《求婚嗰日，我發現我女朋友鍾意食屎》

等緊喎

睇睇下有啲想食譚仔

等緊
樓主加油

但係你個名

今晚真係要深夜
但一定會出

有心無默、唉瘋人、墨說、理想很遠呢幾個都係我追咗好耐嘅高登連登作者，雖然呢段時間真係甜故當道，但係我好認同你咁講，仲有好多好有心嘅作者默默努力咁寫文俾大家睇，仲要日日俾人問候老母添。啱啱live咗即刻再follow埋你ig，好佩服你可以寫到啲咁鳩嘅故，好有三哥嘅味道，加油

痴撚線，睇唔到文唔訓

「吓？」

遲咗一秒，敏敏先勉強俾到反應。

畢竟，對方嘅呢句說話實在來得太過意外。

「雖然你好認識『譚仔話』，亦都好熟悉我哋嘅湯底，但係，如果你有留意我哋嘅招聘廣告，我哋其中一個條件，係需要請一個『雲南人』。」娟姐氣定神閒咁解釋。

「我好明顯就係雲南人啦，你聽我嘅口音都知㗎！」敏敏好明顯仲想力挽狂瀾咁為自己解釋。

「無錯，你嘅口音的確係有幾分相似，差啲連我都呃到。只不過，我已經好肯定你唔係雲南人喇，所以多謝你今日嚟見工，不過請回啦，我哋仲有下一位面試嘅人啊。」娟姐唔再俾機會敏敏解釋，果斷咁落咗逐客令。

而我聽到娟姐嘅說話，馬上留意到店舖入面而家除咗我之外，就只有坐喺我對面嘅一位中年嬸嬸。

呢位嬸嬸喺度填緊個人資料表格，而我斜眼望到，佢喺祖籍上寫咗「雲南」。

呢位嬸嬸，似乎係名正言順嘅雲南人。

如果係咁嘅話，呢個嬸嬸好有機會會俾人請到，換言之我同敏敏想靠住入職嚟換取情報嘅大計就會泡湯。

唔得，一定唔可以俾呢個嬸嬸入到職。

咁即係話，唯今之計，就係要快過呢個嬸嬸搶到入職機會。

但係先唔好講點樣搶，到底頭先點解敏敏臨門一腳會俾娟姐發現佢唔係雲南人嘅呢？

嗱，以佢面試表現嚟睇，一定唔關佢答錯問題事。

所以，最有可疑嘅，一定係佢最後飲嘅三碗湯。

唔通，呢三碗湯入面另有乾坤？

呢個時候，敏敏已經一臉失望咁離開咗張枱。

而我對面嘅嬸嬸，亦都準備好走過去接受面試。

如果我再唔做啲嘢，局面將會有如覆水難收。

既然而家都係背水一戰，陳超博，學個名話齋，搏一搏啦！

我喺對面位嬸嬸準備行過去張枱之前，一個箭步搶咗喺佢前面，坐咗喺敏敏頭先坐低嘅位置。

當娟姐仲未反應得切嘅時候，我一手就拎起咗頭先敏敏飲過湯嘅第一隻空碗，即使入面咩湯都無哂，但係我都用力聞咗一下。

呢一聞，竟然真係令我發現咗啲嘢。

果然，我無估錯。

原來，碗湯入面真係大有文章。

「先生你……？」娟姐好疑惑咁望住我，睇嚟未明我到底做緊啲咩。

「呢『玩』湯同平時『呢』哋嘅湯『Dee』唔同，係香柳，『呢』哋『渣』咗我哋『渣』鄉嘅香柳。」我大腦一邊運轉住咁將我嘅說話變做只有半桶水嘅「譚仔話」，一邊講出我喺湯底嘅發現。

