1970年9月納薩病逝遺缺由薩達特繼任,佢矢志收復西奈失地。為達目的,佢爭取到大量蘇聯軍事援助。薩達特希望以可控嘅戰爭挫下以色列銳氣,有籌碼喺手就可以迫佢埋枱講數。
上次嘅贏家以色列選擇以守代攻保住戰利品,包括耗資巨款喺蘇彝士運河旁修起防禦工事,並以參謀長巴列夫命名。
巴列夫防線以運河邊上嘅混凝土牆為主體,上面再鋪滿沙。之所以用沙係因為佢不易變形,被認為能有效阻止埃及嘅坦克炮轟,達揚更形容為世界上最好嘅反坦克壕之一,估計可以阻擋埃軍一兩日。
然而事態發展遠超以軍預算,1973年10月6日,當天係猶太最重要節日贖罪日(由來:【歷史】點解咁憎猶太人?- 分享自 LIHKG 討論區 https://lih.kg/AuKzNiX),埃及知道嗰日係紅日,好多軍官會選擇回家贖罪,於是同敘利亞同步夾擊以色列。
面對長城咁款嘅巴列夫防線,埃及早有準備喺歐洲買定水炮車,覆蓋喺防線上嘅沙粒因為濕水而迅速崩塌,埃軍好快就喺防線上打出多個缺口。
8萬埃軍僅用咗6個鐘就越過巴列夫防線,同時又以空軍攻擊以色列喺半島上嘅軍事據點,擊落大量戰機。同一時間敘利亞亦進軍戈蘭,收復唔少失地。
埃及同敘利亞都總算吐氣揚眉一次,阿拉伯弟兄亦受到鼓舞,連戰前同以色列眉來眼去(戰前約旦曾向以色列通報埃敘即將發兵,但被以色列認為兩國同新翻嘅蘇制武器接軌需時而不重視)嘅尚書約旦亦決定參戰。佢哋今次更異常團結,以手上控制嘅石油為注碼,威脅歐洲保持中立。
戰爭第四日女總理梅爾夫人決定向國際求援,歐洲諸國一來忌憚石油制裁,二來都覺得上次以色列贏得太盡,霸咗人太多地方,所以都紛紛拒絕援助。相反埃敘除咗伊斯蘭陣營,仲有共產國家如古巴北韓支持。
此刻猶太人仿佛又回到昔日被世界排擠孤立局面。但正所謂兄弟唔駛多,最緊要幫拖,好兄弟,一個就夠。