【仆街喇，我一覺起身變咗條女】《隻戇鳩妖精將我變咗做女仔》 (2)

有書讀

一百六十

我由信封入面拎咗封信出黎，然後打開封信同妍妍一齊睇...

「下？呢封信係...？」我難以置信...

「係...係真既？」妍妍同樣都係一臉驚奇...

「我都唔知...」我真係答妍妍唔到...

呢封...

呢封...係學校寄比我既入學信...

內容大致係話學校收到社署既通知，知道我而家係咩情況，又知道我冇書讀，所以經學校商量之後，決定向我提供一個中三既學位...要我聖誕假之後去學校報到，然後再響下學期既時候正式返學...

點解咁突然既？

而且...學校唔係放緊假架咩？

點解啲教職員會開OT寄呢封信比我既？仲要今日就收到？

「好似...又好似真既一樣...」我睇過封信啲格式，有啲似學校既通告...

「會唔會...同妳聖誕果晚許果個願有關？」妍妍問。

一言驚醒洛克人，我諗唯一既解釋就係咁。

妖精話要幫我響呢個世界創造一個真實身份，似乎佢唔止幫我整咗身份證、護照、出世紙呢啲身份證明文件（即係代表我既資料已經存入咗政府資料庫），甚至連學生呢個身份都幫我創造埋...

佢可以將我變成女仔，咁佢有咩係做唔到？

「嗯...我覺得呢個係唯一解釋...」我嘆咗口氣...

啱啱先諗住自己唔駛返學，只要儘量唔出街，或者只係響返學時間匿響圖書館，就唔會咁易因為果單新聞而比人認出、起底，甚至因為比人認出咗而連累咗妍妍佢哋...然後希望件事過一段時間之後可以告一段落...

但而家要返學...係咪即係代表我比人認出既機會大大增加？

係咪遲早都會比人認出甚至起埋底？

咁既話我係咪應該向妍妍坦白？

...

但唔得架喎，唔通同佢講話我以前係做PTGF，因為唔小心同個客人做咗愛令佢沉船，再令到佢綁架咗我，搞到上晒新聞咩...

唔得...

唔可以比妍妍知架...

但...如果...如果妍妍心情好返啲，然後開始上返網睇下新聞...

咁...

我咪大鑊？

「阿勉，如果係真既話其實係一件好事啊，代表妳可以過返正常既生活。」妍妍道。

「啊...係...係啊。」

「勉...妳...冇嘢吖嘛？妳個樣好似唔係幾開心咁既？」妍妍關心地問。

「哈哈...」我乾笑咗兩聲，答道：「可能...可能我放假放得太耐...所以唔係幾想返學喇。」

「妳唔可以咁架，又係妳自己許願話要個新身份生活，而家有機會妳又唔想返學。」妍妍既語氣中有小小說教既感覺。

「哈哈...妳講得啱，我會調整吓自己既心態架喇...」我又乾笑咗兩下，求其亂咁答...

唉，我擔心既梗係唔係呢樣嘢喇…

「係呢，封信有冇講分班啊？」妍妍又問。

啊，係喎。

呢樣都好重要。

我個心好似老馮學校一定會分返我哋同一班呢？

「唔知我哋會唔會一班呢？」妍妍又問。

雖然我都好想知，但我呢一刻真係冇乜心情，於是只好強笑道：「希望喇。」

「嗯...如果我哋係同一班就好喇。」妍妍講完之後就返埋枱繼續溫書...

「嗯。」

係既，如果可以返去以前果班都好...

雖然我唔知點樣面對冒牌既自己、女神Ginna同埋張彥，但可以同妍妍同一班，有個知我秘密既好姐妹照應都幾好...

同埋...

最重要既係我可以同神駒同一班...

如果我真係想同佢響埋一齊，同佢同一班既話，我應該更加多機會同佢拉近距離...同埋可以有機會同佢化解返之前既誤會...

不過...

呢個係建基於我可以讀返以前果一班既情況下先會發生...

唉，咁我除咗比人認出起底、比妍妍發現果段新聞同我張相之外，咪又要擔心多一樣嘢？

越黎越多嘢心煩...

都冇計，我而家都冇乜嘢好做，唯有匿埋響被竇入面不知所措喇...

我響張床上面坐吓坐吓，又click返入去IG入面睇吓嘢...

然後...

我發覺...

IG訊息果個icon有個圓點響度...

