(live) 裸辭獨遊日本四國兩星期

唔通間廠無開？果時我由岡山港出發，就去到小豆島前五至十分鐘，麻油香到我係船入面醒左出去望

我就係睇完日落就搭果個走，不過可能果時入秋，日落早d

我諗住上去搭大纜車，落返去緊係試埋第二種
不過凍到對手冰哂

我都覺得如果樓主濕疹算嚴重既話就唔好試啦
畢竟日本果邊果D 都唔係精密科學，算係佢地民間研究果D 另類野

食完拉麵，就行去睇 妖怪美術館 ，其實我都講過，我對妖怪冇乜興趣，純粹見呢間嘢竟然開到十點鐘，喺夜晚一片荒蕪嘅小豆島，算係一個異類

除手一影小豆島夜晚嘅街景，呢張相裏面自然咁集齊好多種唔同顏色，好有趣


where are you from？答案都係不出所料



竟然，門票要成2900yen！你區區一個離島妖怪館憑乜嘢！？但一場嚟到算啦，當鬼掩眼，照畀錢入場 好彩我最後揀咗入去，好快就明白點解佢值呢個價





真係要重點提一提佢個運作模式，呢個妖怪美術館，係我去過世界上咁多個展館之中，最有趣嘅之一。佢總共有四個分館，每個館都係一個獨立嘅建築，分佈喺唔同地方(但館與館之間都係五至分鐘腳程)

其實佢係好似party room 加密室逃脫咁樣運作，畀咗錢之後，佢會畀一張帶密碼嘅單張畀你，跟住你就自己去搵嗰四個分館，在輸入密碼開門，開門之後裏面就會自動著燈，同埋做相關嘅效果，完全係全自動。

所以呢一點亦都係點解，呢個館可以開到夜晚十點，因為佢除咗售票處職員之外，其他4個分館係完全唔需要人手的！得個cam睇住




另外，佢個audio guide 係非常user friendly ，普通話配音係真係有搵有質素嘅母語者去配，又會根據氛圍，去播相關嘅背景音樂，好出色


由於天色已暗，周圍冇其他人，我要自己喺夜色裏面行去唔同分館，我係有少少淆底嘅 首先去到分館一，暫時都唔算恐怖，反而似動漫figure 展覽



付喪神，傳說中就係一件舊物件用滿100年，件物品就會有意識，所以有時用滿99年就要抌咗佢

係!!!!!
我自己雖然無濕疹
但我個皮膚體質都係近似
由其係塊面同背會狂爆瘡
好似呢排香港又濕又焗我就會狂發
係香港要戒晒口果隻先叫好少少
由其係食甜野，如果係凍既(即係...雪糕)，一食完2小時內會feel 到塊面深層會爆一堆油，重要係「傑」果種油，你走去洗面又好吸油保濕又好，都無用，因為只洗到表層，深層清唔到跟住就會開始谷瘡> 大爆發

但去到日本旅行，好多時重要出發前香港有瘡未清，但去到日本反而一二日就收乾晒
然後大魚大肉，又炸豬扒又咖哩，晚晚都買雪糕返酒店做宵夜，起身就便利店買牛奶，都一樣乜叉事都無
所以我覺得香港天氣、空氣問題

地震有無影響到你？
咁遠係咪完全無feel?

咩事都冇
身邊都好似冇乜人講咁樣

我鍾意麻油wor

參觀完分館一之後，喺個奇怪嘅管道行返出嚟



跟住開始有少許恐怖啦，我行到去分館二，特別係一打開門嗰陣，間房係全黑嘅，過咗幾秒先自動開燈，然後一開燈嗰下，突然間見到眼前啲鬼怪，好似突然間撲出嚟咁






再去到分館三，喺一條黑暗嘅巷仔裏面，唔係有指示牌我都唔信館三係到，其實都幾難搵路，路痴不建議嚟




妖怪都要玩esg

我最欣賞嘅係，佢真係有探討，「妖怪」呢一樣嘢嘅存在意義，唔係引用啲咩怪談傳說去證明佢存在，而係因應當時嘅社會環境，去解釋點解呢個妖怪會喺嗰個時候出現





例如妖怪A嘅出現，可能係為咗解釋一種未知嘅超自然力量，可能係當時社會富足用嚟消閑，又有可能係因為受太重政治壓迫，而要娛樂至死咁樣搵啲娛樂轉移痛苦。

所以，館主得出咗一個結論，妖怪其實係住喺人嘅內心，妖怪嘅數量同能力都係由人類所決定，我覺得係幾引人反思

跟住又去咗一個房間，係咁有隻鬼望住你，跟住audio guide同你講，話啲乜嘢其實你係注定會嚟到呢度，你內心個鬼怪帶咗你過嚟，之旅之旅，感覺上有少少鬼鬼地，但都幾得意，氣氛營造嚟講係幾好




