事源係早兩日有個friend話一個月前買咗$1000 dogecoin而家（0.7嗰陣）升咗十幾倍，咁小弟上youtube睇人話又上$1又剩，就狗衝咗，高低位（0.65/0.55/0.55）前後買咗三萬幾蚊。
然後琴日shib單野又聽人吹雞入埋淨返嗰$10000入去玩，一開始見3入見上到4冇走（因為聽人吹雞吹3-4倍）跟手即跌落24就開始淆，走咗，然後大家都知咩事，又浮浮沉沉玩下，結果都叫有贏返少少嘅，不過贏粒糖輸棟樓。
成條數計返兩日輸咗差唔多萬六蚊（>30%），小弟打麻將輸$200蚊都會唔開心一晚，到呢兩日碌卡入錢前後比人收成千蚊手續費嗰時眼都冇眨一下，明明知自己輸到瀨屎，但個心情又好平淡，個感覺好奇妙。
到而家已經進入咗一個唔回返本、贏返就唔諗住走，心底覺得有elon baba佢肯定升返，已經打定輸數可能成副身家輸曬，但又不停上網睇人分析建設心理防線嘅狀態。
雖然四萬幾蚊係咁多連登仔fg一個月糧都唔夠，而就算真係輸曬，小弟應該都唔諗住跳樓，最多出去返下part time搵返。自己都有底線唔會玩槓桿合約呢啲，亦唔會問人借錢賭，輸曬就算，希望呢一刻講完到時唔會連自己條底線都冇埋。
打緊呢篇文嘅時間elon baba又出tweet，啱啱0.51又走曬啲shib入多1000粒doge。去到呢度多謝你睇曬，上面啲投資用語我亦唔知用得啱唔啱，講出黎純粹有感而發，冇咩特別意思，亦預咗比人笑，如果有人安慰或者誠心比啲建議我嘅多謝定你先。