話說，就喺我頭先聞咗隻空碗一下嘅時候，我憑住五星級大廚對食物嘅觸覺同嗅覺，我一下就已經發現碗入面殘留住平時「譚仔」湯底無嘅香味。

然後，憑住我五星級大廚對食物嘅認知，我馬上就認出咗呢種香味，係嚟自一種叫「香柳」嘅食材，而呢種食材正好係雲南人多用嘅香料，所以令我對自己嘅發現更加有信心。

「你……竟然聞得出？」娟姐個樣有啲驚訝，又有啲欣賞咁望住我。

「當然，『渣』鄉嘅『惠』道，『禾』『依』定『智』得。」我開始講「譚仔話」講到自己都唔知自己講咩，為免露出破綻，我馬上聞第二隻碗。

「哦……今次『渣』咗香格里拉松茸，可惜『我』有得聞，無得飲，如果唔係個湯底一定好香甜。」我笑住聞完第二隻碗，而娟姐亦都笑住點頭，用眼神示意我試下聞埋第三隻碗。

我充滿信心咁聞，點知，今次隻碗入面竟然只係得一般嘅「譚仔」湯味？

「今次聞唔到喇？」娟姐語帶譏諷咁問我。

我唔服氣咁望住娟姐，索性唔回答佢。

我唔相信，我作為一個五星級大廚，竟然會試唔出譚仔湯底有啲咩特別。

我望住呢隻空碗，入面殘留住嘅，就只有第三碗辣湯殘留嘅紅色。

我望住呢啲紅色嘅時候，我留意到一啲異樣。

當我非常專注喺呢啲喺碗上嘅紅色，我諗，我可以估到呢碗湯有咩特別之處喇。

「呢一碗，係加咗『鵝油』嘅湯。」我放低咗隻碗，胸有成竹咁望住娟姐。

「何以見得？」娟姐臉上睇唔出任何表情，平淡咁反問咗我一句。

「雲南正宗嘅『過橋米線』源自一個故事。有一個妻子為老公送上米線作午餐，誰不知路途遙遠，往往未過橋，米線就已經變凍。所以，妻子為咗幫米線保持溫度，就以鵝油澆於米線湯之上，令米線可以保持熱溫。所以，傳統嘅過橋米線，就會有少量鵝油蓋面。頭先亦都因為咁，鵝油喺湯嘅表面而唔係混入湯中，所以當湯俾人飲哂之後，根本就唔會留低味道，所以先令我估唔到。」我一邊講，一邊慶幸自己當年學廚嘅時候曾經修讀過「中國美食史」，如果唔係呢一刻仲點可以大拋書包。

「既然你話無留低味道，你又係點知道碗湯有鵝油呢？」娟姐嘴角上揚，一臉好奇咁問。

「好簡單，油跡浮面，亦最容易喺餐具上留低痕跡。頭先嗰位小姐飲湯只會用碗嘅其中一邊飲，所以另一邊自然有少量油跡殘留，跟住透過觀察同埋認真聞多兩下，要發現鵝油其實唔難。」我睇到娟姐嘅反應，已經知道自己嘅答案全中。

「犀利犀利，你竟然可以單憑觀察同嗅覺就知道唔同湯底嘅分別，果然厲害。作為一個雲南人，一定可以一試就知道湯底嘅唔同，所以頭先位小姐即使扮得再似，亦唔會講得出。」娟姐一邊讚我，一邊仲忍唔住拍手。

「娟姐，實不相瞞，其實呢，我都係想嚟見工嘅。話哂我咁熟悉雲南食物，一睇就知我係雲南人啦，不如你請我吖。」我見時機成熟，即刻大膽向娟姐提出要求。

「你的確係好熟悉雲南食物，不過，一聽你嘅口音，似菲傭姐姐多過似譚仔姐姐，你好明顯就唔係雲南人啦。」娟姐睿智咁搖頭。

估唔到，我辛辛苦苦先連過三關估中湯底，到頭來竟然係衰喺『譚仔話』手上。

「只不過，雖然你唔係雲南人，不過恭喜你，你已經成功被招聘喇。」娟姐一下就坐咗去我身邊，伸出手同仲未反應得切嘅我握手。

「吓？」對於娟姐再一次為我帶來驚喜，我同樣係反應唔切。

「乜你無睇張招聘傳單咩？上面明明喺『雲南人優先』後面寫咗多一句，『男人應徵，立即聘用』㗎！你知啦，我哋舖頭不嬲就女多男少，但係其實搬搬抬抬好需要男人㗎嘛，所以基本上只要你係男人，我哋都會請。」

