【祼辭獨遊東日本(上)】信越新潟、奧羽東北、福島第一核電廠 13日遊 (極多圖)

大家好，又係樓豬我了

講到去日本旅行，大部份人都即時會諗到去東京shopping、京都睇古都、沖繩自駕遊潛水、九州環島、甚或乎去北海道享受雪國滑雪體驗

但大家似乎好少諗到去日本本州嘅東北地區 (亦稱奧羽地區)，包括宮城縣、山形縣、青森縣、岩手縣、秋田縣，以及受到2011年311大地震嚴重重創嘅福島縣，一共六個縣。當年東日本依場九級大地震，導致海嘯侵襲位於福島嘅 福島第一核電廠，最終引發核災

明明9月先去完轉北九州，但樓豬份工實在chur到就嚟變人乾 最終決定祼辭情況下，促成咗多年嚟想去 福島第一核電廠 嘅決定，亦都比自己喺年尾有 27日時間喺日本放鬆下，但依 27日將會分開 13 + 14日兩段行程，中間聖誕會返一返香港幾日

27日入面，樓豬會依序去 新潟、福島、宮城、山形、東京都、神奈川、栃木、山梨、靜岡 九個都道府縣，睇齊哂 紅葉、銀杏、白雪、樹冰、日出、日落、富士山、核電廠、花火，兼且體驗埋日本跨年、新年初詣、雪地自駕體驗

今個post會先講上半部喺新潟、福島、宮城、山形、東京都 13日嘅行程，而當中嘅 福島第一核電廠見學 行程之前已經出咗post

【前進福島核電廠】我與311核災現場嘅距離
https://lih.kg/3892126


例牌出啲相比大家感受下先

東京 六本木丘欅坂 聖誕點燈


新潟 新潟市水族館 マリンピア日本海


新潟 清津峽光之隧道


新潟 彌彥神社


福島 鶴ヶ城 (會津若松城)


福島 大內宿


福島 JR只見線 第一只見川橋樑


福島 海藍寶石水族館


福島 福島第一核電廠


福島 震災遺構 浪江町請戶小學


仙台 震災遺構 仙台市荒浜小學


仙台 Kirin仙台工場見學


仙台 松島


仙台 光之樂章 聖誕點燈


宮城 藏王狐狸村


山形 藏王樹冰


東京 新宿銀杏


東京 麻布台 Teamlab Borderless


東京 淺草寺 雷門

以下係樓豬過往遊記，還請多多支持

【遲來的關西櫻花遊記】大阪、京都、奈良9日櫻花之旅 (多圖)
https://lih.kg/3472957

【北九州出走之旅】福岡、長崎、熊本、宮崎、大分9日遊記 (極多圖)
https://lih.kg/3796214

【前進福島核電廠】我與311核災現場嘅距離
https://lih.kg/3892126

留名

上半部嘅旅程，主要係跟據第七日嘅 福島第一核電廠見學 行程，再編排其他地方行程，因為核電廠一個月先得一團見學 而上下部分都係採取東京入東京出，再接駁新幹線嘅方式

Part 1：到埗東京
- Day 1：快運早機 UO870 -> 東京成田機場 -> 六本木聖誕燈飾

Part 2：新潟自駕
- Day 2：上越新幹線 とき311-> 新潟市水族館 -> 新潟縣護國神社 -> 白山神社
- Day 3：Times 租車自駕 -> 清津峽 -> 彌彥神社

Part 3：福島復興
- Day 4：福島 鶴ヶ城 (會津若松城) -> 大內宿 / 高倉神社
- Day 5：福島 JR只見線 第一只見川橋樑 -> 飯盛山 (會津螺旋堂 / 白虎隊自盡之地)
- Day 6：福島海藍寶石水族館 -> 富岡町
- Day 7：福島第一核電廠見學團 (東京電力廢爐資料館 / 福島第一核電廠 / 震災遺構 浪江町請戶小學 / 原子力災害伝承館)

Part 4：仙台 / 宮城 / 山形
- Day 8：震災遺構 仙台市荒浜小學 -> 311 交流紀念館 -> 仙台城跡
- Day 9：Kirin 仙台工場見學 -> 松島 (瑞嚴寺 / 五大堂 / 円通院) -> 仙台 Pokemon Centre
- Day 10：藏王狐狸村 -> 大崎八幡宮 -> 仙台光之樂章聖誕燈飾
- Day 11：藏王山頂 (樹冰 / 地藏尊)

Part 5：回歸東京
- Day 12：東北新幹線 はやぶさ108 -> 御茶之水站 -> 麻布台 Teamlab Borderless -> 澀谷 青之洞窟 Shibuya
- Day 13：淺草寺 -> 東京成田機場 -> 快運夜機 UO651

