估唔到返hall影畢業相會被迫用條命玩ocamp

又到入hall嘅季節，係時候講下住hall。

只係，估唔到返hall影畢業相嘅時候，會被迫用條命玩一次hall o camp。
--------------------------------------------------------------------------------------
舊故：
我青梅竹馬同咗個死MK仔一齊//《不懂愛的青梅竹馬們》
Post 1: https://lihkg.com/thread/2583136
Post 2: https://lihkg.com/thread/2656487

《同居女孩》
Post 1: https://lihkg.com/thread/2662244
Post 2: https://lihkg.com/thread/2735039

「我係橙hall前hall tutor阿勝，你信唔信我！？」我激動地對住喺一樓高台邊緣嘅「佢」講。

依家我哋陷入咗一個奇怪嘅狀態，一樓戶外花園同地下廣場有一層單面鏡般嘅白霧，下面望到上去，但係上面就望唔到落嚟。

被迫住玩死亡ocamp嘅我哋，要由一樓背對地面向後瞓落去。

面具男稱呢個係trust fall。如果唔能夠喺限時由一樓fall落去地下，喺一樓嘅人就要面對「懲罰」。

同Ocamp嘅trust fall唔同，而家被迫參與嘅trust fall，啲人要喺一樓向後瞓。正常嘅話，我哋只係水平向後跌，仲會放咗幾張軟墊做安全措施。

而好似我呢啲作為唔洗跳嘅人就要負責喺地下接住由上面跳落嚟嘅組員，接唔到嘅話，佢哋就好大機會跌死。

一樓向後跌落去，唔死都一身殘。

即使唔知道聲音可唔可以穿透白霧，我哋費盡力氣向上呼喊，我想令到準備跳落嚟嘅人知道會有人接住佢哋，令佢哋安心。

就好似真正Ocamp嘅時候，叫組仔女相信我哋一樣。

然後，喺一樓嘅佢就背地地面，張開雙手有如信仰之跳咁由一樓墜下——

新故留名

「嚟緊嚟緊！司機大哥，快少少做唔做到？」坐喺的士嘅我邊傾電話邊問。

司機點頭答應我。

「你有冇搞錯呀師兄！畢業禮都就嚟遲到！」電話另一頭嘅係我嘅住hall時嘅層友嘅Sam。

「老細無啦啦急call我做嘢呀頂！」我好似一般打工仔咁抱怨老細。

「無撚用㗎你！比著以前未收火，你屌撚爆佢啦！」Sam講到興高彩烈、粗口橫氣，我想像到佢附近嘅畢業生都心諗點解呢條友咁爛口。

「無計啦，依家做細，我哋袋底泥咋。」我講完後，司機就一個急剎停低，再打開後坐嘅門。

「我落車先，轉頭見！」我講完就塞咗將一百蚊紙叫司機唔流找，然後就跑去大禮堂，拿拿聲拎晒啲畢業袍同帽戴上身之後，我就攝手攝腳咁混入正在列隊入場嘅畢業生人龍之中。

之後嘅都係播上歌、校長講下廢話、有學運領袖畢業生示下威、上台拎下證書，完場後再同屋企人影下相咁。

同晒屋企人影完相，佢哋就先行告退，我就返hall搵班friend影相。

先講下個hall咩樣，我大學嘅hall有兩棟，分別喺左右嘅南北兩座，兩座各有21層樓，一樓有個露天平台係互通兩座。地下有個狗糧hall canteen，對出又有一個幾大嘅露天廣場，通常hall function都會喺呢個廣場搞，輕鬆容納超過300人。

