【祼辭獨遊東日本(上)】信越新潟、奧羽東北、福島第一核電廠 13日遊 (極多圖)

難得上到山頂緊係挑戰人類極限 依啲地方隨時嚟一次就唔再嚟

不過放心，啲貓有人照顧，離開成個月都仲係肥絲大隻

咁就好

係時候落返山，本身諗住睇完落山仲有時間嘅就去租滑雪gear，再上去樹冰高原站滑一兩轉，點知落得山都成2點幾就算數了

邊位巴打寫嘅，趁依到人少少好認咗佢啦


排依架纜車落山起碼等咗成粒鐘



越嚟越細嘅樹冰


Father and son


套票嘅最後一程車，由 藏王溫泉站 送返大家返 山形站


返到山形站，隨隨便便喺山形站美食街到食啲嘢，山形牛ロース定食，¥1,870，質素不過不失，係細份咗啲



不出意外就要出意外了 因為山形自動車道積雪太多全面封閉，所以今朝搭過嚟果架高速巴士已經停駛，check 埋 google map 仲話 JR仙山線 要第二朝先有返，樓豬心諗仆街了，然後做定心理準備 book 酒店房依一晚滯留山形，再第二朝衝返仙台 checkout 原本果間酒店


但好彩行上山形站望望，發現仙山線仲有車，唔理3721即時上依班車



兩個鐘車程終於返到仙台，食返啲熱辣辣嘅嘢食慰勞下自己依個set好好食，極力推薦

Day 12 // 東京

東北新幹線 はやぶさ108 -> 御茶之水站 -> 麻布台 Teamlab Borderless -> 澀谷 青之洞窟 Shibuya

新幹線一直都係日本嘅命脈，連接住日本由南到北、東到西嘅不同區域，上次坐完 上越新幹線 とき311 嘅 E7系 列車，今次就嚟坐 東北新幹線 はやぶさ 108 嘅 E5系 列車，亦係我心目中最靚嘅新幹線列車 (近期 Netflix 出咗套 《新幹線大爆破》，就係用東北新幹線做主題)

はやぶさ108，坐 はやぶさ 有樣嘢好，由仙台出發之後，就不停站直衝大宮同東京


東北新幹線 營運時速最高達320km/h，依一刻正以305km/h 穿越 栃木縣 東北部嘅 大田原市


返到東京，行緊去酒店放低行李，驚見依個旅程第一次出現嘅銀杏 12月尾嘅時候居然仲有銀杏出現



行入內街尋覓日本美食，發現到一間平價迴轉壽司，就揀你啦


壽司質素高質，每碟價錢由¥138去到¥660不等

太正

我2月去個時pkm store 裝修緊好sad

我2月個時係直接仙台高速巴士直沖到去藏王溫泉個巴士站到 之後去酒店扔低行李就去排樹冰，排撚左我3粒幾鍾

不過時間上係預左排，好彩超值個日天氣超正，樹冰靚到癲

補返張圖 雖然又攰又肚餓 但睇到呢個景真心值

東京依到有個站叫 御茶ノ水站，除咗因為作為鈴芽之旅嘅場景而聞名外，依到仲係一個鐵道迷甚至遊客打卡嘅勝地，點解？因為依到可以見到好多條地鐵線同時進出站嘅景況

丸之內線、中央線快速、中央總武緩行線，三線匯聚喺到，計埋來回行車一共最多六架車同時進出


相中條橋，就係 JR 御茶ノ水站 隔離嘅 聖橋，而想影到多線同時進出站，聖橋就係你要去嘅地方


下一站：御茶ノ水站



雖則話御茶ノ水站三線匯聚，不過等咗我成個鐘，都未遇到三線同時入站嘅情景



最接近三線進出嘅一次 (張gif太大張，連登出唔到，有興趣就撳 link 睇) (順便支持下連登巴打提供嘅 image.cx 服務)
https://image.cx/g/IMG-9055.I3itM

靚天氣可遇不可求啊

終於追到live 樓主加油 好好睇

等咗成個鐘都無料到，唯有忍痛放棄，因為下一個point我係有預約嘅，就無謂遲到入唔到場

Teamlab Borderless 位於麻布台之丘，係全球第一間數位藝術美術館，利用超過470部Projector同埋鏡，形造出無邊無際嘅世界

好有心思嘅出入口設計


進入無界嘅世界，頭兩個區域會係「Animals of Flowers, Symbiotic Lives」同埋「Flowers and People, Cannot be Controlled but Live Together - A Whole Year per Hour」，啲花會配合不斷轉變嘅季節，改變生長嘅地點、重複由誕生到死亡嘅過程。如果有人企喺到唔郁，附近就會生長更多嘅花，但如果有人去觸摸佢地，啲花就會凋謝




