【2ch文連登式演繹】神主與不可思議　日本網友分享從事神職經驗

>>75 我返來了
有人睇好開心！
吹唔吹水畀你哋判斷啦
我只係講體驗過嘅事

的確去到中途都係同A一邊做大祭嘅準備整緊啲文書嘢
但當值做御祈禱嘅我途中就行開去負責老夫婦嘅御祈禱
不過呢個只係普通地係A禰宜會錯意唔係咩幻覺嚟
如果去到連人嘅記憶都改變埋嘅話就唔係單單一句靈覺可以解釋
「呢張相...」

追晒
好同情樓豬遭遇
我冇靈覺但都信呢啲嘢

A「唔...呢張相...佢話幾時影㗎話？」
我「一個月前喺本市嘅XX湖畔」
A「咁就煩喇...」
我「係咪有啲咩唔妥？」
A「你睇睇呢啲先」
A禰宜拎咗個file出嚟入面放咗7-8張相
全部都係一樣有啲黑咗 甚至有成張黑晒嘅
而且一樣都係同一個湖度影嘅

live咗！

A「呢啲最舊有十年前 最近嘅就三年前」
件事係咁 祭祀住湖入面嘅湖主嘅神社自從同我哋神社合祀後就開始影到呢啲相
神社嘅職員認為呢啲相嘅原因係湖主（神）發嬲 三年前做過鎮魂祭以為可以鎮到魂

再做多次鎮魂祭？

同埋新人職員嘅我因為對住附有神明神威嘅相進行淨化 所以唔知會發生啲咩事 點解要咁做呀咁嘅感覺
簡單講 淨化神明簡直係講唔出咁弊
喺神社收工後連埋巫女所有職員全體開會
宮司「今次件事冇同新人嘅樓豬講我哋都一樣有唔啱」
我「真係好對唔住但係今次呢件事到底會有啲咩問題」
A禰宜「你咁諗都冇辦法 但係頭先畀你睇啲相入面嘅人 個個都會因為某啲原因喺一個月以內過身現任宮司嘅老父 先代宮司一樣喺做鎮魂祭嘅三年前過咗身」

樓豬重有幾多個月命？

祭祀係關鍵？

幾引人入勝
推

後續快啦！

樓豬都好努力㗎喇唔好催啦

sor

認真工作但因為啲所謂大人嘅理由而解僱 都幾不可理喻...

最後開會決定我同A禰宜去嗰個湖度
聽講湖主係一條大蛇
好耐以前湖入面有大蛇 大蛇就向人要求活祭品
祭品係奉獻嗰年最早出生嘅嬰兒 村就每年八月奉獻一個赤子
某年有個男嬰出世
個母親留低說話希望唔好將個仔拎去做祭品後就死咗
而佢老公打破村嘅規定逃入山裡面生活 但村民搵到佢搶走埋個仔
到八月奉獻祭品嗰晚 男人為咗救個仔去湖度
但個男人見到嘅係超過百尺嘅大蛇同埋得返一隻手臀嘅仔
男人發狂咁用鍬拮死大蛇 一命賠一命

從此以後個湖就風高浪急令到下游嘅河氾濫 活祭文化就一直維持到江戶時代中期
傳說係咁

追晒
繼續繼續

我鄉下都有大蛇定龍咁嘅傳說

#106
蛇真係好大鑊㗎...

#107
>>106 咁狐狸呢？貓呢？

#109
>>107 基本上動物神多數都唔好惹
狐狸呀蛇呀 狗都係對待方式唔啱就有報應

#111
未去過供奉貓嘅地方
不過呢啲都係有畀祭品有好好供奉就會守護你
但唔咁做嘅話...會點樣你知㗎啦？（威脅）
都係咁樣難服侍嘅神多

日本由古時開始就好多時都係為咗鎮住惡靈作祟就會祭祀佢為神
菅原道真呀崇德天皇都係呢啲嘅典型
動物靈都係一樣

#113
>>111 我淨係識狛犬同稻荷 狛犬即係日式石獅子 題外話 中國同日本古代都係冇獅子 所以中國石獅子其實都一樣唔係貓科動物嚟 只係一個好威嘅名 唔係獅子嚟 理論上同日本狛犬一樣係某種犬科動物 有一說話石獅子係西施狗
多謝解釋

呀原來係咁
係就係神 不過係荒御靈嗰種

>>113 雖然鄉下地 但我家族本家都係神社嚟
阿嫲咁樣教落

個鎮魂祭都係特別嘅祭祀儀式嚟
睇返當時嘅祭儀記見到有啲特別點
將五個代表赤子嘅饅頭掉入湖中
饅頭呢樣嘢應該係受大陸影響 諸葛亮
喺啲饅頭沉晒之前要一直誦祝詞
其他嘅神職就撒淨化嘅大麻同鹽水
喺沉晒後就喺四方棟起木頭用注連繩圍起 注連繩即係神社見到或者啲神樹神石上綁住嗰啲粗繩

