我迷迷糊糊咁搲咗幾下就繼續瞓，點知嗰種痕癢嘅感覺，好快又翻咗嚟。
就好似，有人惡作劇咁用手指搲緊我手臂一樣。
「敏敏啊，唔好玩啦，夜喇，瞓啦。」我好似鬼食泥咁講咗一句，打算繼續瞓。
但係嗰種痕偏偏就開始由手臂開始上升到去膊頭位，而且間房仲多咗啲「時時」聲。
根據我瞓覺多年嘅專業知識，趁你瞓覺先搞到你痕然後又會發出啲聲嘈住你嘅生物只有一種。
無錯，就係世上最乞人憎嘅蚊。
而要解決蚊就只有一個方法，就係完完全全咁殺死佢。
於是，我一邊捽住隻眼，一邊㩒著床邊個燈制，打算同隻蚊嚟一場禁室培慾死鬥戰。
今晚，唔係佢死，就係我失眠！
「嗒」一聲，燈開咗，我喺張床上面坐直咗，盡全力擘大眼，望實自己手臂講：「既然你咁大膽吸我啲血，我而家就打死……！」
「你」呢個字未講出口，我已經失咗聲，換成咗嗌出另一個字：「蟲啊！」
敏敏喺我身邊俾我呢聲大嗌嘈到醒咗，半睡半醒咁講：「有蟲咪打囉，做咩大嗌嘈醒埋我啊？」
「蟲啊，好多蟲啊，好撚多蟲啊！」呢一刻，我已經係用緊「喪」嘅方法大嗌出嚟。
「喂啊，都話唔俾講粗口囉，好無禮貌㗎！」敏敏終於俾我嘈到坐直埋喺張床度，慢慢睜開佢對眼。
然後，不出半秒，敏敏即刻發出咗比我大十倍嘅聲音：「屌！好撚多蟲啊！」
千奇唔好以為我哋兩個細膽或者小題大造。
因為，呢一刻我哋見到嘅，係我哋張雙人床下面嘅地板，鋪滿咗過百條五顏六色嘅蟲，有長有短，每一條都生動活潑。
如果我俾少少想像力，我而家就好似望緊一條會流動嘅河流一樣。
而頭先我之所以會痕，原來係因為有一條蜈蚣爬咗上我隻手度。
突然，敏敏指住左邊大叫一聲：「死喇！啲蟲開始爬上嚟喇！」
我一望過去，果然有好幾條有中指咁長嘅綠黃色大蟲，開始慢慢沿住床腳爬緊上嚟。
我同敏敏呢一刻就好似兩個坐咗喺最後一塊冰川上面嘅求救者，四周圍都俾唔同嘅蟲所包圍，再無退路。
（故事待續）
＝ ＝ ＝
恭喜大家, Penana like數琴日直線上升, 所以聽日中午會再加一更！！！
所以，簡單講，聽日又有兩更文睇啦～
想睇多啲 記得正皮俾like不可少 多多支持
我愛大家
??
無厘頭得嚟好好睇呀
係幻覺定真係驅蠱刺激左啲蠱
好快手