有人dm我！

唔通係衡仔？

我即刻click入去睇...

真係衡仔覆我既message！

（待續）

衡哥
成套嘢最鐘意呢個角色
其次就妍妍

一百六十一

衡仔："唔好意思啊，咁遲先覆妳，響醫院休息緊我唔係成日check手機"

衡仔："我冇事啊，不過仲留緊院"

仲留緊醫，係咪即係好嚴重...？

於是我又send個訊息比佢："係咪仲好嚴重？醫生有冇話幾時可以出院？"

不過衡仔只係好輕描淡寫咁答我："有心，我冇事" 但就完全冇提過幾時可以出院既事。

係唔想我擔心？

於是我又send個訊息問佢：“幾時可出院？不如我黎探下你？”

佢好快又回覆咗我個訊息：“多謝妳，但唔駛喇，發生咗件咁既事，妳都休息下喇”

“但我好擔心你啊” 我真係擔心架。

我等咗陣衡仔都冇回覆，於是忍唔住又send多個訊息比佢：“你比個醫院名同床位我，我黎探下你ar”

講起黎其實衡仔係咪同我入埋同一間醫院都唔知。

隔咗一陣冇回覆，我又再send多個message比佢：“你點ar？”

今次佢好快就回覆咗我：“我冇事（手臂show肌 emoji），妳有心喇，不過真係唔駛黎探我”

衡仔：“妳好好休息，我出院先搵妳吖”

衡仔：“我都抖下先，醫院用電話唔方便”

衡仔：“再傾（揮手）”

佢連續回咗四個訊息比我，之後就冇再出聲，就算我send咗幾個訊息比佢，佢都冇覆到...

可能佢真係要休息吓喇，畢竟佢既傷嚴重咁多，又失血，塊面上面都有唔少刀傷，甚至乎可能會毀容...

...

唉...

係我連累咗佢...

但我而家連探佢都做唔到...

之後我淨係識縮埋響被入面玩電話...直至妍婆叫我同妍妍出去食飯，食完飯我又繼續瞓響床上面玩電話...

「好攰啊。」妍妍溫書溫到差唔多要瞓覺，佢伸一伸懶腰。

佢失戀之後寄情於溫書，都係一件好事黎既。

「攰就抖吓喇。」我其實心情有啲低落，想搵人安慰下我。

我張相冇遮冇掩咁上新聞單嘢、擔心比人起底、突然要返學、衡仔留院、七仔哥哥失去咗聯絡、神駒隔咗咁耐都冇搵過我...

我好擔心、好無助啊...

「妳個樣都好攰啊，唔好玩咁耐電話喇，準備下返學啲嘢喇。」妍妍望過黎我呢面。

乜我個樣好攰咩...

可能真係既，不過我個樣攰，可能同我㩒電話冇關...而係同我啱啱講果啲壓力有關...

「嗯，我知架喇，其實我都冇乜嘢好準備。」我可以有乜準備吖...

「係喎，妳駛唔駛買書啊？」妍妍突然提醒我。

「唔駛喇，我以前返學都冇書架喇。」我搖頭答道。

Band 3學校黎架嘛，上堂邊駛書架？

我諗返起以前仲係男仔既時候，上堂果陣都係鳩hea或者同神駒、張彥佢哋玩同吹水，其他同學仲試過開埋賭檔玩魚蝦蟹、Poker，啲老師都唔理既，佢有佢講，我哋有我哋玩，只有極少數既學生（好似妍妍咁）會聽書。

真係個個老師都係咁hea，對佢哋黎講，呢份只係一份好普通既工，佢哋返工都係等收工，同我一樣。

除咗升中一我真係有買過書之外，老母比我去買書既錢，都比我拎晒去吃喝玩樂。

反正老母都冇過問我有冇真係買到書。

「哦。」妍妍聽完呢個答案都冇乜驚訝既反應，我估佢由我以前同佢拍緊拖既時候都習慣咗我係咁。

「咁妳駛唔駛買校服啊？」妍妍諗咗一陣，又問。

「唔駛喇，著妳果啲咪得囉。」我之前扮返學既時候都係著妍妍果啲校服咋嘛，唔駛咁煩又買過件喇。

妍妍唔知諗到啲咩咁，面色微微一紅，道︰「唔係唔得…但係…其實我啲校服size唔係幾啱妳…我果啲校服對妳黎…好似有啲細件…」

講起黎，妍妍既校服對我黎講真係有啲細，尤其是胸部個位，好緊，好似有小小想逼爆既感覺...而且因為我高過妍妍，扯高咗妍妍條校裙，令條校裙睇落係有啲短...

