(live) 裸辭獨遊日本四國兩星期

(時間去到4月26日，高知day 2)

高知城要除鞋先可以入去，記得要著襪。我係幾鍾意除鞋呢個文化，行咗入去之後成個感覺真係好乾淨，個人唔舒服咗好多

我狀態不太好，基本上冇認真睇展品或者水牌，就咁隨便行下，就咁樣感受過格局同氣氛，我個人幾滿意

啲樓梯唔容易行，而且佢樓底太矮，細佬我大約米八左右，好多次差啲撞到頭






其中一層，擺咗好多張日本城池嘅相出嚟，咁樣一比較之下，好明顯睇得出沖繩嘅首里城係有幾與眾不同，好彩我喺火災之前有幸去過(趁機賣下廣告，嗰次有寫遊記)







終於上到天守閣，首先高知呢度本來就冇乜嘢高嘅建築物，加上呢度地勢本身特別高，的確成為咗肉眼所見範圍裏面最高嘅地方，高知城作為昔日權力地位嘅象徵，企喺度真係想像到當年藩主企喺度呼風喚雨






我就坐咗喺圖一個梯級位，對住個景發吽哣，hea咗幾十分鐘，獨遊就是爽


喺天守閣小心翼翼落返地下，再周圍行下，見到有一個模型幾得意，原來高知呢度有多年嘅捕鯨傳統

有去多肥西？

臨走前再影多一張高知城




門口外面有個阿婆賣緊雪糕，又係寫住乜嘢「高知名物」，都係水遊客多㗎喇 但明知山有虎，卻偏要走去試一試

我靠google翻譯，原來係「蜂蜜雪糕」，我嗌咗綠茶味，但真係估唔到除咗綠茶味之外，真係有蜂蜜嘅味道，加埋係幾有趣嘅配搭




行完有少少肚餓，又再次返去弘人市場(呢度景點好密集，對遊客真係好方便)


今次係試埋另一個必吃嘅名物，安兵衛餃子 舖頭啲staff幾nice，可能因為嗰陣下晝五點幾冇乜人，佢個樣係好想拗水吹嗰種，但當我表示我來自香港，知道大家溝通唔到就唔好再講落去，但聽到佢不斷同其他職員講乜嘢「佢係香港人喎，ii-ne ii-ne」 (唔知佢係乜嘢意思呢)


講番啲餃子，係真係唔錯㗎，皮薄多肉汁，而且個皮係脆到好似係炸過多個煎，食落口感徘徊於煎餃子同炸餃子之間 但係，係好食的

食完餃子，嚟到下一個景點。坂本龍馬誕生紀念館，夜色之下呢個建築幾靚




好簡單介紹下，坂本龍馬呢個人係高知嘅超級偉人，大致上就係因為佢經歷過黑船事件之後，感受到啲洋鬼子嘅船堅砲利，因此去咗做搞「大政奉還」嘅搞手，即係將權力還返畀天皇。因為呢一件事，將來天王先有權力搞明治維新。所以話，如果冇佢，就未必有明治維新。


歷史堂就講完，但其實以上呢啲都係我本身就知嘅，因為呢個館其實幾悶，唔多展品，展品說明又冇英文中文睇，基本上我冇喺度學到任何嘢



唯一一個得意啲嘅，佢有一個360度嘅體驗館，四面牆都有一個連貫嘅畫面投影，跟住你攞住場上面掛住嗰嚿嘢，喺度落力搖發出聲響，個投影器係真係感應到個聲響，係真係可以影響到劇情發展

跟住我又再次去返弘人市場搵嘢食(冇錯，一日裏面去咗三次)


搵到啲鯊魚嘅朋友仔



依家7點左右，去到多人嘅時間，本毒撚喺food court形式嘅環境下搵唔到位首先係唔好意思同一堆自己識嘅人搭枱，其次係出咗去嗌嘢食之後，就扮唔住個位 毒撚悲歌 again


咁就唯有搵咗一間鋪內就有座位嘅餐廳，咁起碼一定有位坐先




熱鬧時期嘅弘人市場氣氛真係好好，雖然我自己一個，個氣場同呢度有啲唔夾，有少少唔自在嘅感覺，但大部分都係覺得係一個好有意思嘅體驗




炸魷魚同埋宮崎炭燒雞，兩樣都係我鍾意嘅嘢食，當然係唔錯嘅

(講起當年喺南九州，第一次試呢個宮崎炭燒雞，我本身就好鍾意陣炭味，所以即刻變咗我最愛之一，又順便買下廣告，都係有遊記的)




