鐵反感...我對Uber反感...

咁點解唔自己考返個車牌？

或者係因為...我連對私架車都反感...

咁揸林寶囉～

係窮呀！咪話咗窮囉！你估我唔想揸林寶咩？做癩痢邊個想有頭髮呀？！

飛揚 2025-05-20 19:05:34

“吼...吼...”坐喺巴士上層，望住出面嘅風景。

由有陽光...開始慢慢變暗...天開始陰...

路程確係有啲遠呢...

望住窗外嘅景色發呆...唔知坐咗幾耐...好似好耐...又好耐...

我對時間唔算得上敏感？

又點會呢～

應該好敏感先係...每一分...每一秒...

或者係我刻意去逃避...刻意唔去面對...刻意唔去正視...

或者人就係咁呢～見得多，遇得多，喺同一個狹窄嘅地方迫太多困得太多，就會想離開...

那怕就只有一剎那...一瞬間...

飛揚 2025-05-20 19:06:42

不知不覺...

“吼...依...吱！”巴士埋站，嚟到目的地。

落車之時，個天已經灰晒，仲開始落住毛毛雨...

我撐起黑色雨傘，抱住束黃玫瑰行...一直行...

毛毛細雨...差唔多每年都一樣...就算朝早幾咁好天都好...到咗呢個時候，總係會落住毛毛細雨...

或者有啲嘢總係冇辦法改變...

或者一切都安排好晒...

真係咁咩？

一直都唔想係咁...甚至唔甘心係咁...

之但係...可以點？

我只係一個普通人...就只可喺有限嘅範圍做有限嘅準備...

飛揚 2025-05-20 19:07:46

繼續喺毛毛細雨之間...撐起黑色遮慢慢行...

一路上都冇其他人...冇途人...

同我同一方向又好...同我反方向又好...成條路都只得我一個人...

好正常～年年都係一樣～因為今日都唔係啲咩特別日子～

就只有對我嚟講...或者係對我哋嚟講先係特別日子...

行到上嚟墳場，離遠就見到有三個擔住遮嘅身影...

我離遠企定定咁望過去...

啱啱將束花放喺墳墓前嘅...係安哥仔...

離遠都睇到佢嘅肥大身形呢～簡直係漆黑中嘅螢火蟲一樣～

飛揚 2025-05-20 19:08:49

而喺安哥仔身邊嘅...係威姐同魚魚...

兩個女仔望住墓前點點頭～又指住束花擰擰頭～安哥仔又好似唔好意思咁摸摸頭～

好似好多嘢要講～或者話安哥仔啲花都係唔夠靚之外，仲會講埋呢一年發生過啲咩事～近況如何～

我就耐心咁等...離遠咁耐心等待...

時間又再一分一秒咁流逝...從來都冇停頓過...

然後又不知不覺間...等到安哥仔、威姐同魚魚向住個墓揮揮手。

望住佢哋轉身，喺毛毛細雨中慢慢離開。

都差唔多喇...

飛揚 2025-05-20 19:11:02

等到佢哋嘅背影都消失晒...我就撐住黑色遮，抱住束黃玫瑰...慢慢咁行...

與一個又一個墳墓喺旁邊擦身而過...

一路上好似好漫長...

好似行極都行唔完...

但又會喺不知不覺之間...行到嚟目的地...

我行到嚟家嘉嘅墓前，望住佢張面帶燦爛笑容嘅相：『我嚟咗喇～』

今日...係家嘉嘅生忌呢...

飛揚 2025-05-20 19:12:36

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～