一個A0毒L和O4女神的故事 (5)

538 回覆
158 Like 3 Dislike
2021-06-01 21:00:19
出住一部份先吖
2021-06-01 21:03:02
加油等緊good Tuesday night
2021-06-01 21:15:24
⋯⋯今晚有無先?
2021-06-01 21:15:48
慢慢啦,最緊要你滿意先出。
2021-06-01 21:52:51
加速
2021-06-01 22:27:54
推推推
2021-06-01 22:28:56
我仲未收工...希望收工有啦
2021-06-01 22:31:01
留名,Gogogo
2021-06-01 22:36:36
Lm
2021-06-01 22:40:00
樓豬 加油
2021-06-01 22:47:53
第七十七章 你對我實在太重要喇!

司機關上車門後,立即鬆開手掣,腳踏油門,巴士隨即離站。

阿康一邊將八達通放回褲袋,一邊走向樓梯,準備到上層尋找座位。

突然,司機急促煞車。幸好阿康有緊握扶手,並沒有人仰馬翻,但仍差點仆倒。

正當某些乘客想出口指責司機怎樣駕駛之際,司機已先發制人,開啟了車門,並連珠炮發地責罵截停巴士的人。

司機:「你老母想點呀,我離站你哋先咁樣衝出嚟截停我!有冇攪錯……」

當時有五至六個人衝向巴士車頭位置,截停巴士,希望巴士停下讓他們上車。

上車的乘客:「唔好意思,唔好意思……」

一行六人匆匆上車,以免繼續被司機責罵。

阿康沒有理會,繼續前往上層。正當他踏上樓梯之際,剛上車的其中一個乘客叫停了阿康。

「先生,你跌咗嘢呀!」

阿康回身一望,發現王婆婆送給他的御守丟在地上。

自從阿康問Athena拿回這個御守之後,他一直將王婆婆這件遺物跟身,上班也會帶著,通常會將它放在褲袋。可能剛才他放回八達通入褲袋的時候,遇上司機急促煞車,御守被弄跌在地上。

阿康:「唔該晒你!」

正當阿康彎下身子,準備拾回御守之際,司機又剛巧在這個時間開車。阿康的身體又晃一晃,放在另一邊褲袋的手機,也步御守後塵,跌在地上。

手機墮地時發出的響聲,令阿康立刻注意到。他隨即拾起手機,發覺螢幕已被跌爆,而且按任何掣也沒有反應。看來這一撞擊,令手機損毀不淺。

手機壞了,阿康不知如何是好。當時已經很晚,大部分手機店已經關門,他家裡又沒有後備手機。而且剛才臨上車前,公司那個客戶仍經WhatsApp不斷詢問他關於合約內容之事,況且那個客戶是一個頗為麻煩的人,遲一點回覆也會不高興。

於是,他決定折返公司。

當時巴士已在下一個站上客。這個是九龍灣的最後一個站,之後便會轉出龍翔道,直去黃大仙。阿康立刻按動下車鍵,司機及時於準備開車前,讓阿康成功下車。

**********

返回公司後,阿康立即找出該客戶的電話號碼,致電給他解釋合約的問題。二人足足傾談了超過半小時,才能解決雙方的分歧。

掛線之後,阿康感到疲累。他開啟電腦,打開九巴網頁,查看班次時間,發覺下一班車顯示「行車受阻」,沒有顯示到站時間。

霎時間想不到要做甚麼,阿康唯有打開Facebook,查看一下Athena最近的帖子和相片。他已有一段時間未見過Athena,而且Johnson今天又提及過Athena,所以,阿康現在特別想念她,不知她最近過得怎麼樣。