不過，我其實冇乜所謂...反正之前出街都成日比人視姦架喇...

況且，我都唔想出街...

我驚比人認到...

「唔緊要喇，我著妳條校裙就ok架喇，唔駛再另外買喇。」我答妍妍。

「唔驚架，少少錢婆婆都仲比到。」妍妍似乎係以為我唔想買多幾套校服係因為錢既關係...

「真係唔駛喱…」

其實係我唔想出街，有機會比人認得出啫...

唉，如果等多幾個月先返學，等啲人淡忘咗件新聞先，你話幾好呢...？

（待續）

勉哥着妍妍啲校服會唔會著到情趣嘢咁

會，死人大波妹

一百六十二

果晚我同妍妍傾咗小小返學既話題我哋就瞓咗嘞。

好在妍妍似乎仲未睇到條新聞啫...

希望可以快啲等到件事丟淡喇…

我之後忍唔住都有上Ｏ登討論區去望下，見有關我新聞果個Po都仲係好熱...好多人討論...

又話香港人好善忘既...

亦都因為咁，我本來有諗過第二日即刻去七仔搵果個金毛肥哥哥，又或者係以前見過果個七仔大嬸，向佢哋打聽下七仔哥哥既聯絡方法，甚至係佢既近況，但因為驚比人認到，所以我完全唔敢出街。

第一日話第二日出、第二日話第三日出、第四日話第五日出…

最後到學校聖誕假既最後一日，我都係冇出過街…

我諗好彩既係妍妍都要溫書，冇叫我一齊出去啫，如果唔係都唔知點推好…

至少唔會比妍妍發現到我有啲咩唔妥先…

「阿勉。」呢一晚溫完書，我坐咗響下格床度真係百無聊賴咁玩緊手機，妍妍突然走過黎我床邊坐低。

啊，死喇。

妍妍係咪終於響網上面見到有關於我果段既新聞啊？

點算啊…點算啊…我應該點面對佢一陣間既質問好啊…

坦白？定亂作個藉口試下濛混過關？

死喇死喇…

「阿勉！」妍妍見我唔應佢，於是又叫咗我一聲。

「啊，妍妍，係，係，咩事？」我回過神來，強裝鎮定。

唔好係問我新聞單嘢…唔好係問我新聞單嘢…

「妳冇事吖嘛？」妍妍關心地問︰「呢幾日有時見到妳個樣好似有啲唔開心…又好似有啲擔心緊咁、緊張緊咁，妳冇事吖嘛？」

「啊？妳問呢樣？妳唔係問其他嘢咩？」我有小小愕然。

「冇啊，我仲有乜嘢好問？」妍妍奇問。

「啊，冇、冇嘢好問...」我不自禁鬆咗一口氣，睇黎妍妍仲未知發生咩事。

「奇奇怪怪咁。」妍妍望住我。

「係咩哈哈，可能係聽日要去學校搞手續有啲緊張。」我乾笑咗兩下想扯開話題：「聽日妳都要考試喇喎，加油。」

「我考試好小事啫，」我想扯開話題，但妍妍就將個話題帶返黎：「妳係咪真係有心事啊？」

睇黎佢真係好關心我，想問我有冇事，冇咁易比我扯開話題。

唔…

雖然我就算以前係男仔既時候都唔係好識隱藏自己既心情，但妍妍都唔係善於觀察既女仔...乜我呢幾日真係表現得咁明顯咩？

我又乾笑咗兩下，道︰「冇事啊，可能…可能…真係架，我可能真係因為聽日要返學所以有啲緊張咋…」我講到有啲口窒窒…

「真係咁咋咩？」妍妍問，面上既表情仲係有啲懷疑。

「係…係啊…」

「阿勉，」妍妍響我隔離伸咗隻手出黎拉住我，道︰「妳前幾日先話過，我哋係好姐妹黎架嘛，係唔係？」

佢把聲令我覺得好溫暖…

「我唔開心、傷心既時候，係妳睇得出我有心事，之後仲陪住我。」妍妍柔聲道︰「而家到妳有心事，到我陪返妳喇。好姐妹就係咁架喇，唔係我單方面受妳幫助，淨係妳陪我。好姐妹係應該互相幫助同關心架嘛，係咪？」

雖然妍妍講得好啱，但我唯獨係新聞呢單嘢唔想比妳知…

仲有衡仔、七仔哥哥...佢哋為咗我一個受咗重傷，一個就連份工都冇埋...

