【2ch文連登式演繹】神主與不可思議　日本網友分享從事神職經驗

見有時間就應要求再講啲！
趁空檔時間所以可能會慢請耐心等

「御白樣」
學生時代嘅研究主題係民俗學
雖然冇咩特別意思但可以話係受柳田國男嘅遠野物語影響
嗰陣時嘅研究對象之一就係調查御白樣
御白樣Oshirasama係東北各地傳承嘅神明 有啲地方會叫Oshinmeisama等等好多叫法
同埋因應地域唔同 保祐嘅嘢都唔一樣 有農耕有治癒等等好多種
但係共通點都係作為御神體祭祀嘅係一個好獨特嘅人偶
冇手冇腳棒狀 好似火柴咁但就幫佢着好多層衫 塊面好扁平咁但有分男女又或者馬咁嘅樣
又加啲網上嘅圖畀大家睇係點嘅樣


雖則話面扁平咁但多少都有啲雕刻都叫有面孔
火柴人咁好似長頸族咁嘅形態好奇妙
而家被奉為御白樣咁祭祀但個由來係悲慘嘅怨念
暑假為咗做調查研究所以去東北
拜訪啲村嘅長老打聽下
當中喺一個御白樣而出名嘅村長老同我講
「越過嗰座山有條XX村 嗰度祭祀住同呢度更加唔同形態嘅御白樣我都未去過 如果想研究嘅話試下去 可能會更接近御白樣嘅歷史都唔定」

因為要做御白樣信仰嘅調查研究所以打算去嗰條村
其他村嘅長老問咩都好爽快咁回答 但唯有就係要去嗰條村就唔多建議咁
聽講嗰條村喺戰亂時代一啲殘黨為咗避開追捕而隱居 又受過附近嘅村唔好嘅對待 所以到而家都唔太鍾意同外村嘅人扯上關係
而我出世長大都唔係呢個地域嘅人嚟 我認為冇問題所以就打算直去
我揸電單車去 但途中啲山路都有啲失修凳到我有幾次差啲炒車
過咗座山就見到村
有桑田等等好多農作物 好多幾舊式嘅民居同田地
因為電單車嘅死氣喉嘈住 俾做緊農作業嘅村民冷眼望我
我落車走埋去第一個村民即係冷眼阿婆度
我「唔好意思～！」
婆「尼係邊戍嘅乜水（本身非常之方言 呢度潤飾過）」
我「我做緊大學嘅研究係關於御白樣嘅咁咁咁咁咁」
婆「係咩 咁尼去村長歌戍啦不過村長依個時候可能瞓緊晏教喺歌邊高台戍嘅神社側跟」

去到敲玄關門都冇人出嚟所以諗住周圍搵下
見神社就參拜係我由以前開始嘅習慣嚟
社殿都好舊 鳥居嘅朱紅色又剝落
本駿入面見到有四疊半闊左右 6.97平方米
最驚訝嘅係本殿嘅御扉開住 奉祀住一座御白樣（正常御扉係做大祭之類先會打開）
我眼力唔好同埋暗所以睇唔到個樣
觀察咗一輪就再一次去敲門 然後有個阿伯出嚟
係呢條村嘅村長
我同村長講我嘅調查內容同埋喺其他村聽返嚟嘅嘢 希望可以訪問一下佢
村長冇神社本廳嘅神職資格（前述嘅御白樣神社（化名）係獨立嘅）而我講我係為咗取得神職資格而讀大學後村長就好爽快答應
然後講咗好多到目前為止咩文獻都未見過嘅內容畀我知村長重好肯定咁主張呢條村就係御白樣誕生地

牛明

而家一般流傳嘅御白樣由來係咁：
「好耐以前有一個男人因為妻子先走一步所以獨自養大個女
冇錢普通百姓嘅男人唯一嘅寶物就係女兒同匹馬
但係女兒就愛上匹馬 話要同匹馬結成夫婦
男人就好嬲發狂咁將匹馬喺桑樹度吊死咗
不過女兒好傷心對馬嘅屍體好眷戀
男人見佢唔放棄 今次就將死咗嘅馬嘅頭斬落嚟
然後馬頭就載住女兒一齊升天冇再返嚟
男人非常後悔殺咗匹馬 所以就用桑樹整成叫御白樣嘅人偶 長期供奉馬同女兒」
有好多唔同嘅版本 但大致上都係講馬同女兒嘅愛情 同埋馬被殺都係共通嘅

