《求婚嗰日，我發現我女朋友鍾意食屎》

好鍾意今日呢個內容
不過如果我係彩萍 我唔會要佢食屎
我會同佢一齊落地獄

好睇

其實你係唔係三哥

恐佈情人發現
明明人哋都無食你，咁都要搞人三代

吓？？！
我見到話佢遊走喺兩個女人之間仲以為食咗添
唔小心代入咗自己

追晒成個post，樓主好用心去講故仔，搞到我一直追故。

佢話差啲去爆房嗰時突然覺得好內疚走左吖嘛

屌好撚恐怖

大陸女人真係好恐怖

好撚痴線
呢段感情真係好變態

正

我以為爆房走咗之後逃避問題喺兩個女人之間嘅時候有食到
冇食到都落蠱
無論冇有食都係佢一個人嘅問題啫
要報都報佢一個就夠啦 仲報埋個女
鳩估彩萍會肯幫敏敏解 不過拒絕幫佢老豆解

等

P牌仔冇得正皮

多謝你欣賞我啊kingston巴
雖然成個故睇落好鳩 但真係有俾心機諗 所以多謝你留意到

心意收到

（Penana 500 likes加更）

當世伯講起呢一番前塵往事，佢固然係講得有幾分唏噓，似乎對做錯事嘅自己不堪回首。

而作為聽眾嘅我同敏敏，我哋除咗好意外世伯曾經出軌之外，聽到彩萍用蟲包圍世伯伯母呢一幕，我哋因為有過類似經歷，所以聽得特別膽戰心驚。

「咁之後點啊？」話哂都係自己阿爸阿媽嘅往事，敏敏當然特別上心。

世佰乾咳一聲，繼續解釋落去：「嗯，首先係我同你媽咪啦。

我好坦白咁同佢講哂成件出軌嘅事，亦都講咗俾佢聽我自己內心嘅自卑、壓力同埋出軌原因，亦都希望佢原諒。

當時你媽咪都係好激動、好傷心，但係佢亦都見到我最後奮不顧身衝入蟲圈度救佢嘅表現，所以佢都相信，我只係一時迷失先會犯錯。

嗰時你媽咪就同我協議，用一段時間嚟彼此觀察，睇下大家仲係咪適合。

好彩，經過一段時間之後，我哋慢慢都可以搵翻從前相愛嘅狀態。

而阿芳亦都幫我轉告咗俾佢爸爸聽我嘅壓力同處境，阿芳仲直截了當咁表示佢係非君不嫁，所以要求佢爸爸唔好再抨擊我。

老實講，我真係好佩服你媽媽嘅勇氣，因為佢，我減輕咗唔少壓力，自然令到我同佢之間嘅感情少咗影響。

所以，我當時都有諗過，如果我一早就同阿芳分享咗我嘅壓力，可能事情就唔會變得咁複雜。

而自從彩萍走咗之後，我一直都有留意我同阿芳嘅生活，睇下有冇出現啲咩影響。

為咗防範佢，我哋買哂一屋嗰啲黑旋風、殺蟲水、螞蟻屋，但係偏偏一直以嚟都相安無事。

點知，直至到我同阿芳兩年後結婚嗰一日，當我哋個結婚蛋糕捧出嚟嗰一刻，我聞到蛋糕上面嘅朱古力味。

嗰一刻，我完全不由自主咁一下子就衝咗去廁所，然後忍唔住咁痾屎再不斷執上嚟俾自己食。

即使我理智上好想阻止自己，但係大腦完全不受控制，最後食到自己一身都係屎。

於是，我喺廁所度叫啲兄弟幫我宣佈嗰日婚禮中途腰斬，理由係新郎唔舒服。

而當我冷靜翻落嚟之後，我坐咗喺個廁格入面咩人都唔想見。

我終於諗明白咗，彩萍當日走之前所講『我就要你親身試下俾人接受唔到、俾人冷待、俾人放棄嘅滋味。』呢句說話嘅意思。

一個會食屎嘅人，試問又點會俾人接受到呢？

點知，當我咁諗嘅時候，廁所門就打開咗。

門外企咗一個人，就係阿芳。

佢第一眼望到我成個身同口都係屎，以佢嘅聰明，可能都已經估到有啲唔正常嘅事發生咗。

