《求婚嗰日，我發現我女朋友鍾意食屎》

推

個半月前嗰一晚，亦都係我同敏敏被無限蟲蟲包圍嘅嗰一晚。

八仙果師父將我同敏敏接咗翻佢屋企住，當敏敏喺八仙果師父間房瞓咗之後，我再去咗搵八仙果師父一次。

我打開八仙果師父間房嘅房門嗰時，佢同高醫生正準備要做啲開心嘢。

但係當時，我為咗敏敏，都硬住頭皮咁講咗句：「我仲有一件事想拜托師父你幫忙。」

「你想學驅蟲之術？」

當八仙果師父換翻好哂啲衫之後，我將我嘅意願話咗佢聽。

「嗯，既然敏敏身上有呢個怪病，將來唔知會唔會又好似今晚咁，無啦啦遇到好多蟲。而我明白，唔係次次都可以咁好彩有師父你出嚟幫手解圍。所以，我好想師父你可以教我一招半式，等我有能力可以保護到敏敏。」

我握緊拳頭，諗到自己今晚嘅無能為力，總係有啲深深不忿。

「我當年學法嘅時候，師父曾經講過我嘅仙術不得外傳。所以，教你唔係問題，但係你話『一招半式』？要學，你就要學哂，而且認認真真咁歸入我師門，但係你唔好睇我只係彈下啲八仙果出去好似好簡單咁，如果你真係要學，就唔好諗住可以輕輕鬆鬆。」八仙果師父一臉認真咁講。

「一直以嚟，敏敏都好努力支持我成為廚師嘅夢想。我最初學廚嘅時候，咩都煮得好難食，但係敏敏都會笑住咁將我煮得勁差嘅嘢食哂佢，仲不斷幫我打氣添。由嗰時開始，我就感受到我一定要好好珍惜呢個女仔。」我諗起從前嘅日子，忍唔住幸福咁笑咗出嚟。

「你有冇諗過，佢可以笑住食你煮得難食嘅嘢，只係因為佢一向食開屎，所以已經免疫咗難食嘅嘢呢？」八仙果師父好認真咁問。

對於八仙果師父呢盤冷水，我決定無視。

然後我繼續講：「一段關係要發展得好，大家都需要願意為對方改變，為對方進步。

其實自從我知道敏敏有食屎呢個怪病開始，我成日都覺得自己咩都做唔到，亦改變唔到啲咩。

但係，當我發現即使咩都改變唔到，但係至少，我可以成為一個有能力保護佢嘅人。

所以，我頭先望到八仙果師父你出手驅蟲嘅時候，我就已經下定決心，要向你學習，令自己有能力去保護佢。

無論師父你嘅訓練有幾辛苦，我都會完成。

因為，我想為敏敏成長，成為一個可以保護到敏敏嘅人。」

講出呢番說話嘅時候，我個心入面，充滿咗敏敏幸福嘅笑容。

「雖然睇落你無咩學法術嘅資質，只不過，我鍾意你願意為對方改變嘅心。

確實，如果雙方永遠都只係死守自己要嘅嘢，永遠都唔願意為對方作出協調同改變，一段關係無可能行得長嘅。

既然你有決心，咁我今日就正式將你收入我八仙果門下。

由於你係我第三位徒弟，論資排輩，你尚有師姊七仙羽同六仙髮，今日我賜你法號為『五仙毛』，但係你初入門，未能擔當『仙』字，所以暫稱『五毛』，等你法力長進，先再為你升級。」

八仙果師父伸手喺我額頭上面寫低咗「五毛」兩個字，雖然我對呢個名唔太滿意，但係總算入門成功。

而喺正式向八仙果師父學習之前，我提出咗另一個請求：「師父，請問你可唔可以將我向你學法嘅事保持秘密，唔好俾敏敏知道？因為佢知我平日廚師工作已經辛苦，我擔心佢一旦知我再為佢勞碌，佢心裡面會好過意唔去。」

