【歷史】點解咁憎猶太人？?

哈馬斯喺起義中蛻變成政治組織，成立初期對準政權只攻擊以色列軍事目標，但到咗89年出現首次針對平民嘅自殺式襲擊：當一架巴士駛到懸崖邊時，車上一名哈馬斯突然襲擊司機，奪去軚盤將車輛駛落懸崖造成16人死亡，而人肉炸彈亦係哈馬斯喺93年發明。


同年以巴和平出現𥌓光，工黨喺92年大選中勝出，由拉賓重任總理，開始著手以政治方法解決巴勒斯坦問題。而巴解嘅阿拉法特隨年歲漸長，亦同前人一樣明白到以色列不可消滅，如果巴勒斯坦要生存就必須妥協，同以色列講和。

經過一年多談判，93年8月20日拉賓同阿拉法特喺美國總統克林頓見證下於華盛頓簽署《奧斯陸協議》。


以談判起點挪威首都奧斯陸命名，協議按當年兩國方案推行，承認巴人對加沙同約旦河西岸部份地區嘅控制權，以色列亦同意從以上地區撤軍，巴勒斯坦自治政府得以成立。

隨協議締結第一次巴勒斯坦起義結束，協議亦令拉阿兩人同時獲得94年諾貝爾和平獎，但亦不幸地為拉賓帶來78年得主薩達特嘅下場：好多以色列人都反對同恐怖份子阿拉法特議和，亦將拉賓視為賣國賊。

在野利庫德乘機攻擊拉賓，指責佢背棄咗猶太傳統同價值觀。喺一啲集會中佢哋將拉賓嘅假人穿上反駁隊納粹黨衛軍制服，並將佢比作希特拉。當時擔任利庫德黨魁及國會議員嘅內塔尼亞胡甚至喺一場反拉賓集會上模擬幫拉賓送終。

為咗表達不滿情緒鷹派以色列人發動咗94年2月嘅希伯倫慘案，一名以色列上尉軍醫持衝鋒槍殺入清真寺，亂槍掃死29人百人受傷，佢哋當時正在做禮拜。

為替希伯倫受害者報仇，哈馬斯先後喺奧夫拉同哈德拉炸死十幾以色列人。95年11月4日死神更蒞臨總理拉賓，佢喺特拉維夫一個和平集會上被槍殺。凶手係一個法律系學生，父祖為也門猶太人，信奉正統派。


拉賓胸前染血嘅《和平之歌》


拉賓去世後，奧斯陸協議亦名存實亡。

以色列法院判決極端正統派猶太人須入伍　美媒：或致執政聯盟瓦解
https://www.hk01.com/即時國際/1032195/以色列法院判決極端正統派猶太人須入伍-美媒-或致執政聯盟瓦解?utm_source=01webshare&utm_medium=referral&utm_campaign=native
🌍最深入國際大事解讀🌍全球單月1700萬用戶🔥 立刻下載：https://hk01.app.link/inter