淨返左下個三串炸嘢，就係特登講下啦，
佢係鯨魚！貨真價實嘅鯨魚肉！！


頭先高知城先行過，知道咗高知捕開鯨，咁樣都算係名物吖？唔係唔試下呀嘛？




咬咗一啖之後，法國真係唔掂，鯨魚肉係我成世人食過最難食嘅肉！ 鯨魚肉嗰陣獨特嘅味，好似臭咗嘅腥魚生咁樣，我真係搞唔掂，真係唔ok


點解咁難食都要捉佢哋出嚟 捕鯨本身都已經唔道德，比西方同環保撚屌到上天，原來仲要咁難食！怎麼可以吃鯨鯨

你睇啲日本仔飲得幾開心 面都紅曬都冇停手



食飽肚(兼受鯨魚肉衝擊) 之後，離開弘人市場，四周圍亂咁行下，竟然喺超市嘅第一排就搵到熱浪，反攻日本啦



睇落好伏



同情人有關嘅橋，都係著名景點之一，循例打張卡

時間嚟到4月27日，今日係最後一日喺高知，夜晚將會搭巴士前往松山市

走啦！check out 啦！




首先，一起身check out之後，就去jr站寄存行李同埋買定車飛先，幾個鐘locker就要700 yen好肉痛


終於見識到傳說中嘅麵包超人列車


喺jr站個麵包鋪買咗個包做早餐，呢舊嘢聲稱人氣第一位，但實在唔太好食，吹大咗



由於之前喺大風大雨吹病咗，依家就試下呢包藥有冇用，原來唔係沖水飲，我一直搞錯咗

跟住呢到一間 土佐料理 司 本店，呢間嘢個評分唔係講笑，tabelog 3.49，Google map 4.1 一場嚟到點都要食下啲傳統土佐嘢



1280 yen 就有眼前咁多嘢食，抵到傻



睇圖都知份雞唔錯啦 份魚同明神丸差唔多質素





我另外嗌多咗一份 土佐a5黑毛和牛 2200 Yen

但上枱先知道原來佢係用明神丸個方法整，基本上係牛肉刺身嚟，its fucking raw！！！



食咗兩嚿之後，仍然唔係好慣，跟住就叫個店員可唔可以幫我整熟少少，可能因為溝通錯誤，佢幫我整得過熟咗少少 講明係a5，點樣整都唔會太差嘅

唔知第一次見到呢一種平價jr飛，唔知信唔信得過，或者有乜嘢條件限制啦



去到 高知縣立高知城歴史博物館，建築物的外觀睇唔出，但入面真係設計得幾靚



頂樓又望到個景，見到高知城公園

一向都分唔同類型既衫裝入一小袋

展示咗一張古時嘅高知地圖，好多細節可以睇到 呢件展品好嘢嚟




成個館嘅建築，室內設計，展品擺位等，好明顯係有花過心思，令佢成為咗一個好entertain到遊客嘅地方，真係幾舒服㗎，推薦

佢個audio guide 雖然有普通話，但只係google translate嗰種AI聲，聽得有啲辛苦

我突然藥效開始到，即刻開始眼瞓，要搵張櫈坐低閉目養神咗十分鐘





今次呢個印係真係靚！佢係準備咗六個印章，將6個印印喺同一個位置，即係係重疊咗六次之後，先會出到眼前呢個印章嘅效果，好靚呀

貴左咁多，4年前先750羊

高知望落唔錯
我當年只係去咗高松松山 唔夠時間去高知

另外估唔到高知城都好似望落唔錯
伊予松山城我本身好鍾意，重多過乜鬼姬路城果D名城

姬路我啱啱4月頭去完
佢個城係靚係大呀，但行上天守閣真係行到仆街
有參觀過日本古城都知D樓梯接近垂直咁濟，重要除鞋爬
姬路重要勁多遊客+佢個天守有5層(實際上係5層7階)
爬到上去又熱又焗又嘈，跟本無心機睇風景
所以我prefer 伊予松山城呢d 中size 既多D

係，same here
本身因為打信長，好鍾意姬路城
但去過一次完全係失望到爆
太多人，一路得個排字
入到去又係太多人根本無得輕鬆欣賞

咁大鑊，其實我plan咗去姫路一日 幾日後去岡山嗰陣，可能順便一日遊去埋

我最鍾意嘅日本城，我會揀北九州 唐津城，又唔多人，又容易行，個風景都好正(可能係我鍾意睇海)

(呢個就係唐津城影，與今次四國旅程無關，敬請留意)

係特登整到咁難行,唔係俾人攻到上黎拖唔到時間

未，遲啲會去

我欣賞既係護城河點座城既設計，點拖慢旅客敵人入天守閣既時間

個章真係幾靚

成日係日本見到有cup印仔既地方，但身邊都冇紙

真係學到嘢
用咗呢個角度睇之後 睇多咗好多嘢

係，所以我四年前喺鹿兒島特登買咗本簿，專係旅行嗰陣用嚟吸印仔

只有得閒嗰陣upload本簿張相上嚟

遲啲得閒嗰陣

屌啦星 我都想出走一個月
樓豬預左幾多筆直?