【歷史】點解咁憎猶太人？?

長久以來作為優秀匠人嘅日耳曼民族
呢個錯誤

恐怖分子

巴勒斯坦猶太人嘅建國欲望伴隨二戰結束而與日俱增，45年5月猶太代辦處向英國人正式提出立國要求，喺遭到拒絕後，代辦處主席·本-古里安古里安警告英國，等待佢哋嘅會係赤裸野蠻暴力。

當明白只有勇武路線可行，猶太代辦處同哈加拿、伊爾貢、萊希等三大民兵團決定放下矛盾，共同組織猶太抵抗運動。哈加拿主要負責文宣，嚴厲抨擊英國嘅移民政策；伊爾貢同萊希就負責針對英軍同警察發動暴力襲擊。

因應猶太人嘅襲擊活動日益猖獗，英國託管當局喺46年6月29日進行阿加莎行動。警察同士兵喺耶路撒冷、特拉維夫、海法同幾十個猶太定居點犁庭掃穴，猶太代辦局亦被突擊搜查。行動中除咗搜獲大量武器同拘捕咗三千人，英國人亦搵到好多猶太代辦處參與恐怖活動嘅證據。文件被帶到大衛王酒店，嗰度當時被英國情報機構徵用作為總部。


伊爾貢同萊希為咗消滅證據，策劃將酒店炸毀。喺未得到本-古里安同猶太代辦處同意下，哈加拿亦決定支持此一計劃。


46年7月22日，喺貝京總指揮下，伊爾貢成員喬裝成阿拉伯人將藏有五百磅炸藥嘅牛奶桶放喺大衛王酒店嘅地下室。事後伊爾貢堅稱曾先後向酒店、報館同法國領事館撥打匿名電話作出警告，要求人員進行疏散。但呢啲電話打出嘅時間都好晏下，同時亦被當成虛報而被無視。到咗中午12點37分，炸彈終於爆發，英國情報機關所在嘅酒店側翼被炸毀，一共有91人死亡，死者包括英國、阿拉伯同猶太人。



本-古里安對此次恐襲表示不知情並作出譴責，猶太代辦處亦退出抗英戰線。大衛王事件震撼咗整個英國社會，令反猶太情緒變得普遍。1947年8月當兩名英國軍士被伊爾貢絞死後，英國各地更爆發反猶太騷亂。

猶太人會賺到盡？

愛因斯坦喺1948年寫既一封信提及到

"如果我地(猶太人)喺巴勒斯坦遭受真正災難果陣 最大責任就係英國人(Balfour Declaration) 而第二大責任就係我地自己既恐怖組織 (指Lehi同Irgun)"

喺信既最後更加同佢地割席

二戰結束後日不落帝國步入黃昏，全球殖民地紛紛獨立。而英國人民對巴勒斯坦嘅治安戰亦越發厭倦，喺當時該區駐防英軍有成十萬人，戰後三年時間英國喺巴區已投入多達2.2億美元。

對大多數英國人嚟講山長水遠嘅中東荒漠由阿拉伯定猶太人揸旗根本關人𨶙事，戰後嘅英國人面對經濟不景資源匱乏，自身生活困苦令佢哋走向厭戰，只希望自己嘅子弟兵可以回家。

猶太人當時嘅抗英活動其實同越共對抗美軍、哈馬斯對抗以色列手段無異，一樣都係周圍掉下炸彈搞下破壞，令敵人管治成本大大提高，等佢哋唔耐煩自行撤退。

猶太人嘅恐怖手段，因歷史中各種陰差陽錯而奏效。急欲復員嘅英國人選擇好似彼拉多咁金盤洗手，喺47年4月正式向新成立嘅聯合國提出將巴勒斯坦問題列入會議日程，計劃結束近30年嘅統治。

同年11月29日聯合國通過181號決議，英國將會喺48年8月結束管治並全面撤軍，巴勒斯坦嘅土地上會分成阿拉伯同猶太兩個新國家，而雙方嘅聖城耶路撒冷就獨立出嚟由聯合國管理。
藍色猶太，橙色阿拉伯


喺當時巴勒斯坦有阿拉伯人約110萬，猶太人就有50萬。 阿拉伯國將分得43%土地，餘下嘅57%歸猶太人。但猶太國嘅大部分領土由內蓋夫沙漠組成，喺當時只係一塊爛地唔適合發展農業，同時亦有大量阿拉伯人口。