——

若說以色列人是美國的人天龍人，
這班極端正統派係以色列的天龍人。
最好戰，但又不用上戰場。

96年利庫德勝出大選，由內塔尼亞胡出任總理。名為Benjamin嘅佢有個乳名叫Bibi，其兄約納坦係特種部隊軍官，76年於烏干達一次拯救人質行動中亡於巴解之手。

或者嘅亡兄嘅人血饅為佢帶來政治資本，內塔88年當選國會議員並得到同為鷹派嘅沙米爾重用，任總理時年僅46歲。



巴解嘅恐襲好似助選團咁為內塔尼亞胡贏得大選，內總理唔信任阿拉法特，認為佢依然暗中策動恐怖活動。佢亦拒絕承認巴勒斯坦國，反對巴人難民回歸，為此刻意拖慢談判進程。

以色列人無視協議繼續喺加沙同將旦河西岸殖民，直到99年工黨擊敗利庫德由温和派嘅巴拉克上場，和談先再有進展。

喺美國撮合下00年7月巴拉克同阿拉法特喺大衛營會面，巴拉克提出將80%約旦河西岸比返巴勒斯坦，8%歸以色列，12%遲啲先講。

喺巴拉克眼中自己已經作出駭人聽聞嘅讓步，但提案依然被阿拉法特拒絕，佢堅持以色列按聯和國決議，放棄所有67年所佔土地。

兩人喺巴人待遇上亦傾唔掂數，阿拉法特希望以色列放寬對待巴人，容許佢哋有遷移嘅自由、取消未經審判嘅逮捕同集體懲罰、以及哨站檢查時嘅百般侮辱，同時阿拉法特亦唔同意一年只容許兩萬難民回歸。

結果大衛營峰會理所當然無結果，阿拉法特回到巴勒斯坦。到9月26日雙方再次進行談判，巴拉克今次願意喺首都問題上讓步，接納耶城為以巴兩國共同首都。但在野黨魁沙龍似乎有意整鳩佢，9月28日佢帶同隨扈傳媒一行人高調到訪聖殿山，因為此地對伊斯蘭教嘅神聖意義，令巴人視之為強烈挑釁，直接導致第二次巴勒斯坦起義爆發。


阿拉法特被認為有份策劃起義，喺沙龍到訪聖殿山幾個鐘後耶路撒冷舊城爆發大型暴亂，同日喺西岸地區亦出現抗議同暴動。

阿拉伯人堵塞主要交通道路，喺銀行同商店放火，猶阿兩族互相攻擊。以國軍警武力鎮壓，短短兩星期已有過百人身亡。

巴拉克面對困局表現得無能為力，令佢01年大選敗於沙龍。沙龍出任總理後表現強硬，命人包圍同轟炸阿拉法特約旦河西岸嘅官邸。

猶太人自古以來最唔缺嘅就係敵人，10月7日黎巴嫩真主黨發動跨境突襲，三名以色列士兵被殺。真主黨為伊朗所扶植嘅什葉派政黨及軍事組織，82年因以色列入侵黎巴嫩而成立，其成立宗旨為消滅以色列，喺巴解撤出後佔領咗佢哋嘅地盤。

踏入千禧年嘅中東，依然係一個火藥庫。

推

推

第二次起義總死亡人數多達4300人，係第一次嘅兩倍。直到02年以色列政府圍繞加沙築起種族隔離圍牆，起義先開始平息。04年11月阿拉法特去世，終年75歲。根據12年瑞士一間實驗室檢驗結果，阿拉法特好可能死於高劑量放射性釙中毒，矛頭直指以色列情報機構摩薩德。

阿拉法特死後阿巴斯當選為巴勒斯坦總統。



自奧斯陸協議以來，巴勒斯坦自治政府就收到唔少國際援助，法塔赫亦腐化起嚟(睇阿巴斯肚滿腸肥就知佢食唔少沙律)，估計阿拉法特本人身家就高達13億美元。

沙龍面對無日無之嘅巴人襲擊，決定推行單邊撤離方案，建立一條更易防範嘅安全綫。05年8月以軍從加沙撤離，甚至將69年以來移入嘅猶太人遷走。此舉受到佢哋好大抵抗，甚至有居民自焚抗議。最後結果就係令走廊成為一個可以從外警備並監視嘅超大型監獄，並將佢留比哈馬斯。



圍牆中窮苦巴人逐步投向清廉而激進嘅哈馬斯，令佢哋勢力漸大。阿拉法特在世時佢哋尚且不敢造次，但到咗05年兩派開始零星發生衝突。06年巴勒斯坦國會大選中哈馬斯贏得132個席位中嘅74，由哈馬斯嘅哈尼亞成為總理。

兩派好快就為人事佈局而爭執，當哈尼亞喺06年12月試圖經拉法邊境口岸進入加沙，因為佢當時帶同多達數千萬美元嘅阿拉伯世界捐款，以軍拒絕俾佢進入，哈馬斯於是襲擊由歐洲觀察員同阿巴斯總統親衛隊守衛嘅口岸。