全靠Athena,公司新出的board game才能大賣。她幫了自己一個很大的忙,一定要好好答謝她。

阿康從抽屜找出一部後備手機,將sim卡放入卡槽,開啟手機。

當時,交通意外已經發生,Athena得知消息後,不斷打電話和傳送信息給阿康,但阿康的手機壞掉了,未能接收來電及信息。

開啟手機後,阿康收到數個留言通知,全是Athena的留言。他立刻聽回這些留言。

「阿康,你喺邊呀,你收到message就覆返我啦!」

「阿康,你做乜冇開電話呀?你唔好嚇我呀,你快啲打返俾我啦!」

「你做乜仲未開電話呀?你唔好有事呀!快啲覆返我啦!」

「鄧逸康,你唔好死呀,嗚……嗚……」

聽到這些留言後,嚇得阿康立即打電話給Athena。

當時,Athena仍未收到阿康任何消息,仍然憂心忡忡。

Esther︰「不如唔好等喇,我哋分頭去醫院搵啦,好冇!」

Athena︰「係,我唔應該坐喺呢度,我要去醫院。」

她們分配好誰人到哪一間醫院,正準備出門口之際,Athena電話響起。

她看見是阿康的來電,立刻接聽電話。

Athena︰「阿康呀,你係咪阿康呀?」

阿康:「係我呀,做咩事呀你?」

Athena︰「你個衰人,你做乜唔開電話呀?衰人嚟㗎,嗚嗚……」

阿康:「Athena,究竟發生咩事呀?」

Athena︰「你冇搭到你平時搭開嗰班33號巴士咩?」

阿康:「吓,我有呀,不過我上車嗰陣跌爆咗個電話,開唔到機,我咪臨時落返車,返公司處理埋啲公事先囉!」

Athena︰「你知唔知嗰班巴士出咗意外,死咗五個人呀!」

阿康:「吓,咁大獲!冇事,我冇事呀,我仲生勾勾喺度,唔使擔心喇!」

Athena︰「你知唔知道我有幾擔心你呀鄧逸康!」

阿康:「我知呀!」

阿康雖不在Athena面前,但他從對話當中,感受到Athena非常緊張自己,猶其這種接近生死邊緣的時刻,他更深切體會到,對方是何等的重要。從這一刻開始,阿康決心不在想起以前不如意的事,甚麼她仍記掛著前度,甚麼她跟前度接吻,對現在的阿康來說,已不再重要。

Athena︰「我想約你聽日出嚟見面,好唔好呀?」

阿康:「好!咁,不如一齊high tea啦!」

Athena︰「唔好,我想約你兩點鐘去你屋企樓下嗰間茶餐廳,好冇?」

阿康:「好!」

二人掛斷電話後,Athena才真真正正放下心頭大石。

Esther︰「都話阿康會冇事㗎啦!」

Chloe︰「無嘢喇依家,唔使擔心喇!」

Athena︰「係,頭先真係嚇死我!依家終於都冇嘢喇!」

Sophie︰「你做乜約佢去茶餐廳食飯呀?」

Athena︰「呢間茶餐廳,同我哋兩個有好大關係。我一定要揀呢度,同阿康重新開始!」

Athena記得阿康講過,屋邨茶餐廳和酒店餐廳是兩個不同的世界。她想讓阿康知道,這些根本不是一回事,她會接納阿康的喜好,接納他的出身,接納他的所有。

**********

翌日,阿康早了十分鐘到達茶餐廳,誰知Athena比她更早到。

他看見今天的Athena,跟往常見到的有很大分別。她穿著一條黃色的碎花連身裙,很有煥然一新的感覺。其實自從曼谷之行之後,就算一起拍拖的時候,阿康都未見過這個模樣的Athena。

Athena︰「嚟咗嗱!坐啦!」

當時Athena選擇坐在一卡位,阿康則坐在Athena的對面。

「西多士,熱奶茶!」

侍應端來了Athena剛才幫阿康點的西多士和熱奶茶。

Athena︰「我記得你最鍾意呢度嘅西多士同奶茶,所以自把自為幫你嗌咗喇,你O唔OK!」

阿康:「OK!」

Athena︰「你唔OK都要食㗎喇,都嗌咗咯,嘻嘻!」

Athena伸出舌頭,做出一個鬼臉。

這個Athena,是阿康一直以來最喜歡的那個模樣。穿著鮮色衫,垂下長髮,一副笑容滿面的樣子。不過,阿康想深一層,Athena是迎合自己的喜好而改穿她不喜歡的衣服,這樣並不恰當。

阿康:「Athena,雖然你今日呢身裝束真係好好睇,但好似唔係太啱嚟呢啲舊式茶餐廳。都話去high tea㗎啦!」

Athena︰「唔係吖,可能係有少少唔夾,但我冇再理其他人嘅目光嚕!同埋,我之前真係太執著喇,淨係限住自己要著咩色衫,其實我今日想著黃色就著黃色,聽日想著黑色就著黑色,根本就唔應該有規範。」