大概係咁樣
補充返鎮魂祭本身係沿襲室町奉活祭品嗰陣嘅做法

推先

#125
神道教都好似其他宗教有分XX派？

講返本篇先
同A禰宜嘅視察決定第2日去嗰個湖
個湖喺相度係深藍色
但呢日個湖就綠色
A「同嗰陣時一樣...」
十年前好似都試過咁嘅色
翠綠色嘅湖有種好吸引人嘅美感
A禰宜話空氣好似唔流動咁所以今日離開先再接近嘅話可能會對我哋都有壞影響

>>125 冇話特別再分派 基本上神社本廳包晒
但就跟祭咩神有分神明（天祖）系、八幡系、稻荷系、出雲系 神明（伊勢）：天照大神；八幡：應神天皇；稻荷：豐收/狐狸；出雲：大國主

第2日有電話打嚟
就係之前搵我哋做御祈禱嘅婆婆
內容係講佢老公尋晚過咗身
呢對夫婦其實係最近先搬去湖附近嘅村 所以唔知個湖咁多嘢
聽到婆婆喊晒咁我個心都乸住咁 婆婆話好唔舒服所以講完決定離開條村後就收線
之後到夜晚要做神事
本來神事係喺神嘅時間嘅夜晚做 伊勢神宮都係夜晚做
呢個時候禰宜講起先察覺
呢日係舊曆8月23日 即係以前奉獻活祭品嘅日子嚟

搵到個有趣PO

同上 好睇

因為宮司只係50幾歲 而且前任宮司又係咁而死所以佢話唔想做
然後唔知跳咗咩掣咁話原因係因為我所以叫我去做
我心諗講到尾唔係你哋冇話我知咩...最後神事嘅齋主就由而家先第三年嘅我去負責
日頭係晴天但一到夜晚條村就落大雨好似係神明想阻住咁
又或者只係偶然
同埋聽講距離條村遠我間神社嗰度一滴雨都冇落

神事同三年前一樣咁做
掉啲饅頭入湖到沉為止一路誦祝詞
但啲饅頭就一直都唔沉
份祝詞俾雨整到濕晒好難睇但都繼續係咁讀
跟住就我都覺不可思議咁雨停咗
喺雲嘅夾縫中月光照落湖嘅瞬間 啲饅頭全部dup一聲沉晒
我本身未試過感受到神明 但呢個瞬間我直頭想講出口咁講係神明

饅頭浮起？

然後就冇再落雨
神事好順利完結返到神社
同我一齊去嘅神職以外個個都返晒屋企 嗰日都喺神社度過夜
第2日宮司建議我自動辭職
話我身上可能會降臨啲災難 而且對神社嚟講死亡係不潔 收留唔到有半隻腳入咗鬼門關嘅我
我心諗喂喂喂有冇咁唔講道理呀嘅時候A禰宜講咗樣嘢我知
「其實到目前為止有喺相到有影到而又生還嘅人 嗰個人係外面嚟嘅人而且之後都冇講嚟條村 可能要樓豬平安嘅話只能夠要你離開」
都已經是但點都好 總之名為辭職嘅炒魷 同埋我總算生存緊
只係唔想再去嗰個地方喇

追晒
意外地有趣好期待

第二間大概就係咁樣
趁冇咩人覆一覆先

#138
咁多呃瞞真係好易搞到會咩人都唔信
樓豬冇好好咁確認都有多少唔着
唔知係因為責任感定份人樂天
唔去逃避呢點令人有好感

>>138 上下關係都有啲嚴都諗係唔係自己打開咗潘朵拉盒咁
補充返嗰次之後神社好似每年都會做鎮魂祭

#142
鎮魂祭應該都係樓豬做完冇事所以先做咁嘅feel
原來侍奉神明嘅人都一樣咁自私

第三間係同第一第二間好唔同嘅地方嚟
我同大學同學講咩都好有冇工介紹喺佢嘅斡旋下搵到嘅
補充係第二間後過咗一年嘅事嚟
因為嗰陣以為可能好快死所以傻傻下咁玩足一年 搞到啲積蓄冇晒嗰陣就諗「咦喂？死唔去嘅？」

#144
樓豬除咗工作有冇不可思議經驗添？

>>142 我諗係冇啲咩災厄發生所以可以做呱
可能到有啲咩發生嗰陣嘅鎮魂祭又會炒個職員
神社界都好多黑暗面

>>144 都唔少㗎！
只係好細蟻嘅事

咁而家係咪做緊第四間？

第三間同第二間一樣都係中規模神社
個人嚟講因為近都會所以都幾開心
一開始同第二間一樣都俾人冷待過 呢行好窄所以啲傳聞傳得好快 重俾人改咗個花名叫疫病添
我估本來想叫我瘟神嘅疫病神 咁因為唔想用神明嚟講人壞話呢啲奇奇怪怪嘅正確嘢所以變咗得返疫病
補充重有啲唔知點解傳出嚟毫無根據嘅嘢 例如我做過痴漢 搞咗巫女個肚奉子成婚所以俾人趕走之類
但我都未結婚

有冇咁過份呀...

