標準流浪簽“李拳王”,亞冠附加賽對手,越南嘅海防,驚驚嗎?
現時海防排喺V League第5,表現不過不失,而近日越南國家隊名單中,出現兩名球員海防球員名字,包括守門員Nguyễn Đình Triệu(阮丁趙)及中場Nguyễn Hải Huy(阮海輝),其中阮丁趙只係大後備。
海防嘅本地兵,有部分係前國腳及前小國腳,例如正選後衛Đặng Văn Tới(鄧文細),曾經係越南U19球員,有正選嘅中場Phạm Trung Hiếu(潘忠孝)及Triệu Việt Hưng(趙越鴻),都係前小國腳。
陣中比較出名嘅越南國腳,除咗Nguyễn Hải Huy,仲有外流過去踢韓職嘅國腳級中場Lương Xuân Trường(梁春長),即使近排冇入選國家隊,但佢都係越南質素最好嘅其中一名現役中場球員。
睇佢哋嘅人腳,似乎冇越南電訊(Viettel)及河內FC咁豐富,但都唔可以忽視,雖然聯賽暫列第5,但其實積分同上面幾隊差唔多,佢哋嘅本地球員係有一定戰鬥力。
至於外援,暫時所見有4位,新簽嘅巴西技術型前鋒Yuri Mamute(媽咪),媽咪曾經係巴西U20球員,喺巴西甲組踢過一排,亦喺日本踢咗兩季,效力SC相模原,不過入球數字比較低,現時佢喺海防上陣4次入一球,睇過兩場,唔覺得有乜特別,可能我冇識波牌啦。
另一位係來自烏干達嘅攻擊中場Joseph Mpande(M趴地),呢位國腳有一定級數,如果有留意開越南聯賽,對佢唔會陌生,可能比前面嘅Yuri Mamute更有威脅。
仲有一名海地中堅Bicou Bissainthe(披索肥),都係國腳級人馬,普普通通一個高大中堅,冇乜特別,冇乜好講。
另外亞援係曾經效力和富大埔嘅澳洲球員Benjamin van Meurs(雲美亞斯),今個月先開始上陣。
標準流浪嘅優勢,都係主場之利,雖然海防本土球員大部分唔係現役國腳,但佢哋個人能力都幾好,外援水平唔曳,能否過關,要睇佢哋自己。
#其他波