【科幻故唔係科幻幻故/幻幻故】《今次一定救到你》(1)

飛揚

1001 回覆

10 Like 0 Dislike

小新之助 2025-05-26 18:58:17

飛揚 2025-05-26 18:59:57

小新晚

飛揚 2025-05-26 19:00:09

上回講到有個銀白色長髮少女入咗嚟！
時世睇唔出佢係咩國籍又幾多歲…只係覺得佢好特別～
咁就唔阻銀白髮少女睇錶喇～
不過銀髮少女睇極都唔啱喎～仲問時世有冇陀錶～
原來係要陀錶～唔怪得睇唔啱啦～
咁時世就拎陀錶俾銀白髮少女睇～
點知連鎮店之寶都睇唔啱喎！
銀白髮少女拎咗隻陀錶俾時世睇～問佢有冇好得過呢隻～
時世俾隻陀錶震撼到！肯定成間舖都冇一隻比得上！
「咁就當然啦...」長白髮少女冷冷放下一句...
『吓？』當然？
「因為隻陀錶有魔力...」長白髮少女冷眼望住時世，「可以控制時間。」
可以控制...時間？
『哈哈～Sorry～Sorry～我唔係想笑你～』不過實在好好笑～
又長白髮又黑色連身長裙又冷艷已經夠晒中二...而家仲話可以控制時間？
唔好咁啦～
然後時世就聽到...
“滴答...滴答...滴答...滴...”
突然之間...好似...靜咗好多...好似...有啲聲冇咗...
習慣咗嘅嘈雜聲因習慣而忽略...但而家唔係忽略...係停咗...
係雨聲！
時世望出窗外...停咗雨！
唔係！唔應該係停咗雨！係雨水停咗落嚟！
『點會...點會咁...』時世睇清楚啲...行埋去窗邊再睇清楚啲...
一點點雨點...喺空間中停低咗！懸浮喺空間之中！
「我係鐘錶師...」長白髮少女行到嚟時世身邊，「可以控制時間。」
鐘錶師？可以控制時間？！
跟住既劇情發展又會係點呢？

準備出文

飛揚 2025-05-26 19:00:57

[Day 01－平凡時光] PART 04

我望住櫥窗外...

『冇可能嘅...冇可能嘅～係唔係啲咩整人節目吖？鏡頭呢？鏡頭收埋咗喺邊？』我左望右望！左摷右摷！『定係幫啲濕鳩電視賣戇鳩廣告吖？』

我睇清楚啲櫥窗...再摸真啲...

『咁真嘅？咁立體嘅？一啲都睇唔出係Mon嚟㗎喎～邊間公司吖？唔會係泡菜啲濕鳩公司掛？』真...真到根本就唔似係Mon...

「人係由幾時開始...遇上難以置信嘅事之時...會搵愚蠢嘅謊言去令自己舒服啲？」鐘錶師指指玻璃門...

難以置信嘅事...愚蠢嘅謊言...

我就行去打開玻璃門...面前就有無數咁多嘅雨點停留喺空間之中...

飛揚 2025-05-26 19:02:38

我伸隻右手出去...向住大小不一嘅雨點伸過去...

我隻手...觸碰到雨點...濕咗！

我感覺到...好清楚感覺到雨水嘅冰冷！

我一直伸出右手...一步一步咁向前行...行出去...

越嚟越多雨點...沾到我手上...我手臂上...我腳上...我身上...我面上！

我身上...沾滿雨水...濕透！

全身都好清楚...感覺到...確確實實！

『點會...你...』我回頭望住鐘錶師...

我剛才途經嘅地方...開出一條雨隧道！

飛揚 2025-05-26 19:04:05

「控制時間...除咗話令時間停頓...仲可以...倒流...」鐘錶師用手指逆時針咁畫圈圈...

然後...我感覺到停留喺空間之中嘅雨點...慢慢向上升...