但係下一刻，佢咩都無問，一下就衝咗埋嚟攬住我。

著住雪白婚紗嘅佢，成件衫都俾啲屎染到污糟哂。

但係佢無理，只係攬實咗我，好溫柔咁同我講，放心，仲有佢喺度，唔洗驚。

聽到佢呢三句說話，就算我呢個男人老狗，嗰刻都忍唔住流哂馬尿。

婚禮之後，我哋去咗睇醫生，醫生話呢種食怪嘢嘅徵狀通常都係由『異食症』引起，唯一減少病發方法，就係盡量避開致敏源。

起初，我哋以為只要盡力避開朱古力就會無事，無諗到，去到敏敏你五歲嘅時候，竟然連你都會有埋呢個會食屎嘅病。

好對唔住，因為我真係唔想俾你知道你爸爸曾經有過一段咁嘅歷史，所以一直都無話你知其實我都有呢個問題。

嗰時雖然我唔知彩萍到底係點做到嘅，只不過，我既然見識過佢控制蟲嘅技術，佢識得啲千奇百怪嘅方法整鬼我當然唔出奇啦。

所以，我都無打算要點樣解決問題，一直以嚟，我都只係希望可以平平安安咁一家人過埋下半世人就算。

至於食屎呢件事，反正都十幾廿年，我都係諗住避得就避，只係無諗過嚟到今日，先俾你哋發現，同埋知道係咩『中蠱』啫。」

聽哂成件事嘅來龍去脈之後，而家我哋已經大致清晰咗敏敏身上嘅蠱毒係點嚟。

而更重要嘅係，我哋亦都已經知道，到底我哋要搵邊個嚟破解呢個蠱毒嘅詛咒。

「彩萍嘅聯絡方法？無喇，自從我同佢斷絕來往之後，就完全無再見過佢喇。始終，我都有負於佢，仲邊好意思搵佢吖。想當年，佢其實對我好認真，從佢嘅眼神，我睇得出佢真係想將終身幸福都托付俾我，只不過，唉，一日都係我……」世伯非常無奈咁嘆咗一口氣，睇得出呢件不堪嘅往事依然令佢十分介懷。

「咁仲有冇其他關於佢嘅資料？多少少都好吖？」我嘗試問多啲資料，否則要喺全中國，或者淨係香港同雲南要搵一個叫「向彩萍」嘅女仔，我諗可能仲難過中六合彩。

「嗯……我記得，佢當年個樣係白白淨、鼻細嘴細，單眼皮嘅，身型瘦瘦削削咁，比較特別呢，好似喺佢右眼角邊有一粒痣。」世伯側哂頭咁諗，睇嚟咁多年前嘅人樣確實係唔易記得清楚嘅。

雖然，而家得咁少資料其實都同大海撈針無咩分別，但係至少都好過毫無資料咁去搵人嘅。

「好啦，故事就講完喇，阿博，我欣賞你知道敏敏有呢個怪病都依然無厭棄佢，敏敏果然無揀錯人啊！」世伯笑住拍一拍我膊頭。

「世伯，我一定會盡力幫你同敏敏解開蠱毒㗎。」我眼神堅定咁講。

「得喇，我就無咩所謂囉，你盡力幫敏敏啦。」世伯一副看透世事嘅表情，慢慢企起身伸咗個懶腰，然後講：「好啦，今晚都夜啦，我去沖個涼先，你哋慢慢傾。」

世伯一邊講，一邊就離開咗客廳，剩低我、敏敏同伯母。

「媽咪，你真係好偉大。」敏敏趁世伯走咗，即刻走咗埋去佢媽咪身邊攬一攬住佢。

或者因為阿媽都係女人，兩個女人，總係特別明白大家嘅辛酸。

「無咩偉唔偉大嘅，其實我嗰時都係搏下，搏下呢個男人係咪值得我投資多一次。我覺得，婚姻其實本來就似一次長線投資，佢跌到谷底，你可以選擇放手沽空，又可以信佢會回升繼續長揸。有人覺得呢場係一埸賭博，但係，我覺得其實正如投資一樣，只要你夠了解間公司，你就會知道到底佢真係唔再值得長線持有，定抑或今次下跌只係一時技術性調整，值得信任佢會升翻。

