青年軍時期效力理文的尼高拉斯,上場「足總盃」4強「倒戈」攻入1球,助深水埗爆冷晉級,他稱感覺非常特別:「依個入波真係好緊要,可能係我人生最難忘一球,估唔到最後可以贏埋場波,好多謝屋企人、教練團同隊友一路以嚟都咁支持我。」
談到是役再與「黃黑軍團」交鋒,他揚言全隊在打入「足總盃」決賽後,目前士氣高昂,面對強隊都會繼續奮鬥:「理文今場唔輸就攞到冠軍,但我哋都正為衝擊聯賽頭8而努力,戰意唔會比對手低,我哋會跟足教練部署,希望再有驚喜。」
理文上場「足總盃」4強反負深水埗出局,「雙冠王」夢碎,主教練曾昭達認為勝敗乃兵家常事,希望球員再對深水埗能夠全力以赴:「上場波失利對球隊有警剔作用,喺今場唔可以有任何差池情況底下,相信會令球員更有推動力,將冠軍盡快攞到手。」
球隊今場只需1分即可提早封王,「達Sir」強調聯賽冠軍屬於整季最重要目標,今場一定會全力爭勝:「聯賽重要性比『足總盃』更大,一定要攞到,因為關乎到來季亞洲賽入場卷,我哋唔止諗和波,會想攞晒3分。」
壞消息是射手保連奴傷勢不樂觀,很大機會提早收咧,對前線調動有影響。
深水埗 4–3-3
門將:1.梁興傑
後衞:13.彭靖揚 72.拿亞 14.宋柱浩 20.波比
中場:11.黃靖揚 22.小田倉康太 24.顏卓彬
前鋒:77.張廣然 99.鄧嘉 15.尼高拉斯
理文 4-3-3
門將:28.陳嘉豪
後衞:3.徐宏傑 14.荷西安祖 13.李毅凱 4.立花稜也
中場:23.黃威 6.胡晉銘 7.保利臣
前鋒:8.艾華頓 9.安尼亞 91.基華尼頓
港超聯 理文強襲深水埗 不敗即封王
https://hk.on.cc/hk/bkn/cnt/sport/20240518/bkn-20240518191509430-0518_00882_001.html