八仙果師父聽咗我嘅解釋之後，明白事理咁點一點頭，應承咗我。

然後，地獄一般嘅學法生涯就正式開始。

頭先，當我見住呢兩個突然出現嘅男人，加埋成堆踴上嚟嘅蟲，我一時失咗方寸。

但係當我摸到自己個袋入面嘅一個盒，我好快就記翻自己當初誓要保護敏敏嘅初衷。

雖然我唔知自己算唔算學藝未精，我亦都唔知我夠唔夠料對付面前呢兩個人，但係比起個半月前，而家我絕對唔應該俾蟲圍住就會嚇到大驚小怪同束手無策。

而家嘅我，比起個半月前，更有資格去用雙手保護敏敏。

就喺啲蟲蟲爬到我同敏敏一步距離嘅範圍嘅時候，我大叫出一句：「地下之蟲，以紫薯八仙果化解！」

我一邊大嗌，一邊從袋入面攞出五粒紫色嘅八仙果然後彈出。

八仙果一落地，第一排即刻有十幾條蟲反肚而死。

鬍鬚佬同痴肥男人見我露咗呢一手，都擘大咗眼，不可置信咁望實我。

我將六罐唔同口味嘅八仙果好似子彈咁圍住咗條腰，挺起胸膛咁望住鬍鬚佬同痴肥男人講咗一句。

「我的女人，就由我來保護。」

（故事待續）

＝ ＝ ＝
下一個加更位：550正皮
Penana加更位：1400 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」，IG限定㗎
IG : windblowssilently