哈尼亞最後喺無帶錢下返到加沙，但喺越過邊境時汽車被槍手襲擊並殺死佢一名保鑣。哈馬斯將襲擊歸咎法塔赫，兩派好快喺加沙同約西爆發大型衝突。法塔赫以緊急內閣取代哈尼亞領導嘅政府，哈馬斯亦罷免法塔赫所有官員，巴勒斯坦政府一分為二。

巴勒斯坦內戰造成過千人死亡，一直到08年3月兩派先喺也門傾掂數簽訂和約。哈馬斯一路打自己人，一路亦無停止向以色列攻擊，喺05至07向以色列發射約2,700枚加沙土制火箭炮，但只造成少量傷亡。08年6月以哈喺埃及斡旋下達成為期6個月嘅停火協議，以色列並答允逐步放鬆對加沙封鎖。

但以政府並無兌現承諾，並坦承自己就係想加沙經濟崩壞。喺以色列經濟同高牆封鎖下走廊150萬居民過住貧困生活，衛生程度低落同時失業率高企，就好似一個型貧民窟。



好多加沙人忍受唔到而選擇移民其他阿拉伯國家或去以色列做外勞，以色列亦得以削弱哈馬斯吸收新血。而佢對約旦河西岸就採取另一種做法，殖民性吞併土地，西岸三分一被重新劃分為大耶路撒冷一部份，猶太人得以喺度建立屯墾區。



長期被封鎖嘅加沙人依靠地道偷運包括軍火在內各種物資，08年底以色列以此為由對加沙發動代號鑄鉛嘅軍事行動。行動蓄謀已久，經兩年策劃並吸取黎巴嫩戰爭時情報不足嘅教訓，以軍精準地向加沙發射過萬導彈，摧毀警察局、監獄同指揮中心等450個哈馬斯目標，而同時黎巴嫩眞主黨亦向以北發射火箭炮，2009年加沙戰爭爆發，戰爭僅22日就結束，以軍以鉅大優勢大勝，以方僅有十幾人死亡，巴勒斯坦則達1400人。



09年大選中利庫德再次取得相對優勢，由內塔牽頭其他4個黨派組織聯合政府，包括工黨、冷戰後蘇聯移民為主體嘅“以色列我們的家園”、正統派嘅夏斯黨、右翼猶太人家園組成聯合政府，內塔再次出任總理。



由於以色列人作為民族本來就係五花八門，導致政壇各小黨林立，最多試過有33個政黨參選，佢哋分為5大類：以工黨為首嘅左翼、利庫德為首嘅右翼、中間黨派、宗教黨同阿拉伯人政黨。

雖然猶太人當中只有15%為正統派(50%為世俗派35%為保守派)，但因為以色列政黨嘅特殊形勢令任何黨派都無法單獨組閣而必須拉攏各小黨派，包括宗教黨在內嘅中小黨派得以發揮不成比例嘅影響力，除咗安插成員入閣，更可以對總理制約甚至勒索。

1970年嘅《回歸法》修正案正反映宗教黨勢力加強：只有猶太母親所生及皈依猶太教先算係猶太人得以入籍，以此將宗教同民族捆綁。同屬右翼嘅宗教黨隨利庫德上台地位上升，佢哋喺巴勒斯坦領土問題上態度強硬，認為猶太人回歸已經係神嘅旨意，應不受限地移居西岸同走廊最終佔領整個地區建立大以色列。佢哋當中嘅極端派亦有一啲幾塔利班嘅行為，包括喺安息日襲擊路過汽車，毆打喺安息日從事娛樂活動嘅人，分隔巴士上男女乘客，反對喺報刊上刊登女性照片。