成個展嘅最尾一節，行過一條好詭異嘅樓梯，去到一間全黑嘅榻榻米房，得幾支蠟燭喺度，好似啲恐怖電影裏面邪教儀式咁樣





你躺平瞓榻榻米上面，係微弱火光之下，會見到天花板有一隻咁嘅嘢望住你，我實際上見到嘅景象，大約係以下兩張圖嘅中間位 咁黑嘅環境之下，好難捕捉到肉眼見到嘅景象




聽住佢個audio guide，佢同我講話要做一個內觀，你要瞓喺度，同你內心嘅妖怪對話，諗返起以往一啲失意嘅事，訓訓下就進入咗狀態，本身覺得呢個環境好唔自在好鬼，但慢慢竟然覺得適應咗

呢一part 好似有啲似鏈鋸人惡魔個concept

本來幾有feel，但呢個時候突然樓下好嘈，嗰班友大聲講大聲笑本來我做呢啲類似內觀咁嘅嘢，當然係要心無雜念好寧靜咁樣做

忍咗十分鐘都唔停，我就氣匆匆諗住落去話佢哋幾句點知一落樓，就見到原來系館主同佢班friend(宣傳單張有館主嗰樣，所以認得佢)，即刻霸氣盡失 最尾就扮係睇完展覽館，準備離開，毒撚式敗走

(毒撚心路歷程全展現)
最好笑係，我敗走之後又好唔忿氣，谷住谷住咁，所以最尾我又走返返去 同佢講可唔可以去間全黑榻榻米房坐多陣，跟住叫佢可唔可以靜少少，我都係想欣賞你嘅作品啫


最後，我如願再上多去一次，但佢哋都只係靜咗少少，我戴上耳機同hoodie帽之後都ok嘅。當我喺全黑榻榻米房hea夠，真係準備離開，館主就突然走過嚟，畫比咗呢張嘢我

離開之後，喺漆黑寧靜嘅路上亂咁行，回想返去頭先喺全黑房嘅經歷，明明係一個咁詭異嘅空間，但我慢慢竟然覺得幾舒服，慢慢我明白到，咁係因為佢教識咗我，妖怪只係一樣人造物，只係個人心態或者社會現況嘅衍生物品

雖然我哋人類未必控製到，所以啲妖怪仍然會繼續出現，但起碼我明白咗佢嘅底細，即使要撞到佢，同佢相處，都未必會驚，因為佢好可能只係你內心嘅另一面


諗下諗下之後，好似對夜晚嗰種黑暗都冇咁驚，特別係你夜晚望入一個深不見底嘅小巷，嗰一種恐懼，好似少咗啲，所以雖然夜晚嘅小豆島又黑又冇人，我卻覺得自在

信則有，不信則冇

我覺得世界係有樣 信仰之力 咁既野

好似有套動漫係講
有人拜既神明會好厲害，著都著得光鮮啲
冇人拜既就變到好落泊咁

妖怪鬼神果啲個運作我覺得都係咁

野良神

慢慢行期間，搵到一間仲營業嘅餐廳，自稱全島唯一一間開到凌晨嘅

Utamarotei
+81 80-2999-5110
https://maps.app.goo.gl/WoVhPQone3x25UA58





入面就係好傳統嘅居酒屋印象，一班日本人席地而坐，飲酒吹水



野食到了 呢餐係我呢次旅程，暫住食過最好食嘅串燒 而且真係唔貴





好彩有毒撚bar枱位，唔使同入面嗰班三唔識七嘅小圈子一齊坐

食食下，電視竟然開始過最新一集嘅鬼滅之刃 我一早就想體驗下，真係計好時間打開電視追動漫嗰種感覺(好似細個個時)，而唔係喺屋企打開電腦睇




嗌多一輪助興！食住睇炭仔打上弦，呢餐真係爽死

勁呀師兄！ 加油！

感謝支持

冇錯

識啲嘢 幾時先肯出新一季呀

好似幾好玩咁，四間屋全程都冇其他參加者 如果好多人一齊又即刻冇晒feel