[是咁的] 丫屌,我細個響朵條村搬鬼咗 (2)

係喎, 痴撚線.

所以又send咗封信去問MP睇有冇咩提議, 不過睇返其他要申請ARC嘅人同埋問過幾個律師, ARC審批平均大約要兩至六個月.

都係嗰句, 只係期望M.P.去篤一篤IRCC, 佢等佢肯扭下個屎忽.

要等45日先可以踢第二腳

雖然甩甩漏漏又行到身水身汗, 但大家總算平安返到入屋, 雖然大家都想狗衝入沖涼房淋個水, 但正所謂好男不如女鬥, 沖涼呢啲粗重嘢梗係要讓畀娃娃同癬妹先, 我哋呢班戇鳩仔只能夠去洗嘢同透爐...

當然以上呢啲嘢對經常係HKSCC風餐露宿嘅我哋嚟講真係合埋眼都搞得掂, 所以勁快個爐已經著咗、燒嘢食嘅材料亦都準備好曬, 三支公䟴䟴腳食住煙、飲住汽水等囡囡出浴.

反而最麻煩係要擋住兩隻喺燒烤爐附近虎視眈眈嘅傻狗, 驚佢哋亂食嘢同搞破壞.

所以當娃娃佢哋沖完涼出嚟之後, 袋癬第一個走去沖之後到我, 連我都搞掂埋就叫軍佬去沖涼.

點知軍佬死閪都唔肯, 用大大聲話：今朝咪沖咗屌,又沖？沖到甩皮呀仆街！

剛剛拉咗張膠櫈、坐喺軍老附近嘅娃娃：吓？咪撚玩啦, 你臭到仆街呀老細！
然後即刻拉開咗張凳.

軍佬：你識閪咩, 呢啲個男人味呀！

我隨手拉咗張凳, 諗住坐喺軍佬同娃娃中間隔開佢哋：鳩味就有你份..
點知剛剛坐, 真係聞到軍佬有陣味：嘩屌, 點支煙闢吓你啲男人味先..
然後拿拿聲拉開張凳.

軍佬：仆街啦你...
見到我同娃娃個樣咁厭惡, 佢就有啲好唔情願咁向反方向褪過去.

點知今次到坐係另外一邊嘅癬妹投訴：嘩唔掂呀喂, 你真係好臭, 麻煩坐開少少...

軍佬霎時間個樣好似唔知點算好, 戇鳩鳩拎住張凳企撚咗喺度：屌點呀你哋...

袋癬：沖涼啦仆街...

軍佬：er....燒完嘢食都成身味㗎啦, 燒埋先沖啦....

聽見軍佬咁講, 我哋霎時間都覺得好似有啲道理,因為本身都諗住燒完嘢食沖多次, 所以就決定唔理佢,大家坐開少少就算.

燒嘢食期間都冇咩特別, 大家有講有笑鳩下鳩下又一餐, 執埋啲嘢又去淋多次水出返嚟, 發現軍佬好似仍然冇意欲去沖涼, 朋友一場我哋又唔好意思再話佢, 而且佢陣臭味已經被燒烤嗰種肉味cover咗, 聞聞下感覺還好？夜晚瞓覺嗰陣仲覺得有啲肚餓...

如是者, 連續落嚟嗰幾日, 軍佬都只會日光日白嘅時候走去沖涼, 基本上只要太陽落咗山佢就打死都唔會行入廁所一步, 連刷牙都走去廚房刷, 對比起點解佢要咁做嘅原因, 我哋更加關心佢忍屎忍尿嘅功力有幾深厚, 所以成日特登罐佢飲勁多嘢飲, 睇下佢會夜晚唔會瀨尿...

不過講返轉頭, 我哋自己都好似有個不成文嘅共識,太陽落山後一定唔會再放狗, 如果有咩要落沙田買,都要天黑曬之前返到上祖屋, 如果遲咗寧願畀錢打的門口有落.