阿康覺得,這數個月來,Athena有很大轉變。他覺得Athena沒有了當初的模稜兩可,眼神比以前堅定。

阿康:「Athena,好多謝你呀!我知道你暗中幫咗我,我設計嗰隻board game先可以大賣!」

Athena︰「唔使多謝,都係一句說話者!相比起你以前為我做過嘅嘢,呢啲只係好小事。」

阿康:「喺我心目中唔小㗎喇!」

Athena拿出一個袋,放在桌上。

Athena︰「送俾你㗎!」

阿康:「吓,做乜無啦啦送嘢俾我?」

Athena︰「其實唔係我送,係有人託我送俾你。」

阿康從袋裡拿出一個盒子,發覺這是那隻限量版marvel figure。

阿康:「點解會係呢隻figure嘅?係邊個送俾我㗎?」

Athena︰「係鈴木san呀!」

Athena將這兩個月來所發生的事,包括摔壞了音樂盒,以及到北海道維修音樂盒的事,和阿康一一提起。

然後,她拿出了維修好的音樂盒,放在阿康面前。

Athena︰「我哋嘅感情,都可以好似呢個音樂盒咁,修復得到,你話係唔係?」

阿康望著Athena,看見她清徹而堅定的目光。

Athena︰「你打開個音樂盒,睇下有咩唔同!」

阿康根據Athena的意思,打開音樂盒,仍然是以前的那個模樣。不過,他發現積木的排序,和以前有些不同。

他立刻開啟手機,搜尋某些英文和數字的對照表,再與音樂盒上的積木做比對,發現Athena真的更改了積木的次序。

他扭動音樂盒的按鈕,發現音樂仍然是「默契」的副歌。

阿康:「Athena,你……」

Athena立刻捉緊阿康的手,並說出自己的心聲。

「一直以嚟,你都將我放喺你嘅第一位,拍拖嗰陣,所有嘢都好像以我為中心,我好似冇真正關心過你,在乎過你。」

Athena續說:「之後我做咗啲對唔住你嘅嘢,我真係好後悔,好後悔我冇一心一意咁對你。你講得冇錯,嗰張貼喺舊屋嘅合照、嗰一連串嘅密碼,同埋對深色衫嘅執著,就好似令到我一直都活喺佢嘅陰影之下。」

二人仍然互相對望著。阿康沒有插咀,讓Athena繼續說下去。

「你放心啦,張合照已經俾我撕爛,密碼已經改晒,任何顏色嘅衫我都會著。我已經同Thomas冇晒感覺,唔會再有可能同佢喺返埋一齊,因為依家我個心裡面,只有你嘅存在。」

阿康放開了Athena的手。

阿康:「喺我答覆你之前,你可唔可以跟我去一個地方?你應承我,你見到之後,你唔好嬲。」

Athena︰「你想帶我去邊呀!好啦,我跟你去啦!」
2021-06-01 22:48:32
(續)

二人離開茶餐廳,之後上了的士,目的地是一個私人屋苑。

阿康帶Athena來到他的新居門口,然後作狀緊張起來。

阿康:「陣間我開門之後,希望面前嘅畫面唔好嚇親你啦!」

Athena︰「你究竟想我嚟睇啲咩呀?」

Athena完全估不到阿康想讓她看甚麼。阿康的心思一向很容易估計,但在這個重要時刻,她完全理解不到,阿康會讓她看一個怎麼樣的場景,還是一個會令她發怒的場景!

阿康打開大門,Athena看到這是一個正在裝修的單位,進度大概已接近七八成。細心一看,這裡的裝修,有些似層相識。

阿康:「點解你見到呢間屋會冇感覺嘅?」

Athena再細心一看,發現這個單位的裝修,是她心目中dream house的模樣。

Athena︰「啊……點解會咁㗎?」

阿康:「呢間屋係我啱啱買㗎,你鍾唔鍾意呀?」

Athena︰「鍾……鍾意呀!」

她看到單位有一個露台,可以望到海景;客廳有兩個玻璃飾櫃,可以放置他們的音樂盒和figure;廚房是開放式,睡房的衣櫃亦非常巨大。整個色調都很溫暖,很有家的感覺,完全是Athena心目中的dream house模樣。

Athena完全想像不到眼前的畫面。明明是自己做錯了事,現在阿康沒有再怪責她之餘,還遵守了拍拖時許下的承諾,而且還提早兩三年實現了。想到這裡,Athena立刻流淚,心裡很感激阿康為她所做的事。

Athena︰「你係咪傻㗎!」

阿康立刻將Athena擁在懷裡。

阿康:「我根本忘記唔到你,你對我實在太重要喇!就算我買咗樓,打算自己一個人住,但我由買樓到裝修,我都一直喺度諗,如果你會同我一齊住喺呢度,究竟要點樣整,你先會住得開心舒服呢?我一直都好想好想,你會成為呢間屋嘅女主人!」