而且...如果妳知道咗件事既話，咁連我之前做PTGF啲事，都會一次過比妳知道晒架…

「我...真係...冇嘢。」我其實真係好想講出黎，搵人分擔下呢件事...

「真係唔緊要架，就算我幫唔到妳，但我至少真係可以作為一個聆聽者去聽下都可以架。」妍妍把聲好溫柔：「有啲嘢講咗出黎個心會舒服啲。」

「我...」好明顯，妍妍已經估到我唔係因為聽日要去學校而緊張...

好喇...我認呢幾日我應該係有啲神經緊張，而且連街都唔敢出...比妍妍估到我有啲其他既心事可能都唔係太令人意外...

「當然，我唔係逼妳講啊。」妍妍道，把聲音就好似已經可以安慰到我，有種令我覺得溫暖既力量咁：「不過妳願意講，我就願意聽。」

「我...」

（待續）

講就講啦
呀勉真係戇鳩鳩
佢唔講，個姊妹就唔知自己做雞咩，講真佢返到學校實有人講咖啦

佢戇鳩是常識
佢唔戇鳩好多情節推動唔到

一百六十三

響妍妍溫柔又溫暖既聲線之下，加上我發生咗工廈禁錮件事之後，真係好擔心比人起底，又覺得對七仔哥哥同衡仔唔住，都真係好需要人安慰，妍妍呢個時候就好似突然出現既救命草咁，比佢勸多幾次，我終於忍唔住講晒我既心事出黎...

當然就算我唔講，萬一我響學校比人認出咗之後宣揚開去，又或者妍妍上網真係見到段新聞既話，佢都會知道既...如果係咁既話，我不如一早自爆好過。

但當然我呢個時候反而冇諗到呢樣嘢，我係純粹因為妍妍既關懷而令我想同佢傾訴呢一切...

我響變咗女仔之後，實在太多嘢收得太埋喇，其實響不知不覺間，呢啲秘密心事成為咗我既壓力，壓到我成日都唔開心…

所以講吓講吓，我連工廈禁錮事件之前既事，好似我做PTGF啊、因為擔心妍妍所以特登約佢個前男朋友阿泰出黎睇下佢係一個點既人啊、發生工廈禁錮事件之前我同衡仔、七仔哥哥係咩關係，甚至響我啱啱變完女仔之後神駒收留我再同我發生關係，我哋又點響球場上面因為冒牌羅皓勉既出現而產生誤會，同最後我連自己響公園殘廁比張彥誘姦都講埋出黎…

妍妍就只係一路聽住，拖住我既手一路都冇放開過，而我就好清晰咁感受到佢隻手帶比我既溫暖…而佢面上都係一副溫柔既表情，比到我勇氣將所有嘢講晒出黎…

我講下講下，竟然會委屈到忍唔住喊埋起黎…我變咗女仔之後係咪咁眼淺啊…

不過要我再諗返一次果日經歷就覺得好驚、好委屈...

我果陣同警察落口供都講過，可能我個人善忘，唔提果種恐懼就會當過咗去、唔記得咗咁...唔會影響到我平時既心情，但實際上當再次去回憶既時候，我都係會再感受到果種驚架...

John佢唔似係講笑，至少佢應該真係想殺咗衡仔...

妍妍見我喊，佢就溫柔咁用另一隻手幫我抺眼淚...

唔知講咗幾耐，反正個感覺上係過咗好耐，我終於將所有事講晒比妍妍知...

雖然之前我一路擔心唔知妍妍如果知道我之前係咁痴線、咁唔要面，毫無羞恥之心既話佢會唔會睇唔起我，嚴重啲甚至會同我絕交、趕我出呢個屋企既門口…

不過…響我將所有嘢講晒出黎之後，我竟然有一種鬆一口氣既感覺...

我偷望一下妍妍，唔知佢知道晒咁多嘢之後會點睇我...

「原來妳經歷咗咁多嘢...辛苦妳...」妍妍溫柔地撫摸咗我塊面一吓，順便抹埋我啲眼淚...

好彩我擔心既事最後都冇發生，佢冇嫌棄我、同我絕交、趕我走...

