Taylor Fu
上一個球季我地分別贏左聯賽同足總盃冠軍,而我同另外兩個隊友總共每人上陣踢左大約1400分鐘,但好可惜既係我地都分別被告知將落選今次亞運既名單,而當中落選既理由令到我地十分困惑同埋不解。教練選人的準則係咩?選人準則有無確切執行?過程中又有無適當既透明度呢?
作為球員既我地實在處於一個被動既位置,揀定唔揀無可否認係取決於教練既選擇。當香港女足代表隊運作既模式唔係徵召制,而係係有工作在身同球會訓練間三線進行,相信有一個合理既落選既原因就變得更加重要,因為每個球員都會想尋求進步,而唔係比一句兩句說話去抹煞左球員既努力。花你幾分鐘時間了解下發生左咩事
1. 聲稱以出席率作為選人準則但又無確切執行
教練團早在大半年前已經聲明同強調出席率會影響入選機會。呢個大家亦都清楚係香港有部份女子足球員要反朝9晚5,有啲工作甚至要OT,又要兼顧球會訓練。如果要用出席率嚟選最佳22人名單,會唔會太過兒戲?出席率可以完整代表球員嘅能力嗎?既然遊戲規則係咁,大家都唯有遵守,但弔詭既係出席率更低既球員竟然可以成功入選,就好係有免死金牌一樣。
2. 落選理由不合理(以下係佢哋對我哋解釋嘅原因)
球員1: 你季尾打依個位好亮眼,但我覺得未夠,我心目中已經有x, y, z,就算上一格都無你位置。加上你早前因為讀書同工作令到出席率都唔夠,所以就唔揀你。但係我想你幫手踢泰國嗰場友誼賽… 同埋你係我後備亞運 list, 有人受傷就係你頂上
疑問1: 踢呢個位既球員係雙冠既球隊,可以勝任防中同攻中既位置,最後兩場比賽亦都有踢足,能力不足的地方係邊到? 會唔會有實際既例子去說明原因?
球員2: 唔係因為你能力問題,你依加好fit,但你季尾個陣有傷,無踢足最尾兩場既比賽,如果因為你依家fit而簡你,會對其他球員好唔公平,因為我地只係練左一課波,無辦法睇到每個人係咪真係有能力入選,不
過,我想你今個星期跟我地一齊返大陸踢友誼賽
疑問2: 自足總盃決賽,香港隊安排近三星期既休息,球員係無辦法操控,教練似乎有更大既責任去確保所選既球員係最好最強,而唔係將呢樣野強加在一個狀態好既球員身上,球員無義務去為左其他人既狀態而承受今次既落選。另外,名單內有好多球員都無需要踢最後兩場決出冠軍既比賽,亦有部份球員早在差唔多既時間因傷而避戰,顯然同一個原因套在唔同球員身上會有唔同既解讀。
球員3: 5年前代表香港踢咗30分鐘無力
疑問3: 球員無辦法去改變過去,可以做既只有繼續努力去尋求進步,但教練以一個球員5年前既表現作為落選原因,係荒謬至極,係呢到都無需再解釋有幾咁離譜
真係諗唔明,選人準則因人而異,今日係針對出席率,聽日係針對舊傷,後日就講返5年前既事,遊戲規則隨時改,亦唔係論能力去揀人,呢場權力遊戲可以摧毀好多球員既信心同夢想。不過我哋會繼續係球會努力。
https://www.facebook.com/photo/?fbid=7186347178047168&set=a.102377853110838