見多識廣嘅連登仔已經睇得出

不過村長講嘅係咁：
「時代係戰國初期 呢片土地上成為都有地域戰爭
敗戰嘅殘黨兵嚟到呢條村開始隱居
喺有一日隱居村嘅村長發現個女經常夜晚走出去
問點解出去 原來係去採山菜嗰陣遇到鄰村嘅一個男人並且愛上咗佢
嗰個人叫右馬助
因為鄰村係敵方支配之下所以同佢講絕對唔可以去搵嗰個人 但個女打破規矩
村長好嬲嘅同時又想睇下到底嗰個人係點所以叫個女帶右馬助嚟
女兒帶咗右馬助嚟 懇求可以容許佢兩個結成夫婦
村長就同其他村民合力喺個女面前將右馬助綁起吊喺桑樹下
同右馬助講唔好再同佢個女來往 但右馬助依然懇求容許佢哋結合
村長就嬲到發狂 用繩纏住右馬助條頸吊起佢
慢慢右馬助失去意識死咗 女兒就對住右馬助嘅屍體痛哭
村長認為斬咗右馬助個頭落嚟就可以令個女接受現實 就喺揮刀之際女兒用身擋住 結果斬咗女兒個頭落嚟
就係咁右馬助同個女都死咗 村長後悔自己殘酷嘅行為 就用右馬助死嘅嗰棵桑樹雕出御白樣嚟祭祀佢哋

嗰個像就係本殿入面奉祀嘅像
歷代村長就係有份殺死右馬助同女兒嘅落難武士子孫 為咗鎮住佢兩個嘅靈而做神主守住神社
去更上嘅地方個故事就又唔同 所以推測應該本來就係唔同嘅故事嚟
村長話詛咒之類嘅嘢同其他故事合埋一齊而成
而呢條村就一直遵守住幾樣嘢
一、唔可以同其他村 特別係鄰村嘅男性結婚
二、唔可以令桑樹枯死
三、祭事嗰晚只要喺村度就唔可以同其他人來往
四、祭事嗰晚唔可以同唔識嘅人交談

呢啲規矩對研究嚟講好有趣
第一點理由明白 雖然對因為咁而被殺嘅兩人嚟講難順氣
第二點係為咗繼承御白樣嘅傳統要用到桑樹
第三點同第一點相同都係會令到御白樣反感
第四點就係有啲不可思議喺祭事嗰晚村度會出現未見過嘅情侶
佢哋會走去問村民今日有啲咩事
嗰兩個人被視為係右馬助同女兒 交談嘅話會被帶去死嘅世界

村嘅神社只係得一尊御白樣 就係代表女兒嘅嗰尊
另一尊而家喺鄰村 喺右馬助出身嘅村度被祭祀起嚟 只係到祭日先會帶去隱居村嘅本殿度湊齊兩尊
我諗呢個祭典應該會幾有意思所以向村長取得咗祭日再嚟訪問嘅許可
半年後 祭日前一晚去到當地 幫手準備神社祭事
然後就再次向村長問嗰四點禁忌 特別係後兩點要注意
第日朝就幫手做祭事同埋畀我參列埋一份直到夜晚
夜晚有氏子嘅人擺嘅攤檔 有種好懷舊風嘅祭典氣氛 感覺都幾開心

只係不時聽到有人講喺XX度見到御白樣 等等咁樣嘅傳聞
然後諗返起村長講嘅嘢 御白樣會由村去山 再由山去神社
嗰度嘅神社就係關鍵 被搭話都唔可以講嘢亦唔可以睇
只需要無視等佢改變
本身好期待咁嚟祭典但而家開始緊張同後悔嚟咗
喺啲細路仔周圍走之中 聽到村入面嘅婦女所講知道御白樣愈來愈接近
而家落山 由山去緊神社 重有五分鐘就到
後來先再聽返嚟 就係村嘅氏子青年部每年會派兩個人做睇水聯絡神社（呢度都有限制 就係唔可以俾御白樣發現 發現到嘅話就即刻唔可以繼續做睇水）

慢慢神社度嘅人聲靜落嚟
做奉納嘅嗰班婆婆嘅舞蹈同音樂都突然停晒同耷低頭
我都離遠咁見到御白樣喺度 兩個
真係好似長頸族咁嘅身體同埋睇唔清樣
望望跳舞嘅婆婆 見到兩個御白樣分別咁逗人講嘢
神社好靜 只係聽到樹林嘅聲
我知道向緊我呢邊嚟緊 所以我都唔睇面向下合埋眼

