[足球/穿越]重來一次的足球人生（4）第二章

三十、


“左右開弓嘅後場校炮手？”

杉田直人有點吃驚地看著這記長傳，他一直有在觀察對方的球員，所以非常肯定這名外表看來平平無奇的中堅是名右腳球員，但這是他今場第一次起腳長傳。

最讓他意想不到的是，皮球的落點剛好在門將猶豫要否出迎的最尷尬位置，而只要接應者技術足夠好能流暢地將其控下來，便會是一次極具效果的反擊。

群馬伊香保溫泉作為地面傳控流的球會，陣中居然還羅致了這樣的人物？

今村一彥將皮球控下來後作勢往右方虛晃了一大步，硬是將從後方狼狽地撲來的中堅騙開了一米多後再用左腳腳外背往外線一撥，這假動作足夠為他爭取到能起腳遠射的空間。

“走位果斷，知道自己速度無對方咁快，亦好迅速咁選擇咗一條可以阻礙對手嘅跑動路線，巧妙地卡住宮澤將個波控低，當然控波嘅技術亦都好好……係一個非常有潛質嘅球員。”杉田直人見狀也不禁點著頭暗暗稱讚。

“可惜遠射唔係今村擅長嗰瓣，”鈴木卓也大概猜到了這次進攻的結果。“不過呢次反擊算係一個信號，起碼應該可以令大家稍為鎮定少少。”

嗯？

雖然晃開了對手，但左腳本應可以施射的今村卻沒有這麼做，而是再做了一次假動作，但這次站穩了身子的宮澤並沒有上當。

是想稍作拖延等隊友前插嗎？杉田直人朝中場附近看了一眼，蕭智堯確實是心有靈犀般早就起步上前，但長谷川一直緊跟在他附近，況且這記長傳斬得飛快，說是想作第二點接應也未免太癡人說夢。

不，他想在這裡直接將對手的中堅過掉，以一個更近距離的位置起腳。

……

「今季聯賽，你有無咩想我要特別注意嘅嘢？」

郡山神風戰的前一晚，鈴木卓與中西智和坐在辦公室內聊著戰術與培育方針上的事項，作為青年軍總教練，中西的任務是引導各青年球員的成長路線，並盡量結合正式隊的戰術風格。

「嗯……」中西抱著胸想了數秒，被問到U-13的問題，腦海裡第一時間想起的自然是蕭智堯。「郡山神風都係棘手嘅球隊嚟，我覺得聽日對蕭智堯嚟講可能唔容易應付。」

「對佢嚟講應該都係嗰個問題：佢需要一個穩定嘅傳球目標、唔識自己去創造節奏。」鈴木卓輕嘆一聲點了點頭。「要前鋒嘅話，今村毫無疑問係U-13入邊最有潛質嗰個，但佢哋兩個嘅配合好似都唔係太理想，時靈時唔靈咁。」

「因為今村踢波太過理性。」中西智和微笑道。「佢嘅走位、處理波嘅方式同思路，都係好教科書式，所有嘢都有文有路，你可以喺任何一個瞬間截停佢然後問佢點解要咁做，然後佢可以好清晰咁解釋畀你聽，佢所有決定同動作嘅原因。」

「都係，蕭智堯反而係啱啱相反。」鈴木卓笑道。「咁你嘅意思，係想我著重蕭智堯去改善呢一點？」

中西智和搖了搖頭。

「正好相反。」

「你想我改造今村？」

「又唔係話講到要改造咁誇張，」中西智和笑道。「但我想你畀今村知道，踢波有時候唔可以純靠理性－太理性代表你做嘅嘢都係喺人哋嘅掌握之中。」

……

這番話鈴木卓並沒有急著跟今村轉達，他仍在考慮要怎樣讓蕭智堯跟今村一彥這對組合建立獨特的默契，因為實際上他們兩人各自秉持的踢法都沒有對錯之分，作為教練，他不想用自己的價值觀或是可能只是短暫幾年的利益便擅自將這種獨特性毀掉。