Hall嘅入口有兩部好似地鐵閘鐵咁嘅三條鐵閘口，宿生要拍學生證入去。而訪客就要喺宿生入去後，叫坐喺望住大門嘅保安解開閘機隔離嘅大玻璃門嘅鎖，等訪客可以入去。

我同Sam都喺hall住咗3年，算係老鬼，所以都有唔少returning（回流宿生）識得我哋，特登搵我哋影相。

Sam返到hall之後話有嘢做要行開下，我都唔知佢可以去邊，佢依家又無房。

不過佢可能去屌女，所以就由得佢，捉咗今年returning 、我上年層仔肥田嚟幫我影相。

叫佢層仔係因為我係hall tutor，作為樓層嘅領導人安排樓層嘅大小事，同埋可以揀選returning。

即係有權力揀咩人可以下年再住hall，對於宿位少嘅大學嚟講，呢個權力可以話係神技。

我都聽過唔少傳聞話有唔少嘅女宿生會用身體去換取下年嘅宿位，好可惜嘅我住嘅係男層，所以這些機會不是屬於我的。

「hall tutor 房，懷唔懷念先？」肥田問。

咁樣一問，今朝畀老細屌嘅場面就閃現，然後我苦笑：「都掛住。」

始終係到嘅時候我係大晒，出到去就只係垃圾。

如果可以，我都想一世留喺到。

「颯！」

就喺我感嘆嘅時候，一股仿似有重量嘅風好似箭咁穿過我人中，再由後腦出走。

好似有啲嘢俾風帶走咗，再融入去四周。

我眼前嘅景象瞬間分裂再重組，再變成油畫然後返到現實。與此同時，耳鳴產生「吱吱」嘅無意義聲音喺我腦海中徘徊。

呢一切大概只係發生咗一兩秒，當世界回復正常嘅時候，感覺好似所有嘢都被烏雲籠罩。

怪事一不離二，突然一道響亮到令人耳痛嘅聲音伴隨間歇性閃起嘅紅光鳴起：「嗚！嗚！」

「屌！又誤鳴！」肥田早我一步鬧出口，至於點解話又？係因為我哋hall嘅火警鐘真係經常誤鳴。

「唔走㗎啦？」我理所當然地講，因為我哋已經認定佢係誤嗚，所以我哋冇必要走。

「係呀⋯⋯」

「呯！！！」

肥田口都未合返埋，樓上就傳出巨大嘅聲響同震動，仲有啲灰燼喺上面跌落嚟。

感覺就好似爆炸。

我哋頭頂上嘅燈泡不約而同咁樣發出「啪」一聲然後全部燒晒，成條走廊頓時被黑暗吞噬，之後紅色嘅火警鐘閃起，為我哋帶嚟一絲不停掠過嘅光源。

「奇怪⋯⋯」我托住下巴思考，有啲嘢好奇怪。

「咩事？大佬，上面似係爆炸喎，我哋唔走冚家剷啦喎。」肥田用暴龍哥嘅口吻講。

「呀！係⋯⋯」

光線！明明而家係朝早，應該會有陽光照入嚟宿舍，但係點解會咁黑？

我連上邊嗰句說話都未講完，我就好似突然斷電咁失去咗意識，暈咗喺地下。

「對⋯⋯唔住⋯⋯」

喺我暈倒之前，我聽到聲音，一把就嚟fade out嘅聲音同我講嘢，但係我卻乜都聽唔到。

————————————————————————————

「呀⋯⋯」唔知時間過幾耐，我有返意識嘅時候要自己係上年嘅hall tutor房，我大字形咁、背脊朝天瞓咗喺鋪喺地下嘅床褥到，頭側埋一面搞到條頸有啲痛。

我醒唔起點解自己暈低，我用手撐返自己起身， 發現自己仲着緊畢業袍，天花上面嘅火警鐘仲喺度閃緊，但係已經冇發出聲響。

我檢查自己身體，卻搵唔到一處傷痕，而且我依家唔係好肚餓，即係時間應該唔係過咗好耐。

間房係我上年住嘅房，而且唔知點建佈置同傢俬同上年我住嘅時候一模一樣！

明明新嘅hall tutor已經搬咗入嚟，我之前喺新hall tutor、我曾經嘅層仔恆爺手上，我嗰時仲有特登返嚟幫佢執房，當時嘅佈置肯定唔係依家咁。

奇怪，實長太奇怪。

不過而家又有另一個好嚴重嘅問題。

「我好急尿。」

講完之後，我就行咗入廁所解決。

順帶一提，成個宿舍只有hall tutor先會有獨立廁所。

雖然我都覺得自己呢個決定有啲戇鳩，喺呢個唔知頭唔知路嘅情況下仲走去屙尿，但係我真係好急。

我邊屙尿，邊喺度整理自己思緒。

頭先我返嚟影畢業相，諗住喺宿舍自己住過嘅房門影張相，突然聽到類似爆炸嘅聲音，然後火警鐘響起，之後我就莫名其妙咁失去意識。醒返之後我就喺我上年嘅房到，四肢健全，同埋火警鐘鐘閃緊。喺呢個可能火燭或者爆炸嘅情況下，我醒返之後選擇做嘅第一件事係屙尿，聰明聰明。

