Q : "伊蘇8" 其實係乜鬼野GAME黎架?
A : ARPG, 故事係講主角亞特魯所乘坐既一艘巨大客船被神秘怪物襲擊,
遇上船難後漂流到被稱為 "永遠被咀咒" 既神秘孤島 "青蓮島",
為左逃離哩所被咀咒既孤島, 亞特魯聯同一群同樣遇上船難既漂流者,
一同探索孤島既秘密尋找脫離島嶼既方法......
Q : 伊蘇 "8" ?, 乜原來出到第八集架!? 直接玩第八集會唔會唔明隻GAME講乜架?
A : 雖然伊蘇係系列作, 但伊蘇8入面登場既舞台係與舊作毫無關連既全新地域,
登場人物差唔多九成九都係初次登場, 亦極少提及到舊作既事,
只要將主角亞特魯認識成係有豐富冒險經驗既冒險家就足夠
Q : 我見到有分 "PS4" 同 "VITA" 版喎, 有乜野分別架?
A : VITA版早於一年前就已經發售, 至於PS4版不單止將VITA版既缺點改善,
女主角丹娜關連劇情大幅增加, 丹娜更新增全新既戰鬥型態,
簡單黎講PS4就係完全版, 要買的話PS4版絕對係首選
Q : 我都係想先試下隻試玩版先決定買唔買
A : 試玩版有就係有既, 但PS4既試玩版完全表現唔出伊蘇8既魅力之處,
因為只係放出一個關卡畀人打, 只試到基本既戰鬥系統,
探索孤島嗰種冒險感完全表現唔出,
反而VITA版既試玩版比較顯現出伊蘇8既好玩之處,
係由序章至到第二章中段既長篇試玩版,
但目前只係得日本PSN先至有, 港服會唔會放出就唔清楚
Q : 新手開始玩應該玩咩難度好?
A : 未接觸過伊蘇系列又唔太擅長玩動作GAME的話,
建議由EASY或NORMAL開始, 認為自己係動作GAME高手的話,
就可以試下HARD或者NIGHTMARE, 至於最高難度INFERNO......
只推薦畀爆過NIGHTMARE既經驗者......
Q : 我想討論下隻GAME既劇情, 哩度係咪唔方便講?
A : 為左顧及到未玩過伊蘇8既玩家,
希望各位可以自律一下同劇情有關既討論盡可能唔好提及,
想搵個可以討論既地方我建議到哩個POST
https://lihkg.com/thread/238980/page/8