【祼辭獨遊東日本(上)】信越新潟、奧羽東北、福島第一核電廠 13日遊 (極多圖)

lm

行返出嚟，我地再感受下依個雪地世界



由於景點距離遠，揸車都要唔少時間，9點零出車，睇完清津峽都已經晏晝1點半 食個熱包填下肚就盡快上路


車外風景



回程揸去彌彥神社，遇上剷雪車沿路清雪，所有車都要慢駛跟隊尾，時間大失預算 但如果無剷雪車開路，真心隨時冼到炒車。。 落雪路面唔好隨便轉線，兼要跟軚痕行，如果唔係條胎隨時唔咬地就898

由於我去果間 Times 無 ETC卡租，所以每一次上高速都要拎高速道路通行券，落高速時插返入部機就識自動計錢，是日來回過路費高達 ¥6,860 (= HK$343)

彌彥神社位於蒲原郡彌彥村，已經有超過2,400年嘅歷史，供奉住開拓越後地區嘅神祇 御彌彥樣，成座神社比樹林包圍住，有種寧靜神聖嘅感覺


彌彥神社 大鳥居，位於JR矢作站附近，1982年為紀念上越新幹線通車而建造，而佢亦係日本最大規模嘅紅色大鳥居


彌彥神社 一の鳥居，臨神社關門之前一分鐘終於趕到


小橋流水 「玉の橋」


二の鳥居 通往拜殿嘅林蔭大道


拜殿



繪馬奉納所


展出新潟不同造酒廠嘅酒釀



平安揸車返到新潟市中心，不過由於之前剷雪車作業，加上回程超級塞車，又要去埋入油，導致遲咗15分鐘先還車，逼住用香港電話number打電話去 Times 到拜托佢地等我15分鐘🙈



揸咗全日車，午餐又得個熱包落肚，晚餐食好啲慰勞下自己，小朋友先會做選擇，我牛舌同蠔全都要！

LM 支持

Diu 想更新遊記，但完全upload唔到圖係發生咩事

建議執好相 upload咗先開始打文
半夜upload速度快啲

走出天守外，對面有一個小小嘅庭園，叫做「茶室麟閣」。依個茶室係會津藩主蒲生氏鄉個仔 千力休之子少庵 為咗要振興茶道文化，而喺會津滯留期間建造嘅。天守嘅入場券包埋茶室麟閣嘅入場券嘅

茶室麟閣由此路進



不過喺到品嘗一杯茶需要花費 ¥600，我對茶無乜興趣就行入嚟睇下就算

我相執好哂，文暫時打到去 Day 10，係差在未upload相

睇嚟要凌晨upload定哂啲相，先慢慢排返個版

Toyota Roomy唔係K car
車牌黃色既先係K car

學到嘢了 原來車牌都有分顏色

咁樣黃色
你係日本一定見過

順帶一提 黑色係商用k truck
綠色係商用載客車(的士/巴士)
非法載客取酬嘅白牌私家車真係白色牌

遊覽完 鶴ヶ城，就準備出發去福島另一個好著名嘅景點：大內宿 本身我係想搭巴士去 JR西若松站 轉鐵過去，但我剛到埗福島果時我唔記得喺會津若松站買「大内宿共通割引きっぷ」 搞到我又要返會津若松站一轉

「大内宿共通割引きっぷ」價錢 ¥2,200，包咗 會津鐵道 西若松站 <-> 湯野上温泉站，再加 猿遊號巴士 湯野上温泉站 <-> 大內宿 嘅四程交通。如果從會津若松站出發，只需外加兩張 JR 會津若松站 <-> 西若松站 嘅車飛就得



到達 會津鐵道 湯野上温泉站 之後，轉左就會見到 猿遊號巴士 上車點，不過要留意，有預約嘅人係優先上車，架車有空位先會比無預約嘅人上，所以有買飛只係比你有權搭車，唔包你一定上到車


小弟作為 猿遊號 來回都有預約嘅人，當然快人一步上車 預約網址自己搵啦



到達大內宿


大內宿有一間餐廳好出名，佢就係 三澤屋，專食 大蔥蕎麥麵



三澤屋 嘅 大蔥蕎麥麵，特色就係用一碌大蔥做筷子，兼碌蔥仲可以食埋 不過食完就知道完全唔岩我口味，樓豬絕對覺得成碗麵係難食，硬係覺得個麵有陣怪味，勉強食咗一半就投降，成間舖最正常就係。。杯茶咯。。。

未睇不過多謝你個行程先
準備去東北

早啲放棄碗麵，早啲出去睇景好過 大內宿基本上就得一條直路，兩旁全部都係賣小食、手作手信嘅舖頭


路上遇到可愛嘅狗勾金毛


一路行去盡頭上斜坡，就會到大內宿最正嘅打卡位 喺依到就可以睇出去商店街，見到屋頂鋪滿雪嘅景象，不過依一刻唔算多雪




大內宿中段位置，大家會發現有個高倉神社嘅一の鳥居，但又唔見神社喺邊。。 其實神社再要經鳥居行多五百米先會見到，個鳥居好似就係專登話比人知神社其實一直都存在咁



穿過雪地就會見到神社入口


高倉神社周圍比樹林包圍，格外寧靜，而神社建於大約17世紀，係大內嘅鎮守，一直供奉住高倉以仁王


高倉神社 二の鳥居


神社就係得眼前咁大，無人，無地方寫御朱印、賣御守，上嚟嘅旅人通常都嚟祈求旅途安全



返返去 湯野上溫泉站，等返個半鐘 會津鐵道 返會津若松站(係啊 Weekend 係無 16:08 嘅班次㗎，得返 17:09 果班)，所有人都要等依班，等到天都黑鬼埋