因為我叫有經驗 所以就唔算係新人初哥咁
俾人背後講壞話又冷眼看待所以精神健康上都麻麻 亦都冇後生嗰陣咁tough所以一日一日咁低落
當然最初有否定啦！但啲人都係講咩「喺XX神社嘅XX度聽返嚟㗎喎」「犯罪者個個都係唔認㗎啦」之類冇根冇據嘅嘢嘈嘈閉所以中途就駁都費事

勁過份

傳咗開去→都明
花名叫疫病→都明
痴漢奉子成婚→乜料？

精神唔好會反映喺外在度
做錯又成日失敗 下下都唔順手
啲誹謗中傷又唔停 甚至可以話全部都係啲牽強嘢
到有一日 上頭一個神主同我講一單工作嘅嘢
呢個人係御宮入面唯一對我又唔講壞話甚至唔係幾同人講嘢有少少怪嘅B權禰宜
「樓豬呀 如果我搞錯都好啲你係咪睇到靈體嗰啲嘢」

#158
禰宜同權禰宜有咩分別？

有靈覺喺現實世界生存都幾辛苦咁

我「唔係呀 啊 係 唔係 邊有啲咁嘅事呢...」
B「哦咁...其實我睇到」
講真第一次喺呢行度遇到公開認嘅人
我「？！？你睇到？其他人知唔知㗎？？」
B「知呱？所以啲人都驚咗唔同我講嘢 宮司都知所以專畀啲大鑊嘢我去負責」
的確B寧舍多做外祭 第三間神社係罕有地出去做外祭會有額外津貼出 所以個個都爭住做外祭 然而又唔會有人羨慕B咁多外祭做

>>158 禰宜嘅職級高啲
權呢個字嘅意思係代揩或者補佐咁解
例如有啲大間嘅御宮喺宮司之下都有權宮司 即係宮司嘅輔助咁解

B「去同宮司講下次一齊出去做外祭 我教你點做法事」
我心諗呢個人想做啲咩呢
但係好似真係幾有實力咁 所以宮司都同意我一齊去
喺車入面知道咗原來B意外地係幾健談嘅人嚟
有啲老豆格咁 同埋知道我俾人炒嘅理由都同我講嘢同情我 我心諗俾佢爆菊都制

原來如此
thx

追晒
久違好PO

佢同我講呢行度睇到嗰啲嘢嘅人有俾人疏遠嘅傾向
最後呢行都係講出身講家底 同你睇唔睇到冇關係 甚至可以話同其他人唔同所以更易俾人怕咗你
講真我多多少少都感覺到而家就直情確信
之後就開始同B一齊做嘢嘅生活
B作為權禰宜職位雖然唔算好高但都冇人對佢有意見 而我都全靠咁所以都少咗俾人講壞話

幾好睇
樓豬微妙地大安旨意又幾得意

我諗都有人會諗神社有冇咁常接啲大鑊嘅案 係間唔中會有 講真唔係會嚟好多
不過第三間神社嘅附近有個出名嘅詛咒樹林 簡單講都係做丑刻參拜嗰啲 釘稻草人 丑時着白初頭上綁蠟燭拎個稻草人仔釘去樹度 即係日式打小人 詳情參閱伊藤潤二嘅《雙一》
「呢啲嘢有冇效㗎？」會咁諗 但人嘅怨念的確係幾可怕嘅嘢
用嗰個方法會唔會令到人不幸就唔知 但積聚怨念嘅人偶就的確會對周圍有壞影響
據B所講憎惡嘅感情愈強就愈會吸引到惡靈 確實地會腐蝕人心

住啲樹附近嘅氏子聯絡我哋 然後再交接由B同我去處理 氏子係指氏神嘅後代或者信同一個氏神嘅後代 氏神係地域奉嘅共同神 氏族奉嘅神
大概一星期有一單 多嘅就兩單 可能你會諗 如果咁常有嘅話點解唔搵人去看守住
但丑刻參拜原則係唔可以俾人見到 曾經係搵過人去看守但就遇襲自從嗰次後就唔再派人去睇住

而件事係我入職三年左右

就算俾人見到 殺埋見到嗰個就咁就施咒成功
做丑刻參拜嘅人都會叼住啲利器我諗都係咁用

有一日 好似平時咁有稻草人釘咗上去
每次都係會做法事 但第日又有第日又有咁連續咗一個星期
而且睇嚟似係同一個人整嘅添
因為睇見都唔舒服 所以我提議不如貼啲告示話咩危險請勿傷害樹木之類
第日想知點樣所以去睇 但離遠就見到張紙唔見咗
心諗會唔會係俾人撕走咗 埋去一睇

見到係張紙上面釘滿咗稻草人同釘

我附近都有稻草人神社
日頭都覺陰森一行近就唔舒服