耳邊聽到聲 係咪叫不協和音呢
好似啲瑜珈球彈彈下咁buwa~nm嘅怪聲
「好生面口喎」「你喺邊度嚟？」
「活着快樂嗎？」
腦入面聽到咁樣
我用力合埋眼忍耐
然後點形容好呢 突然間有陣輕鬆晒咁嘅感覺知道完咗
御白樣返到神社祭典都結束 我同啲村民一齊飲嘢飲天光
同村長道謝後我就離開呢個地方
其實原來如果打破御白樣嘅禁忌會點冇人知
就係咁我貴重而又有啲恐怖嘅調查研究就咁完喇

到底打破禁忌會點呢
好有趣

#704
民俗學原來都搵命搏

>> 704 唔嗯 我係當興趣啫
喺學校度我主修唔係民俗學而係神道學

#711
諗起《宗像教授異考錄》 御白樣都幾恐怖 一套考據民俗傳說嘅漫畫 講兩面宿儺個PO都有提到
我喺東京以前住過嘅一個單位都試過俾白色手嘅靈捉過
個單位係兩房嘅 其中一間房應該話好陰寒好定咩 總之感覺唔多好所以平時都係瞓另一間房
但有次因為打掃喺嗰度瞓咗覺 就有俾鬼責&左手手臂壓迫
我心諗搞邊科 望一望左手邊嘅櫃 見到有隻白色手伸出嚟捉住我
之後我合埋眼頂住 然後冇耐覺得鬆晒後就察覺佢走咗
從此以後就避開唔再喺嗰度瞓

>>711 Google咗宗像教授異考錄！
好似幾好睇咁！
諗住搵日睇下^^
你冇咩實際受害咁就安心喇
真係好...

#717
好彩冇咩實際受害 但其實係一棟員工宿舍嚟 朋友住嗰個單位出現過落難武士
因為又方便又平租所以都諗係咁㗎啦 就算有啲咩出現個個都當冇嘢咁
睇嚟真係好講心態！

好想樓豬睇下前作嘅《宗像教授傳奇考》嘅「菊理媛說了什麼？」嗰個故事 譯本好似叫《東方奇譚秘聞錄》
講到黃泉比良坂嘅逸事 點解以前埋葬先人嗰陣要綁住手腳 黃泉比良坂係日本神話中現世同冥界嘅交界 綁住葬繩文時代嘅葬法

>>717 其實最重要都係就算有啲咩出現都唔好動搖！！
我搵日睇下先
多謝！

#733
我好鍾意夜晚嘅伏見稻荷所以會一個人喺丑時三刻周圍行咁嘅話會唔會觸怒神明㗎？
不過我冇靈覺所以咩都感覺唔到

>>733 唔會嬲嘅 但夜晚係神明嘅活動時間嚟！！
只要冇做啲咩無禮嘅行為應該唔會有問題

#736
樓豬有冇去過黃泉比良坂？
如果有去過嘅話想問下過咗榊樹個位就會覺得空氣好唔同 想知點解

>>736 唔好意思冇去過
到我死嗰陣都想去下嘅！

#742
呀！黃泉比良坂係指喺島根縣嘅嗰個多謝回覆 島根縣松江市東出雲町有個地方都係叫黃泉比良坂 補充少少日本神話嘅主要地點出雲國就係今日嘅島根縣

>>742 呀 嚇死我重以為問我啲咁神怪嘅嘢添
出雲大神嘅話有去過！
嗰度有嚿石碑！
古事記同日本書紀我覺得有趣嘅地方係
高天原呢個喺天嘅國度同而家日本好多地方名同傳承都有聯繫
我認為神明本身係人 係建立呢個日之國嗰陣活躍過嘅人物嚟
對當時嘅在權者 今日嘅神明嚟講 九州同出雲等地話唔定就係神之國嚟！
好興奮

#753
淨低嘅不可思議故事都想聽下

>>753 御白樣比想像中花時間但反應好似平平咁（唔知係咪有人睇）所以有啲氣餒 我明

御白樣比起恐怖係悲劇
我成日都咁諗 日本嘅恐怖片同鬼故喺恐怖嘅同時多數都係啲悲傷故事睇到心up咁

#810
既然御白樣反應麻麻咁我有嘢想問有度比較在意
我諗會唔會好似生剝鬼咁係由人嚟扮演㗎呢 秋田嘅一種祭典
如果係咁就在場個個都可以見到 定抑或係同人係唔一樣嘅嘢...嚟呢