娟姐隨手拎咗個放大鏡嚟，然後放喺張招聘傳單上面，果然係有一句「男人應徵，立即聘用」，但係字體，分分鐘細過隻蟻。

娟姐見我對呢個字體非常不解，就有啲唔好意思咁笑住解答：「你知啦，呢句嘢如果大大隻字寫出嚟，又會俾人話咩『性別歧視』㗎喇，所以唯有寫細啲囉。」

「咁即係話……我而家就可以翻工？」我仲係有啲不可相信咁問。

「係啊，你就算唔係雲南人都咁熟悉雲南食物，呢樣就已經值得請啦。」娟姐讚我嘅時候，突然仲伸出兩隻手，一隻放咗喺我手臂，另一隻放喺我個肚腩，笑吟吟咁講：「而且，你又有『雞肉』，又有『懶肉』，仲係一塊小鮮肉，最啱就係喺我哋呢間咁多姨姨嘅分店做㗎喇！」

我一邊俾娟姐好滿足咁捽住我隻手瓜，一邊開始明白，原來只要我係男人，我就可以俾人請到。

咁到底，呢一個月嚟，我同敏敏咁努力學「譚仔話」嚟做咩。

到頭來，其實一切都可以「遇阿姨我不想努力了」嚟解決。

Anyways，至少，我都順順利利咁正式成為咗「譚仔」嘅員工。

喺翻工嘅第一日，娟姐帶咗我去員工室同我講：「嗱，呢度就係平時我哋放低嘢嘅地方，每個員工都有自己嘅Locker，雖然Locker周圍都係，但係你最好都係揀定一個然後貼個名牌上去啦，方便自己吖嘛。」

於是，我就求其揀咗一個儲物櫃，打算將自己啲嘢放哂入去。

就係呢個時候，我留意到，喺我嘅儲物櫃隔離嗰格，原來都寫咗一個名。

呢個名，就係「向彩萍」。

（故事待續）

＝ ＝ ＝
下一個加更位：450正皮 （就快夠數啦！）
Penana加更位：900 likes
Penana link：https://www.penana.com/story/90310

最後留低埋樓主IG，大家有興趣可以去嗰邊催迫樓主加更，仲有得睇埋呢個故嘅「作者前言」，IG限定㗎
IG : windblowssilently

辛苦哂所有等文嘅讀者們，
今日真係有點夜，
辛苦大家等了

留言聽日一次過覆，
事關我都有點眼瞓

最後一句，
多謝大家支持，
希望大家繼續Enjoy呢個故事，
得閒多啲share俾朋友就好啦

搞咁多嘢，原來只要係後生靚仔就得

成個故一路都暴走

凌晨4點出文，樓主唔洗訓咩

雖然Locker周圍都係

好好笑，雖然有點老土但見工篇都幾得意。
話時話有無人好似我咁係GOOGLE SEARCH 向麗泙 譚仔
好失望仲以為會搵到D咩添

痴線, 見譚仔工都要遇阿姨先唔駛努力in

男人應徵，立即聘用
辛苦左咁耐 但原來只要係男人就請

估唔到連lovker周圍都係都有

新黎即live
星期一朝早睇完真係醒哂神
中意師父講拂you
唔知娟姐係咪取材自練美娟呢?

真係痴L 線

等睇男豬俾姐姐溶化