五毛

笑撚死 五毛

五毛樓主個腦到底裝啲咩

五毛

五毛咁都比你諗到

型，好好保護敏敏啦

痴線故

食開屎所以食得落啲難食嘢

七仙羽都可以諗到去五毛樓主個腦發生咩事
呢個伏筆有料到

又五毛又Nmsl
好嘢

笑死

又live

樓主一早痴線啦

五毛
笑死

今日睇文之前，有時間可以去我IG睇睇，
寫咗一篇關於今次故事嘅小小愛情心得

睇完之後，就可以擔定櫈仔等今晚睇故喇

十分鐘內，酒店房內因為呢場蟲蟲對抗戰而變得烏煙瘴氣。

呢邊抹茶八仙果落地，十幾條蟲蟲即刻掉頭走；嗰邊海鹽八仙果彈出，又有一群蟲蟲反肚身亡。

睇到滿地蟲蟲，我不禁心感安慰，知道過去個半月嘅苦練並無白費。

要知道，我過去個半月每朝清晨都要去跟八仙果師父練習發射八仙果同埋認蟲嘅功夫。

八仙果師父會拎一大本好嘔心嘅昆蟲圖鑑，迫我逐頁記住蟲嘅特徵，然後再講出要用啲咩八仙果去對付啲蟲。

一旦答錯，就會俾八仙果師父大大聲嗌住「拂you拂you」咁用塵拂拂我，令到我如坐針氈，即使一朝早未瞓醒都要打足十二分精神答問題。

好彩，而家所有功力正好派上用場。

「臭蟲？莞莤味！」一粒青色八仙果飛出，牆上面即刻有幾十隻準備向我跳過嚟嘅臭蟲落地。

「蜘蛛？咸蛋黃味！」我轉身向天花板射出一粒黃色八仙果，一粒連續射穿三個蜘蛛網，又有十幾隻蜘蛛跌落地而死。

鬍鬚佬同痴肥男人見勢色開始唔對路，兩個突然一齊拎出短笛，同時吹響。

原本，佢哋只係吹出幾個單音，已經引嚟萬千蟲蟲。

但係呢個時候，佢哋兩個嘅短笛竟然吹出延綿不斷嘅音符，變成一段我聽落去有啲熟口面嘅旋律。

聽多幾個音，我終於發現，原來佢哋吹緊嘅，竟然就係香港考生最怕嘅惡夢神曲：「綠袖子」！

令我意外嘅係，當呢首「綠袖子」一被吹奏，房內嘅蟲蟲好似精神百倍咁，竟然加速向住我衝過嚟。

唔通，呢首神曲，竟然可以連蟲蟲都可以變到「真得很興奮」？

而家嘅我，無時間去思索呢個問題住，因為所有蟲蟲速度增加，變相令我認蟲同埋彈出相應嘅八仙果嘅時間更加少。

而且，因為長期彈出八仙果，我十隻手指嘅指甲內都開始滲出血跡，甚至有一陣麻酸感。

我知道，自己唔係頂得好耐。

就喺呢個時候，我聽到敏敏用好微弱嘅聲講咗一句：「我終於明白……點解之前會見到你啲手指有瘀傷啦。」

我抬頭一望，原來鬍鬚佬手上面嘅香已經燒盡，唔怪得敏敏可以回復神智啦。

「敏敏，而家形勢危急，你快啲打俾八仙果師父叫佢過嚟救命啦。」我滿頭大汗咁講。

「我部手機……漏咗喺廁所啊……」敏敏無奈咁低頭講。

我洩氣咁搖一搖頭，再彈射出一堆八仙果驅散咗百幾條蟲。

但係鬍鬚佬同痴肥男人繼續不斷吹笛，蟲依然源源不絕咁出現，再喺咁落去，我十分鐘內就會頂唔住。

正當鬍鬚佬同痴肥男人嘅「綠袖子」吹得興起嘅時候，突然有另一道笛子嘅聲音從房外奏起。

呢道笛音不但清脆響亮，旋律清澈到令人聽咗有一種春回大地，煥然一新嘅精神感覺，完全打亂咗「綠袖子」悠揚嘅旋律。

而特別嘅係，地下嘅蟲好似被新嘅笛聲吸引咗，一時間竟然停止咗向住我狂衝。

照咁睇，似乎出面嘅人係有意想幫助我同敏敏喎。

鬍鬚佬同痴肥男人對望一眼，表情上睇得出佢兩個有啲慌張。

佢哋同時深呼吸一口氣，然後再次吹響短笛。

畢竟，佢兩個人，兩支笛，聲音好快再次蓋過出面嘅笛聲。

出面嘅笛聲驟然停止，令我不禁懷疑出面嘅人係咪已經宣告輸咗呢？

但係不出一秒，出面就傳嚟一把我期待已久嘅聲音：「八仙法—何仙姑：腳踏荷花！」

呢把聲，當然係八仙果師父把聲啦。

只見八仙果師父從房外極速衝咗入嚟，同時喺佢手上亦有幾張A4紙平平飛出。

呢個時候成間房嘅地下都係蟲，我都諗緊佢可以點樣入嚟嘅時候，師父已經一腳踩喺飛緊嘅A4紙之上。

超越我幻想嘅係，張紙完全無俾八仙果師父踩低，反而好似一塊踏腳石一樣令師父可以凌空而行。

不出幾步，師父已經企穩喺我同敏敏前面。

「師父！你做咩瞓咗咁耐啊？」救兵嚟到，我當然感到莫名嘅興奮。

「我無瞓，一直都喺我間房度睇緊事態發展，見你頂得住，咪俾你威多陣囉。」八仙果師父笑咗一笑，似乎完全唔當眼前呢堆蟲蟲同嗰兩個男人係一回事，然後再溫柔咁摸一摸坐咗喺地下嘅敏敏個頭，「放心，無事㗎喇，你男朋友保護得你好好。」

敏敏聽到，對住我又感激又甜蜜咁笑咗一笑。

「你剛才所用的是什麼不要臉的法術？還有那奇怪的笛聲也是你發出的嗎？」鬍鬚佬指住八仙果師父問。

「你們連我八仙果師父都不認識，真是有眼不識泰山。我是八仙果師父，用的當然是『八仙法』。我剛才只不過用了『韓湘子：天籟之音』和『何仙姑：腳踏荷花』，還有六仙的功夫還未用呢。反倒是你們這些『獵蠱人』，妄顧他人性命，為了獵蠱不惜一切，你們才是不要臉的一方。」八仙果師父氣勢迫人咁反駁鬍鬚佬。