可今天的今村，看起來似乎是有一點不一樣。

雖然基本功紮實熟練，但他並不是一名擅長過人的球員，平常拿到皮球後第一時間肯定是尋找可以配合的隊友，然後再通過走位去迷惑或是衝擊對方的防線，這才是他一貫的踢法。

只見他花了頓工夫做各種假動作和試探，與郡山中堅宮澤祐一糾纏了數秒，才在勉強擺脫的情況下強行起腳，被門將輕鬆沒收。

“佢係知道遠射一定無機會入，寧願放手去搏一個仲有機會嘅做法……”雖然還能用理性的角度去析他的想法，但這種情境放在以往他肯定是會起腳看看能否換來一個角球。

「嗄……嗄……」全速跑上來準備想方法接應的數名隊友見狀都覺得不可思議，因為這樣的行動放在今村一彥的身上是一反常態的，但他們當然也沒說什麼，只是拍拍手表示激勵。

「……」蕭智堯扭頭朝球隊的另一名前鋒兒嶋覺看去，心道剛才他果然是打算回來幫忙，致使今村在前線苦無支援。

不過也正因如此，今村反倒有了單打獨鬥的空間。

這時今村突然向後方的舞木高舉了大姆指，表示他這記精準的長傳十分出色。

「好波啊今村！唔緊要再嚟過！」舞木也拍著手高喊回敬道，他知道這是目前最有效的進攻方式，即使這次攻勢沒能改寫比分，也足以讓場上的形勢有所改變。

最直觀的一點是，郡山神風的前場壓逼更為緊密了，這明顯是為了阻止舞木有長傳的空間，但同樣地群馬的中前場便有了更多的擺脫和調整空間，場上的整體壓力也因此有所紓緩。

「就完半場，準備一下。」杉田直人蹲在場邊，朝旁邊的助教說道。「等陣我哋要踢得再針對性少少。」

半場休息時，群馬的一眾球員無不氣喘吁吁，郡山神風那種不要命的踢法是他們此前未曾經歷過的，全場人盯人這種古舊的戰術反倒有種不知該怎麼對付的感覺，或者說是因為他們真的太快了。

快得能迅速地填補因為短傳組織出現的空間，不管是在前場還是後場。

「最可怕嘅係，佢哋嘅體能好似真係用唔完咁。」岡田健也喝著水，一臉擔憂地說道，像是害怕下半場還難以改善這種狀況。

這時鈴木卓搖了搖頭，朝對方的那些球員們看過去。

「無可否認，對方嘅體能狀況確實係十分出色。」他說道。「但我再講多次，傳控踢法對於體力嘅需求其實係更高嘅，所以一直以嚟嘅訓練餐單入邊，體能訓練係長期佔相當高嘅比重，你哋應該要對自己嘅體力抱有信心，要同郡山踢消耗戰都唔一定會處於下風。」

「但監督，我哋應該要點做去應付呢種全場人盯人戰術？」橘大輔問道。

「唔需要特別去改變踢法，就好似而家咁踢就得：盡量短傳配合，用撞牆去拉開空間同製造缺口，當對手有人跟甩嘅時候，陣形平衡就會被打破，咁佢哋就會需要更多嘅體力去補返呢個缺口－所以下半場對手嘅體能消耗會幾何級增大。」

「但我哋而家俾人逼到連擺脫都有少少……」岡田健也臉有難色地回答道。

「記住一樣嘢，對手係依靠速度嚟踢波嘅人，而速度愈快，反作用力就會愈大。」鈴木卓微笑著說道，但眾人似乎還是不太明白的樣子。「簡單嚟講，你哋要做多啲迷惑對手嘅嘢，去逼使佢哋頻繁咁停低再加速，而唔係畀位佢哋可以一直加速咁去纏住你。」

他邊說著邊拿出電話，在網上找了一條沙維在中場擺脫對手的影片，負責盯防他的是一名速度飛快的黑人，在影片中用幾近全速的姿態向沙維跑去，但該名中場大師在準備接球轉身時稍微做了一記假身，便直接將那名對手晃開了一段很遠的距離。