嗰時我之所以信你老豆，其實真係全靠佢瞓身過嚟救我嗰下㗎咋。咁當然，之後佢同我講翻佢出軌嘅心路歷程，至少都令我可以對翻佢有信心，同埋同佢一齊慢慢建立翻呢段關係。其實你老豆頭先俾面我所以無講啫，喺佢出軌呢件事之前，每次我老豆話佢無出息嘅時候，我都會講笑住咁幫我老豆口笑下佢。我本來係想懶係打完場搞下笑，但係原來對你老豆嚟講，好多我嘅說話都俾咗落井下石嘅感覺佢。所以呢，有啲嘢，唔講清楚，其實大家真係可以一直都誤會落去，直到一日大家玩完都唔知咩事。」

伯母講到呢度，伸出隻手一邊拉起敏敏，另一邊就拉住我隻手疊埋一齊，然後講：「雖然我唔知你哋打算結婚未，但係記得，婚姻，係你兩個將自己嘅人生投資落對方人生嘅重大決定，所以，一定要對自己投資啲咩知道得一清二楚。有咩唔明就問到明，咁先可以幸福到老㗎。要放棄一段感情好容易，但係要堅持一段感情真係要花一世功夫㗎。」

我同敏敏互望一眼，心有靈犀咁點一下頭，然後對望一笑。

呢一個心照不宣嘅笑容，代表咗我哋都對自己將要投資嘅人好有信心。

從世伯伯母屋企離開之後，我同敏敏第一時間趕翻去八仙果師父屋企匯報成果。

「你外父所講嗰枝紅色短笛叫做『赤木笛』，係由雲南苗人聚居嘅地方先有嘅木材所造嘅。所以，我無講錯，成件事，睇嚟都同雲南脫離唔到關係。」八仙果師父胸有成竹咁講。

「但係人海茫茫，我哋又點搵到呢個『向彩萍』出嚟呢？我已經問過我阿爸，但係佢話無見咁耐，其實真係咩都唔知。而且當年佢哋見面嘅夜總會已經執咗，變相就無哂下落。」敏敏有啲擔心。

「雖然我就唔信埋哂啲咩用枝笛就可以指揮昆蟲呢啲咁旁門左道嘅嘢，只不過，我都可以幫手叫醫院電腦部嘅人幫手查下有冇咩病人係呢個名嘅。」高醫生喺側邊插嘴講。

就喺呢個時候，我舉高咗手。

「我諗，今次唔洗高醫生你出手喇。」

「阿博你搵到『向彩萍』喇？」敏敏好驚訝咁問。

我舉起手中嘅手機，俾佢哋見到一個年約四五十嘅中年女人，白白淨、鼻細嘴細，單眼皮、身型雖然就已經唔多瘦削，但係右眼角邊真係有一粒痣。

「嘩！應該就係佢喇！你點搵佢出嚟㗎？」敏敏指實我部手機，笑住咁問。

「其實我都係就咁Google search『向彩萍 雲南』，結果好快就出現呢張相。」我攤一攤手，表示過程真係一啲都唔難。

「咁我哋而家可以點樣搵到佢啊？」敏敏又追問一句。

「輕鬆啦，你望下佢張相隔離！」

我將張相拉過少少，敏敏同八仙果師父一齊望埋去。

「向彩萍 店舖經理 譚仔雲南米線旺角店」。

八仙果師父見到之後，氣定神閒咁笑咗一下講：「我都話，成件事同雲南脫離唔到關係㗎啦。」

（故事待續）

＝ ＝ ＝
下一個加更位：450正皮
Penana加更位：900 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」，IG限定㗎
IG : windblowssilently

為咗多謝大家連日支持，今日加更出多少少，希望大家睇得開心
好睇嘅記得留個言支持下同埋俾個正皮又得

睇完文記得專心翻工翻學啦
今晚出文再見

薯仔巴
我邊有三哥咁勁