>>810 有睇到嘅人都有淨係聽到聲嘅人
但就個個都感受到咁樣！

#873
終於睇到御白樣 咩時代嘅故事呀？咁覺好有趣 東北同山陰喺民俗學上好吸引

>>873 其實度度都有好多有趣嘅故事 柳田國男之類嘅民俗學家成功咁保存咗呢啲故事有個說法係話只係咁啱係遠野 柳田國男係類似格林兄弟咁搜集民間傳說 著作有《遠野物語》 遠野係岩手縣一個地方 岩手就係日本東北

以前好似聽過似御白樣嘅故事
唔記得喺邊度聽返嚟 嗰個故事係唔係御白樣呢
記得明明只係聽下都覺得好似驚驚地咁

樓豬有冇去過黃泉比良坂？

「收信」

大學嗰陣嘅事嚟 大學時代我一個人住
未搬前我都講過新地址畀高中等等嘅朋友知
有咩搵我嘅話都係用老家或者固網電話做聯絡
有一日 喺信箱度嚟咗一封信
個地址係我住嗰度但收信人名唔同 我心諗原來咁都會寄到然後睇下信入面
係男性嘅文體寫畀女朋友咁嘅內容嚟
哎呀呀 雖然對阿男朋友有啲唔住但我掉咗封信
然後又一日又有信嚟
睇內容應該係互相有通信嘅關係嚟

不過我有啲後悔之前掉咗封信我再睇睇個內容係講「係唔係重嬲緊 想你回信」咁樣
但係有唔少地方寫嘅字同平假名wi都係啲舊時嘅寫法
掉咗封信個心都唔舒服所以決定回信
內容係單刀直入咁寫話佢寄錯畀人
然後三日後左有信箱又收到信
竟然係我自己寄出嗰封嚟
當時我唔知點解會寄唔出 所以去郵局問下點解封信會打回頭
郵局個姐姐叫我等等然後就拎走封信去查下

「先生唔好意思 你呢封信個地址呢 而家已經冇咗呢個地址㗎喇 所以請你寫過個新地址再寄過啦」
就係咁樣
因為我本身唔係住呢度 唔熟呢度嘅地址所以先咁簡單都諗唔到
我知道咗係因為町村制改革嘅舊地址嚟
有少少謎謎地 我諗如果呢封信啲料係舊點解又會寄到去我度呢
我查一查知道我住嗰度嘅地址係冇變到

我住嘅係叫XX莊一棟好舊嘅樓 起碼有40年
我去業主嗰個阿婆點知有意外嘅答覆
呢塊地喺戰前都一樣有棟樓
當然形狀同而家唔一樣 名就冇變過 係由業主老豆經營
戰後因為空襲過同舊所以應該要拆嘅
但業主老豆堅持下搞返掂
業主本身細個都係重建前喺度玩過
然後我就問下關於收信人嘅女人名嘅事
業主聽到好驚訝

竟然係以前喺度住嘅住客嚟
業主話好有印象記得佢夫婚夫因為空襲而死所以捉住業主老豆係咁喊
不過可惜已經唔知佢而家喺邊重在唔在生
喺重建搬走嗰陣只係聽過傳言話佢嫁咗去第二度

到而家我嗰封信都寄唔到畀嗰個男人
遺憾嘅係而家嗰棟樓都冇咗 業主都過埋身所以唔知而家點樣
唔知嗰封信仍然會有信寄去嗰度呢
而我就到而家都冇辦法寄到畀嗰個男人
我諗一定係死咗之後都一直有寄信出去 寄畀相睇但未見過面嘅未婚妻

#755
喔喔喔
即係話空襲死之前一直通信嘅柏拉圖式情侶啦！

御白樣個故事好有趣 但係連冇靈覺嘅村民都可以睇到咁諗落都幾恐怖
收信個故事好慘情...樓豬多謝你咁有趣嘅故事

樓豬嘅故事好好睇
感覺睇完好似有得着咁

靈咩覺丫係咪on9？有就奇啦白痴

作為文化咁去睇去享受咪得囉

#669
我唔係好想信啲見唔到嘅嘢
但聽到呢啲後叫我住凶宅都會咪搞

#823
>>669 英國嗰邊好似話啲有幽靈出現嘅屋會好受歡迎兼且可以租貴啲添

>>823 啲西人都唔怕幽靈嘅
但明明佢哋就異常地咁驚惡魔

對西洋人嚟講做壞事就全部計惡魔
除此以外「只係喺度（人畜無害）」嘅就係幽靈
一認定係無害就只會當佢係一種phenomena

神係一啲自己入面嘅嘢嚟
你認為有就存在 咁嘅話嗰個就係神
同我思故我在一樣
崇拜山同海嘅習俗都係咁樣而嚟

#887
有嘢想問
有啲神社明確寫住唔准帶寵物有啲就冇 個分別喺邊？
如果話因為係神域所以唔准帶寵物都明 但咁嘅話冇寫嘅神社唔係都應該知呢個常識㗎咩？
有少少疑問