「妳好勇敢，如果經歷過啲咁恐怖既事，我而家一定淨係識匿埋響被竇喊…」妍妍道。

「我唔勇敢…我諗只係我頭腦簡單，件事發生咗之後唔再諗佢就唔記得點驚。」我搖頭道︰「啱啱我同妳講既時候其實我一諗返起當時既場景，我就又再驚起上黎…」對於自己頭腦簡單呢點我係幾有自知之明既。

「我都係覺得妳好勇敢…」妍妍嘆咗口氣，續道︰「不過…阿勉…妳唔好怪我咁講…妳自己覺唔覺得…妳之前既私生活…係咪有啲亂呢？」

其實妍妍咁講已經好客氣，我既私生活何止係有點亂啊？

雖然妖精將我變咗做女仔既時候，係將我變咗做一個性慾強既女仔，但唔代表我既私生活一定要淫亂架喎。

如果我自制力好啲，又或者冇咁大既虛榮心，成日諗住用女神既身材樣貌去搵著數，我都唔會淪落到又做PTGF又比人強姦…

所以我嘆咗口氣，道︰「妳話有啲…其實都好比面我架喇…」

妍妍諗咗一諗，問道︰「所以…妳之前成日出街，其實唔係搵妳講果個七仔哥哥？」

我有啲尷尬，點頭道：「嗯…雖然都有同七仔哥哥出去，但係...其實好多時我係去咗做ptgf...」

我哋之間突然沉默起黎...

「唉...妍妍，對唔住...」

妍妍有啲奇怪咁問：「做咩要同我講對唔住？」

「我...」我又流咗幾滴眼淚出黎，問：「我之前咁樣...係咪令妳好失望...？」

「算喇，」妍妍嘆咗口氣：「都過咗去喇，妳都受咗好多苦，唔好再諗喇。」

（待續）

有無講比妍妍聽係無套中出

妍妍真係好好

佢應該估唔到 你誘姦埋佢

冇J，姦唔到

佢係一個好人勉哥配佢唔起

一百六十四

妍妍真係好善良，正常人知道我背後原來係個咁賤格既人可能已經鬧緊我臭雞同公廁...

「妳以後唔好咁喇，」妍妍苦口婆心地道：「我以前都叫過妳，唔好恃住人哋有啲鍾意妳，就去搵七仔哥哥既著數喇，其實呢啲係同一樣道理黎架咋。」

妍妍講得啱既，如果唔係我恃住自己樣靚身材好，去搵啲客人笨拎著數，仲要好搵唔搵搵著巴膠John呢個癲佬，都唔會發生今次呢件事...

「我知架喇...我會改架喇...」老實講，今次受咗咁大教訓，唔通仲唔知驚咩...

「至於會唔會比人起底...」妍妍嘆咗口氣，道：「我都唔知啊...而家啲人咁勁...」

唉，連妍妍都咁講，我真係好擔心...

「不過擔心都冇用喇。」妍妍向我溫柔一笑，道︰「妳話過我哋係好姐妹黎架嘛，無論點我都會陪住妳架。」

妍妍真係好…

我原本預計既情形（絕交）唔止冇出現，佢仲係咁溫柔體貼咁安慰我，仲話會陪住我…

講起黎，我真係欠佢太多喇…

「多謝妳啊，妍妍。」聽完妍妍既安慰，我即使仲係好擔心都好，但係心情的確係放鬆咗唔少…

有人分擔心事真係唔同啲。

「我哋係好姐妹啊嘛。」妍妍笑一笑，鬆開拖住我果隻手，然後就由床邊企咗起身，向我微笑道︰「好喇，我去刷牙洗臉先喇，聽朝要考試啊。妳都唔好諗咁多喇，聽朝我同妳一齊返學校喇。」