「睇到未？」鈴木卓將影片停了下來，那上面是沙維側過身將皮球推順，而另一側則是用全速壓逼失敗並逼使自己迅速想要急停的對手，兩者之間足有三四米的距離。「一個假動作，就可以將對手擺脫開咁遠嘅距離－原因就正正係因為對手嘅速度快。」

一眾球員看著那靜止的電話畫面，像是明白了什麼般虛晃著身驅，想要去快速地熟習這種感覺，既然知道速度快反而會將失敗時的距離拉得這麼大，心裡忽然覺得對手那飛快的速度好像沒那麼可怕了。

「雖然快速逼搶嗰陣唔一定會係全速跑，但你可以想像對手快速向你跑過嚟嘅時候係一道箭咀，你首先要將佢引導去某一邊，然後再作出相反方向嘅盤帶，咁樣就會令對手出現一個非常大嘅判斷代價，而且呢個代價係撲得愈快就愈大。」

「所以當呢種假動作做得愈多，對手嘅身心負擔就會愈大。」橘大輔茅塞頓開地說道。

「係，所以點解好似沙維咁嘅咁多著名中場球員，即使速度唔快，但都可以輕鬆咁喺中場踢出自己嘅節奏保護到皮球，就係因為佢哋識去擺弄對方嘅重心。」

蕭智堯不完全能聽懂鈴木卓的解釋，但他能清晰地聽到「箭咀」這個字詞，配合其手勢也大概能猜到意思，隨後便像突然想通了什麼般，知道自己剛才被長谷川緊逼時犯了什麼錯誤。

「阿蕭，」正思索間，今村一彥走了過來，一向沉默寡言的他竟罕見地主動開口。「等陣間你可以大膽啲傳畀我，就好似舞木咁，果斷啲直接畀，我會諗辦法配合你。」

「吓？哦……好，我都會諗辦法配合你嘅走位。」蕭智堯有點始料不及地點了點頭，並隨口應道。

「唔係，一直以嚟我同你嘅踢法都配合唔到，係因為我同你好多時候都搵唔到一條重合嘅傳球路線，」他斬釘截鐵般搖了搖頭。「下半場你可以大膽啲去傳，用你自己嘅意思去諗，唔使等我起跑或者有眼神接觸先畀－我會試下去理解你嘅思路。」

「但咁樣做你……你本身已經無對手跑得咁快，喺速度本身已經輸蝕嘅情況下會更加……」

「正如鈴木監督話齋，係迷惑。」今村一彥再次搖頭。


「作為球隊嘅頭號得分手，我需要令對手出現動搖嘅誘因。」
___________________________________

推

咁又一話

lee 話算長好多啦

場波仲耐過足球小將

好過兩句講完呀，人地真係有心寫足球。
唔係出兩招絕招就踢完，咁有咩意思

jeng但係重點係要有超高技術型中場例如小白，沙維先可以破人盯人。強如曼城，俾leeds人盯人都好難擺脫.

重點係除了蕭智堯，其他中場都係細路仔，何來咁好技術

條片有冇link想睇

條片我搵唔返添 幾年前睇過一次

其實兩邊都係細路仔 設定上群馬呢隊係踢開短傳 技術係比郡山好少少 不過正因為係細路容易手忙腳亂

咁又唔係隊隊都做到leeds咁癲嘅

樓主講到明對面體能好勁，10個簡迪咁feel

簫智堯只要甩開長谷川，郡山第二個去補位已經俾簫手術刀劏穿，之前已經試過幾次敵一動，簫即傳

人盯人喎，前面又冇走位靈活前鋒

其實我臨出呢話前就覺得應該喺呢場波之前講一講主角同今村點樣夾唔到 而家變到有少少突兀
Btw郡山呢套戰術基本上無補位呢個概念 自己甩嘅人自己死追返

追到live左

推

今晚有冇