Teamlab無明確嘅參觀路線，所以大家可以隨意參觀，而下一個係其中一個大型重點區域，叫做「Universe of Water Particles on a Rock Where People Gather」，故名思義大家係可以喺到坐嘅 瀑布會不斷打落坐喺岩石上面嘅人，而流水會隨岩丘同人們嘅存在而有所改變，不斷變化


隨時間流逝同人們嘅位置，牆上同地下都會有不同嘅變化



「What a Loving, and Beautiful World」，當你觸摸啲字嘅時候，文字所蘊藏嘅世界就會展現出嚟



「Walk, Walk, Walk」，作品入面嘅動物會不斷移動，甚至跳入其他嘅作品，實行 “Borderless” 理念

Teamlab 好經典嘅場景：Infinite Crystal World，要留意依到嘅地板同天花都係鏡嚟。依個作品係一個透過極多LED燈、累積光點所創造嘅立體作品






有部機係可以比大家揀想要咩主題，你亦可以喺電話app到揀


「Bubble Universe: Spherical Crystallized Light, Wobbling Light, and Environmental Light - One Stroke」，每一個球體都成為其他球體組織依一個環境嘅一部份，當人企喺球體前面唔郁，離果個人最近嘅球體就會越嚟越光，光再從而傳去其他嘅球體，互相影響，形成一條獨有嘅光之軌跡





「People Create Space and Time, at the Confluence of Their Spacetime New Space and Time is Born」，空間同時間因為人存在而改變，當佢地相交嘅時候，新嘅時空就會誕生


「Dissolving Light」空間，依個空間太多個作品都好似，全部都係煙+光，分唔出邊個打邊個 但一句講哂樓豬覺得依到個 feel 好似落 club 咁

「Future Park」，隔離有一間親子房，可以比大家為動物填色，然後 scan 完之後就會出現喺依到


「Memory of Waves: Flowing Beyond Border」，作品係以連續波浪所組成，無起點亦無終點，更加會跨越過去其他作品


「Dark Waves: Born in the Darkness, Return to the Darkness」，入到去眼花撩亂，小心撞親 但佢想表達世界上嘅海洋都係連埋一齊嘅，而且所有嘅波浪都係串聯嘅



「Microcosmos, Beyond Borders」，一個又一個嘅水晶球沿住軌道不停移動，感覺依到好似 Harry Potter入面嘅Department of Mysteries





「Memory of Tepography」，一個高低不平嘅空間，大家需要穿越山間嘅景色、草叢去探索




行完一圈出返嚟，感覺就係真係好靚，亦都係絕佳嘅打卡地方 不過好想問，點解 Teamlab 要改到啲作品名鬼咁長。。。。 仲要有部份作品會喺同一地方出現，而且仲要有唔同名 知唔知事後做資料搜集勁辛苦。。。

冬天要捉緊聖誕嘅尾巴，有好多聖誕嘅燈飾只要一過咗聖誕，就會即時完結。而澀谷嘅 青の洞窟 Shibuya 就只會喺 12月6號 至到 25號 點燈

青之洞窟係聖誕季節時，由 代代木公園 開始到 澀谷公園通、一路延伸約 900m 嘅浪漫點燈活動。起源自2014年喺中目黑舉辦嘅第一屆點燈活動，隨後喺2016年就將地點搬到澀谷舉行

位於 澀谷 嘅 青の洞窟 Shibuya



依個水晶球仲會化身成一個雪人


話明係「青」の洞窟，當然就係以藍色做主題，相比仙台嘅 光之樂章 以橙黃色做主題，大家各有特色



一路向馬路延伸

睇完聖誕點燈都見肚餓，既然人都返到嚟東京，作為香港人就當然去試試我地香港嘅過江龍：譚仔三哥 味道唔似嘅話就拆佢招牌！

譚仔三哥喺 2022 年初正式登陸新宿，舖頭內外都沿用返香港風格 (有無覺得好似望住 中環威靈頓街 果間譚仔三哥？)，並且字都係寫返繁體中文




不過始終日本同香港唔同，喺日本搵同香港一樣嘅原材料有難度，而且亦要在地化配合日本人口味，所以餐牌上嘅款式同用料會同香港有啲唔同 不過！湯底我覺得還原得好似！ 麻辣小辣堅係同香港一樣！