睇住八仙果師父呢道氣勢，我差啲就以為佢係武俠小說入面嘅女俠。

「廢話少說，先接下我們的『萬蟲流之術』吧！」痴肥男人二話不說，即刻同鬍鬚佬將短笛放入口，但係今次吹出嚟嘅樂曲再唔係「綠袖子」。

今次首歌嘅旋律我會用「詭異」去形容，感覺好有中東舞蛇音樂嘅色彩，總之無論節拍同旋律都令人聽到毛骨悚然，好唔舒服。

而喺呢啲笛音嘅驅使之下，地下嘅蟲竟然一隻隻疊起，慢慢竟然變得有半個人咁高。

「而家我手上得翻最多嘅係黑糖珍珠味八仙果咋。呢隻味你從來都無用過，係咪啲咩獨門必殺技嚟㗎？」我將一罐仲未開封嘅八仙果交俾八仙果師父。

「唔係。」八仙果師父搖一搖頭，「我唔用佢，係因為呢隻味，其實只係純粹我鍾意食所以整出嚟，根本對對付蟲係一啲用都無。」

我忍唔住反咗個大白眼，然後細聲講：「師父，咁我哋嘅八仙果未必夠用喎。」

因為頭先我對抗啲蟲已經用咗唔少八仙果，如果再嚟一大堆，即使我同八仙果師父聯手擋得住，但亦都未必夠彈藥。

「如果係一萬條蟲湧過嚟，就算有再多八仙果都頂唔住。所以，今次要贏，睇怕都唔可以再用八仙果，而係要無招勝有招。」八仙果師父呼出一口氣，示意我同敏敏企後一步。

我同敏敏見到師父佢面色凝重，即刻唔多講，退到去床邊企好。

「八仙果獨門仙術：閃～電～八～連～鞭！」

八仙果師父就好似日本動漫啲人物咁高聲嗌出自己招式嘅名，然後全身一搖，雙手凌空好似捉實咗啲嘢咁。

「一鞭！」八仙果師父兩雙手好似握實咗啲嘢，然後身體抽搐一下，雙手由上而下咁做咗一個揮動嘅動作。

正當我同敏敏都唔同師父做咩要喺度做默劇嘅時候，超越常識嘅事情就發生喇！

我望到順住師父揮手嘅方向，地下有過百隻蟲直接一命鳴呼，形成咗一條好明顯嘅蟲屍路。

而呢條蟲屍路，就啱啱好形成咗一條長鞭嘅曲線形狀。

我好驚訝咁望住一切，唔通，八仙果師父手上真係有一條無形嘅閃電鞭？

「兩鞭、三鞭、四鞭……八鞭！」

如果唔係八仙果師父嗌得好有威勢咁打出每一鞭，我估旁人睇落，真係會以為師父係喺度跳緊Chacha。

只不過，我見到每當師父佢兩隻手向住某個方向揮出嘅時候，嗰個地方嘅蟲就會應聲大量死亡。

而最厲害嘅係，去到最後一鞭，鬍鬚佬同痴肥男人兩個支短笛竟然同時斷成一半，所以再亦都發唔出聲。

「我勸你們，不要再打這小女生的主意，否則下一次斷的就不是你們的笛，而是……」八仙果師父嘅目光慢慢向鬍鬚佬同痴肥男人嘅下半身望去，佢哋心領神會，即刻咩都唔講就跑走咗。

「喂，你們剛才提過的『那個人』是誰啊？」我本身仲想追問，但係嗰兩個男人已經掩住下半身跑走咗。

「多謝八仙果師父你又救咗我啦！」敏敏見到嗰兩個男人一走，即刻鬆一口氣咁走去八仙果師父隔離。

點知我見到，八仙果師父呢個時候成個額頭都係汗，而且腳步浮浮，狀態似乎唔太好。

「師父你點啊？」我好緊張咁問。

「我無嘢…..」八仙果師父話未講完，馬上就噴出咗一口鮮血，然後順勢一下就暈咗喺我同敏敏張床上面。

（故事待續）

下一個加更位：550正皮（就快夠數！！！)
Penana加更位：1400 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」同「故事心得」，IG限定㗎
IG : windblowssilently