山都係要有雪先靚


湯野上溫泉站隔離有個足浴溫泉，等車可以去浸下


等，寂寞到夜深


老實講，會津若松附近可以選擇嘅餐廳唔多，所以為免中伏樓豬都選擇返啲大路少少嘅 カルビ大将，最低 ¥2,780 就有食べ放題任食


一人獨佔一個包廂


最平嘅套餐選擇不多，建議大家揀高一級，不過樓豬一個人食就無謂了 食飽自己，就返去休息準備聽日打大佬

我覺得我啲行程永遠異於常人 因為都幾chur

Day 5 // 福島

福島 JR只見線 第一只見川橋樑 -> 會津螺旋堂 / 白虎隊自盡之地

JR只見線一直被譽為日本最美鐵道之一，由第一只見川橋樑觀景點望出去，可以影到 JR只見線列車 通過 第一只見川橋樑 嘅畫面，配合周圍嘅環境，令好多人慕名過嚟打卡

不過要影到一張打卡相，除咗講天氣講運氣之外，仲要做定功課先好去影

JR只見線 上行 同 下行 各自都得六班車，由會津若松出發下行會自動減少兩班上行quota，去程自身動用一班車quota，然後冬季日落時間超早，基本晏晝四點後所有車都無得影，無咗五班quota，回程再動用一班，自己計計你有邊班影到


樓豬由會津若松出發，搭 06:08 頭班下行班次 (即係 07:23 經過第一只見川橋樑果班)


從車尾望出車外雪景


雪景、綠葉、紅葉 三景合一


到達會津宮下站 (大家唔好以為 會津西方站 喺直線距離近啲就喺前一站落車)




第一只見川橋樑觀景點 位於 道の駅 尾瀬街道みしま宿 隔離，兩地相隔大約 2.8km，步行需要行最少30分鐘，但如果你好似樓豬咁，坐頭班下行班次嘅話，你可以趕得上一日只有一班嘅巴士上道の駅

一日只有一班巴士由 08:10 出發，盛惠¥500，而回程巴士係按需要行駛，如果你無喺道の駅預約回程巴士，就唔會開回程班次

到咗道の駅，向隧道口方向上山，冬季上山好冼，可以準備冰爪



山上有三個觀景點，分別係最低嘅B點，中間嘅C點，同最高嘅D點，大家可以睇自己喜好揀拍攝點 現場有唔少當地人都揀D點影


喺 D 點影 09:01 只見線 下行 第二班次，當日天空幾大霧，但好彩近景無乜霧 仍然能夠影到紅葉白雪，配霧中嘅只見線


轉個頭就落咗 C 點影 09:20 只見線 上行 第三班次，司機好人嘅話會喺橋上面慢駛比大家影耐啲，而列車顏色就講大家運氣


比大家望下空景紅葉景況，依到係B點，清晰度會比之前高啲


順帶一提大家冬季嚟影只見線，最好真係有咁早得咁早，因為中午開始融雪了

喺道の駅食返個飯先，會津地雞親子丼，係我食過嘅雞丼入面，最好食嘅一個，雞肉鮮嫩！


回程我無預約巴士，所以我係行返會津宮下站嘅，全程都係行馬路邊


行返 會津宮下站 中途會遇到嘅 鐵橋三兄弟，分別係「長男」只見線 大谷川橋樑、「二男」縣道小栗山宮下線 宮下橋，同埋「三男」國道252號 新宮下橋


之後就坐返 13:03 只見線 上行 第四班次 返上會津若松，由於 會津宮下站 係無人站，記得返到 會津若松站 需要補票

就係獨遊先chur得起
我自己一個都係朝早7點就出門口跑行程

真 有其他人一齊就會變悠閑團 訓醒先再算果種

仲有無人記得喺第四日嘅行程中，喺 鶴ヶ城 曾經睇過一塊有關於 白虎隊 自盡嘅歷史？依家樓豬就準備出發去 飯盛山，依到除咗有 會津螺旋堂 外，仲係19位白虎隊成員自盡嘅地方。

飯盛山依到有條好「貼心」嘅電梯比人輕鬆上山，但其實係要收費嘅 好似係大概¥200


上到頂就會見到一個個墓碑同埋紀念碑



沿住路牌行落去就會到達白虎隊自盡之地，不過老實講落到去我都睇唔出實際喺邊到



之後行過隔離，就會見到一個奇特建築，就係 會津螺旋堂 (さざえ堂)。會津螺旋堂喺1796年建成，高三層，外觀睇落好似無乜特別，但其實入面係一個雙螺旋樓梯嘅結構，你會不斷轉圈行上去，上到頂就相反，不斷轉圈落返嚟，但上去嘅人係唔會遇到落去嘅人

會津螺旋堂嘅外觀




雙螺旋樓梯結構，行到上頂樓後可以行過對面切換下行樓梯，而上落過程你將會見到33座觀音像，被視為西國三十三間佛寺巡禮嘅象徵




會津螺旋堂 同 會津若松站 其實一條直路就到，不過要行30分鐘，既然巴士有排等，就直接行返去仲方便 途經一間勁大嘅超市，順便買啲串燒返酒店做自己晚餐

會津西方站落會有咩問題？中間封咗路？