食完晚餐，鳩行下新宿範圍

Day 13 // 東京

淺草寺 -> 東京成田機場 -> 快運夜機 UO651

樓豬喺10年前嘅 2014年暑假，第一次踏足東京依一片土地，當年嚟咗東京7日，但因為行程緊逼，樓豬親手改走咗 淺草寺 依一個眾人皆知嘅景點 所以10年後嘅 2024年，樓豬依一轉日本之旅，其中一個目標就係要去返 淺草寺，補返10年前嘅遺憾

早晨，新宿





淺草寺 起源自 628年，兩個漁夫 檜前浜成 同埋 檜前竹成 兩兄弟，喺海到捕撈到一座佛像。鄉士 土師真知 認出佛像刻畫嘅聖觀音形象，就因為咁而皈依佛教，並且將自己屋企改建成寺廟，以便村民供奉果座佛像

自857年 慈覺大師 圓仁 建造咗一座代替本尊佛像供人參拜嘅觀音像，淺草寺就慢慢發展成宗教場所，直至去到942年，平公雅 去咗參拜，祈求被委任成 武藏國 嘅 武藏守，如願之後就返嚟起咗座好大嘅 七堂伽藍 還願，而大家熟悉嘅雷門、寶藏門，都係喺依個時期建造嘅

但淺草寺其實經歷過好多次破壞被毁同重建，包括1041年嘅地震、1079年嘅火災、1945年嘅第二次世界大戰美軍嘅東京大空襲 (Operation Meetinghouse)行動等等，淺草寺最少重建咗大概20次


淺草寺 雷門，正式名叫做「風雷神門」，1865年火災被毁後，喺1960年由松下電器創辦人 松下幸之助 出資重建，左邊有風神像，右邊就有雷神像




雷門大燈籠底部


穿過雷門，就會進入表參道商店街範圍




淺草寺 寶藏門 (仁王門)，喺1964年由實業家大穀米太郎夫妻捐款重建。原先寶藏門係叫 仁王門，因為喺門嘅兩旁設有仁王像，但喺昭和年代再重建先改名叫 寶藏門

淺草寺 本堂，係日本嘅重要文化財產，現時嘅本堂係經美軍 東京大空襲 之後重建嘅產物，大家可以喺本堂前面插完香，再入去參拜



本堂內部佛龕


天花嘅「天人散華の圖」


本堂內有大量不同款式嘅御守


出返嚟可以望到五重塔，高48m，內部有收納供養靈位牌嘅靈牌殿，而塔嘅最上層有斯里蘭卡傳入的舍利子



淺草寺おみくじ，提提大家淺草寺凶籤比例高達30%，所以大家考慮清楚先抽，但即刻抽到凶籤，都可以綁喺寺內化解


淺草寺境內嘅 淺草神社，以及二天門



淺草寺係可以直接望到 Skytree 晴空塔


行返出淺草寺雷門，有好多人力車喺到，大家可以比錢坐下，由佢地帶你遊覽淺草寺一帶

行完淺草寺，去食埋上半部旅程喺日本嘅最後一餐，之後就差唔多時間準備入機場


喺新宿隨便揀咗間中州屋台拉麵，果然好有福岡特色，因為有明太子



返去 京成上野站，登上 Skyliner 返去成田機場



唔係好想上去離開 (雖然過幾日我又會踏足多次日本國土)


成田依幅牆好正


UO全新「行刑架」，幸好樓豬從未需要被行刑



再見日本，樓豬過幾日再飛過嚟

上半部 13日嘅行程暫告一段落 今次總算開拓咗啲人認為日本最難去嘅區域：日本東北，都叫做係樓豬其中一個成就啦

今次淨係去咗東北嘅3個縣，福島、宮城、山形，睇下之後會唔會有機會挑戰埋 青森、秋田、岩手

不過去任何地方之前，都要先出埋下半部 14日東京近郊、追逐富士山遊記 依一刻我仲未寫，等等我會快馬加鞭寫㗎啦寫㗎啦

青森去左4次但仲有好多地方未去
種差淺蟲下北十和田湖津輕龍飛崎十二湖呢啲

係咩驅使你去咁多轉青森

啱啱追完 po

樓主寫得好仔細，期待下半部嘅遊記