我都忍唔住讚吓自己，可能因為我以前喺呢度住得太舒服，令我冇乜危機意識。

屙完後我fing fing條嘢，然後洗個手行返出房。

我哋會叫佢哋去一樓乒乓波室匿埋，令喺其他新人被罰時可以偷偷地打下波，當然要求佢哋保密，如果唔係嘅話我哋兩者都會出事。

改變唔到「傳統」，咁就只有喺「傳統」下保護自己能夠保護嘅人。

「十五分鐘！」廣播又響起：「你哋有十五分鐘時間落到地下。落唔到嘅話⋯⋯三二一開始！」

廣播男飛快咁倒數後，十五分鐘嘅落樓時間隨即開始。

不過十五分鐘實在太唔合理，就算我依家喺八樓跑到落地下，最多都係三分鐘。依家嘅時間要求實在長到有啲奇怪。

依家唔係諗嘢嘅時候，我要盡快落樓。

「呯！！！！」忽然，有啲猛然咁撞落我道房門。

「呀！」緊隨其後嘅係一把男人嘅叫痛聲。

「阿謙！」肥田緊張嘅叫聲喺門外傳到入嚟。

睇嚟肥田同埋阿謙應該喺走緊嘅時候遇到障礙，果然俾十五鐘我哋係因為有阻礙！

緊張嘅我即刻拉開門走出去睇下咩事。

喺出去之前我要講一講宿舍結構，又。

宿舍每一層嘅設計都一樣，有分左右翼，每邊翼都有廿間房左右，兩間房為一個unit，連住兩間房一個廁所。每一個unit推開房門後嘅對面都有另一個unit門對門咁。

而hall tutor房就喺兩邊翼嘅正中間，房門對住電梯大堂，電梯大堂有三架𨋢。電梯大堂房門中間又連接兩翼嘅走廊。hall tutor房隔離就係lounge，入面有埋廚房。