Day 1 // 東京

快運早機 UO870 -> 東京成田機場 -> 六本木欅坂聖誕燈飾

一如以往早大約兩個鐘時間到機場，今次樓豬我依個老人家就試下科技嘢，用自助checkin機+自助寄倉 (以往唔想煩會排人手)，終於體驗到咩係速度 5分鐘處理好哂所有嘢，幾驚又要好似9月果次飛福岡咁，等到要職員叫航班number優先checkin

UO870，用嘅係當時新機落地兩個月嘅 A321NEO (B-KKJ)


大人所謂嘅「出去走走」，就係要上飛機飛出香港


成田到著 話說我飛東京從來都唔介意成田定羽田，成田係遠啲但最多都係坐程 Skyliner / NEX


樓豬對成田依塊航班資訊板比10個like，好有舊式揭牌式資訊板嘅感覺


聽連登鐵道post巴打講，京城電鐵 Skyliner 出市區係快過NEX，所以我都唔執輸搭咗 Skyliner (兼且 Skyliner 平啲)，而 Skyliner 採用嘅係第3代 AE 形電車



想方便啲下一日搭新幹線，所以今次選擇直接住 Skyliner 嘅終點站：上野，貪佢交通方便 安頓好啲行李，落酒店樓下食個快飯，就準備出發去樓豬第一個景點

12月嚟日本，邊有可能唔去睇聖誕燈飾係咪先？東京最出名嘅聖誕燈飾一定就係六本木丘欅坂嘅聖誕點燈，成條道路用上超過70萬顆藍白色燈作為點綴，配上背景嘅東京鐵塔，永遠都成為啲女仔打卡上IG嘅勝地

隔離毛利庭園居然仲有紅葉睇


遊客聖誕打卡勝地 東京鐵塔夜晚8點開始仲會有燈光效果


除咗地面，仲可以上天橋影返落去


就咁睇落好似無乜遊客？少年你地太天真了 每一次綠公仔，個個都飛奔出馬路影相，多人到要有工作人員拉帶欄住


欣賞完聖誕燈飾就返酒店休息下，準備第二朝一早出發新潟

留名支持

留名

Day 2 // 新潟

上越新幹線 とき311-> 新潟市水族館 -> 新潟縣護國神社 -> 白山神社

小弟份人比較心急啲，所以小弟直接揀上越新幹線中，最快到達新潟嘅班次：とき311，只會停東京站、大宮站，之後就直達新潟站 (每日只有一班係咁)，不過自己就要由上野搭返過去東京站上車

09:12先出發嘅とき311，我早咗40分鐘到


上越新幹線採用嘅 E7系 列車，2019年開始投入服務取代 E4系 列車行駛


仲影？上車啦


穿越南魚沼市嘅隧道，映入眼簾嘅就係一片白色嘅世界 新潟係其中一個會落豪雪嘅縣，所以新潟有唔少好出名嘅滑雪場


到埗新潟，放低行李去酒店後，就直接上巴士出發 話說我見到架巴士寫住 “Non-Step Bus”，我仲心諗日本人嘅英文係咪差到一個點 點知原來係樓豬我自己做咗小丑，個字原來解做 “低地台巴士”……


開始新潟嘅第一個景點：新潟市水族館 マリンピア日本海

新潟市水族館係新潟5個水族館當中、兼面向日本海規模最大嘅水族館。水族館喺1967年開幕，館內飼養咗大約600種共3萬隻海洋生物


一入門口有幾個小型嘅缸，孕育部份小型魚類




行入少少可以觀摩一下用嚟探索佐渡海峽嘅遙控潛水艇



我會稱依條魚叫做生癌魚 個頭腫咗一舊咁



每一個水族館都有佢嘅主水缸同展覽區，而新潟市水族館就係依一條短短嘅拱形隧道，入面有好幾條魔鬼魚游嚟游去



Hi Dory, are you finding nemo？


水族館每日都會有海豚表演，不過我依一日嚟係平日，所以觀賞表演嘅人流唔算好多 睇親海豚表演都唔明到底佢地係點練到咁聽指令，我連自己兩隻貓都訓練唔到。。





除咗睇生活喺水入面嘅生物，戶外仲有個海獅海豹同企鵝專區 隻隻都肥絲大隻，睇嚟依到好食好住




喺依到見到一樣幾特別嘅嘢，我無估到原來水族館都需要利用造浪裝置去製造人工浪



行得七七八八就出返去，喺 souvenir 到見到有個 生どら焼 ，280円唔太貴就買咗牛乳味嚟一試，不過普普通通唔推薦

lm

東北係連登仔樂土上連登無人去東京大阪北海道嫁

加上依家有直航仙台 好似多咗巴絲打去 識玩嘅東北係好玩

水族館隔離5分鐘路程，就會係 新潟県総鎮護 新潟縣護國神社，行完水族館未有巴士不妨過嚟參拜一下

新潟縣護國神社 係 新潟縣嘅總鎮護，護國神社建於 明治元年 (1868年)。護國神社係日本神社嘅其中一種，主要懷念因國事而殉難嘅國民，所以當初護國神社係叫做「招魂社」。去到 昭和14年 (1939年)，內務省先將 招魂社 改名做 護國神社