「啊，係喎，妳屋企有冇太陽帽、太陽眼鏡，同埋口罩啊？」我問。

「應該有…做咩咁問啊？」妍妍側頭問，個樣有啲不明所以。

雖然妍妍真係唔靚，但唔知點解我覺得佢呢個側頭既姿勢真係好可愛…

「可唔可以借比我？」我問。

「可以係可以，但妳想要黎做乜嘢…？」妍妍側住頭咁問。

啊，妍妍諗唔到我想拎黎做咩？係喎，佢應該係同我一樣咁蠢…

「我聽日返學校既時候，諗住帶帽啊、黑超啊、口罩啊，遮住晒我個樣，咁我咪唔怕比人認出再起底囉。」我將我既打算講咗出黎。

「吓，妳咁都得啊？」妍妍好似比我呢個諗法嚇咗一跳。

「係啊，人哋連我個樣都睇唔到，咁就冇可能起到我底喇！」我自信滿滿地道。

「但係…咁樣…唔係更加引人注目咩？」妍妍有啲不解地問。

「啊…係咁架咩？」我諗諗下，又好似係喎…

「係啊。」妍妍點點頭。

不過話雖如此，但係就算我係引人注目，至少人哋都見唔到我個樣先吖…

「唔緊要喇，試咗先囉。」我道，心入面都係覺得咁樣著可能仲著數…

「哦…咁我刷完牙轉頭搵埋啲帽同黑超比妳喇。」妍妍都冇再追問落去，只係點點頭咁輕易就答應咗我。

妍妍好快就刷完牙走返入房，然後東摷西搵，一邊同我講︰「不如妳都去刷牙洗臉先喇，除咗口罩係擺咗響廚房，其他嘢我都唔係好記得放咗響邊。」

「不如我都幫妳搵下吖。」我由床上面走落黎，然後行到去妍妍隔離，問︰「妳有冇小小印象放咗響邊？」

「唔駛喇，我搵得架喇。」妍妍道。

其實我見到妍妍響度周圍搵我需要既嘢我又唔幫手，唔係幾好意思既。

妍妍已經幫得我太多，我又點可以連呢小小嘢都唔幫？

於是我唔理妍妍，自顧自咁搵起上黎。

我見床底下面有個膠箱仔，於是將佢拖咗出黎。

「阿勉，唔響果度架，唔好拎出黎啊。」妍妍見到我想拎果個膠箱仔出黎，急忙阻止。

我反而覺得妍妍話冇既地方先至有可能係有既地方，於是唔理妍妍既反對，想掲開膠箱仔，一邊講︰「唔係哩，未搵過又點知冇呢？」

「唔好開啊！」妍妍見我想打開個蓋，就走過黎想阻止我。

不過已經太遲，膠盒仔個蓋已經比我雙手揭起咗。

「唔準望！」既然妍妍趕唔切阻止我揭開個膠盒蓋，佢就喝住咁叫我唔好睇個膠盒入面啲嘢…

但既然我係打開咗個膠盒蓋，我雙眼好自然就係望緊個膠盒仔架喇，唔通我合埋雙眼去開個盒咩，所以響妍妍出聲之前，其實我已經望到晒個箱仔入面啲嘢…

「呢啲係…」

（待續）

勉哥cls
根本就係以搵口罩為名，刺探人哋秘密

當年嘅定情信物 定係 性玩具

自己借自己Po賣下廣告︰



新番組！上架！有興趣請上Penana睇睇！同樣係差別連載，可以免費睇到尾，但訂閱讀者有得優先睇更多章節！

link in Bio: https://www.penana.com/story/151602/

故事簡介︰正傳世界觀第七作

有冇試過響中學既時候，遇到一啲異性，一講起嘢上黎，就情不自禁地同佢鬥咀？有人話過，如果一個唔成熟既男仔，總係要係咁搞到一個女仔發火，咁係因為佢心底入面其實係鍾意果個女仔，想要引起果個女仔既注意。

對林必才而，佢都有個類似既對象，呢個對象既名叫做葉佩儀。究竟佢一路以黎，其實對呢個女仔，只係單純既友情？定係心底入面其實不知不覺已經對佢起咗感覺呢？又或者…其實男同女之間有冇純粹既友誼存在？

(愛情/友情/正傳世界觀)

阿勉個人真係CLS的，又唔明人情世故，做嘢又淨係諗自己

妍妍冇性玩具咁淫

一百六十五

我望住眼前膠箱仔入面既嘢，有小小呆咗咁，半响都出唔到聲...

「呢個...咪係我果陣送比妳既...」我伸過手拎起咗盒入面果隻細細地既毛公仔…

係一隻傻鴨…

我記得…

係仲響我係男仔、同妍妍拍緊拖既時候送比佢既…

我其實係有一次我自己都唔記得係咩節日約咗妍妍出黎約會，行行下聽到隔離有人傾電話先醒起果日係唔記得啲咩節日（我真係唔記得…係咪聖誕？）應該要買份禮物送比佢，於是我響街啲街邊檔求其見到有隻冒牌既傻鴨公仔就買黎當禮物送比妍妍…

我腦海入面突然清晰地浮現咗果陣既情景...