決議得到冷戰兩強美蘇共同支持，當時兩國都反對英帝國殖民主義：對蘇聯嚟講中東一直係英法嘅勢力範圍，如果可以扶植建立猶太國家，甚至可能係一個親蘇社會主義國家，對於共產主義戙旗有積極作用；而美國則一貫反對包括英國在內嘅殖民主義，美蘇兩國亦同時有大量猶太人口，亦成為以色列立國嘅推動力。

結果喺蘇聯東歐附庸同拉美諸國贊成下，議案獲得通過，而英國則棄權。

反對嘅大部份係阿拉伯國家，佢哋唔認同聯合國有資格分割阿拉伯嘅神聖領土。當巴勒斯坦猶太人為立國歡天喜地，佢哋嘅阿拉伯鄰居則陷入狂怒當中，先係喺12月1日發起持續三天嘅總罷工，不久再將手段升級 ：阿拉伯人湧向市中心，一邊高呼要殺死猶太班仆街，一邊以私刑處死佢哋。


新成立嘅阿拉伯聯盟喺背後支持巴勒斯坦人，由埃及、伊拉克、約旦、黎巴嫩、沙特阿拉伯、敘利亞、也門組成嘅阿盟當時好似中華民族咁，想重建大一統阿拉伯帝國。但阿拉伯人亦不幸地同華人一樣喜愛內鬥----約旦王國想將巴勒斯坦納入國土，敘利亞認為黎巴嫩同巴勒斯坦都係大敘利亞一部份。埃及穆罕默德·阿里王朝嘅國王以正統君王自居，睇唔起約旦同伊拉克嘅暴發戶哈希姆家族；哈家同時亦仇視將佢遂出阿拉伯半島嘅沙特阿拉伯。

留名學嘢

岩岩煲晒樓主既法餓懊土po
獲益良多

樓主在嗎

樓主，爭幾篇咋，比啲力寫埋去

伴隨二戰結束係巴勒斯坦內戰白熱化，阿拉伯人同猶太人互相撕殺，手段包括向對方平民開槍同喺公眾地方放炸彈。而行將撤退嘅英國人同澳葡時代殖民地官員一樣，對崩牙駒同水房賴嘅鬥爭採取放任態度，1948年嘅巴勒斯坦已深陷泥沼。

戰火繼續燒向平民，阿拉伯人好多都選擇逃離家園，而4月9日發生嘅代爾亞辛村大屠殺更將移民潮推向高峰。當日伊爾貢同萊希約120名民兵試圖佔領耶路撒冷附近嘅代爾亞辛村，嗰度有約600阿拉伯人定居，長年同側近嘅猶太人和平共處。



4月9日清晨伊萊聯軍抵達村莊，佢哋本來以為村民已經走曬，但卻遭到頑強抵抗。民兵們於是以手榴彈挨家逐戶入侵，將民房炸毀。戰鬥中有過百村民被殺，當中包括婦孺。

民兵軍紀敗壞，喺村中燒殺搶掠，甚至想將被俘嘅村民殺曬。但好在代爾阿辛村民同隔離村嘅猶太人一向關係友好，喺猶太村民阻止下而唔成事。



屠殺令到更多阿拉伯人選擇離開，48年間合計有近70萬人逃離巴勒斯坦。因為事件性質太過惡劣，哈加拿同猶太代辦處都表示割席。代辦處更向約旦國王道歉，但就遭到回絕。

阿拉伯人迅速展開報復，5日後佢哋襲擊咗一隊準備前往耶路撒冷哈大沙醫院嘅醫療車隊，70幾名猶太醫護病人，以及護送嘅哈加拿士兵被殺。槍手肢體咗佢哋嘅屍體，並同屍體合照。照片被大量沖曬更制作成明信片出售。