平和の礎



鎮魂慰靈之碑


拜殿



繪馬


神社內仲有一個 明治大學戰沒學徒忠靈殿


喺依到買咗今個旅程第一個御守：麻御守 堅係靚

返返去市中心，隨便行咗入巴士總站隔離嘅foodcourt，食返個丼飯先 平平地嘅價錢有碗丼飯，加一碗用蝦熬出嚟嘅麵豉湯



普遍神社喺冬季期間，關門時間會比夏季再早啲，食完碗丼飯就好快啲出發去下一個神社：白山神社⛩️

頭先果個係新潟縣嘅護國神社，依家依個白山神社就係新潟嘅總鎮守，已經有超過1000年嘅歷史。神社主要供奉菊理媛大神、伊邪那岐大神、伊邪那美大神。菊理媛大神係締結男女姻緣嘅神，係「結緣」神力強大嘅神明

正殿前門


白山神社有塊Hello Kitty造型嘅掛繪馬板


祈求愛情美滿，只要寫上你個名，同棵銀杏樹祈禱再掛上去就可以


發覺白山神社都同幾多嘢聯乘，除咗 Hello Kitty之外，仲比我見到聯乘 JFA 日本足總 出嘅御守 唔洗講咁多即刻買返個


白山神社島居，依一刻12月中已經準備好新年初詣嘅擺設

依日基本上都係落雨咁濟，所以行完啲景點都無點周圍行，淨係行下商場同車站附近嘅地方就算

新潟站對出馬路有塊地標牌，雖然就無乜創意，但夜晚配合地面反光咁都唔錯


新潟站附近嘅街道


尋尋覓覓搵到間食叉燒拉麵嘅舖頭，叫做 だるまや NIIGATA BASE，主打就係鋪滿叉燒喺面嘅拉麵，不過略嫌佢乾得制又唔太冧，扣咁啲分

LM
東北同北陸真心好玩

LM

靚相

但好多人都忽略哂依兩個地方

Day 3 // 新潟

Times 租車自駕 -> 清津峽 -> 彌彥神社

新潟縣佔地面積超過12,000平方公里，係日本第五大縣市，有見及此景點都分得好散，並且交通上絕對唔易搭車，無車牌自駕隨時轉幾次車再行返半粒鐘路 行得嚟都天黑了

所以樓豬一早喺 Times 到租咗一架K Car仔，朝9晚6即日還車，方便自己去今日嘅行程

Toyota Roomy，AT車，996cc，4WD，雪胎 (雪地區域租車標配，唔洗加錢)，連最重保險，盛惠 ¥10,450，一個人好夠用


架車仲好新，ODO先得4,335km


從新潟站出發揸咗兩個幾鐘，144.6km 長途駕駛過後，終於嚟到真正嘅雪國 初嘗雪地駕駛，去程感覺還好，但泊車需要做足措施，拉起前後雨撥，淨係入P波唔好落handbrake




清津峽位於新潟縣十日町市，全長12.5km，喺上信越高原國立公園嘅一部分。佢同富山嘅黑部峽谷，同埋三重縣嘅大杉谷，並列日本三大峽谷。自1996年建成咗條750m長嘅隧道，以及2018年越後妻有大地藝術祭翻新成「光之隧道」後，清津峽就成為好多遊客打卡嘅地方

清津峽雪景



買張入坑券，正式跌入迷離隧道



一入場會先有個簡介介紹光之隧道，同埋有座模型比大家睇下不同見晴所相對應嘅位置


第一見晴所，就只係一個毫無裝飾嘅見晴所，比大家行近望下出面山谷景色



第二見晴所 「窺」 “Invisible Bubble”，牆壁黑白班馬紋設計，配上中間嘅。。。。公廁 喺入面係望得到外面嘅


第三見晴所 「滴」 “Drops”，好多面鏡配上紅色光源


嚟到光之隧道嘅重頭戲，第四見晴所「鏡池」”Light Cave”，顧名思義依到就係天空之鏡，遊人可以經水池兩旁行去最盡頭打卡 (不過係會濕水嘅)



一個細小地方，竟然喺到撞到兩對香港情侶 多謝其中一對情侶幫樓豬影咗張好靚嘅打卡相 (之後旅途所有搵途人影嘅相都炒撚哂車)

Push

lm 想睇樓主裸體辭職多啲

已經多左好多人

尻 fing fing 咁行入老細房拍枱辭職 自由自在

我係唔會學巴打你咁著衫辭職嘅！