果陣妍妍送比我既係一件運動褸，其實我都好開心，因為果件褸我想要咗好耐...都同妍妍講過好多次...

而妍妍收到我隻細傻鴨公仔既時候，佢一樣係好開心，係咁問點解我會揀呢隻公仔送比佢、又同我講係佢人生入面第一次有男仔送隻毛公仔比佢…

我果陣求其答話覺得隻傻鴨傻更更咁好似佢…

雖然話我係亂答，但其實我響街邊檔買隻公仔真係咁諗，覺得隻公仔好襯妍妍傻下傻下既形象...

估唔到妍妍仲保存得咁好…

「攞返黎啊！」妍妍將隻傻鴨公仔由我手上搶返過去，但唔知點解佢可以論盡到將成個膠箱仔整跌，入面既嘢都倒瀉晒出黎…

「唔好望啊！」妍妍急忙叫道。

但老實講，個箱響我面前比佢整跌咗，我會望住眼前既景象係人之常情，試問又點合得切埋眼呢…

所以，個箱入面倒瀉咗出黎既嘢，全部比我一眼就睇晒…

「呢啲係…」

「都叫妳唔好望咯！」妍妍氣急敗壞咁將所有倒瀉咗既嘢掃返晒入個箱仔，但其實我已經睇到晒係乜嘢黎…

係我同佢拍拖果陣送比佢既嘢…

有幾張卡（聖誕生日求其買、入面寫得句聖誕快樂或者生日快樂）、仲有果陣響妍妍半逼半就下同佢一齊影既好多張貼紙相、幾個求其亂買既鎖匙扣、為咗同妍妍一齊行山所以去買既環保袋…

全部都係我送比妍妍既嘢...

而妍妍就保存得咁好...

正如妖精所講...

即使妍妍之前自己冇意識到...

但佢實際上...

佢內心深處係有我既存在既...

佢自己做出黎既行為已經反映咗呢樣嘢...

「妍妍...」

妍妍已經將啲倒瀉咗既嘢亂咁推返晒入個膠箱仔，然後扮晒冇嘢咁...

「我都話冇架喇。」妍妍扮晒冇嘢咁，然後收返埋個盒仔，當我睇唔到咁...

但...我又應唔應該當睇唔到？

我呆咗咁坐咗響地上面，覺得心情有啲複雜，本來話要幫妍妍手搵黑超同太陽帽都冇咗件事...

我都唔知坐咗幾耐，先至識得企起身諗住幫手繼續搵，但妍妍一見到我起身就即刻叫停我：「阿勉，真係唔駛幫手喇，我自己搵就得。」

「哦…」我又坐返上床…

經過啱啱件事之後，今次我唔敢唔聽妍妍既說話…

唔係話驚啲咩，而係唔想搞到再有咩尷尬既事發生…

「啊，我記得喇，上次去行公園既時候我放咗響婆婆個袋度…」將成間房反轉又反轉，搞咗好一輪，妍妍先醒起黑超同帽唔響自己間房…

「阿勉，妳等我一陣…」妍妍講完之後就走咗出去，睇個樣似係去咗妍婆間房，然後我隱約聽到妍婆問佢「做乜咁夜仲唔瞓響度搵嘢」既聲音…

好快妍妍就返入房，手上拎住頂太陽帽同黑超，然後行埋床邊遞比我︰「阿勉，搵到喇。」

我接過黎之後講咗句「唔該」，然後兩個人沉默咗起來。

應該係因為啱啱件事搞到我哋有啲尷尬…

「我…我瞓先喇。」妍妍企咗一陣，然後行埋去碌架床條梯，準備爬上床休息。

我響妍妍經過我身邊既時候我拉住佢隻手…

「唔…？」妍妍停咗落黎，表情有啲困惑咁望住我…

「妍妍…妳聽朝要考試…但都肯聽我傾心事，又幫咗我搵呢啲嘢搵咗咁耐…多謝妳…」其實我心入面好感動…妍妍雖然蠢，次次考試既成績都好差，但佢係一個好重視考試既好學生黎，佢溫完書本來應該係早啲瞓，點知就因為我任性既要求，犧牲咗自己既休息時間，聽我講心事聽咗成個鐘，之後再幫我搵頂太陽帽同埋副黑超搵咗成半粒鐘都有...

好感動...

（待續）

感動完睇死佢又準備搞鳩人了