直到聖誕嗰晚癬妹同娃娃都話要去尖咀睇燈飾, 所以我哋早早搞掂曬啲嘢, 五點幾就行落山坐車出尖沙咀食飯順便睇燈飾, 跟手過九龍城前衛唱個k, 期間又撞到我同娃娃各自學校班friend, 成晚幾層樓週圍走.

最後唱到四點幾嗰陣, 軍佬突然之間拉住袋癬拉
同我出房門口：喂喂喂兄弟, 我屋企有啲事要返一返屋企, 可能今日返唔到上山...

我：吓？冇事呀嘛？

袋癬：有冇嘢要幫手？

軍佬：應該ok嘅...

我：有事出聲喎？

軍佬：唉, 講你哋都...

袋癬：都咩呢？

軍佬：er...都...幫唔到手㗎啦..

我：你係ok至好喎？

軍佬：得啦...

袋癬：咁你幾時返上嚟？約個時間我哋落嚟食飯順便一齊返上去囉？

軍佬：唔知㗎, 你哋有我屋企嘅電話㗎嘛, 到時call我囉？

我：吓？好似好嚴重咁喎？

軍佬：以防萬一啫.

袋癬：咁呀, 是撚但你話事啦.

軍佬：係啦, 有咩call我啦..

返入房之後軍佬再同娃娃佢哋交代多幾句, 仲話如果情況有變化可能直頭成個假期都返唔到嚟, 我哋聽見就梗係問佢咩事啦, 但佢只係ee oror又唔肯講, 見係咁我哋都無謂再問落去, 心諗可能佢屋企真係出咗啲咩唔好嘅事,就叫佢快啲返去.

軍佬走咗之後最後成棚人唱到五點幾鐘, 前衛就嚟落閘放狗咬人我哋先走人, 求其過前衛隔離三角公園坐下吹下水, 等順X茶餐廳開門就過去食埋個早餐, 然後坐車返祖屋大覺瞓.

開頭諗住軍佬都係最多走一兩日, 點知到我哋落山嗰日條仆街都仲未捨得返嚟, 仲叫我哋幫佢執埋佢個背囊, 仲千叮萬囑我哋一定要平平安安咁將佢嗰幾條、丫幾本囡囡拎返去畀佢.

雖然可能真係屋企有事我哋都唔方便開口屌柒佢, 但最後喺火炭平房區上小巴之前, 我哋都好有默契咁將佢班囡囡掉撚曬入垃圾收集站.

對比起我同娃娃, 袋癬住得比較近軍佬所以最後佢負責孭住軍佬個袋返屋企, 而我當然係送娃娃返到康盛花園、喺後樓梯卿卿我我一輪之後先返屋企.

如是者又過咗幾個星期, 大約係一月中嗰陣, 我同軍佬、袋癬同契妹詩喺慈雲山head quarter對面大家樂食緊下午茶嗰陣, 契妹口痕問起我哋上次去祖屋啲嘢, 開頭都好地地, 後尾袋癬開始屌鳩軍佬正仆街,要佢一個人捧住鬼死咁多嘢返屋企, 我又開始笑鳩佢成日唔沖涼嗰陣.

一直聽我哋講嘢唔出聲掛住食嘅軍佬突然嬲爆爆咁爆咗句：屌你老母我想嘅咩！？你間屋有鬼呀仆街！

霎時間我覺得大家樂啲客個個啤住我哋, 雖然我都大約知佢想講乜, 但為免尷尬都唯有大大聲屌返佢：係呀, 咪你個屎忽鬼囉！

袋癬：咪係囉, 仆你個街又唔知自己個袋重, 要我幫你孭到返屋企, 頂你咩！

詩：軍佬似咸濕鬼多啲..

可能軍佬自己都覺得頭先係大聲, 所以亦都用返平時嘅聲線答我哋：屌...唔係呀, 佢間屋真係有鬼呀仆街...