Athena︰「多謝你呀阿康,好多謝你!」

阿康立刻親吻Athena,二人擁作一團。

他們知道,今次的復合,二人的關係會更穩固,已經再沒有任何事情可以影響到他們……

**********

二人坐在露台的椅子上,Athena挨在阿康的肩膊上,欣賞眼前美麗的海景。

Athena拿出手機,向阿康展示一張相。

阿康:「嘩,做乜會俾你搵到嘅!」

Athena展示的,是音樂盒店的留言冊上,阿康留給Athena的情話。

Athena︰「哈哈,我都冇執輸,喺留言冊上面寫咗啲嘢俾你。」

阿康:「咁係咩呀?有冇影低?」

Athena︰「冇呀,想睇就自己飛去小樽睇啦!」

阿康:「我攪掂晒隻game啲嘢之後,我哋不如一齊去北海道旅行吖!順便去睇下你寫咗啲咩俾我!」

Athena︰「好呀!」

阿康再次與Athena相擁。

Athena︰「係喎,究竟點解你會有咁多錢,可以夠首期買到呢度?」

阿康:「係王婆婆。」

阿康將王婆婆擁有資產的事向Athena說起。

Athena︰「王婆婆係你嘅大恩人,仲要係我哋嘅紅娘!」

阿康:「仲有,琴晚我上車之後跌爛電話,都係因為我要執返起佢留俾我嘅御守而造成。如果冇佢呢個御守,我今日根本冇可能可以喺度同你一齊傾偈。」

Athena︰「佢用呢種形式,喺你身邊救咗你一命,仲係你嘅救命恩人呀!」

阿康拿著御守,彷彿王婆婆就在自己身邊,一直默默守候著他和Athena。

突然,一陣怪風迎面而來,阿康捉不穩手上的御守,被怪風吹走了。

阿康:「大獲!」

阿康想飛身拾回御守,但已來遲一步,御守被吹離露台位置。

幸好,御守並沒有直墮,而是飄到隔鄰的露台上。

Athena︰「做乜咁論盡㗎!好彩飛咗去隔離屋喳!」

阿康:「我哋過隔離屋襟鐘,睇下有冇人啦!順便認識下鄰居。」

正當二人從露台返回客廳時,隔鄰的住客打開露台門,步出露台。二人見到這個鄰居,不禁吃了一驚。

「Thomas!」

Thomas︰「咦,原來係你哋搬入嚟,唔係咁橋吓話!呢個御守係咪你哋跌咗過嚟㗎?我拎返過嚟俾你哋啦!」

阿康和Athena互相苦笑,但最終也變成大笑。他們相信,現在遇到任何困難,已不再重要,因為二人心裡只有對方,再沒有任何事情可以影響到他們。

<主故事完>

2021-06-01 22:49:20
2021-06-01 22:49:51
最後揀左一個最簡單平淡嘅結局
希望唔算太爛啦
多謝各位睇到最後
2021-06-01 22:52:51
臨瞓前睇到結局
係呢個荒謬嘅世界,平淡係一種幸福
多謝樓主最後都俾咗個好結局佢地
2021-06-01 22:55:27
多謝樓主呢個故陪咗我哋幾個月
2021-06-01 22:55:31
由開始追到最尾 多謝樓主
2021-06-01 22:59:14
多謝樓主
平淡是福的確唔錯
但係樓主你都係想搞鳩呀康架喇,去到最尾都比火車頭出翻黎
2021-06-01 22:59:30
樓主
2021-06-01 23:00:37
嘩!點解會係火車頭
咁另外早幾日撞到個條女呢
2021-06-01 23:01:03
2021-06-01 23:01:32
終於睇到美滿既結局 多謝樓主
2021-06-01 23:02:22
有啲空虛
因為故己完
2021-06-01 23:02:56
搞乜撚嘢呀個火車頭
2021-06-01 23:03:13
唉屌 追左咁耐
睇到最後個結局
我竟然即刻係諗到個三個英文字
已經番唔到轉頭了 無得救
但都多謝樓主寫好故
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台潮流台上班台財經台房屋台飲食台旅遊台學術台校園台汽車台音樂台創意台硬件台攝影台玩具台寵物台軟件台活動台電訊台直播台站務台成人台黑 洞