我拉開門出去探頭張望，因為窗外嘅天空幽暗得很，而且走廊嘅燈集體碎裂，跌到一地都係燈管嘅玻璃碎。

斬下斬下嘅火警鐘間歇性咁閃起紅光，成為黑暗中嘅一絲光源，而成條走廊都飄浮着好多嘅塵埃，每次俾紅光照到嘅時候就更加明顯。

紅黑交替嘅空間令成條走廊嘅氛圍非常詭異。

喺正我門口隔離嘅係一個怪人。

怪人身高超過兩米，膊頭唔正常嘅闊，成個人橫過道門，佢右手拎住一把老牛咁大嘅鎅刀，鎅刀嘅刀尖有一滴滴血流緊。

而佢嘅雙眼，閃爍住深紅嘅光輝。

刀手強大嘅存在感令我不寒而慄，佢企喺lounge門口用左手捉住阿謙天靈蓋將佢抬起，然後左手手腕射出闊身嘅透明膠紙，將阿謙嘅手腳綁住。

因為佢對付緊阿謙，所以無留意到我嘅存在。

「呼⋯⋯」刀手吐出沉重嘅一口氣，嗰口氣甚至濃厚到見到白煙。

心知阿謙不妙嘅我即刻一個捨身撞擊落去刀手到，刀手一下子失平衡鬆手，阿謙成個人跌落地下。

我踏前一腳將把刀踢去走廊嘅末端，然後想行過去幫阿謙解綁。

「勝！小心！」肥田話語未落，刀手對我射出膠紙，然後我右手前臂就被反向黐落牆，但係因為膠紙唔太厚同埋我多汗，我稍微用少少力就掙脫。

知道未必救到人嘅我決定先後退，於是我連滾帶跑咁走到𨋢口大堂嘅肥田身邊，再閂埋大堂嘅門，暫時隔開我哋同刀手。

因為係𨋢大堂嘅門係推門，所以我哋壓晒成個人上去，in case刀手推門我哋都可以頂到陣。

而刀手就呆咗咁望住把刀企喺原地唔郁，無打算對我哋做啲乜，但因為怕驚動佢，所以我都唔敢輕舉妄動去救阿謙。

被綁住嘅阿謙都爬下爬下咁縮到入lounge，成條走廊得返刀手一個。

呢個時候我先發現，上年同層嘅老鬼同今年嘅returning都喺呢到，一個freshman都見唔到。

「勝，你無受傷？」今年接任我嘅hall tutor恆爺問我。

「無大礙，有冇人話我知咩事？」

「我哋聽到廣播話要趕落去之後就走出房，唔知點解間房喺上年嗰間⋯⋯之後我哋一出嚟就俾嗰隻怪物阻住，阿謙走唔切所以⋯⋯」恆爺解釋，眼送不時遊走到喺怪物前嘅阿謙身上。

「好彩你哋無扔低佢。」我稍微鬆口氣。

「有部分人已經因為太驚而走咗落去，淨低喺到嘅都係想齊上齊落。」

「自保為先都合理。另外，有冇見過Sam？」我有啲驚訝咁多人無走，我出於對Sam嘅關心而問。

本來我以為呢啲危難時刻，

「無⋯⋯可能佢仲喺房。」恆爺唔確定咁講，就好似Sam兇多吉少。

「呀！！！」氣氛沉重之際，走廊傳嚟慘叫聲。

透過窗望去走廊，我哋發現刀手唔見咗！

我推門而入，環顧一周後發現刀手喺左邊走廊嘅中間！佢手握被我踢走嘅巨型鎅刀，刀身穿過咗一個人嘅肚中心，刀尖淋浴喺血液之中。

「咸叔！」跟住我行入嚟嘅恆爺大叫。

咸叔被高舉到半空中，血花濺到周圍都係。

「⋯⋯死咗⋯⋯？」目睹穿肚嘅肥田口都震埋。

真係會死人！？

氣氛急劇改變，惡寒由我哋內心湧出。

依家我哋所有人嘅生命都危在旦夕，唔係講玩，隻怪物真係想殺死我哋。

「呼⋯⋯慶生⋯⋯要畫花個身⋯⋯」刀手講完之後就甩一甩到，將肥胖嘅咸叔重重咁摔落地。

「啪⋯⋯嗞⋯⋯」

咸叔無力咁吐血、傷口發出微弱的滋滋流血聲，雙眼已經失去光彩、活力。

刀手唔知係邊到拎出一支黑色marker喺咸叔嘅屍體上亂畫。

「係九尾嘅封印⋯⋯？」肥田講。

隻刀手竟然喺咸叔身上畫火影忍者入面，嗚人肚上封印九尾時被畫上嘅圖案，就好似我哋慶生時會喺人哋身上亂畫咁。

「聽日midterm⋯⋯都要慶生！要！！！點解迫我！！」刀手大叫，佢紅色嘅眼珠彷似寶石咁越發閃耀。

刀手先用帶殺意嘅眼神望我哋所有人，然後揮一揮右手，喺衫袖中fing出一支有火槍頭嘅煤氣罐：「生日⋯⋯要燒鳩毛！！！」

我哋一行人見刀手來勢兇兇就即刻衝返入去電梯大堂逃亡，然後頂住道門，但係我哋好快就發現刀手根本無追過嚟！

「大獲！佢嘅目標係阿謙！」肥田指出樓層內講。

「肥田跑入去之後拎滅火筒噴火！」肥田、我同埋未被我提到嘅恆爺時起步，推門衝返入樓層。

「點解係我！」肥田雖然嘴上抱怨，但腳已經跑起嚟。

肥田同恆爺去防火櫃到拎出滅火筒，我一個閃身喺肥田開始噴前嘅剎那以飛剷式穿過刀手同lounge門衝入去入面。我一口越過刀手同阿謙，走到廚房拎膠紙，然後返到去阿謙身邊時，肥田又繼續用二氧化碳噴刀手。