袋癬：係咪眼花呀你？我哋住咗咁耐都見唔到, 叫咗你打少啲飛機㗎啦...

我雖然見到軍佬啤住我, 但為勉佢拉我落水,唯有耷低頭繼續食...

詩：係囉, 我都冇聽見阿哥或者娃娃講過有啲乜嘢,係咪你黑咋？

軍佬啤咗我一陣見我都冇反應：屌..你條C叔丫...啱曬你呀個名, 私私縮縮呀~

我見軍佬好似仍然想堅決拉我落水, 唯有勉為其難咁答佢一句：吓？好似你匿埋係廁所打飛機咁私私縮縮呀？

詩：吓！？唔拿係呀話！？

我：屌你老母, 成村人等住去沖涼, 條仆街仔匿埋喺邊打飛機唔出嚟...

詩露出厭惡嘅眼神：eeeeee......好賤格呀..

我：打都算啦, 你射撚完執返乾淨個地方我冇所謂呀, 但打完仲連本書都留撚埋喺入面唔拎返出嚟, 冇啲手尾頂佢個肺...

詩變成鄙視嘅眼神：eeeeee......好核突呀..

我：咪係囉,屌. 我同娃娃就話冇所謂啫, 仆街袋癬個妹喺度㗎..

詩直頭擰歪面唔敢望住佢：eeeeee......好仆街呀..

軍佬畀我同契妹每兩個圍攻咗一輪都唔敢出聲, 直到我哋兩個講月佢先再開口：邊有打飛機啫....

我：咁廁所無啦啦會有本鹹書？本咸書急尿自己行入去廁所呀？

軍佬：...學術研究啫...

袋癬：研究自己幾耐射？

軍佬：都話冇打囉屌你！

我：咁你入去咁耐托呀？又唔係沖涼！

詩：你又知佢冇沖？

我：我同娃娃入去嗰陣搭地乾㗎嘛！

詩：eeeee~~你同娃娃入去~~~~!？

我：刷牙呀屌..

詩：刷定插呀？仲屌？

我：仆你個街..第時插嗰陣叫你過嚟旁觀好未？

詩：你話㗎哥！我等你call呀！

袋癬：c叔我報名！

我：仆街你返去報名睇老豆插你老母呀..

大家鳩完一輪諗住繼續食嗰陣, 軍佬突然間又開口：唔係呀, c叔你間屋真係搵人搞搞佢啦, 好撚猛..

我心諗明明成件事都完咗, 你做乜撚嘢又返轉頭：乜撚嘢事呀你又？

詩：收啦, 冇人有興趣你喺廁所打飛機呀.

軍佬：話咗冇打囉！

袋癬：仲要打唔出喎...

軍佬：咪話咗..

我：你打唔到同醫生講呀, 同我哋講托咩？

軍：屌！你班仆街畀我講埋先得唔得？唔好係咁打斷我！

我哋三個都好敷衍咁答佢：得得得...
答完我就順手攞起檯面包煙, 詩見到就問：哥, 你出去食煙呀？

我：唔係呀, 諗住坐過吸煙區咋, 做咩呀？

詩：冇呀, 諗住叫你順手幫我買杯奶茶咋？

我：ok呀, 不過你自己去攞喎...

詩：丫頂, 咁同我自己去有咩分別？

我：其實冇乜㗎..叫做排少條隊咁囉..

詩：丫我陪你一齊過去食煙...返嚟嗰陣先買..

袋癬：唔使啦, 你畀錢我去買, 你陪c叔去食煙囉..

詩：丫, 唔該喎..

我：搭單加多杯..

然後我哋三個好齊心咁離開嗰張枱, 留返軍佬自己戇鳩鳩坐喺度.

過到去吸煙區點著支煙食咗啖, 詩就問我：喂哥,你哋係咪真係撞鬼呀？

我諗咗諗先答佢：um...係呀.

詩：咁大件事你哋唔講嘅？

我：又唔係好大件事嘅, 見到有條友喺我哋面前跑過咁囉..