>>887 冇話有咩分別
應該只係睇宮司介唔介意而寫或者唔寫啫
原則上係唔帶得寵物嘅
可能只係剛好有宮司見到然後嬲得滯自己棟個牌啫

個PO差唔多爆
會唔會開2？
日日都追睇冇得睇會唔開心

咁快又開PO可能會對樓豬有負擔
到想開嗰陣先再開嘅話都會開心
雖然冇咩留言但一直有睇緊

「浴室的女靈」

件事係做第二間神社嘅事嚟
神社冇宿舍所以喺附近租屋
係木造建築50年樓齡
不過入面多少都有裝修得唔錯 有埋浴室 原文寫風呂場 即係有得浸浴 啲平租嘅地方多數都係得企缸
諗住租又平咁都幾lucky
就喺住落一排後 有日去浴室嗰陣有種唔好嘅感覺

好似有人喺度咁
間唔中會出面有貓走入嚟但唔係嗰種感覺
入到去果然有個女性嘅幽靈
我心諗「嗚哇唔係呱」但又有啲在意唔知點解嗰個女人係裸體嘅
我就冇話特別興奮嘅
應該話係好似有啲霧矇矇地咁 個腦認知唔到係一個裸體嘅女人呱

我姑且有唸到祓詞但神明好似冇降臨咁所以睇嚟冇效
見佢又冇做壞事所以無視佢照沖涼
而個女人就一直正座
我洗頭嗰陣佢「呢～呢～」咁叫我！
我以為我一直警戒住佢咁沖涼應該唔會嚇親 但都嚇到我膝頭撞埋牆度好痛
我試下應佢「咩事呢...」
「知唔知我屋企喺邊...？」
「er…我剛剛搬嚟冇耐唔係好清楚」
「咁...我可唔可以喺度住...？」
「唔可以...」「點解...？」
「你嚇到我撞親膝頭好鬼死痛囉...」
我急到都唔知自己講緊乜

然後個裸體女靈就
「係咩...你會後悔錯過我咁靚嘅靚女」
咁樣講咗啲奇怪嘢就穿牆出咗去
講真好驚
膝頭又痛 重有啲損咗添
因為佢最後句對白咁講搞到有少少後悔
之後一排我每次沖涼都諗「嗰個女仔重會唔會再嚟呢」
以上係一段年輕時嘅戀愛物語

#948
會講呢啲嘢嘅性格嘅女 唔關生死事都不了好啲

#949
哇～戀上你的靈喎
有套舊戲叫《與異人們共處的夏天》有靈體戀愛嘅男性版吸走陽氣嘅情節
同靈體交流得多係咪真係會被吸走陽氣㗎？

>>948 我對戀愛好單純...所以差啲中伏～
執返身彩～！

>>949 係㗎 所以我認為唔好扯上太多關係好
會有可能變成又唔係人又唔係靈唔上唔落嘅存在！
即係唔知自己係生定係死咁慢慢被侵食咁嘅感覺
喺度就喺度但應該唔會戀上嘅 但身邊冇咩人嘅話就會突然間覺得好似都唔錯咁

#952
浴室幽靈如果係model咁索咁好身材嘅話真係會幾兩難...

>>952 唔知變咗做幽靈係唔係會有美化功能 但真係幾靚！
同埋到底佢想做咩而家都係一個謎

#954
如果有層霧睇唔清嘅話 就算係生勾勾嘅女人
都有美化嘅傾向

#956
鬼我都見唔少 但個個都有着衫
係唔係自己嘅固定觀念覺得幽靈＝有着衫呢

>>954 講開又係！！！
睇嚟係自動腦補咗^^

>>956 我讀大學嗰陣都否定過靈體嘅存在
只係個腦自己搞出嚟嘅幻覺！咁諗
到我見到林林總總後都只可以認輸接受（笑）

其實幽靈觸唔觸摸到？

樓豬 繼續啦
我都喺去宮島嘅彌山嗰陣都唔知點解感覺到有神明咁
出雲大社嘅話要講反而係後面座御山感到有神明
好耐冇上2ch就見到呢個PO 唔知係唔係都係受到呼喚呢～

樓豬對啲問題嘅見解都好有趣好好睇
如果對樓豬唔造成負擔嘅話希望再開PO
回覆嘅話可以比而家慢慢嚟都得 希望考慮下！