Lounge入面嘅枱凳同埋雪櫃都被打到擠壓埋牆邊，掛喺牆嘅電視都碎晒，就好似打完仗咁。

「幫拖！」恆爺率先回過神嚟引導眾人嚟幫手。雖然怕死，但係總唔能夠放低住過一齊嘅兄弟。

刀手被二氧化碳射中嘅𣊬間就好似被人由後打咗一拳咁，佢猛然咁轉身望向肥田，但視線好快就被白煙遮住。

刀手一手擋住白煙，然後慢慢向肥田行過去，睇嚟係想先解決最大嘅隱憂。

「唔好阻住⋯⋯慶生！！！」刀手又吼叫。

「火機！跟我做！」恆爺急中生智，佢問同層嘅煙剷們借火機，然後就喺走廊執起用嚟做樓層佈置嘅可燃性噴油，一噴再點火射向刀手！

其他人見到火攻後都照板煮碗咁執起地下嘅可燃性噴油用火攻射向刀手。

「呀！！」刀手開始叫痛，用雙手擋出火柱，而且唔能夠再前進。

我衝入廚房拎兩把較剪出嚟，然後返到阿謙身邊幫佢剪開膠紙。

「阿謙，忍下痛，可能會𠝹到你。」我講完就開始剪膠紙，但係因為好黑同埋紅光閃下閃下，令我好難集中。

「Sorry⋯⋯咁搞你哋都可能死。」阿謙低頭講。

「有咩留返拜山先講。我幫你剪晒綁手嗰啲之後，我自己剪腳。」我專心剪膠紙，好順利咁鬆開綁住阿謙雙手嘅膠紙。

啲膠紙同我哋喺層入面慶生時用嚟綁人嘅透明膠紙係一樣。

身後突然安靜落嚟，火焰嘅燃燒聲音唔見晒。

「恆爺，噴晒啦！」

「勝小心！」恆爺大叫。

「勝哥！！！小心後面！」阿謙突然大叫，我猛然轉身，刀手就企咗喺我後面，佢無再理恆爺一行人嘅干預。

刀手龐大嘅身體為我帶嚟好重嘅壓迫感，佢雙手合成沙煲咁大嘅拳頭，拳頭嘅影子投射到我身上，佢打算由上向下揮拳打落我到！

幫推。

Lm

我勉強反應得切抱住阿謙喺地下碌咗一圈避開，拳頭沉重咁打喺地上令白色瓷磚地板凹陷。

雖然避到第一擊，但係我同阿謙已經退無可退，後面就已經係窗邊。

刀手無諗住放過我哋，佢右腳作勢拉弓射波，想當我哋係波咁踢。

心知不妙嘅我用身體顧住阿謙，背對怪物打算硬食呢一下，我緊閉雙眼希望唔使死。

萬念俱灰之際，有人一躍跳咗入嚟lounge，執起地下嘅10kg鐵餅當係美國隊長個盾咁扔出去，一嘢就扔中刀手嘅頭，令刀手失平衡跌落地下。

佢嘅一連串動作有如行雲流水，然後捉緊時間跳到我身邊。

「勝！」趕嚟救我嘅Sam大叫。

「Sam幫手剪爛啲膠紙！」我無深究點解Sam會出現，危急之際我只想快啲甩難。

「抬佢出去先剪！」Sam講完，我就孭起阿謙跑向樓梯。

「全部人，走！」我對喺門口支援嘅兄弟大叫。

刀手好快就企返起身跑過嚟追我哋，佢用佢嘅火槍燒向我同阿謙！

「條友點打都唔死嘅屌！」肥田仲有力喺逃走嘅時候大叫。

火柱筆直咁襲嚟我身後，Sam見狀就即刻撞開我。

「Sam！」我驚慌地大喊！