詩：吓？有條友跑過有幾出奇呀？你哋眼花咋係話？

我見附近冇乜人, 拿拿聲企起身一路做咗個仙人掌怪嘅姿勢一路答佢：條撚樣保持住呢個姿勢跑喎！你跑次俾我睇丫？而且條友仲係平面架喎？

詩：ee.....係咁咋？

我：um...仲有幾個細路仔跑嚟跑去...

詩：乜咁鍾意跑嘅嗰到啲鬼？

我：荒山野嶺冇嘢做啩？

詩：頂..仲有冇呀咁？

我：um..丫, 仲有個山...樹...窿...

詩：吓？山定樹呀？個窿又跑埋一份呀？

我：唔係呀, 開頭以為係個由樹組形成嘅窿, 點知原來係條隧道嚟..

詩：咁搞笑？

我：係呀, 所以咪唔講囉, 又唔係咩恐怖嘢...

詩：但你睇頭先軍佬個樣真係淆底喎...

我：屌條仆街...雖然我同娃娃都冇證據, 但係我哋都懷疑乜撚嘢都係佢搞出嚟...

詩：吓？你係話佢扮鬼？

我：唔係呀, 我指撞鬼呢單嘢分分鐘都係佢累鳩我哋..

詩：oh...

我：食完喇, 返過去聽佢講啲咩...

正當我企起身諗住行返過去嗰陣見, 到軍佬同埋袋癬托住個放咗三杯奶茶嘅盤行緊過嚟我哋呢邊, 既然係咁我又坐返低等佢哋過嚟.

袋癬剛坐底, 就開口：唔係喎c叔, 聽落真係幾猛喎...

我拎起杯奶茶底比契妹, 之後自己攞咗杯順手落埋糖：up乜鳩呀你又？

袋癬：唔係呀頭先軍佬同我講咗單嘢呀..你個廁所堅猛..

我：吓？你而家不舉賴落我個廁所到呀？

軍佬：我冇打飛機啫, 唔代表我不舉！

我：丫是撚旦..你條咸濕仔打唔到飛機咪即係不舉囉..

軍佬：屌, 打飛機還打飛機、不舉還不舉, 兩樣野嚟嘅

我：但源頭都係同一個地方個下死呢..

軍佬：丫屌...

我：點呀, 有嘢你講啦...

軍佬：唉....話說呢...

係呢到先同大家介紹一吓我祖屋個廁所, 間隔基本上就係一個正方形, 一開門入到去正面就係鏡櫃洗手盆, 門同洗手盆中間右手邊有隻磨砂玻璃質地嘅窗同埋一啲波浪型嘅窗花, 洗手盆嘅左手邊隻係馬桶、馬桶對面就係熱水爐同埋花灑.

馬桶上面有個鐵做嘅間隔用嚟放廁所紙同其他雜物,好啲未用嘅洗頭水、沖涼液嗰啲, 而廁所本身又冇做咩乾濕分離設計, 甚至連浴簾都無條, 所以沖涼嗰陣馬桶必然會濕撚曬（唔好問邊個設計,總之係個天才）, 所以我一早提醒咗大家, 抆完屎記得放返捲廁紙上架, 唔係就大撚鑊.

Ok?繼續.

軍佬：...嗰日我見你哋個個係出面唔係撚狗就睇電視, 我咪諗住入廁所me time囉...

我：me你老母咩...打飛機定屙屎呀？

軍佬：妖, 你咪撚打斷我啦.

我：咁到底係打飛機定屙屎呀？

軍佬：屌！兩樣都齊呀滿意未？？總之我入到去除底褲之後就順手掛咗喺門後面個勾, 之後就坐低一路運功、一路睇咸書...

詩：睇住走火入魔, 喺個口度噴啲屎出嚟..

軍佬：頂！咪撚嘈啦你兩個！

我+詩：哦...