一路向上...一路向上！由空間之中...由地上...由我身上！

沾喺我身上嘅雨水都跟地上嘅雨上升返上天上！

而且！街上擔緊遮嘅途人都倒後行...路面上嘅車輛都倒後行緊！

所有所有都好似倒帶咁！

越嚟越快...倒帶嘅速度越嚟越快！

然後...喺雨簾之間...隱約見到...呂經理嘅背影！

飛揚 2025-05-26 19:05:08

呂經理嘅背影就向住我身處嘅方向...後退緊過嚟！

然後！又停低咗！所有人！所有車！所有嘢！連同空間之中嘅雨點都停頓咗！

控制時間...鐘錶師！

『你真係可以...』我走到去鐘錶師面前！『控制時間？』

「已經展示過俾你睇...」鐘錶師冷眼望住我，「仲要問？」

『咁可以返去幾耐之前㗎？』假如可以回到過去...

「任何時候...」鐘錶師指住我左手手上隻陀錶...

『任何時候...』我望住左手手上隻陀錶，『我想返翻去十年前！』

「返去想做啲咩？」鐘錶師冷眼望實我...

『我...』我揸實隻陀錶！『我想返去救一個人！』

飛揚 2025-05-26 19:06:17

「冇用...」鐘錶師擰擰頭，「就算俾你返到過去...都改變唔到。」

『點會吖？已經發生過一次...俾我返翻去就實改變到！』只要俾我返去...返到去嗰陣...

「已經發生咗...係冇辦法改變...縱使作出改變...都唔會影響到現在。」鐘錶師指住我，「只係俾多一次機會你...體會。」

『冇可能！我好有信...』我仲未講完...

「我唔係已經展示過俾你睇咩？你身上嘅雨水...」鐘錶師指向天上...

我身上嘅雨水...都係升返上天？

『就正正因為咁...今次我一定可以改變到！』我一定可以...一定要！

「好...」鐘錶師帶住微笑點點頭，「你咁有決心...我當然會俾機會你...」

太好喇！

飛揚 2025-05-26 19:07:16

「只要諗住你想返翻去嘅嗰段時間...」

只要諗住我想返翻去嘅嗰段時間...

「陀錶就會帶你穿越時空...」

陀錶就會帶我穿越時空...

我揸實隻陀錶...望住裡面嘅時針...

我要返翻去...

分針...

我要返翻去...嗰陣...

秒針...

我要返翻去...嗰陣...二零...

裡面嘅齒輪開始轉動...

而且仲好似聽到...“滴......答...滴...答...”聲...

隻陀錶...開始郁...時分秒針都開始逆時針轉動！

飛揚 2025-05-26 19:08:12

“滴...答...滴答...滴答...”

我要返翻去...二零一...

「你要記住...當你再次聽到滴答...滴答...慢慢變慢...停止...就係你再返翻嚟現在之時...」

“滴答...滴答...滴答...滴答...”

「好好再一次享受...」

眼前嘅陀錶開始扭曲...產生出黑色嘅...深淵一樣黑嘅...黑洞...

越嚟越黑...眼前隻陀錶...我隻手...一切...一切...整個空間...正被深淵一樣黑嘅黑洞吞噬...

吞噬...

...

..

飛揚 2025-05-26 19:09:05

.

..

...

當我眼前開始有返啲...光...

開始有返啲影像...

我開始見到...鐘...鬧鐘...

開始清楚...越嚟越清楚...

係我每朝起身都會見到嘅...電子鬧鐘...

而家幾點吖...屌個鬧鐘又慢咗吖？由細到大都用呢個鬧鐘...但又成日行慢咗...成日都遲咗響...又唔知點解大個都要帶埋佢搬出嚟...

可能我就係唔想佢咁準時嘈醒我掛...

飛揚 2025-05-26 19:10:12

唉點都好啦...今日咩日子吖？係唔係要返工㗎？

我睡眼惺忪咁坐起身...先俾眼前嘅景物嚇咗嚇！

啱啱仲未瞓醒...但而家嚇一嚇！

『唔撚係吖化？』我睜到對眼勁大！

睇清楚...四周...整間房...

呢間房...咪係我由細住到大...舊陣時一直住嘅屋企？！

我再睇清楚啲...書架...電腦...少量嘅擺設...

真係...真係我細個間房...呢度...呢度...

『我真係返翻嚟？我真係返翻嚟中學時代？！』

飛揚 2025-05-26 19:10:57

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～