到咗5月14日，英國對巴勒斯坦嘅統治正式結束。同日喺特拉維夫嘅藝術博物館，猶太代辦處主席本-古里安喺國父赫茨爾肖像下宣讀《以色列國獨立宣言》，以色列正式立國。



本-古里安成為首任總理，而年邁且幾乎失明嘅魏茲曼就成為虛君元首總統。

以色列立國迅速引來阿拉伯諸國反對。第日上午埃及、約旦、伊拉克、敘利亞等國紛紛派軍隊進入巴勒斯坦，並襲擊以色列軍隊同猶太定居點，第一次以阿戰爭爆發。

樓主新年快樂

賺錢太盡 搞到神憎鬼厭

元首都有d德政

納粹全名係國家社會主義德意志勞工黨

當時阿拉伯聯軍合計有4萬3千人，而以色列就算將三大民兵團納入正規軍，都係得3萬人左右。而軍備上得到英國背後支持嘅阿聯亦遙遙領先，英國軍官更加喺阿軍中擔任顧問，雙方實力懸殊。



喺當時普遍認為阿軍會大炒以軍，二戰英雄蒙哥馬利將軍更認為以色列會喺兩星期內被擊敗。而喺阿拉伯人眼中，自己嘅祖先長久以來都係勇武嘅征服者，而猶太人則從來都係唔打得嘅順民。

阿拉伯人兵分幾路攻向新生以色列：埃及軍由南路進攻，一路打到特拉維夫城外40公里處。而約旦軍則喺5月17日攻入耶路撒冷，同以軍爆發激烈巷戰，更佔領咗聖城嘅阿拉伯同猶太舊城區，敍利亞同伊拉克亦都佔領咗唔少城池。



此時以色列已經水浸眼眉，但好在佢嘅立國係得到聯合國確認，此時兩大常委國美蘇都出面干預，喺48年5月29日宣佈由6月11日起停戰28天停戰。同時暗中支持阿拉伯嘅英國，亦因為受到美國壓力而退出。

阿軍因為急需補充軍火同人員，所以亦同意暫時停戰。以色列喺全國發起總動員，所有全國17歲以上青年，不分男女都要接受軍事訓練。世界各地嘅猶太人亦紛紛搭飛機嚟到以色列參軍，當中有好多係參加過二戰嘅老兵。



猶太人嘅雄厚財力喺關鍵時刻亦發揮作用，以色列得以大量購買武器，但美國人當時並未開通依然對以色列實施軍火禁運，以色列只能以購買推土機或農業機械名義從美國走私軍火。當時反而係蘇聯屬國捷克對以色列無限量提供武器，日後以國空軍嘅基礎就係當時打下。

到48年7月，以軍人數已增至6萬5千人，到當年底更突破十萬大關。相反各懷鬼胎嘅阿拉伯聯軍人數就無咩增長，到48年10月只有5萬5千人，一直到戰爭結束。

當時嘅以色列人再縮就無路可退，自然有破釜沉舟嘅氣魄；相反阿拉伯人只係希望爭奪巴勒斯坦嘅地盤，約旦試圖兼併約旦河西岸建立大約旦王國，而以阿拉伯龍頭自居嘅埃及則希望壓制約旦嘅野望。

7月9日停戰期限一過，新建嘅以色列空軍直撲阿軍陣地，並好快獲得咗制空權。此後阿拉伯聯軍因為內部分及缺乏統一嘅軍事計劃，錯失多次戰機。勝利天秤逐漸向以色列傾斜，以軍連戰連勝逐步奪回被佔領土。最後阿方因為損失慘重，喺49年1月提出停戰，被以方接納。以色列有6千餘人陣亡，阿拉伯聯軍損失萬五人。

樓主初二都出文

樓主加油，新年快樂

雖然以色列傷亡人數較少，但當時佢只得六七十萬人口，按百分比損失甚大。第一次中東戰爭改變咗巴勒斯坦版圖同人口結構，獲勝嘅以色列佔據咗8成土地，但約旦河西岸同東耶路撒冷依然俾約旦佔據，約旦並喺50年將該地納入國土；今日紛亂嘅加沙地帶就被埃軍接管，成為收容阿拉伯難民嘅營地。



1923年希臘土耳其人口互換喺戰後中東重現。70萬阿拉伯人離開以控巴勒斯坦，分別前往加沙、約旦河西岸同其他中東國家。同時亦有相等數量嘅猶太人離開阿拉伯國家，佢哋嚟自摩洛哥、也門、伊拉克等地，其中伊拉克喺戰前更有35萬猶太人。