雖然正統派猶太人希望多佔巴勒斯坦土地，但就以宗教為由拒絕服役，而此舉亦被法律容許，不過咁唔代表佢哋對以色列軍事毫無貢獻，正統派猶太人嘅高生育率令各種育兒所需嘅醫療教育設施喺社區蓬勃發展，造成所謂馬太效應嘅兩極分化現象(好嘅越好衰嘅越衰)，世俗派搭上順風車得到便利，因而願意多生。現時以色列嘅生育率達到2.93，為發達國家首位，同時好多出身正統派家庭嘅細路長大後投向世俗派，最終亦成為兵源。

推

納粹黨嘅組織模式本來就係源自法西斯主義，而法西斯又係列寧主義嘅學生。

但係...法西斯主義早過列寧主義好多喎

Live

Push

推到2024

就黎完post

內塔尼阿胡嘅改革方案引起司法界強烈抗議，視為行政干預司法，破壞三權分立。雖然內塔嘅用意只係想減少司法系統對國事嘅掣肘，但改革亦同時削弱緊基層法官嘅法律解釋權，而佢哋審判日常瑣事時對人情義理嘅理解往往比死跟條文更重要，司法界由上到下都反對內塔方案。

内塔嘅舉措正係佢長期執政嘅結果，以國一直以來嘅短命政權屎忽都坐唔暖，對於限制法院權力自然興趣缺缺，甚至樂得將權力同司法系統分享，將爭議交俾法院裁決。喺比比王同佢 麾下原來邊緣化嘅極右翼政客眼中，就係司法系統剝削緊行政應有嘅權力。同時佢哋倡導嘅政策亦同最高法院許多法例相衝突，兩權因而迎面相撞。

為反對司法改革，以色列國內爆發大型示威，最終喺2024年1月1日，最高法院以8票對7票否決有關法案。



當以色列陷於內憂同時，佢嘅頭號外患亦由阿拉伯人變咗波斯人。79年伊朗爆發咗伊斯蘭革命，以霍梅尼為首嘅毛拉們(伊斯蘭學者)用列寧嘅手段控制軍隊同糧食配給，創立黨國一體嘅神權政治體，一個信阿拉嘅蘇維埃。

西方世界本來對佢哋得勢感到高興，認為係對抗親蘇世俗派如法塔赫嘅健康力量。但隨住冷戰結束，伊朗亦都同塔利班一樣同美國反目。視美國為敵嘅伊朗自然睇主人打狗，以伊雖地理不相連，但伊朗憑藉對哈馬斯同黎巴嫩眞主黨嘅扶掖，一直對佢進行狙擊。

而以色列嘅反制措施就係還施彼身，扶持位於伊朗北境嘅阿塞拜疆。阿塞拜疆人係伊朗國內最大少數民族，佔比達15%。如果伊朗境內嘅阿塞拜疆人選擇與同胞結合，伊朗將有分裂之憂。以色列為阿國提供武器以換取石油，亦喺阿國同亞美尼亞(得伊朗支持)嘅領土糾紛上支持佢，形成猶太-伊斯蘭vs伊斯蘭-基督嘅吊詭局面。



2022年伊朗另一盟友俄國入侵烏克蘭，黃藍越發壁壘分明。輸無可輸嘅哈馬斯再次為金主作爛頭卒，喺23年10月7日發動震驚世人嘅雷姆音樂節大屠殺，慘案前一日加沙附近嘅雷姆集體農莊正進行「超新星蘇庫特節」，入場人數達3,500。

正當音樂會進行當中，突然有50名哈馬斯成員切斷電源，而且見人就殺，300幾個平民慘被槍殺同燒死。




但佢哋好可能比僥倖者更幸運，40人被挾為人質，更遭受殘酷對待。據網上流出片段，一名女人質懷疑被哈馬斯先姦後殺，死後衣衫不整嘅屍體被當成戰利品遊街，沿途民眾不斷歡呼，並向女屍吐口水。

同日共有3千名哈馬斯由加沙入侵以色列，同時間佢哋亦從加沙發射飛彈，造成過千人死亡，第六次中東戰爭嘅號角已經吹響。

推

真係到左2024，推

今日最新消息
哈馬斯領袖喺伊朗畀以色列擊殺