軍佬：咁睇睇下性起, 咪諗住打個飛機排吓毒..正當我猶豫緊拎定卷廁紙落嚟先定環保機射落地好嗰陣..

我聽到佢想射落地嗰下即刻想講粗口屌柒佢, 但軍佬厲啤咗我一眼, 又諗起之後我同娃娃行入去嗰陣見地下乜都冇, 唯有唔出聲繼續聽佢講...

軍佬：咁啱抬頭一望, 發現自己勾喺門後面嗰條褲上面個條布帶扣返埋...

詩因為冇份去, 所以好奇怪咁望咗我一眼, 我就答佢：軍佬嗰條係平時我哋出camp嗰種布帶.

詩：吓？嗰條嘢平時發發下都有聲㗎喎, 成條扣埋都聽唔到？你聾㗎？

軍佬叫得做軍佬, 當然除咗擁有數量龐大嘅出火庫之外,佢真係好熱愛軍用裝備, 當時佢用緊嗰條布帶就係舊時應軍用嗰種鐵扣布帶, 即係皮帶扣嗰個位係一舊長方形鐵扣嚟, 你要先打開佢、穿過條布帶再卡返埋, 唔好話每一次開閂個扣都一定會發出金屬撞擊嘅卡卡聲, 本身條布帶嘅另一邊亦都係一個金屬扣, 所以只要條布帶穿過中間個扣就已經會有聲出.

軍佬：最慘我冇呢！屌你老味睇到條布帶無啦啦扣返埋、仲要穿過曬本身條褲嗰啲皮帶窿我都差啲嚇到不舉...

我：話撚咗你不舉啦..

軍佬：屌, 呢下我仲頂得住..

我：呢下頂得住？咁即係仲有一下就不舉啦？

軍佬個樣面有難色：........
然後飲咗淡水.

我見到咁即刻窒一窒, 心諗唔撚係呀話？條友真係嚇到真係不舉？如果係嘅話, 都覺得自己寸佢寸得有啲過份, 連詩都忍唔住話：咪飲水啦, 想飲咩呀我請你飲啦..

軍佬諗在諗之後答我：er...大家樂有冇熱杏霜？

我：熱砒霜就有你份, 我過藥房買畀你呀？

詩：哥~

我：係係~熱杏霜呀？我去幫你問下...
到最後當然係冇, 所以我求其執咗杯差唔多顏色嘅熱可力畀佢算撚數.

軍佬飲咗啖之後, 冇乜特別表示抗議就繼續講：見到條布帶扣返埋個吓, 我都嘗試說服自己會唔會係頭先太有手尾, 剛剛諗住揭多兩頁咸書定下經, 就聽到一大班細路仔喺佢耳仔邊好齊咁“嘻、嘻”笑咗兩聲, 嗰下真係書都跌撚埋落地下..嗰下真係嚇撚到我由誓不低頭變永垂不撓....

我：永垂不撓都叫曾經擁有呀..

軍佬：屌..

我：你扯得起先算啦..

軍佬：我屌你咪撚打斷我呀.

我：邊有打斷你啫, 你自己不舉咋嘛..

軍佬：頂...唉, 總之我聽到啲笑聲即刻嚇到彈起身, 夾硬解返開條布帶著返條褲, 拿拿聲衝出嚟廁所, 出到嚟見到你同娃娃喺屋外面吹緊水, 佢兩兄妹又瞓咗, 咪諗住求其開部電視等間屋有啲聲囉, 係你入嚟同我講我先知我成個背脊濕鬼曬.

我：um.....所以你之後夜晚唔肯入廁所？

軍佬：係呀硬係形住一入去就會奶嘢..

我：咁之後都冇乜嘢啦話？

軍佬：你就想...