戰後阿拉伯國家民族主義勃發，近似國民黨嘅復興社會黨人興起，反對西方勢力同佢嘅走狗王室。而喺第一次中東戰爭後阿拉伯人就將敵意轉向猶太鄰居身上----畢竟白鬼同以色列遠在天邊，只能以攻擊排斥身邊嘅猶太人，形成共犯結構去塑造民族。

呢啲東方猶太人就係咁俾佢哋嘅西方同胞唧濕，不見容於本國，只能夠離開世居千年嘅屋企，好多就移民咗去以色列。



一時間以色列多咗一倍人口，為此政府喺50年通過《回歸法》，宣佈所有猶太人皆可獲得以色列國民身份。

當東方人回歸祖國後發現既得利益已經比先來者歐洲猶太人霸佔，而長年同阿拉伯人雜處嘅佢哋亦同西方人格格不入。東方人俾政府安置喺戰爭中新獲得嘅土地屯墾，做開荒牛兼炮灰。

而埃及嘅阿拉伯民族主義者最終喺52年推翻親西方法魯克王朝，激進派軍人擁立強人納薩上場。



納薩上台後希望富國強兵振家聲，首個大計就係建造阿斯旺水壩，以灌溉尼羅河三角洲。而納薩雖然反西方，但同反對舊帝國主義嘅美國相當投契，於是得到佢貸款資助。

但美國雖然答允助埃及富國，但就拒絕出售武器，以免影響以色列。於是納薩就改為同美國宿敵蘇聯埋堆，蘇聯再次透過捷克出售大量軍火俾埃及。

不滿嘅美國於是抽起對水壩嘅貸款，當時亦正值英軍撤出埃及(36年埃及獨立後，協議駐軍20年)，納薩把心一橫，喺56年7月將英法嘅蘇彝士運河收歸埃及，以運河收入興建水壩。



蘇彝士運河係由法國人喺1859年開鑿，法英兩國資金分別佔52同44%，埃及政府及其他股東只佔4%。由於三份二嘅中東石油都要途經此地，對英法而言係生金蛋嘅。

納薩嘅決定自然引起英法兩國反彈，佢哋決定利用敵人嘅敵人代勞。當時以色列亦對埃及嘅擴軍舉措感到憂慮，英法以三國一拍即合，達成祕密協議，由以色列做爛頭卒攻擊埃及。然後英法兩國再扮和事老介入，透過調停重新介入控制蘇彝士運河。

1956年10月29日，以軍喺英法空軍掩護下，出動4萬5千兵力分四路攻向西奈半島，第二次中東戰爭爆發。

1956年同時係英國國力大幅下降嘅年份
之後就美蘇爭霸

呢次係千百年來猶太佬首次主動出擊打𨳊人。幾個鐘頭後英法亦出嚟扯貓尾要求兩國停火，以色列表面接受調停但繼續入侵，兩日後佔領咗整個加沙及西奈半島。而英法亦以埃及拒絕調停為由，藉此進軍埃及。



但三國嘅行為遭到以美蘇為首嘅國際社會讉責，甚至英法國內都有反戰示威。更由於佢哋行動前未知會盟友美國，令佢好唔滿意，視之為英法殖民之心不死，必須予以打擊。總統艾森豪威爾為向英國施壓，即大手拋售英磅致其貶值達15%。而蘇聯亦支持盟友埃及，向美國提議聯合軍事行動，甚至威脅要放核彈。

由於戰後歐洲經濟一直仰賴美國支持，拿人手短嘅英法實在缺乏同美國作對嘅勇氣。11月6日三國宣告停火，第二次中東戰爭僅8日就結束。不久英法即退兵，而以色列就直到57年3月先撤出加沙同西奈。

二次中東戰爭係除英法以外盡皆勝者嘅一役，英帝日落西沉，從此世界化作美蘇兩霸嘅博弈場；以色列則成功喺中東戙起枝旗，成為該區不能忽視嘅存在，更洗脫猶太人千年來嘅怯懦惡名。



而更出人頭地嘅係埃及總統納薩，佢憑住擊退老牌強國英法嘅名望，奠定阿拉伯世界龍頭地位。1958年2月埃及同敘利亞合併為阿拉伯聯合共和國，不久又加埋也門王國組成阿拉伯合眾國。但到咗61年9月敘利亞就頂唔順埃及扮曬大佬而宣佈退出，阿拉伯合眾國亦於當年底解散。但埃及一直保留聯合共和國號至71年。