火焰噴落喺Sam用嚟格擋嘅雙手到，然後Sam即刻踎低避火，同時刀手喺噴到Sam之後就好似lag機咁呆咗，雙手垂低任由手上嘅火燒到自己。

「走！唔好發呆！隻怪物唔會入樓梯！」Sam轉身向𨋢口跑後對呆咗嘅我講。

我無時間諗Sam點解會知刀手唔會追入樓梯，呢刻我知能選擇相信兄弟。

「快！」頂住房火門樓梯嘅肥田催促我哋。

肥田同恆爺等兄弟都入到樓梯仲向下走緊，孭住阿謙嘅我都走到入樓梯，只係差嚟救場嘅Sam。

身後嘅刀手又突然有返意識：「要慶生！！無人準走！！！」

刀手喺褲袋掏出𠝹刀刀片並飛向我哋！

警鐘嘅紅消失再亮起嘅剎那！

「颯！」

刀片有如子彈穿透手臂，血液好似噴泉咁喺兩端嘅傷口濺出嚟！

「Sam！」

殿後嘅Sam嘅左手被不幸中刀，我隨即扔低背上嘅阿謙，由樓梯走返出去𨋢口將受傷嘅Sam拖入嚟後樓梯。

刀手已經走到入嚟𨋢口大堂，喺正Sam身前！

「呯！」刀手想用拳打落Sam身上，但係我快一步將Sam拉到入後樓梯，刀手只能夠打傷樓梯口前嘅地板。

我喘住氣望住眼前嘅刀手，Sam嘅身體頂住防火門令我無辦法閂埋門，我同刀手四目交投，依家嘅佢只要行前一步，我同Sam都會係咁先。除非好似Sam咁講，刀手係入唔到樓梯。

「Sam！你忍陣，好快會幫你包扎！」我對Sam講。

「嗯⋯⋯」面色變得蒼白嘅Sam輕輕地點頭。

我緊握雙拳，等候刀手嘅發落。

我只能夠用眼神死死咁望住佢，就好似啲籃球撚咁用眼神防守。

佢嘅眼不停閃爍，我嘅心跳不斷加速。

紅光閃過一圈又一圈。

「噠⋯⋯噠⋯⋯」

刀手頭也不回咁轉身離開，睇嚟佢真係入唔到後樓梯。

「呼⋯⋯呼」我成個人即刻從緊張嘅壓力中緩解，貪婪咁喘氣。

但係現實上，我無呢個時間。

「勝！要走啦！集合時間隨時會到！」已經孭起咗阿謙向下跑嘅肥田對我講。

「大鑊！」我已經唔記得要去樓下集合，我孭起Sam：「你忍下，落到樓下幫你包扎。」

「⋯⋯嗯⋯⋯」Sam虛弱地答我。

幫推。

Push

每經過一層，我哋都聽到唔同嘅慘叫聲，但係無時間理其他人嘅事，我哋只能夠專注咁向下走。

「頂住呀Sam⋯⋯」我心中唸濾有詞咁講。

落到樓下，已經有唔少人集合咗。通去校舍同埋外面嘅路都被瓦礫阻住，而且瓦礫前面仲企咗幾隻成兩米高、拎住長茅嘅巨人，因為佢哋嘅存在，無人試圖去逃走。

大家都怕一走近就會被殺死，所以群眾都係廣場上行行企企或者休息。

「黃hall嘅兩層男層、兩層女層同一層男女層落到嚟、紅hall暫時得一層男女層落到嚟、藍hall嘅兩層男層、一層女層同埋兩層男女層到齊、我哋橙hall嘅兩層男層到齊、兩層女層同一層男女層都喺到。時間大概仲有兩分鐘。」恆爺喺廣場遊走咗一圈後同我報告。