我：吓？

軍佬：仆街之後晚晚發惡夢, 夢到自己冇著衫、凍冰冰咁企撚咗喺你祖屋條樓梯下面, 然後附近好似有班人係我後面行嚟行去, 又有條友圍住我跑嚟跑去, 但一擰過去又乜都見唔到...但又覺得有啲嘢越嚟越近, 擰吓擰吓就突然覺得嗰樣嘢去咗我已經去到我背脊, 爭少少就掂唔到我, 跟住就嚇醒咗..

可能頭先已經聽軍佬講咗次, 所以一直冇出聲嘅袋癬突然勁大聲咁講咗佢：嘩屌！

我+詩+軍佬齊齊畀佢嚇咗嘢：屌做乜撚呀你又！？

袋癬：唔係呀, 頭先你講嗰陣我都覺得怪怪哋,而家聽你講多次我終於知道似乜嘢！

軍佬：乜嘢似乜嘢呀？？

袋癬：你冇著衫畀人搞你後面嗰度呀！

軍佬：結撚時話有人搞我後面呀！

袋癬：屌, 你自己話有人喺你後面吖嘛！

軍佬：喺後面咋嘛, 邊有搞我啫！？

袋癬：咁你冇著褲呀嘛！

軍佬：冇著褲就要屌屎眼㗎喇喎！？

我：嘩, 軍佬你前面不舉、後面又屌屎眼, 你都好忙下喎？

軍佬：屌, 你想講咩呀袋癬？？

袋癬用好神秘嘅聲音講：1、2、3、紅綠燈..

我+詩+軍佬三個人一齊：嘩屌！

我唔知詩同軍佬佢兩個, 但係我全身起曬雞皮, 拿拿聲飲杯奶茶暖下肚、順手點支煙定下經. 因為我即時諗到軍佬背後應該就係嗰班細路仔, 而圍住佢哋跑緊嗰個就係仙人掌怪..個畫面熱鬧到呢..

軍佬隔咗陣先再講：唉..咪唯有唱k個朝借啲椅走佬囉.....真係返屋企先叫有覺好瞓, 仲要一瞓就瞓撚咗差唔多成兩日, 嚇到我老母以為我死撚咗....不過就算瞓醒都係週身唔聚財頭暈身㷫又發燒, 食咗成個禮拜藥都唔好, 後尾被老母的咗我去咗旺角嗰間唔知乜廟到拜拜先叫好返啲..

我：你唔早講？

軍佬：點講啫？你哋個個都冇事, 係得我奶嘢..
點著支煙之後吸咗幾啖先再講：所以...冇計呀, 你哋唔好怪我走撚咗去呀, 唔係我唔想沖多啲涼呀, 唔係我唔想返嚟執返我啲嘢, 係大佬我連續發足咁多日呢啲閪夢, 我真係淆底呀陰公....

聽完我哋靜咗一輪, 當我望住大我成個碼嘅軍佬揸住支煙隻手震到柏金遜咁、個口一路講我真係淆底呀嗰陣, 我決定...

以後都唔撚返上祖屋, 屌你老母就算有人我個仆街阿爺良心發現,話成間送畀我都唔撚要.

至於軍佬呢壇嘢...我只能夠當係一件發生係一個朋友身上、純熟不幸嘅鬼故聽就算, 反正...事實上又真係得佢一個奶呀嘛, 我最多都係摱車邊叫有份參少少..關我鬼事咩...

最後再過多唔夠半年我就冇再返HKSCC, 全程投入牛頭角下邨嘅懷抱..

不過話時話, 我哋HKSCC成日周山跑, 去埋啲荒山野嶺到camp, 又入嗰啲破屋破廟打過wargame, 甚至好出名嘅達德小學我哋都去玩過, 反而完全乜事都冇..唔知唔關唔關見制服勁似消防、頭頂又有個金色圈圈嘅事呢？

好, 終於有時間錄完祖屋呢單嘢.

因為上個月應承咗迷離公路, 所以下一篇都會係鬼故

但唔會係HKSCC, 係之後同班friend係一個朋友屋企樓下嘅平台遇到嘅一件怪事.

btw, 其中有大家最期待嘅人物出現.