「唔該你。」幫完Sam包扎之後，我就乏力咁攤喺地下，好似所有力氣都已經用盡。

我嘅熟人暫時都無事，但係唔太熟、只係點頭之交嘅有唔少都唔見身影，始終唔知道有咩人被困喺到。

「你個ex，我指阿米都無事。但佢嗰層嘅hall tutor死咗。」恆爺指住企起無幾遠嘅阿米。

阿米今年final year，佢著住橙色hall tee同牛仔熱褲。阿米依舊咁靚，佢同青山渚極似樣，但就矮一個頭同埋係短頭髮。

當年因為我堅持要做hall tutor，但係佢唔想我做，唔想我減少陪佢嘅時間，最後我哋嘈到分手。

對呢段情，我覺得嘅係可惜。

「咪提佢。」我耍耍手，唔想係呢個時候諗啲兒女私情。

Sam則因為失血過多，佢失去意識咁攤埋一邊。

恆爺作為新嘅hall tutor，佢為咗盡責去保護層仔，佢唔理自己幾累都好，佢仲四圍收集情報，搵齊橙hall嘅hall tutor交換情報。

我呢個前hall tutor就死屍咁郁都唔郁攤喺到，有夠無用。

恆爺又講：「其他層都有怪物，例如玩粉塵爆炸嘅怪物、想將蛋糕塞入人哋屎眼嘅怪物等等。」

「呢啲怪物同『怪物』嘅真正意思有啲距離。」我吐嘈後再講：「佢哋都係hall慶生時會做嘅嘢，但係用激進啲嘅方式去做。」

「係。」恆爺點頭。

「搞乜撚嘢！」我遮住雙眼對住漆黑嘅天空大叫。

Lm

「黃hall嗰邊好奇怪，喺到密密傾緊啲唔知乜嘢⋯⋯」恆爺未講完就被打斷。

「叮！叮！叮！」

廣場上嘅喇叭響起聲音，一個戴住蝙蝠俠面罩、身穿橙hall tee同短褲嘅男人行上廣場嘅舞台上，佢身邊企咗兩個巨人幫佢推走所有企喺舞台上嘅人。

「蝙蝠俠？我哋上年聖誕party 都係戴呢個面具。」恆爺若有所思咁講。

「恭喜晒晒咁多位可以玩到Ocamp嘅第二輪遊戲！順帶一提，樓上嘅所有樓梯同埋𨋢都已經鎖上，無人會再出到嚟！」面具男對我哋喊話，其後宿舍就傳嚟一連串嘅慘叫聲，甚至有屍體被人由樓下扔落嚟廣場。

睇嚟，頭先喺hall走唔切嘅人已經全數陣亡。

廣場上嘅人都爭相走避，生怕會被樓上跌落嚟嘅人扎死。混亂之中，我先察覺應該暈咗嘅Sam唔見咗人。

人嘅肉體有如流星般不停由天空墮落，血飛濺到一地都係，人體殘肢更不時飛到周圍都係。

「呀！啪！」最一個死嘅係黃hall嘅女生，佢頭部著地，身首只係勉強咁被皮膚連繫着，如果喺另一邊睇就會見到佢頸椎嘅骨肉。

面具男滿意地拍手，然後成個空間彷似停止咗咁，只有面具男身邊嘅巨人拎出大型垃圾桶將所有屍體塞落去。

跟著，有人選擇劃破寧靜。

「上！佢就係幕後黑手！」以運動成績出眾而聞名嘅黃hall嗰邊有人大喊，然後佢哋有一群男人同時跑向舞台，目標好明顯係面具男。

呢群大隻佬以勇者無懼嘅心跋足向前，拎頭嘅係上年黃hall嘅hall tutor、曾經嘅Hall莊P Adam。

Adam大叫：「足球隊去頂住我左邊嘅怪物、籃球隊負責右邊嗰隻！淨低嘅同我一齊上去搞掂蝙蝠俠！佢就係幕後黑手。」

「係！！！」大隻佬們用充滿運動員鬥志嘅語氣回應。

佢哋嘅隊型分成三路，Adam帶頭領住中路向前。

睇嚟佢哋想擒王、搞掂罪魁禍首，令到成件事完結。

最令我驚訝嘅係佢哋嘅團結，竟然可以咁唔怕死衝出去。

兩邊嘅怪物都被幾個大隻佬頂住，Adam嘅中路都好快跑到台前。

「你哋健身嘅時候，無健埋個腦咩？」面具男嘲諷一句之後就啪一啪手指，令身上嘅衫變成黃hall tee。

之後，舞台嘅邊緣有一堆火柱由地面向上噴出，形成火牆包圍住舞台，一眾大隻佬即刻束手無策。

大隻都怕火。

「退！」Adam見狀就果斷咁下令撤退，一眾大隻佬都向後退著。

「咁咪幾好。唔好成日喺啲唔適當嘅時候做唔適當嘅嘢。就好似頭先你哋喺上面見過嘅『你哋』咁。」面具男意味深長咁講。

「所以你先搵嗰啲怪物對付我哋？」Adam毫不膽怯咁問。

「到底係邊個對付邊個呢？hehe。」面具男嘰笑一聲後一面嚴肅再講：「但係，你太囂張啦。」

一隻怪物呼應住面具嘅不滿突破火牆，一躍跳到Adam面前，再順勢揮出上勾拳。

但係Adam毫髮無損，佢一個閃身向後避開，然後怪物喺Adam再有反應前再嚟一個肘擊！Adam快被擊中前，一個大隻佬撞開Adam，為佢Adam硬食一肘。

大隻佬成個頭被肘擊擊飛，頭同身體就喺Adam眼前分離，一條血柱由斷頭嘅頸部向天徑直噴射。

Adam無時間悲傷，佢退後一步擺出格鬥嘅架勢，準備同眼前嘅怪物搏鬥。

「夠啦，停手。」面具男一聲令下怪物就停落嚟：「直接殺你唔好玩，你生存落去我會更開心。」

怪物慢慢行返去面具男身邊，穿過火牆時毫不畏懼。

Adam見暫時安全，於是佢默默咁將被殺嘅同伴嘅頭同身體放埋一邊，再問人借咗畢業袍覆蓋住，最後用無人聽到嘅聲線講咗聲對唔住。

一眾黃hall人都集體沉默起嚟，無一個出聲去怪責Adam。

令我估唔到嘅係，明明有爆炸去到依家其實只係好短時間，但是黃hall人竟然咁快就調整好心態，準備去作戰而唔係隨波逐流咁樣等死。

到底運動員嘅心理質素有幾高？

講真，我內心到而家都唔係太相信自己陷入咗呢啲死亡遊戲，思想未係好接受到自己隨時會死。

就算頭先已經有人死喺我面前，我都覺得下個唔會係我。

Bu?

但係面具男無畀時間佢哋傷春悲秋，佢講：「小劇場就睇完，依家講返正題，三秒後望上天，最少一人一張嘅。十秒後我再講嘢。」

三秒過去，一堆紙碎從天而降。

我隨手拎咗兩張，每張都有唔同嘅數字同顏色。

橙色4號。
藍色2號。

未知呢到數字代表乜，但我估計顏色代表hall色。

「好啦！Ocamp必要嘅元素係咩呀？係組呀！嚟緊嘅十分鐘同大家玩分組遊戲！每個人要拎返同自己住嘅hall相應顏色嘅紙，然後同其他hall有相同數字嘅人組隊！集齊最少6個人先叫一組，入唔到組嘅人就⋯⋯好自為之啦！」面具男樂此不疲地講解。

呢個時候，群眾已經鼓燥起嚟，開始試圖搵自己嘅隊友。

「喂喂喂！我都未話開始！」面具男嘅說話暫停晒所有人嘅動作，佢見人群靜落嚟就再講：「只要集齊兩張唔係自己hall色嘅組隊紙，就算入唔到隊都唔會有事！」

「組隊紙嘅顏色分布同呢到嘅人數分布係唔同。例如可能呢到有20個紅hall人，但係有50張紅色嘅分組紙，同時60人嘅藍hall可能得30張組隊紙。」

數口比較精嘅人已經聞到不安嘅味道。

面具男再講：「收集到兩張唔係自己hall色嘅組隊紙就可以存活。咁計嘅話，紅hall多出嘅組隊紙就係30張，30張可以救到嘅就只有15個藍hall人。假設本身30張組隊紙都落入藍hall人手上，加埋都淨係得45人得救。仲有15個藍hall人係乜都無㗎！」

「！！！」一眾大學生已經發現面具男想暗示啲乜，大家都驚慌起嚟，甚至已經有人開始爭奪或收埋組隊紙。

「呢15個人入面，只要佢哋喺兩個紅hall人身上搶到紙嘅話，佢哋就可以成為贏家啦。」面具男狡猾地舔脷。

留名癲得嚟又幾好睇